Search
پنجابی
پنجابی
کورونا وائرس تے عالمگیر ڈاک سروس وچ رکاوٹ دے سببوں، اَسیں اپنی ’مُلوں بغیر چھاپی ہوئی کتاب دی سروس‘ نوں تھوڑے چِر لئی بند کر دے پئے آں۔
ایس صورتحال دے چانن وچ اسیں ایس ویلے تہانوں کتاباں گھلن دے قابل نئیں ہیگے آں۔
دُعا ہے پئی ایہہ وبائی بیماری چھیتی ای مُک جاوے تے ڈاک سروس کُھل جاوے۔

مسیحی ایمان اُتے عام سوالنامہ

مضمون 1: پانی تے رُوح نال نویں سریوں جمنا

1-24. یوحنا دے ذریعے دِتاجان والا توبہ دا بپتسمہ کیہ اے؟

یوحنا اصطباغی خُدا دا خادم سی جیہڑا یسوُع توں چھ مہینے پہلاں پیداہویا،جیہدے بارے پُرانے عہد نامہ دے آخری نبی ملاکی نے پیشن گوئی کیتی سی ۔
” تُسیں میرے بندہ موسیٰ دی شریعت یعنی ایہناں فرضاں  تے  حکماں   نُوں  جیہڑے میَں حورب اُتے سارے بنی اِسرائیل لئی فرمائےیاد رکھو۔ویکھو خُدا دے بزرگ تے خوفناک دِن دے آن توں پہلا ں میَں ایلیاہ نبی نُوں تُہاڈے کول گھلاں گا ۔ تے اوہ پیودادِل پُتر دے وَل تے پُتردادِل پیووَل مائل کرےگا۔ایس توں پہلاں پئی میَں آواں تے زمین نُوں لعنتی ٹھہراواں ۔ “  (ملاکی ۴:۴۔۶)۔
جد یسوُع پیدا ہویا اوس ویلے بنی اِسرائیل نے خُدادے عہد دے کلام نُوں چھڈدِتا  سی تے  اجنبی
دیوتیاں دی پرستش کیتی ۔اوہناں نے اَنہیاں تے عیب دار پسُواں دِیاں قربانیاں چڑھائیاں تےخُدادی ہیکل نُوں کاروباردی ٹھاربنالیاسی۔موسیٰ دی شریعت تے نبیاں دے صحیفیاں وِچ یسوُع مسیِح دے بارے وی پہلے دَسیاگیاسی ۔ شریعت اِنسان ذات نُوں پاپ دا عِلم بخش دی اے ، ایہہ واضح کردی اے پئی اوہ کِنے پاپی نیں (رومیوں ۳:۲۰)۔جوکُجھ شریعت دِیاں کتاباں وِچ لِکھیا اے اوہدے اِک وی حکم تے عمل نہ کرنا پاپ اے۔
پُرانے عہد نامہ وِچ ، اِک پاپی جیہڑا شریعت دی کِسے گل دی خلاف ورزی کردااوہ خیمہ  ء اجتماع دے سامنے پاپ دی قربانی چڑھاندا،تے اپنے پاپاں نُوں قربانی دے پسُو اُتے لدن لئی اپنا ہتھ پاپ دی قربانی دے پسُودےسراُتے رکھدا،تے معافی حاصل کرن تے خُدا نال دوبارہ میل کرن لئی پاپ دی قربانی نُوں ذبح کرداسی ۔فیر کاہن اوہدا کُجھ خون لےکے سوختنی قربانی دے مذبح دے سِنگاں اُتے لانداتے باقی ساراخون مذبح دی بنیاد اُتے ڈوہل دینداسی ۔
فیر وی ، بنی اِسرائیل ایہناں روزمرّہ دِیاں بے شمارقربانیاں توں نظر ہٹاکے اپنے سارے پاپاں توں مکتی حاصل نئیں کر سکدے سَن۔ایویں ، خُدا نے اوہناں لئی اِک پکاآئین بنایا یعنی یومِ کفارہ ۔ایہہ اوہ دَور سی جد خُدا ستویں مہینے دی دسویں تاریخ نُوں اوہناں دے سالانہ پاپ معاف کرداسی ۔اوس دِن ، سردارکاہن ،ہارون ،دوبکرے لینداتے دونواں بکریاں اُتے چِٹھیاں پاندا؛اِک خداوند لئی تے دُوجی چھڈے جان والے بکرے لئی ۔ فیرجِس بکرے اُتے خُداوند دے ناں دی چِٹھی نکل دی ہارون بنی اِسرائیل دےسارے سالانہ پاپ اوہدے اُتے لدن لئی اوہدے سِر اُتے ہتھ رکھدا۔ایہدے بعد ہارون اوس بکرے نُوں ذِبح کرداتے اوہداخون لےکے اوہنوں سَت واری رحمگاہ دے اُتے تے سامنے چھڑکدا۔
جداوہ پاک مقام لئی دِتے جان والے کفّارہ نُوں مکمل کرلینداتے اوہ دُوجی قربانی چڑھاندا۔ اوہ زندہ بکرے دے سِراُتے ہتھ رکھداتےاِسرائیل دے سارےسالانہ پاپاں دااوہدے اُتے اقرار کردا۔ ایس طریقے نال ،اوہناں دے سارے سالانہ پاپ اوہدے اُتے منتقل ہو جاندے ، تے ایہنوں کِسے مناسب شخص دےہتھ بیابان وِچ بھجوادِتا جاندا۔ایویں بنی اِسرائیل اپنے سالانہ پاپاں توں مکتی حاصل کردے سَن ۔
فیروی، پُرانے عہد نامہ دی شریعت دے مطابق چڑھائی جان والی  قربانی ، وَرہیاں  توں چڑھان والیاں نُوں کامل نئیں کرسکدی سی ۔ ایہہ شریعت صرف آن والیاں چنگیاں شیَواں  ( مسیِحا دے سچے کماں ) داپرچھاواں سی (عبرانیوں ۱۰:۱)۔بنی اِسرائیل نے یسوُع مسیِح ،مکتی داتا نُوں نہ اُڈیکیا۔ ایہدے توں اُلٹ اوہناں نے پاپ نال بھری دُنیا وِچ اجنبی معبوداں دی پوجا کیتی ،پُرانے عہد دے نبیاں دِیاں گلاں نُوں چھڈدِتا ۔
ایویں ، خُدا نے پہلاں توں دَسیا پئی اوہ اِسرائیل دے لوکاں دے دِلاں نُوں بحال کرن تے ، اوہناں نُوں اپنے وَل لیان لئی،اوہ اوہناں دے دِلاں نُوں تیارکرن لئی یوحنااصطباغی نُوں گھلے تاں پئی اوہ یسوُع مسیِح نُوں قبول کرن لین ۔ ایس توں پہلاں پئی یوحنا اصطباغی یسوُع نُوں بپتسمہ دیندا ،اوہنے یہودیہ دے بیابان وِچ بنی اِسرائیل نُوں توبہ دا بپتسمہ دِتا۔
اوہدااوہناں نُوں پانی دا بپتسمہ دین دامقصد ایہہ سی پئی اوہ یسوُع اُتے ایمان لیان تے اوہنوں اُڈیکن وِچ اوہناں دی اَگوائی کرے ۔ اوہنے اوہناں نُوں سکھایا پئی مکتی داتا اوہدے کولوں بپتسمہ لوے گایعنی دُنیا دے پاپ چُکن لئی ہتھ رکھے جان دے طریقے نال ،تےفیر اوہناں نُوں اوہناں دے سارے پاپاں توں بچان لئی صلیب اُتے قربان ہووے گا ۔ اوہنے آکھیا پئی یسوُع  آئےگاتے نامکمل قربانیاں نُوں دُورکرےگاتےاپنے بدن نال ابدی قربانی پیش کرےگا :اوہ بپتسمہ دے ذریعے ساڈے سارے پاپ چُک لوےگا ،جِویں بنی اِسرائیل پاپ دی بے عیب قربانی چڑھان دے سبب ،اوہدے اُتے ہتھ رکھن تے پُرانے عہد نامہ دے اندرقربانیاں دے نظام دے مطابق اوہنوں ذِبح کرن دے راہیں مکتی حاصل کرسکدے سَن ۔
بوہت سارے اِسرائیلی لوکاں نے اپنے پاپاں دا اِقرار کیتا، توبہ  کیتی ، تے  اوہدے  کولوں  بپتسمہ
لیا۔ ” توبہ“  توں مُراد  ” اپنے ذہن نُوں خُداوَل پھیرنا “ ایں ۔ اوہ لوک یوحنا کول آئے تے پُرانے عہد نامہ دی شریعت نُوں یاد رکھدے ہویاں اوہناں نے اِقرار کیتا پئی اوہ بے آس پاپی سَن جیہڑے بچ نئیں  سکدے سَن سگوں مرن دے دِن تیک صرف پاپ کردے رہن گے ۔ اوہناں نے ایہہ وی اِقرار کیتا پئی اوہ شریعت دے مطابق کیتی جان والی نیکیاں نال اَسمان دے  بادشاہی  وِچ  داخل نئیں  ہو  سکدے سَن ، تے اوہناں نے اپنے ذہناں نُوں یسوُع مسیِح وَل پھیریا،جیہڑا اِکو ای وارتے ہمیش لئی ، اَسمان  دی  بادشاہی   دا  بوہا کھول دے ہویاں اوہناں دے پاپ دُور کردیوے گا۔
یوحنا اصطباغی نے بنی اِسرائیل نُوں جیہڑا بپتسمہ دِتا اوہ تھلے لِکھیا ہویا سی ۔ اوہ اوہناں کولوں ایہہ اِقرار کرانداسی پئی اوہناں نے اپنی جندڑیاں وِچ کِنّے بوہتے پاپ کیتے ، توبہ کرن تے یسوُع مسیِح دی راہ ویکھن ،جیہڑااوہدے ،یعنی سردارکاہن تے اِنسان ذات دے نمائند ہ کولوں ،اوہناں دی طرحاں بپتسمہ لوےگا تےاوہناں نُوں اوہناں دے سارے پاپاں توں بچان لئی مصلُوب ہوجاوےگا۔ایہہ بائبل مقدّس  دےمطابق  سچی توبہ اے۔
ایویں، یوحنا نے لوکاں دے سامنے اِعلان کیتا ، ” میَں تے تُہانُوں توبہ لئی پانی نال بپتسمہ دیندا آں پر جیہڑا میرے بعدوں آؤندااے اوہ میرے نالوں زوروالااے ۔میَں اوہدیاں جُتیاں چُکن دے لائق نئیں۔ اوہ تُہانُوں رُوح القدّس تے اَگ نال بپتسمہ دیوے گا۔ “ (متی ۳:۱۱)۔
یوحنا اصطباغی نے لوکاں دے ذہناں نُوں یسوُع وَل پھیریا ، اوہناں دے سامنے گواہی دِتی پئی یسوُع دُنیا دے پاپ سارےچُک لے جاوےگا(یوحنا ۱:۲۹)تے اوہناں لئی عِوضی دے طورتے مرےگا ۔ ایویں یسوُع نے خُود گواہی دِتی پئی یوحنا سانُوں راستبازی دی راہ وکھان لئی آیا(متی ۲۱:۳۲)۔