مضمون 3: پانی تے رُوح دی خوشخبری
[3-2] یسوُع دابپتسمہ تے پاپاں داکفارہ <متی ۳ : ۱۳ ۔ ۱۷>
<متی ۳ : ۱۳ ۔ ۱۷>
”اوس ویلےیسوُع گلیل توں یردن دے کنارے یوحنا کول اوہدے کولوں بپتسمہ لین لئی آیا۔پریوحنا ایہہ آکھ کے اوہنوں منع کرن لگا پئی میَں آپ تیرے کولوں بپتسمہ لین دا محتاج آں تےتُوں میرے کول آیا ایں ؟یسوع نیں جواب وچ اوہنوں آکھیا ہُن تُوں ہون ای دے کیوں جے سانُوں ایسے طرحاں ساری راستبازی پوری کرنا مناسب اے۔ ایہدے تےاوہنے ہون دِتا۔تے یسوُع بپتسمہ لےکے اوسے ویلے پانی دے اُتے آیا تے ویکھو اوہدے لئی اَسمان کھُل گیا تے اوہنے خُدادے رُوح نُوں کبوتر دی شکل وِچ اُتردیاں تے اَپنےاُتےآندیاں ویکھیا۔تےویکھو اَسمان توں ایہہ آواز آئی پئی ایہہ میرا سوہنا پُتراے جیہدے تو ں میَں خوش آں۔“
کیہ کوئی اجیہاشخص ہے جیہڑا ہُن وی پاپ توں دُکھی ہُندااے؟
کیہ ساڈاپاپ دابندھن مُک گیااے؟
آہو
ساڈے خُداوند خُدا نیں سارے لوکاں دِیاں پاپاں دِیا ں زنجیراں نُوں کٹ دِتا اے ۔اوہ سارے لوک جیہڑےپاپ دے سبب دُکھ اُٹھاندے نیں، پاپ دے نوکر نیں ،اَپنی مکتی دے سبب ساڈے خُداوند نیں اوہناں نُوں بالکل کٹ دِتااے ۔اوہنے ساڈے سارے پاپ مٹادِتے۔ کیہ ہُن وی کوئی اجیہا شخص اے جیہڑاپاپ توں دُکھی ہُندااے؟
سانُوں سمجھنا پئےگاپئی پاپ دے خلاف ساڈی جنگ مُک گئی اے۔ اَسیں پاپ دے سبب فیر
کدی دُکھ نہیں جھلاں گے۔ساڈی پاپ دی قیداوسے ویلے مُک گئی جدوں یسوُع نے سانُوں اَپنے بپتسمہ تے خون نال مکتی بخشی ۔ساڈے سارے پاپ بالکل ختم ہوگئے نیں۔ خُدانیں ،یسوُع دے راہیں سارے پاپاں دی قیمت اداکردِتی تے اوہنےسانُوں ہمیش لئی رہاکردِتا ۔
کیہ تُہانوں پتہ اےپئی لوک کِنّےبوہتےاَپنے پاپاں دے سبب دُکھ اُٹھاندےنیں؟ ایہداشروع آدم تے حوادےویلےتوں ہویا۔یعنی اِنسانی پیڑھی نُوں پاپ توں دُکھ پاؤنا، آدم کولوں میراث وِچ ملیا۔
پرساڈے خُدانیں اِک عہد بنھیاجیہڑاپیدائش ۳ : ۱۵وِچ لِکھیاہویااے،تےاوہ عہد ایہہ سی پئی اوہ سارے پاپیاں نُوں رہائی بخشےگا ۔ اوہنے فرمایاپئی لوک پانی تے رُوح دے سبب یسوُع دی قربانی دے راہیں اَپنےپاپاں توں رہائی پاؤن گے ۔جدوں ویلاآیا ،اوہنے ساڈے مکتی داتا،یسوُع نُوں بھیجیاپئی ساڈے وِچکارحیاتی بسرکرے۔
اوہنے ایہہ وعدہ وی کیتاپئی اوہ یوحنا اصطباغی نُوں یسوُع دے اَگے اَگے گھلے گا،تےاوہ اَپنے عہد اُتے قائم رہیا۔
مرقس ۱ : ۱۔۸ بیان کردااے ، ” یسوُع مسیِح خُدادے پُتردی خوشخبری دا شروع ۔جِویں یسعیاہ نبی دی کتاب وِچ لِکھیااے پئی ویکھ میَں اَپناپیغمبرتیرے اَگے گھلدواں جیہڑاتیری راہ تیارکرےگا۔بیابان وِچ پکارن والے دی آواز آندی اے پئی خُداونددی راہ تیارکرو۔ اوہدی راہ سدھی کرو۔ یوحناآیاتےبیابان وِچ بپتسمہ دینداتے پاپاں دی معافی لئی توبہ دے بپتسمہ دی منادی کرداسی ۔تےیہودیہ دے ملک دے سارے لوک تے یروشلم دے سارے رہن والے نکل کے اوہدے کول گئے تے اوہناں نیں اَپنے پاپاں دا اِقرارکرکے دریائے یردن وِچ اوہدے کولوں بپتسمہ لیا۔ تے یوحنا اونٹھ دے والاں دے لیِڑے پاؤندا تے چمڑے دا پٹکا اَپنے لک اُتے بنھی رکھداسی تے ٹِڈیاں تے جنگلی شہدکھانداسی ۔تے ایہہ منادی کرداسی پئی میرے بعدوں اوہ بندہ آن والااے جیہڑامیرے توں بوہتا زوروالا اے ۔میَں ایس لائق نہیں پئی جُھک کے اوہدی جُتیاں دا تسمہ کھولاں ۔ میَں تُہانُوں پانی نال بپتسمہ دِتاپر اوہ تُہانُوں رُوح القدّس نال بپتسمہ دیوےگا ۔“
یوحنا اصطباغی،گواہ تے خوشخبری نُوں پہلاں پیش کرن والا
یوحنا اصطباغی کون ایں؟
آخری سردارکاہن تے اِنسان ذات دانمائندہ
یونانی زبان وِچ،’βάπτισμα báptisma ‘دا خاص خاص مطلب ،’پانی وِچ ڈبونا‘اے،ایس لئی ایہہ لفظ دھون ،دفن کرن،غوطہ دین ،یا واری واری لدن اُتے وی عائد ہوندااے ۔ جدوں یسوُع نے بپتسمہ لیاتے خُدادی راستبازی پوری ہوگئی ۔یونانی زبان وِچ لفظ’راستبازی‘ “Δικαίωση ( dikaiosune)”اے ۔جیہد ا مطلب ’بالکل ٹھیک‘ اےتے ایہدامطلب ’بوہت مناسب‘ ’حدوں دُونا معقول ‘ یاں ’سب توں بوہتی چنگی حالت‘ وی اے۔
یسوع نیں ایس لئی بپتسمہ لیا سی پئی بوہت درُست تے مناسب طریقےنال مکتی داتابن سکے ۔ ایس لئی جیہڑے لوک یسوُع دے بپتسمہ تے صلیب اُتے ایمان رکھدےنیں اوہناں نُوں مخلصی دی بخشش خُدادی طرفوں حاصل ہوندی اے۔
نویں عہدنامہ وِچ یوحنا اصطباغی پُرانے عہد نامہ داآخری سردارکاہن ایں ۔ آؤمتی ۱۱ : ۱۰۔۱۱ اُتےغورکریے ۔ کلامِ مقدّس فرماؤندااے پئی یوحنا اصطباغی ساری اِنسانی پیڑھی دانمائندہ اے،تےنویں عہدنامہ دےسردارکاہن دےطورتے؛اوہنے سارے پاپ یسوع اُتے لددِتے؛اِنج نویں عہدنامہ دےسردارکاہن دی خدمت انجام دِتی ۔
یسوُع نیں خودیوحنادی گواہی دِتی ۔اوہنےمتی ۱۱ : ۱۳۔۱۴وِچ آکھیا ، ” کیوں جے سبھے نبیاں تے توریت نیں یوحناتیک نبُوّت کیتی ۔چاہندےاوتےمن لوو۔ایلیاہ جیہڑا آن والا سی ایہوای اے ۔“ ایویں، یوحنا اصطباغی جِنہے یسوُع نُوں بپتسمہ دِتا ،اوہ سردارکاہن ہارون دی نسل تے نالے آخری سردارکاہن سی ۔ بائبل مقدّس پُرانے عہدنامہ وِچ یوحنادے ہارون دی نسل وچوں ہون دی گواہی وی دیندی اے (لوقا ۱ : ۵، ۱۔تواریخ ٢۴ : ۱۰)۔
فیریوحنا کیوں بیابان وِچ کَلّا اونٹھ دے والاں دے بانےپائی رکھداسی ؟ایہدے توں سردار کاہن
دی خدمت مرادسی ۔ساری اِنسانی پیڑھی دے نمائندہ دےطورتے،یوحنا اصطباغی ،لوکاں دے وِچ نئیں رہ سکداسی ۔ پر،اوہنے لوکاں نُوں پکارکے آکھیا ، ” توبہ کرو،اَے سَپ دے بچیو! “تے اوہناں نُوں توبہ دے موافق پھل لیان لئی بپتسمہ دِتا جیہدے نال لوک یسوُع وِل پرتے،جیہڑااوہناں دے سارے پاپ دُورکرسکداسی ۔ یوحنابپتسمہ دین والےنیں ساڈی مکتی لئی دُنیا دے سارے پاپ یسوُع اُتےلددِتے جدوں اوہنےیسوُع دے سراُتے اَپنےہتھ رکھے ۔
دُو قِسماں دے بپتسمے
کیوں یوحنا اصطباغی نیں لوکاں نُوں بپتسمہ دِتا ؟
لوکاں نُوں اوہناں دے سارےپاپاں توں توبہ کرن وِچ اَگوائی لئی تے مکتی لئی یسوُع دے بپتسمہ اُتے ایمان رکھن لئی
یوحنا اصطباغی نیں پہلاں لوکاں نُوں تے فیر یسوُع نُوں بپتسمہ دِتا ۔پہلاں ،’ توبہ دا بپتسمہ‘ سی جِنہے پاپیاں نُوں خُداوَل پرتن دی دعوت دِتی ۔بوہت لوکاں نیں یوحناکولوں خُداداکلام سُن کے اَپنے بُتاں نُوں چھڈدِتاتےواحدخُداوَل پرت پئے ۔
دُوجابپتسمہ یسوُع دابپتسمہ اے، ایہو جیہابپتسمہ جِنہے دُنیادےسارے پاپ یسوُع اُتے لددِتے۔ یوحنا اصطباغی نیں خُدادی راستبازی نُوں پوراکرن لئی یسوُع نُوں بپتسمہ دِتا ۔ دُوجے لفظاں وِچ،یوحنا بپتسمہ دین والے نیں یسوُع نُوں ایس لئی بپتسمہ دِتاتاں پئی سارےلوک اَپنے پاپاں توں بچ جان۔ (متی ۳ : ۱۵)۔
یوحنا دایسوُع نُوں بپتسمہ دیناکیوں ضروری سی ؟دُنیاداپاپ مٹان لئی ،خُدانُوں یسوُع اُتے سارے پاپ لدن لئی یوحنانُوں اِجازت دینی سی تاں پئی جیہڑے لوک یسوُع اُتے ایمان رکھن اوہ مکتی حاصل کرسکن۔
یوحنا اصطباغی خُداداایہو جیہاخادم سی جیہداکم بپتسمہ دے راہیں سارے پاپ یسوُع اُتے منتقل کرنا سی ، تے ساری اِنسانی پیڑھی دے توبہ کرن دے سلسلے وِچ یسوُع دی گواہی دینی سی تے مکتی تے ایمان رکھن دے راہیں اَپنےپاپاں توں دُھل جاناسی ۔ایس لئی یوحنا نُوں بیابان وِچ کَلّے رہناپیا۔ یوحنا اصطباغی دے دَور وِچ اِسرائیل دے سارے لوک بدکاری داشکارسن تے ٹِڈھ دیاں ڈونگھیائیا ں تیک تباہ ہوچکے سَن ۔
ایس لئی خُدانیں پُرانے عہدنامہ وِچ ملاکی ۴ : ۵ ۔ ۶ وِچ فرمایا ، ” ویکھو خُدادے بزرگ تے خوفناک دِن دے آؤن توں پہلاں میَں ایلیاہ نبی نُوں تہاڈے کول گھلاں گا۔تے اوہ پیودا دِل پُتروَل تے پُتردادِل پیووَل لیاوے گا ۔ایس توں پہلا ں پئی میَں آواں تےزمین نُوں لعنتی ٹھہراواں ۔“
خُدادی نظر وِچ ،اِسرائیل دے سارے لوک جیہڑےپہلوں یہوواہ دی عبادت کردے سَن ،بدکار سَن ۔کوئی اوہدےحضُوروِچ راستبازنہیں سی ۔مثال دےطورتےہیکل دے دھرمی آگُو جِنہاں وِچ کاہن ،فقیہ تے شرع دے عالم شامل سَن ،دِل دی خاص ڈونگھیائی تیک بھیڑے سَن ۔ اِسرائیلی تے کاہن خُدادی شریعت دے مطابق قربانی نئیں چڑھاندےسَن ۔
کاہناں نیں قربانی دے پسُو اُتے ہتھ رکھن تےخون دی قربانی چڑھان دی رسم نُوں چھڈ دِتاسی ۔جیہڑی خُدااوہناں نُوں اوہنے دےپاپاں دے فدیےلئی دے چُکیاسی ۔ ایہہ گل درج ہےپئی ملاکی دےدَوردے کاہن قربانی چڑھان ،ہتھ رکھن تے خون پیش کرن دی رسم نُوں چھڈچُکےسَن ۔
ایس لئی ، یوحنا اصطباغی اوہناں دے نال نہیں رہ سکداسی ۔ اوہ بیابان وِچ جاکے پکاریا۔ اوہنے کیہ آکھیا؟یسعیاہ نبی دے الفاظ مرقس ۱ : ٢ ۔ ۳ وِچ لکھے نیں ،”ویکھ میَں اَپنا پیغمبر تیرے اَگے گھلداواں جیہڑاتیری راہ تیارکرےگا ۔بیابان وِچ پکارن والےدی آوازآندی اے پئی خُداوند دی راہ تیارکرو۔اوہدی راہ سدھی کرو۔“
بیابان دی آواز نیں لوکاں نُوں پکارکے توبہ دے بپتسمہ دی دعوت دِتی ۔ ’ توبہ دا بپتسمہ ‘ کیہ اےجِیہدے بارے بائبل مقدّس بیان کردی اے ؟ایہہ اوہ بپتسمہ اے جِیہدے لئی یوحنا اصطباغی پکاریا؛لوکاں نُوں واپس لیان دابپتسمہ پئی اوہ یسوُع اُتے جیہڑا ایہناں دے سارے پاپ چُک لئےگا،ایمان لیاکےمکتی حاصل کرن ۔توبہ دا بپتسمہ مکتی تیک اوہناں دی اَگوائی کرن لئی سی ۔
” توبہ کروتے بپتسمہ لوو۔یسوُع ساڈے مکتی داتا نُوں وی ساڈے سارے پاپ چُکن لئی ایسے طرحاں بپتسمہ لیناپوےگا ۔“ یوحنا اصطباغی دی پکار ایہہ سی پئی یسوُع دُنیا دے سارے پاپ چُکےگا،سارے لوکاں دی مکتی دی خاطر صلیب اُتے سزاجھلےگا،تاں پئی اوہ فیر خُدادے کول آسکن ۔
” میَں تےتُہانوں پانی نال بپتسمہ دِتاپراوہ تُہانوں رُوح القدّس نال بپتسمہ دیوے گا ۔ “
)مرقس۱:۸) ’ اوہ تُہانوں رُوح القدّس نال بپتسمہ دیوےگا ‘ ایس نوِشتےدا مطلب سارے پاپ دھونا ایں۔ بپتسمہ دا مطلب اے ’دھونا ‘یردن وِچ یسوُع دا بپتسمہ سانُوں دَسدا اے پئی خُدادےپُترنُوں ایویں بپتسمہ دِتاگیاتے اوہنے سانُوں بچان لئی ساڈےسارے پاپ اَپنے اُتے لے لئے۔
ایس لئی ،سانُوں اَپنے پاپاں دیاں زندگیاں توں پِھرکےاوہدے اُتےایمان لیاؤناایں۔ اوہ اجیہابَرّہ اے جِنہے سارے اِنساناں دے پاپ چُک لئے ۔ایہہ اوہ مکتی دی خوشخبری اے جیہدی یوحنا اصطباغی نیں گواہی دِتی ۔
پاپاں دے کفارہ لئی سردارکاہن داکم
مکتی دی راہ کِنّے تیارکیتی؟
یوحنا اصطباغی نیں
یسعیاہ نبی نیں پیشنگوئی کیتی سی ، ” یروشلم نُوں دلاسہ دیووتے اوہنوں پکارے آکھو پئی اوہدی مصیبت دے دِن جیہڑے جنگ تے اوکھائی دے سَن لنگھ گئے۔اوہدے پاپاں دا کفّارہ ہویا تے اوہنے خُدادے ہتھوں اَپنے سارے پاپاں دابدلہ دُگنا پایا۔“(یسعیاہ ۴۰:۲)
یسوُع مسیِح نیں تُہاڈے ،میرے تے ہراِک دے پاپ اَڈکسے بہانے توں چُک لئے؛ موروثی پاپ،موجودہ پاپ ایتھوں تیک پئی مستقبل دے پاپ وی ، اوہدے بپتسمہ دے راہیں دُھل گئے ۔اوہنے سانُو ں سب نُوں مکتی بخشی ۔سانُوں ساریاں نُوں خُدادی مخلصی دے بارےجانناچاہی دااے ۔
اَپنے پاپاں توں مکتی حاصل کرن لئی ،سانوں لازمی طورتےخوشخبری اُتے ایمان لیاناچاہی دااے جیہڑی بیان کردی اے پئی یوحنا اصطباغی نیں بپتسمہ دے طریقے نال یسوُع اُ تے سارے پاپ لددِتے سی ۔
سانوں ایہہ سوچ کے اُلجھن دا شکار نہیں ہونا چاہی دا، ” کیوں جے خُدامحبت اے،ایس لئی اَسیں صرف یسوُع اُتے ایمان رکھن دے راہیں اَسمان وِچ داخل ہوسکدے آں ،بھانویں ساڈے دِلاں وِچ پاپ موجودہووے۔“
اَپنے سارے پاپاں توں مکتی حاصل کرن لئی سانُوں اوہدے بپتسمہ تے صلیب اُتے بھروسہ کرنا ایں ، جیہدے راہیں یوحنا اصطباغی نیں دُنیادےسارے پاپ یسوُع اُتے لد دِتے ۔ ایہہ’ پانی ‘ دے راہیں سی پئی یوحنا اصطباغی نیں دُنیادےسارے پاپ یسوُع اُ تے لد دِتے ۔
سانوں بچان لئی خُدانیں پہلاں کم ایہہ کیتاپئی یوحنا اصطباغی نُوں دُنیا وچ گھلیا۔خُدادا پیامبر ، یوحنا اصطباغی بادشاہ دے ایلچی دےطورتےگھلیاگیا ،جِنہے دُنیا دے سارے پاپ بپتسمہ دے راہیں یسوُع اُتے
لد دِتے ۔اوہنے ساری اِنسانی پیڑھی لئی شاہی سردارکاہن دی خدمت انجام دِتی ۔
خُدانیں سانوں دَسیا پئی اوہنے اَپنے پیامبر یوحنا اصطباغی نُوں ساڈےکول گھلیا۔ ” ویکھ میَں اَپناپیغمبر تیرے اَگے گھلداواں ۔“ تیرے اَگےدامطلب یسوُع دے اَگےہے۔ کیوں خُدانیں یسوُع توں پہلاں یوحنانُوں گھلیا؟ایہہ بپتسمہ دے راہیں دُنیادےسارے پاپاں نُوں یسوُع ،خُدادے پُتر،اُتے لدناسی ،جیہڑا تیرے اَگے” تیری راہ تیارکرےگا ۔“ ایس حوالے دا اصل وِچ کیہ مطلب اے ۔
اوہ کون سی جِنہے ساڈ ی راہ تیارکیتی تاں پئی اَسیں مکتی حاصل کرکےاَسمان اُتےجاسکیے؟ یوحنا اصطباغی ’ تیرے ‘ دامطلب یسوُع تے ’ اَپنے ‘ توں مطلب خُداخود اے ۔ ایس لئی جدوں اوہنے آکھیا، ” ویکھ میَں اَپناپیغمبر تیرے اَگے گھلداواں جیہڑاتیری راہ تیارکرے گا “ ایہداکیہ مطلب اے؟
کِنہےساڈی راہ تیارکرنی ایں تاں پئی اَسیں اَسمان تے جاسکیے ؟یوحنا اصطباغی نیں ساڈے سارے پاپ یسوُع اُتے لد دِتے تاں پئی اَسیں ایمان لیاسکیے پئی اوہنے اوہناں سب نُوں دھودِتا؛اوہداکم یسوُع مسیِح نُوں بپتسمہ دین دے راہیں اوہدے اُتےپاپ لدناسی ۔ایہہ یسوُع تے یوحنا سَن جِنہاں نیں ساڈے لئی سچائی نُوں جانناتےمکتی حاصل کرناممکن بنایا۔
ساڈی مکتی دا انحصار کس گل اُتے اے ؟ایہدا انحصار ایس گل اُتے ہےپئی اَسیں یسوُع ،خُدا دے پُتر دے سچےکماں تےایس سچیائی اُتے ایمان رکھدے آں پئی خُدادے پیغمبر یوحنا اصطباغی نیں دُنیادےسارے پاپ اوہدے اُتے لددِتے۔سانُوں ساریاں نُوں معافی دی خوشخبری نُوں جانناچاہی دااے ۔ خُداباپ نیں اَپنے پیغمبرنُوں اَگےگھلیاجِنہےاوہدے پُتر نُوں بپتسمہ دِتا۔تےاوہنوں سارے اِنساناں دانمائندہ بنایا۔ایویں ،اوہنےساڈے لئی مکتی دے کم نُوں پوراکیتا۔
خُدانیں یوحنا اصطباغی اَپنے خادم نُوں بھیجیاپئی اوہدےپُترنُوں بپتسمہ دیوے تاں پئی یوحنا اصطباغی اوہناں سبھناں لئی مکتی دی راہ تیارکرسکے جیہڑے یسوُع اُتے ایمان رکھدے سَن۔ یسوع دے بپتسمہ لین دی ایہووجہ سی ۔یوحنا اصطباغی دے راہیں یسوُع دابپتسمہ مکتی دی تکمیل سی جیہدے سبب لوکاں دےسارےپاپ یسوُع اُتے لددِتےگئے تاں پئی سارے لوک یسوع اُتے ایمان لیاکےاَسمان اُتےجاسکن ۔ ایتھوں تیک پئی لوکاں دے مستقبل دے پاپ وی یسوُع دے بپتسمہ دے راہیں اوہدے اُتے لد دِتے گئے۔یسوُع تے یوحنا اصطباغی نیں رَل کے ساڈے سبھناں لئی اَسمان دی راہ تیار کیتی ۔اِنج ،خُدانیں یوحنا اصطباغی دے راہیں مکتی دے بھیت نوں ظاہر کیتا ۔
اِنسان ذات دے نمائندہ دےطورتے ،یوحنا اصطباغی نیں یسوُع نُوں بپتسمہ دِتاتاں پئی اَسیں اَپنی مخلصی اُتے ایمان لیاکے اَسمان اُتےجاسکیے ۔اوہنے بپتسمہ دے راہیں یسوُع اُتے ساڈے سارے پاپ لددِتے۔ایہہ مکتی ،خوشخبری دی انتہائی خوشی بھری خبراے۔
یوحنا اصطباغی کیوں پیداہویاسی؟
کیہدے راہیں اَسیں یسوُع اُتے ایمان رکھ سکدے آں؟
یوحنا اصطباغی دے راہیں
ملاکی۳ : ۱ وِچ،ایہہ لکھیا اے، ” ویکھو میَں اَپنے رسول نُوں گھلاں گا تے اوہ میرے اَگے راہ ٹھیک کرےگا ۔“ تُہانوں بائبل مقدّس دابڑے غورنال مطالعہ کرنا چاہی دااے۔خُدا نیں یسوُع دےاَگے کیوں اَپنے پیغمبر نُوں گھلیا ؟یوحنا اصطباغی کیوں یسوُع توں ۶ مہینے پہلاں پیداہویاسی ؟
سانُوں ایہہ سمجھنا چاہی دااے پئی بائبل مقدّس دا خلاصہ کیہ اے ؟پُراناعہدنامہ سردار کاہن ہارون دی خدمت نُوں بیان کردااے ۔ ہارون موسیٰ داوڈابھائی سی ۔خُدا نے ایہنوں تے ایہدے پُتراں نُوں کاہناں دےطورتے مسَح کیتا۔ دُوجے لاویاں نیں ایہناں دے تھلے خدمت کیتی ،اوہ ایہناں دے کول اِکو جیہے بھانڈے لیاندےسَن،روٹیاں لئی آٹا گُہُن دے تے بوہت ایسے طرحاں دے کم کردیندے سن،جدپئی ہارون دے پُترپاک خیمہ ء اجتماع دے اندر قربانی چڑھاندےسن ۔
ہارون دے پُتراوہناں دے وچکاربرابرخدمت ونڈن لئی مسَح سَن ،پریومِ کفارہ اُتے جیہڑا ستویں
مہینے دی دسویں تاریخ نُوں ہونداسی ۔سردارکاہن کَلّا اپنے لوکاں دے سالانہ پاپاں دی قربانی چڑھانداسی ۔
لوقا۱ : ۵وِچ یوحنا اصطباغی دی پیڑھی پائی جاندی اے ۔سانُوں یسوُع نُوں ٹھیک طور تے جانن لئی خُدادے ایس پیغمبر نُوں ٹھیک طورتےسمجھنا ہووےگا ۔ اَسیں یسوُع دے بارے تے بوہت سوچ دے آں پریوحنا اصطباغی نُوں بوہت زیادہ پراں سُٹ دے آں ،جیہڑا اوہدے تو ں پہلاں آیا۔میَں ایہہ سمجھاؤن لئی تُہاڈی مدد کراں گا ۔
” یسوُع مسیِح خُدا دے پُتر دی خُوشخبری دا شروع۔جِویں یسعیاہ نبی دی کتاب وِچ لِکھیااے پئی ویکھ میَں اپنا پیغمبر تیرے اَگے گھلداآں جیہڑاتیری راہ تیار کرےگا ۔ “ (مرقس ا: ۱۔۲)۔آسمانی خوشخبری داشروع ہمیش یوحنا اصطباغی توں ہوندااے ۔
یوحنا اصطباغی دے بارے چنگی طرحاں سمجھ لین دے بعد اَسیں یسوُع دی مکتی دی خوشخبری نُوں واضح طورتےسمجھ سکدے تے ایہدے اُتے ایمان لیاسکدے آں ۔ ایہہ بالکل اوہناں ایلچیاں دیا ں گلاں سُنن دے برابر اے جِنہاں نُوں اَسیں دُنیا وِچ گھلیا اے تاں پئی ساریاں قوماں دے حال توں آگاہی حاصل کرسکیے۔جدوں اَسیں یوحنا اصطباغی دے بارے جان لیندے آں، تےخُدادی مکتی نُوں ڈاہڈے چنگے طریقے نال سمجھ سکدے آں۔
پر ایہہ کس قدر افسوس دے قابل گل اے پئی موجودہ دَور وِچ بوہت سارے مسیحی یوحنا دی اہمیت تے نظرنہیں کردے ۔ایہہ اِنج نہیں پئی خُدانیں اَپنی اُکتاہٹ یاں فرصت دے سببوں اوہنوں گھلیا۔نویں عہدنامہ دِیاں چونہہ انجیلاں یسوُع دی مکتی دے بارے بیان کرن تو ں پہلاں یوحنا اصطباغی دے بارے بیان کردیاں نیں۔
پرایس دَوردے انجیل دے مناد ایہنوں مکمل طورتے پراں سُٹ دے نیں تے لوکاں نُوں دَسدے نیں پئی مکتی حاصل کرن لئی یسوُع اُتے ایمان لیانا ای کافی اے۔اصل وِچ لوکاں دی اَگوائی کر رہے نیں پئی اوہ ساری حیاتی پاپی رہن تے اوہناں داانجام جہنم ہووے ۔جےسارے مسیحی یوحنا اصطباغی دےکردارنُوں سمجھیوں اَڈصرف یسوُع اُتے ایمان رکھدےنیں، تے مسیحیت تُہاڈےلئی محض دُوجا دُنیاوی دھرم بن جاوےگا ۔جے تُسیں سچیائی نُوں نہیں جان دے تے کِویں مکتی حاصل کر سکدے او؟
ایہہ کدی نئیں ہوسکدا ۔
مکتی دی خوشخبری نہ تے اینی سادہ اے ناں اینی سَوکھی ۔ ایویں بوہت لوکاں دا خیال اے پئی مکتی
ساڈے صلیب تے ایمان رکھن دے سبب حاصل ہوندی اے ایس لئی یسوُع ساڈی خاطر صلیب اُتے مویا ۔پرجےتُسیں پاپاں دےمنتقل کیتےجان دی ساری سچیائی نُوں جانیوں اَڈ صرف اوہدی مصلوبیت اُتے ایمان رکھد ےاو۔تےایہو جیہاایمان مکمل مکتی تیک اَگوائی نہیں کرےگا،کوئی معنےنہیں رکھدا بھاویں تُہاڈاایمان کِنّاں وی مضبوط ہووے ۔
ایس لئی خُدانے یوحنا اصطباغی نُوں گھلیاتاں پئی دُنیا جانے پئی مکتی دی تکمیل کس طرحاں ہون والی سی تےیسوُع کس طرحاں دُنیا دے پاپ چُکن والاسی ۔صرف جدوں اَسیں سچیائی توں مکمل اَگاہ ہوواں گے تے آں اَسیں سمجھاں گے پئی یسوُع خُدا دا پُتر اےجِنہےساڈے سارے پاپ اَپنے اُتے لے لئے ۔
یوحنا اصطباغی سانُوں مکتی دی سچیائی دےبارےدَسدااے ۔اوہ سانُوں دَسدااے پئی کس طرحاں یسوُع دےخُداتےنالےسچےنُورہون دی گواہی دین آیا۔اوہنے واضح طورتےبیان کیتا پئی اوہ خُودنُورنہیں سی ،سگوں اوہ نُوردی گواہی دین لئی آیاسی۔ اوہنے یوحنا دی انجیل دے پہلے باب وِچ ایہہ گواہی دِتی پئی اوہنے یسوُع نُوں بپتسمہ دین دے سبب مکتی دی خوشخبری نُوں تیارکیتا۔
جےمکتی دےبارےساڈےکول یوحنا اصطباغی دی گواہی نہ ہوندی،تےاَسیں کس طرحاں یسوُع اُتے ایمان لیاسکدےساں؟اَسیں کدی یسوُع نُوں نہیں ویکھیا ،پرجدوں اَسیں مختلف تہذیباں تے دھرماں وَل رجوع کردے آں ،تےیہوواہ اُتے ساڈے خُدا دےطورتےایمان لیاؤناکِویں ممکن ایں۔
پوری دُنیا وِچ ایہوجیہےمختلف دھرم ہون دے سبب ،اَسیں کِویں یسوُع مسیِح نُوں جان سکدے آں؟اَسیں کِویں جان سکدے ساں پئی یسوُع ،اصل وِچ خُداداپُتراے،جِنہے دُنیا دے پاپ اَپنے اُتے لین دے راہیں سانُوں مکتی بخشی ؟
سانوں پُرانے عہدنامہ وِچ مکتی دے کلا م نُوں شروع توں لبھن تے ایہہ جانن لئی غور کرنا ہووےگاپئی یسوُع ساڈا مکتی داتا اے ۔سانُوں صحیح ایمان لیان لئی صحیح عِلم دی لوڑ اے۔ ایہہ جانن توں اَڈ اَسیں کُجھ نہیں کرسکدے ۔ یسوُع اُتے ایمان لیاؤن تے مکتی حاصل کرن لئی ،سانُوں مکتی دی ایس خوشخبری داعِلم حاصل کرناہووےگا،جیہدی یوحنا اصطباغی نیں گواہی دِتی تے ایس وِچ ایہدے کردار نُوں جاننا پوےگا ۔مسیح اُتےمکمل ایمان رکھن لئی سانُوں مکتی دےبارےسچیائی نُوں جانناپوےگا۔
ایویں،جِویں پئی یسوُع نے فرمایا، ”تےسچیائی توں اَگاہ ہوووگےتےسچیائی تُہانوں رہاکرے گی “ سانُوں اوہدے وِچ مکتی دی سچیائی نُوں جانناچاہی دااے ۔
بائبل مقدّس وِچ ثبوت
کِس نُقطےتوں چونہہ انجیلاں دا شروع ہُندااے؟
یوحنااصطباغی دےظاہر ہون توں
آؤبائبل وِچ مکتی دے سارے ثبوتاں نُوں لبھدے ہوئے اَگے ودھیے۔ آؤ ویکھیے پئی چونہہ انجیلا ں یوحنا اصطباغی دےبارےکیہ بیان کردیاں نیں ،پئی اوہ کون سی ، اوہنوں ’ اِنسانی پیڑھی دانمائندہ ‘یاں ’ آخری سردارکاہن‘ آکھیاگیا اے،کس طرحاں اوہدے راہیں دُنیادےسارے پاپ یسوُع اُتے لدےگئے،تےکیہ یسوُع نےساڈے سارےپاپ اَپنے اُتےلئےیاں نئیں ۔
سانُوں سچیائی اُتے توجہ دینی چاہی دی اے پئی چونہہ انجیلاں داآغازیوحنا اصطباغی توں ہوندااے۔یوحنا ۱ : ۶ سانُوں خوشخبری دے اَت اُچیرے اہم نقطے دے بارے دَسدا اے ۔ایہہ حوالہ سانُوں دَسدااے پئی کِنہے یسوُع اُتے دُنیادےسارے پاپ لدن داکم انجام دِتا۔ ” اِک بندہ یوحناناں آموجودہویاجیہڑاخُداوَلوں گھلیاگیاسی ۔ایہہ گواہی لئی آیا پئی نُور دی گواہی دیوے تاں پئی سب اوہدے راہیں ایمان لیاؤن۔“ (یوحنا۱ : ۶۔۷)۔
ایتھےلِکھیااے، ’ تاں پئی سب اوہدے راہیں ایمان لیاؤن ‘ تے ایہہ پئی اوہ ’ ایہہ گواہی لئی آیا پئی نُوردی گواہی دیوے۔ ‘ اوہ نُور یسوُع مسیِح اے۔ایہدامطلب اے پئی یوحنا نُوں یسوُع دی گواہی دینی سی تاں پئی سب اوہدے راہیں ایمان لیاؤن۔ہُن آؤ متی دی انجیل دے باب ۳ اُتے ڈُونگھی نظرپائیے۔
متی ۳ : ۱۳۔۱۷ وِچ ، ” اوس ویلے یسوُع گلیل توں یردن دےکنارے یوحناکول اوہدے کولوں بپتسمہ لین لئی آیا ۔پریوحنا ایہہ آکھ کے اوہنوں منع کرن لگاپئی میَں آپ تیرے کولوں بپتسمہ لین دا محتاج آں تے تُوں میرے کول آیا ایں ؟یسوُع نیں جواب وِچ اوہنوں آکھیا ہُن تُوں ہون ای دے کیوں جے سانُوں ایسے طرحاں ساری راستبازی پوری کرنا مناسب اے۔ایہدےتےاوہنے ہون دِتا۔تےیسوُع بپتسمہ لےکے اوسےویلےپانی دے اُتے آیاتےویکھواوہدے لئی اَسمان کھُل گیاتےاوہنےخُدادے رُوح نُوں کبوتردی شکل وچ اُتردیاں تے اَپنے اُتے آندیاں ویکھیا۔ تے ویکھو اَسمان توں ایہہ آواز آئی پئی ایہہ میراسوہناپُتراے جیہدےتوں میَں خوش آں۔“
سانُوں کیوں یوحنا دی پیڑھی سمجھنی ایں؟
کیوں جے بائبل مقدّس سانُوں دَسدی اے پئی یوحنا ساری اِنسانی پیڑھی دا سردار کاہن اے
یوحنااصطباغی نیں دُنیا دےسارےپاپاں دی معافی مکمل کرن لئی یسوُع نُوں بپتسمہ دِتا۔ بپتسمہ جیہڑا یسوُع نیں یوحناکولوں حاصل کیتا ساڈی مکتی لئی بڑاضروری واقعہ سی پرتفصیل نُوں سچیائی نال سمجھ لین تے ایمان رکھن لئی سانُوں پہلاں یوحنااصطباغی داڈونگھا مطالعہ کرناچاہی دااے۔
لوقا ۱ : ۱-۱۴ وِچ ، ” کیوں جے بوہتیاں نیں ایس تےلک بنھیا پئی جیہڑیاں گلاں ساڈے وِچکار واقعہ ہوئیاں اوہناں نُوں ترتیب واربیان کرن۔جِویں پئی اوہناں نیں جیہڑے شروع توں خودویکھن والے تے کلام دےخادم سن ایہناں نُوں ساڈےتیکر پہنچایا۔ایس لئی اَے محترم تھیفلس میَں وی مناسب جانیاپئی ساریاں گلاں دا سلسلہ شروع توں ٹھیک ٹھیک دریافت کرکے ایہناں نُوں تیرے لئی ترتیب نال لکھا ں ۔تاں پئی جِنہاں گلاں دی تُوں تعلیم پائی اےاوہناں دی پکیائی داتینوں پتہ لگ جاوے ۔یہودیہ دے بادشاہ ہیرودیس دے زمانہ وِچ ابیاہ دے فرقے وِچوں زکریاہ ناں دا اِک کاہن سی تے اوہدی بیوی ہارون دی پیِڑھی وِچوں سی تےاوہداناں الیشبع سی ۔ تے اوہ دونویں خُدادے حضُور راستباز تےخُدادےسب حکُماں تے قانوناں اُتےچلن والے سَن ۔ تے اوہناں دے نیانے نہیں سَن کیوں جے الیشبع بانجھ سی تے دونویں وڈیری عمردےسَن ۔جدوں زکریاہ خُدا دے حضُور اَپنے فریق دی واری اُتےکہانت داکم انجام دینداسی تے ایویں ہویا۔ پئی کہانت دے دستُوردے مطابق اوہدے ناں دا قرعہ نکلیا پئی خُداونددےمقدِس وِچ جاکے خوشبو جلاوے۔تےلوکاں دی ساری جماعت خوشبوجلان دے ویلےباہردعاکررہی سی ۔ پئی خُدادا فرشتہ خوشبودےمذبح دےسجےپاسے کھلوتا اوہنوں وکھالی دِتا ۔ تے زکریاہ ویکھ کے گھبرایا تے اوہدے اُتےخوف چھاگیا ۔ پرفرشتے نے اوہنوں آکھیا اَے زکریاہ !خوف نہ کر کیوں جے تیری دعاسن لئی گئی اے تےتیرےلئی تیری بیوی الیشبع توں پُترہووےگا ۔ توں اوہداناں یوحنارکھیں ۔تےتینوں خوشی تےشادمانی ہووےگی تے بوہت سارے لوک اوہدی پیدائش دے سببوں خوش ہون گے ۔“
ایتھے لوقا،یسوُع داچیلا ،یوحنادی پیِڑھی نُوں کھُلے طورتےبیان کردااے ۔لوقا،یسوُع داچیلا،شروع توں یوحنادی پیِڑھی نُوں پیش کردااے ۔لوقا نے تھیفلس ناں دے اِک شخص نُوں خوشخبری دی تعلیم دِتی سی ،جیہڑااِک مختلف وسیب نال تعلق رکھداسی تے خُداوند دےبارےکُجھ نہیں جانداسی ۔
ایویں ،ایہنوں یسوُع،پاپیاں دے مکتی داتا،دےبارے تعلیم دین لئی ،لوقانیں سوچیا پئی اوہنوں یوحنا اصطباغی دی پیِڑھی نُوں کھُلےطورتےبیان کرن دی لوڑسی ۔جس طرحاں اَسیں وی مختلف پیِڑھیاں وِچوں غیرقوم دےلوک آں ،اَسیں یسوُع دی مکتی نہیں سمجھ سکدے ساں جے ایہہ گل کھول کے اِک اِک شَےواضح نہ کیتی جاندی ۔ آؤلبھیےتفصیلاں کیہ نیں ۔
لوقا ۱ : ۵ ۔ ۹ وِچ ،اوہ بیان کردااے ، ” یہودیہ دے بادشاہ ہیرودیس دے زمانہ وِچ ابیاہ دے فرقے وِچوں زکریاہ ناں دا اِک کاہن سی تے اوہدی بیوی ہارون دی پیِڑھی وِچوں سی تےاوہداناں الیشبع سی ۔ تے اوہ دونویں خُدادے حضُور راستباز تےخُدادےسب حکُماں تے قانوناں اُتےبے عیب چلن والے سَن ۔ تے اوہناں دے نیانے نئیں سَن کیوں جے الیشبع بانجھ سی تے دونویں وڈیری عمردےسَن ۔جدوں زکریاہ خُدادے حضُور اَپنے فریق دی واری اُتےکہانت داکم انجام دینداسی تے ایویں ہویا۔ پئی کہانت دے دستوردے مطابق اوہدے ناں دا قرعہ نکلیا پئی خُداونددےمقدِس وِچ جاکے خوشبو جلاوے۔“
ایتھے ،جدوں زکریاہ کہانت دے دستوردےموافق خُدادی خدمت کررہیاسی ،تےاِک واقعہ ہویا۔لوقا واضح طورتے گواہی دیندااے پئی زکریاہ ہارون دی پیِڑھی وِچوں سی ۔ فیرزکریاہ کس فریق وِچوں سی ؟ایہہ بوہت اہم نقطہ اے۔
اوہنےکھول کے گل کیتی ، ” جدوں زکریاہ خُدادے حضُور اَپنے فریق دی واری اُتےکہانت داکم انجام دینداسی۔“ اَسیں ویکھ سکدے آں پئی لوقازکریاہ دےبارےایس قدرجان داسی پئی اوہنے مکتی دی خوشخبری نُوں دونویں، زکریاہ تے الیشبع دےراہیں کھول کے بیان کیتا۔
یوحنااصطباغی زکریاہ تے اوہدی بیوی الیشبع دے گھر پیداہویا ، جیہڑی ہارون دیاں دِھیاں وچوں
اِک سی ۔ ہن آؤاَسیں ،زکریاہ ،یوحنادے پیودی پیِڑھی اُتے غورکریے۔
یوحنااصطباغی دی پیِڑھی
یوحنااصطباغی کیہدی پیِڑھی وِچوں سی؟
ہارون، سردارکاہن دی
یوحنااصطباغی دانسب نامہ سمجھن لئی ،سانُوں پُرانےعہدنامہ وِچوں ۱۔تواریخ ٢۴ : ۱۔۱۹ دامطالعہ کرنا چاہی دااے ۔
”تےبنی ہارون دےفریق ایہہ سَن۔ہارون دے پُترندب۔ ابیہو۔ الیعزرتے اتمرسَن۔ تے ندب تے ابیہواَپنے پیوتوں پہلاں ای مرگئے تے ایہناں دی اولاد نہیں سی تےالیعزرتے اتمر نے کہانت دا کم کیتا ۔تے داؤدنے الیعزرتے اتمر دے پُتراں وِچوں صدوق تے اتمر دے پُتراں وِچوں اخیملک نُوں ایہناں دی خدمت دی تربیت دے مطابق تقسیم کیتا ۔ تے اتمردےپُتراں توں بوہتے الیعزردےپُتراں وِچ رئیس ملے تے اِنج اوہ تقسیم کیتے گئے پئی الیعزردےپُتراں وِچ آبائی خانوادیاں دے سولہ سردارسَن تے اتمردےپُتراں وِچوں آبائی خانوادیاں دےمطابق اَٹھ۔ایس طرحاں قرعہ پاکےاوہ آپووِچ غلط ملط ہوکےتقسیم ہوئے کیوں جے مقدِس دے سردارتےخُدا دےسردار نبی الیعزر تےنبی اتمردونواں وِچوں سَن ۔ تےنتنی ایل منشی دےپُترسمعیاہ نیں جیہڑالاویاں وِچوں سی ۔ایہناں دے ناواں نُوں بادشاہ تے امیراں تے صدوق کاہن تے اخیملک بِن ابیاتر تےکاہناں تےلاویاں دےآبائی خانوادیاں دے سرداراں دےسامنے لِکھیا۔جدوں الیعزر دااِک آبائی خاندان لیاگیا تے اتمرداوی اِک آبائی خاندان لیاگیا ۔تے پہلی چِٹھی یہویریب دی نکلی۔دُوجی یدعیاہ دی۔تیجی حارم دی۔ چوتھی شعوریم دی۔ پنجویں ملکیاہ دی۔چھیویں میامین دی۔ستویں ہقوض دی۔اَٹھویں ابیاہ دی۔نویں یشوع دی۔دسویں سکانیاہ دی۔یارہویں الیاسب دی ۔بارہویں یقیم دی تیرہویں خفاہ دی۔ چودہویں یعباب دی۔پندرہویں بلجاہ دی۔سولہویں امیردی۔ ستارہویں حزیردی۔اٹھارہویں فضیض دی۔اُنیسویں فتحیاہ دی۔بیسویں یحزقیل دی۔ اِکیسویں یاکین دی۔بائیسویں جمول دی۔تیئسو یں دلایا دی۔چوبیسویں معز یاہ دی۔ایہہ ایہناں دی خدمت دی تربیت سی تاں پئی اوہ خُدادے گھر وِچ ایس قانُون دے مطابق آن جیہڑا اوہناں نُوں اوہناں دے پیو ہارون دی معرفت ایویں ای ملیاجِویں خُداوند اسرائیل دے خُدانیں ایہنوں حکم کیتاسی۔“
آؤاَسیں دسویں آیت فیر پڑھیے۔” ستویں ہقوض دی۔اَٹھویں ابیاہ دی۔“ داؤدبادشاہ دے دَوروِچ بوہت سارے کاہن سَن، ایس لئی اوہناں دی باقاعدہ عبادتاں لئی اِک نظام قائم کرن دی وی لوڑ سی ۔ایس لئی داؤد نیں ہارون دےسارے پُتراں دے حصے وِچ چِٹھیاں پائیاں تاں پئی ترتیب نال قربانی چڑھائی جاوے۔ (جِویں پئی تُسیں سارے جان دے او،ہارون موسیٰ داوڈابھائی سی۔خُدانیں موسیٰ نُوں اَپنے نمائندہ تےہارون نُوں اِسرائیل دے لوکاں دےسامنےپاک خیمہ ءاجتماع داسردارکاہن مقررکیتا) ۔
دُوجے سارے لاویاں نُوں کاہناں دے ہیٹھاں کیتا گیا تے ہارون،تے اوہدے پُتراں نیں،خُدادے حضُورساریاں قربانیاں چڑھان دا فرض سنبھالیا ۔داؤددے قرعہ پاؤن توں پہلاں کاہن جیہڑے ہارون دی نسل وِچوں سَن، اوہناں نُوں ہرواری قرعہ پاؤناپینداسی تے ایہدے سببوں بڑی بے ترتیبی پیداہوندی سی ۔
ایویں ،داؤدنیں ہر اِک فریق نُوں ترتیب دین لئی اِک نظام نوں ٹھیک کیتا ۔ ترتیب وِچ ۲۴فریق سَن ،جِنہاں دا شروع ہارون دے پوتیاں توں ہویا ،جِنہاں وِچ اَٹھواں ابیاہ سی ۔ ایہہ دَسیاگیا اے۔ ”ابیاہ دے فرقے وِچوں زکریاہ ناں اِک کاہن سی۔“ایس طرح زکریاہ ابیاہ دی پیڑھی دا کاہن سی، تے ایہہ دُویں سردار کاہن ہارون دی پیڑھی وچوں سَن۔
ایویں،ایہہ زکریاہ ابیاہ دے فریق دا کاہن سی جیہڑا یوحنا اصطباغی دا پیوسی۔ سانُوں بائبل مقدّس وِچوں پتہ لگدااے پئی اوہ اپنے ای خاندان وِچ ویاہ کردے سَن۔
ایویں یعقوب نیں اَپنے مامے دی کُڑی نال ویاہ کیتا۔ پیِڑھی دی ایہہ شرع اہمیت دی حامل اے۔ ایتھے دَسیا گیا اے۔” ابیاہ دے فرقےوِچوں زکریاہ ناں اِک کاہن سی۔“
پر اوہ پکے طورتے ہارون دی پیِڑھی وِچوں سی ۔کون؟ زکریاہ ،جیہڑا یوحنا اصطباغی دا پیو سی۔ یسوُع دی خلاصی نُوں،یوحنا اصطباغی دی خدمت نُوں تے یسوُع اُتے دُنیا دے پاپ لدے جان نُوں واضح کرن لئی ایہہ اِک اہم سچیائی اے۔
صرف ہارون دے پُترکاہناں دے طورتے خدمت کرن گے
پُرانے عہدنامہ دے دَور وِچ کیہڑے اُچی کہانت دی خدمت کرسکدےسن؟
ہارون تے اوہدےمقررکیتے ہوئےپُتر
فیر،بائبل مقدّس کِتھے اچیچا دَسدی اے پئی ہارون دے پُتراں نُوں کاہناں دےطورتے خدمت کرنی چاہی دی اے؟آؤاَسیں ایہنوں ویکھیے۔
گنتی ۲۰ : ۲۲ ۔ ۲۹وِچ ، ”تے بنی اِسرائیل دی ساری جماعت قادس توں روانہ ہوکے حورب دےپہاڑ کول اَپڑی ۔تے خُداوند نیں حورب دے پہاڑ اُتے جیہڑاادوم دی سرحد نال ملیا ہویا سی موسیٰ تے ہارون نُوں آکھیا۔ہارون اَپنے لوکاں وِچ جا رَلےگاکیوں جے اوہ ایس ملک وِچ جیہڑامیَں بنی اِسرائیل نُوں دِتا اے جانئیں پاوےگا ایس لئی پئی مریبہ دے چشمہ اُتے تُسیں میرے کلام دے خلاف عمل کیتا ۔ ایویں تُوں ہارون تے اوہدے پُتر الیعزر نُوں اَپنے نال لے کےحورب دےپہاڑ اُتےآجا۔تےہارون دے بانے نُوں لاہ کے ایہدے پُترالیعزرنُوں پوادے کیوں جے ہارون اوتھے ای مرکے اَپنے لوکاں وِچ جارَلے گا ۔تے موسیٰ نیں خُداوند دے حکم دے مطابق عمل کیتاتے اوہ ساری جماعت دی اکھاں دے سامنے حورب دےپہاڑاُ تےچڑھ گئے۔تےموسیٰ نےہارون دےبانےنُوں لاہ کے اوہدے پُترالیعزرنُوں پوادِتاتے ہارون نے اوتھے پہاڑدی چوٹی اُتے رحلت فرمائی ۔ فیر موسیٰ تے الیعزر پہاڑتوں لتھے ۔ جدوں جماعت نے ویکھیا پئی ہارون نے وفات پائی تے اِسرائیل دے سارے گھرانےدےلوک ہارون اُتے ۳۰ دِن تیک ماتم کردے رہے۔“
خروج دی کتاب وِچ ،خُدادی شریعت درج کیتی گئی اے ،جیہدے وِچ لِکھیا اے پئی ہارون سردار کاہن دے پُتراں نُوں بغیر کسی حیلے بہانے دے، سردار کاہن دی خدمت مخصوص کیتے ہُوئے پُتر نُوں،انجام دینے چاہی دی اے ،جِویں اوہناں دا پیواَپنے دَور وِچ کرداسی، ٣۰ ورہے دی عُمر دا ہون اُتے ۔
خروج۲٨ : ١ ۔٥ وِچ، ” تےتُوں بنی اِسرائیل وِچوں ہارون نُوں جیہڑاتیرابھائی اے
تے اوہدے نال اوہدے پُتراں نُوں اَپنے لاگے کر لویں تاں پئی ہارون تے اوہدے پُتر۔ ندب تے ابیہو تے اتمرکہانت دے عہدے اُتے ہوکے میری خدمت کرن ۔ تے تُوں اَپنے بھائی ہارون لئی عزت تے زینت واسطے مقدّس لباس بنادیویں۔تے تُوں اوہناں سارے روشن ضمیراں نُوں جنہاں نُوں میَں حکمت دی رُوح نال بھریااے آکھ پئی اوہ ہارون لئی بانا بنان تاں پئی اوہ مقدّس ہوکےمیرے لئی کاہن دی خدمت نُوں انجام دیوے۔ تے جیہڑے لباس اوہ بنان گےایہہ نیں یعنی سینہ بندتےافودتےجبہ تے چونہہ خانیاں داکُرتہ تےعمامہ تےلک بَن۔اوہ تیرے بھائی ہارون تے اوہدے پُتراں واسطے ایہہ پاک لباس بنان تاں پئی اوہ میرے لئی کاہن دی خدمت نُوں انجام دین۔تےاوہ سونے تے اَسمانی تے ارغوانی تے لال رنگ دے لیڑے تے مہین کتان نُوں لین ۔“
خُدانیں واضح طورتے موسیٰ دے بھائی ،ہارون نُوں وڈی کہانت دی خدمت لئی مقررکیتا۔ کوئی گیا گواتاشخص کہانت وِچ شامل نئیں ہوسکدا سی۔ خُدانیں موسیٰ نُوں حکم دِتا پئی اوہ ہارون نُوں سردارکاہن ہون لئی مقدّس کرے ،تے اوہدے لئی ٹھیک اوہوجیہا بانا تیار کرے جیہڑاخُدانیں بنان لئی آکھیاسی ۔ سانُوں کدی خُدادے اکھراں نُوں بھُلنانہیں چاہیدا۔
خُروج۲۹ : ١۔۹ وِچ،بیان کیتاگیا اے ،”تے ایہناں نُوں پاک کرن دی خاطر تاں پئی اوہ میرے لئی کاہن دی خدمت نُوں انجام دین ،تُوں ایہناں دے واسطے ایہہ کریں پئی اِک وچھاتےدوبے عیب بھیڈوُلئیں ۔تے بےخمیری روٹی تے بےخمیرکُلچےجِنہاں نال تیل ملیا ہووے تے تیل دی چوپڑیاں ہوئیاں بے خمیری روٹیاں لئیں۔ایہہ سب کنک دے میدہ دِیاں بنائیں ۔تے اوہناں نُوں اِک ٹوکری وِچ رکھ کے ایس ٹوکری نُوں وچھے تے دونویں بھیڈوُآں سنے اَگے لے آویں ۔فیرہارون تے اوہدے پُتراں نُوں خیمہ ءاجتماع دے بُوہے تے لیاکےایہناں نُوں پانی نال نہلاویں ۔ تے اوہ لباس لےکے ہارون نُوں کُرتہ تے افود داجُبہ تے افودتےسینہ بند پوادیویں تےافوددااُستادی نال بنیاہویالک بنھ اوہدے بنھ دیئیں۔تے عمامے نُوں اوہدے سراُتےرکھ کے ایس عمامے اُتے مقدّس تاج لادیئیں۔ تے مسَح کرن دا تیل لےکےاوہدے سراُتے ڈوہلیں تے اوہنوں مسَح کریں۔ فیر اوہدے پُتراں نُوں اَگے لیاکےاوہناں نُوں کُرتے پواویں تےہارون تےاوہدے پُتراں اُتے لک بنھ لویٹ کے ایہناں نوں پگاں بنھ دیویں تاں پئی کہانت دے عہدے اُتے ہمیش لئی ایہناں دا حق رہوے تے ہارون
تےایہدےپُتراں نُوں مخصوص کریں۔“
ہارون تےاوہدے پُتراں تے لک بنھ لویٹ کے ایہناں نُوں پگاں بنھ دیویں۔ ۔ ۔ ۔ تاں پئی کہانت دے عہدے اُتے ہمیش لئی ایہناں دا حق رہوے۔ایس طرحاں تُوں ہارون تےایہدےپُتراں ۔ ۔ ۔ ۔نُوں مخصوص کریں۔ خُدانیں ایہہ ٹھہرادِتا پئی صرف ہارون تے اوہدےپُتراں نُوں کہانت دی خدمت انجام دین لئی دائمی طورتےمقدّس کیتا جاوے ۔جدوں اوہنے خاص طورتےایہہ آکھیا، ” کہانت دے منصب اُتے ہمیش لئی ایہناں دا حق رہوے،“ تے ایہہ لاگُو ہویا پئی یسوُع دے ایس دُنیا وِچ آن توں بعد وی کہانت مؤثر سی۔
لوقا ڈونگھے طورتےواضح کردااے پئی زکریاہ سردارکاہن ہارون دی پیِڑھی وِچوں سی۔ جدوں زکریاہ خُداونددی ہیکل وِچ بڑے اختیار نال اوہدے حضُور خدمت کررہیا سی تے اِک فرشتہ ظاہرہویا تے اوہنے ایہنوں دَسیا پئی تیری دُعاسُن لئی گئی ؛یعنی اوہدی بیوی الیشبع اِک مُنڈا جمے گی ۔
زکریاہ ایس گل اُتے بھروسہ نہ کرسکیا تے اوس نیں آکھیا ،” میری بیوی بڑی وڈیری اے،کیویں اوہ اک نیانہ جم سکدی اے؟ “ اوہدے شک دے سبب خُدانیں کُجھ ویلے لئی اوہدی جیبھ نُوں بند کردِتا تاں پئی اوہدےاُ تے ظاہر کرسکے پئی اوہدے اکھرسچّے سن ۔
مقررکیتے ہوئے ویلے اُتے ،اوہدی بیوی حاملہ ہوئی تےتھوڑے ای چِر بعد کواری مریم وی حاملہ ہوئی ۔ دونویں واقعے ساڈی مکتی لئی خُدادے اِکو جیہے معجزےسَن۔ بدکاراِنسانی پیِڑھی نُوں بچان لئی اوہنوں اَپنے خادم یوحنا نُوں بھیجناسی تے اَپنے اِکو اِک پُتر یسوُع نُوں ایس دُنیا وچ پیداکرناسی ۔
ایس لئی ،خُدا نیں اَپنے پُترنُوں یوحناکولوں بپتسمہ لین دی اجازت دِتی ،تاں پئی دُنیا دے سارے پاپ اوہ اَپنے اُتے لے لئے تاں پئی جیہڑاوی اوہدے اُتے ایمان لیائے اوہ مکتی پائے۔
خُدادی خاص کارسازی!
یسوع توں پہلاں اوہدی مکتی دے کم لئی خُدانیں کِنّوں تیار کیتا؟
یوحنا اصطباغی نُوں
یسوع مسیح اِنسانی پیِڑھی دا مکتی داتا سی ،جیہڑا کواری مریم دے ٹِڈھ وِچوں پیداہویا،مریم دی منگنی یوسف نال ہوئی سی ،جیہڑایہوداہ دی پیِڑھی وِچوں سی ۔یسوُع نُوں خُداداعہدپورا کرن لئی یہوداہ دی پیِڑھی وِچوں پیداہوناسی بالکل ایسے طرحاں جِویں یوحنا اصطباغی نُوں سردارکاہن،ہارون دے گھرانہ وِ چوں پیداہوناسی ۔
خُدانیں ایہناں دوواں دے ایس دُنیا وِچ پیداہون داانتظام کیتا ،ایس ترتیب نال پئی یوحنا یسوُع توں پہلا پیدا ہویا ۔یوحنا ایس لئی پیداہویا تاں پئی یسوُع نُوں بپتسمہ دے سکے تے دُنیا دے سارے پاپ اوہدے اُتے لد دیوے ۔ سردارکاہن دی پیِڑھی خُدادے عہد نُوں پورا کرن لئی کفارہ دی قربانی چڑھانی سی ، جیہڑا پُرانے عہدنامہ تے نویں عہدنامہ وِچ بنھیا گیا سی ؛تاں پئی یسوع دی مکتی دی خوشخبری ٹھیک طورتےمکمل ہووے تےسارےلوک چھٹکارہ حاصل کرسکن۔
خروج دی کتاب وِچ ،خُدانیں اِسرائیل نُوں اَپنی شریعت تے نالے عہدبخشے؛خُدادی شریعت تے خیمہ ء اجتماع وِچ قربانیاں چڑھان داانتظام ،کاہناں د ے بانے تیکر ،قربانیاں دی تفصیل تے کہانت دی کاہناں دے پُتراں نُوں منتقلی تیکر قانون فراہم کیتے۔ خُدا نے ہارون تے اوہدی پیِڑھی نُوں دائمی طورتےوڈی کہانت لئی مقررکیتا ۔
ایویں ،ہارون دی ساری پیِڑھی قربانیاں چڑھاسکدی سی تے سردارکاہن صرف ہارون دے گھرانے وِچوں ہوسکدے سن ۔ کیہ تُسیں ایس گل نُوں سمجھ سکدے او اِنج کیوں سی ؟
پرہارون دی پیِڑھی دے بوہت لوکاں وِچوں ،خُدانے اِک خاص کاہن زکریاہ تے اوہدی بیوی الیشبع نُوں چُنیا۔اوہ آکھ چُکیاسی ، ” ویکھ میَں اَپناپیغمبر تیرے اَگے گھلداآں۔“ جدوں خُدانے زکریاہ نُوں دَسیاپئی اوہ الیشبع نُوں مُنڈا جمن دی قوت بخشے گا ، تے ایہہ پئی اوہ اوہداناں یوحنا رکھے ،تے اوہ ایس قدرحیران ہویاپئی اوہدے حکم نال مُنڈے دے پیدا ہون تے ناں رکھن تیکرگونگاہوگیا۔
بےشک مُنڈااوہدے گھروچ پیداہویا ۔جدوں اِسرائیل دی رِیت دے مطابق مُنڈے دا ناں رکھن داویلاآیا،تےمُنڈے داناں پیودےناں اُتے،یاں اوہدے اَنگاں ساکاں وچوں کسے اِک دے ناں اُتے رکھیاجاناسی ۔
”تے الیشبع دے نیانہ جمن داویلا آپہنچیاتے اوہدےمُنڈاہویا۔تے اوہدے گوانڈھیاں تے اَنگاں ساکاں نیں ایہہ سُن کے آکھیا خُداوند نیں ایہدے اُتے بڑی رحمت کیتی تے اوہدے نال خوشی منائی ۔تے اَٹھویں دِن ایویں ہویا پئی مُنڈے داختنہ کرن لئی آئے تے اوہداناں اوہدے پیودےناں تے زکریاہ رکھن لگے۔پر اوہدی ماں نیں آکھیا نئیں سگوں ایہداناں یوحنا رکھیاجاوے ۔ اوہناں نیں آکھیاپئی تیرے خانوادے وِچ کسےداایہہ ناں نئیں۔اوہناں نیں اوہدے پِئونُوں اِشارہ کیتا پئی تُوں ایہداناں کیہ رکھنا چاہنداایں۔اوہنے تختی منگاکے ایہہ لِکھیاپئی ایہداناں یوحنا ایں تےسب نیں تعجب کیتا۔ تے اوس ویلے اوہدا مونہہ تے جیبھ کھُل گئےتے اوہ بولن تے خُدادی حمد کرن لگ پیا۔تےاوہدے آلے دوالےدے سارے رہن والیاں اُتے خوف چھاگیاتےیہودیہ دےسارے پہاڑی ملک وِچ ایہناں سبھے گلاں دا ڈھنڈورا مچ گیا۔تے سب سُنن والیاں نیں اوہناں گلاں نُوں دِل وِچ سوچ کے آکھیا ایہہ مُنڈا کہیوجیہاہون والا اے؟کیوں جےخُداوند داہتھ اوہدے اُتے سی۔“(لوقا۱:۵۷ ۔ ۶۶)
اوس ویلے وی زکریاہ بول نئیں سکداسی جدوں مُنڈاپیداہویا۔جدوں بچے دا ناں رکھن دا ویلا آیا ۔ تےاَنگاں ساکاں نیں مشورہ دِتا پئی بال داناں زکریاہ رکھیاجاوے۔ پر اوہدی ماں نے زور دِتاپئی ایہداناں یوحناہوناچاہیدااے ۔ایس تے ،اَنگاں ساکاں نیں آکھیا پئی تیرے خانوادے وِچ کسے داایہہ ناں نہیں تے بال دا ناں ایہدے پیودے ناں اُ تے رکھیاجاناچاہیدا اے۔
جدوں الیشبع ایس ناں تے زور دیندی رہی تے اَنگ ساک زکریاہ کول گئے تے اوہدے کولوں پُچھیا پئی نیانے دا ناں کیہ ہونا چاہیدا اے ؟زکریاہ نے جیہڑاہُن تیک بول نئیں سکدا سی ،تختی منگائی تے اوہدے اُتے ’ یوحنا ‘ لِکھیا۔سارے اَنگ ساک ناں دے ایس غیر معمولی انتخاب تے ہکےبکےرہ گئے۔
پرناں رکھن توں بعد ، زکریاہ دی جیبھ فوراًکھُل گئی ۔اوہنے خُدا دی وڈیائی کیتی تے اوہ رُوح القدّس دے نال بھرگیاتےنبُوّت کرن لگ پیا۔
ایویں لوقا دَسدااے پئی یوحنا اصطباغی زکریاہ دے گھر وِچ پیدا ہویا۔” ابیاہ دے فرقے وِچوں زکریاہ ناں اِک کاہن سی۔“ خُدا دے خاص فضل نال ،یوحنا اصطباغی، انسانی پیِڑھی دا نمائندہ ،
زکریاہ دے گھر وِچ پیدا ہویاجیہڑاہارون دی پیِڑھی وِچوں سی ۔
یوحنا اصطباغی تے یسوُع مسیِح دے راہیں ،خُدا نیں اِنسانی پیِڑھی دی مکتی نُوں مکمل کیتا۔ اَسیں مکتی دے کم اُتے جِنہوں یوحنا تے یسوُع مسیِح نے پوراکیتا ایمان لیاؤن دے سبب اَپنے پاپاں توں مکتی حاصل کر
دے آں۔
یسوع دابپتسمہ
کیوں یسوُع نے یوحنا کولوں بپتسمہ لیا؟
دُنیادےسارےپاپ چُکن لئی
یوحنا اصطباغی نیں گواہی دِتی پئی یسوُع خُدا دا پُترسی تے اوہنے ساڈےسارے پاپ چُک لئے۔ اوہ یوحنا اصطباغی خُداداخادم سی جِنہیں ساڈی مکتی دی گواہی دِتی ۔ایہدا ایہہ مطلب نہیں پئی خُداخُود سانُوں نہیں دَسداپئی اوہ ساڈامکتی داتااے۔ خُداکلیسیاوِچ اَپنےخادماں تے اوہناں سارے لوکاں دی زبانی کلام کردااےجیہڑے مکتی یافتہ نیں۔
خُدافرماؤندااے ، ” یروشلم نُوں دلاسہ دیووتے اوہنوں پکارکے آکھوپئی اوہدی مصیبت دے دِن جیہڑے جنگ تے اوکھیائی دے سَن، لنگھ گئے۔تےاوہدے پاپاں دا کفّارہ ہویا تے اوہنے خُدا دے ہتھوں اَپنے سبھے پاپاں دابدلہ دُگناپایا ۔ ۔ ۔ آہوگھاہ مُرجھاندااے ،پھُل کملاؤنداے پرساڈےخُداداکلام ابدتیکرقائم اے۔“ (یسعیاہ۴۰:۲،۸)۔
خُداپہلاں ای گھٹوگھٹ مسیِح دی پیدائش توں سَت سوورہےپہلاں وعدہ کرچُکیاسی، ” تُسیں ہُن توں پاپی نئیں او۔ میَں تُہاڈے سارے پاپاں دا کفارہ دِتاتےجنگ تے اوکھیائی مُک چُکی اے۔“ ایویں،مکتی دی خوشخبری دی آوازسانُوں پکاری دی اے ۔ ایہہ ہے جیہڑی مُستعد خوشخبری اَکھواندی اے ۔
جدوں اَسیں یوحنا اصطباغی دی خدمت نُوں سمجھ لیندے آں، جدوں اَسیں واقعی ایہہ سمجھ
لیندے آں پئی دُنیادےسارےپاپ یوحنا اصطباغی دے راہیں یسوُع اُتےلددِتے گئے سَن،تے اَسیں سارےاَپنےسارےپاپاں توں مکتی حاصل کرسکدے آں۔
چارے مقدّس انجیلاں سانُوں یوحنا اصطباغی دے بارے دَسدیاں نیں ،تے ملاکی ،پُرانے عہدنامہ داآخری نبی وی یوحنا اصطباغی دی گواہی دیندااے پئی یوحنا اصطباغی خُداداتیار خادم اے۔نویں عہدنامہ داشروع یوحنا اصطباغی دی پیدائش تے اوہدے راہیں پاپاں توں چھُڈائےجان نال شروع ہوندااے۔
فیراَسیں اوہنوں یوحنا اصطباغی کیوں کہندے آں؟ایس لئی پئی اوہنے یسوُع نُوں بپتسمہ دِتا۔ بپتسمہ داکیہ مطلب اے؟ایہدا مطلب ’ سلسلہ وار لد دینا ،دفن ہونا، دھویاجانااے ‘ — ایہہ بالکل ایسے طرحاں ایں جِویں پُرانے عہد نامہ وِچ ’ ہتھ رکھے ‘ جاندےسَن ۔
پُرانے عہدنامہ وِچ،جدوں کِسے اِنسان نیں پاپ کیتا،تے اوہ اَپنے پاپ قربانی دےبے عیب پسُواُتے اوہدے سراُتے ہتھ رکھن دے راہیں منتقل کردینداسی ،تے قربانی دا پسُو ایہناں پاپاں نال مرجانداسی ۔’ ہتھ رکھن ‘دامطلب’ واری واری لد دینا ‘اے۔ ایویں ،’ ہتھ رکھنا‘ تے ’بپتسمہ‘ دامطلب اِکوجیہی عائدگی رکھنااے ،ایتھوں تائیں پئی اوہ بھانویں ظاہراً مختلف نیں ۔
فیر، یسوع دے بپتسمہ توں کیہ مُراد سی ؟ اوہدا بپتسمہ ساڈے لئی پاپاں دی معافی حاصل کرن دا اِکوطریقہ سی ۔خُدا شریعت قائم کرچُکیاسی تاں پئی پاپ ’ ہتھاں دے رکھے جان‘ دے راہیں قربانی اُتے منتقل ہوسکن ۔ ایویں پُرانےعہدنامہ وِچ ،پاپی لوکاں نُوں قربانی دے پسُو دےسراُتےاَپنےپاپ لدن لئی ایہدے سراُتےاپنے ہتھ رکھنے پیندےسَن۔ فیر اوہ ایہنوں ذبح کردےتے کاہن ایہداخون لےکےسوختنی قربانی دے مذبح دے سنگاں اُتے لادیندا۔ ایہہ روز مرّہ دے پاپ داکفارہ دین دا طریقہ سی ۔
فیر،اوہ سالانہ پاپاں دا کفارہ کس طرحاں دیندے سَن ؟
ایس صورت وِچ،سردارکاہن ہارون سارے بنی اِسرائیل لئی قربانی چڑھاؤنداسی ۔ کیوں جے یوحنا اصطباغی ہارون دے گھرانے وِچ پیداہویاسی ، ایس لئی سردارکاہن ہونااوہدے لئی مناسب سی ، تے خُدا نیں اوہنوں مکتی دے وعدے دے مطابق ،آخری سردارکاہن ہون لئی اوہدے جمن توں پہلاں ای مقرر کر دِتاسی ۔
یوحنا اصطباغی ساری اِنسانی پیِڑھی دا نمائندہ تے آخری سردارکاہن سی ، ایس لئی پئی یسوُع مسیِح
دی پیدائش نال پُرانے عہدنامہ دااختتام ہویا۔ کسے دُوجے نے نیں سگوں یوحنا اصطباغی نیں دُنیادےسارے پاپ اوسے طرحاں یسوُع اُتے لددِتے جِویں پُرانے عہد نامہ وِچ ہارون اَپنے سارےلوکاں دے پاپاں دا کفارہ دینداسی۔پُرانے عہدنامہ دے آخری سردارکاہن تے ساری اِنسانی پیِڑھی دے نمائندہ دےطورتے یوحنا بپتسمہ دین والے نیں یسوُع نُوں بپتسمہ دین دے راہیں دُنیادےسارےپاپ اوہدے اُتے لددِتے جیہڑے ویلے اوہنے اوہنوں بپتسمہ دِتا۔
کیوں جے یوحنا نیں سارے پاپ یسوُع اُتے لد دِتے ایس لئی ساڈا پانی تے رُوح دی خوشخبری اُتے ایمان رکھنا سانُوں بچاسکدااے ۔ یسوُع سارےپاپیاں نُوں بچان دی خاطر بَرّہ بن گیا تاں پئی خُدادےمنصوبہ دے مطابق مکتی دے کم نُوں پوراکرے۔ یسوُع نے سانُوں دَسیا پئی یوحنا اصطباغی آخری نبی ،یعنی آخری سردارکاہن سی جِنہیں دُنیادے سارےپاپ اوہدے اُتے لد دِتے ۔
کیوں کیہ یسوُع ایہہ کم خُود نہیں کرسکداسی ؟اوہنوں کیوں یوحنا بپتسمہ دین والےدی لوڑسی؟یوحنا اصطباغی دے یسوُع توں چھ مہینے پہلاں آؤن دی اِک وجہ ایہہ وی سی؛ایہہ اوہدے وعدیاں
نُوں مکمل کرن لئی ،پُرانے عہدنامہ دی شریعت نُوں پوراکرناسی ۔
یسوع کواری مریم توں تے یوحنا اصطباغی اِک وڈیری عمرتےبانجھ زنانی الیشبع توں پیداہویا سی ۔
ایہہ خُدادےعجیب کم سَن تے اوہنے سارےپاپیاں نُوں بچان لئی ایہنا ں دا منصوبہ بنایا۔ سانُوں پاپ دے خلاف اَبدی جنگ توں بچان لئی ،تےساڈےسارے پاپ نال بھرے دُکھاں دے نال نال ،اوہنے اَپنے خادم یوحنا نُوں تے بعد وِچ اَپنے اِکواِک پُتر،یسوُع نُوں گھلیا۔ یوحنا اصطباغی نُوں لوکاں دے نمائندہ ،یعنی آخری سردارکاہن دے طورتےگھلیاگیا سی ۔
زنانیاں وِچوں جمن والا سب توں اُچیرا اِنسان
دھرتی تے سب توں اُچیرااِنسان کون سی؟
یوحنا اصطباغی
آؤاَسیں متی١١:۷۔١۴ اُتے غورکریے۔” جدوں روانہ ہوئے تے یسوُع نیں یوحنا دی بابت لوکاں نُوں آکھناشروع کیتا پئی تُسیں بیابان وِچ کیہ ویکھن گئے سی؟کیہ ہَوادےنال ہِلدے ہوئےکانےنوں؟تےفیرکیہ ویکھن گئے سی ؟کیہ مہین لیِڑے پائے ہوئےشخص نُوں؟ویکھوجیہڑے مہین لیِڑےپاؤندےنیں اوہ بادشاہواں دے گھراں وِچ ہوندے نیں۔تےفیرکیوں گئےسی؟کیہ اِک نبی ویکھن نُوں؟میَں تُہانوں آکھداآں پئی نبی توں وڈے نُوں ۔ایہہ اوہو ای ہے جیہدی بابت لکھیااےپئی ویکھ میَں اَپنا پیغمبر تیرے اَگے گھل داآں جیہڑاتیری راہ تیار کرےگا۔میَں تُہانوں سچ آکھ داآں پئی جیڑے زنانیاں وِچوں پیداہوئے نیں اوہناں وِچوں یوحنا بپتسمہ دین والے توں وڈاکوئی نئیں ہویاپر جیہڑا اَسمان دی بادشاہی وچ چھوٹا اے اوہ اوہدے توں وڈااے۔ تےیوحنابپتسمہ دین والے دے دِناں توں ہُن تیکراَسمان دی بادشاہی اُتے زورہوندارہیااےتےزورآوراوہنوں کھوہ لیندے نیں ۔کیوں جے ساریاں نبیاں تے توریت نیں یوحنا تیک نبُوّت کیتی ۔جے چاہندےاوتے من لوو۔ایلیاہ جیہڑاآن والا سی ایہوای اے۔“
لوک بیابان وِچ یوحنا اصطباغی نُوں ویکھن گئے۔ جِنہیں پکارکےآکھیا، ” اَے سپ دے بچیو!توبہ کرو۔“ تےیسوُع نے آکھیا،”تےفیرکیہ ویکھن گئے سی ؟کیہ مہین لیِڑے پائے ہوئےشخص نُوں؟ویکھوجیہڑے مہین لیِڑےپاؤندےنیں اوہ بادشاہواں دے گھراں وِچ ہوندے نیں۔“
یسوُع نے خُود یوحنا دی بزرگی دی گواہی دِتی ۔”تے فیر کیہ ویکھن گئے سی ؟اِک جنگلی شخص نُوں جیہڑا اونٹھ دے والاں دے بانے پاؤندا،تےپورے زور نال پکارداسی ؟ایہنوں ضرور اونٹھ دے والاں دے بانےپاؤنےچاہیدے نیں۔ تےفیرکیہ ویکھن گئے سی ؟کیہ مہین لیِڑے پائے ہوئےشخص نُوں؟ویکھوجیہڑے مہین لیِڑےپاؤندےنیں اوہ بادشاہواں دے گھراں وِچ ہوندے نیں۔”پراوہ بادشاہ توں و ی وڈااے،“ یسوع نیں گواہی دِتی ۔ ”تےفیرکیہ ویکھن گئے سی ؟بھلامہین لیِڑے پائے ہوئےشخص نُوں؟ویکھوجیہڑے مہین لیِڑےپاؤندےنیں اوہ بادشاہواں دے گھراں وِچ ہوندے نیں۔تےفیرکیوں گئے سی ؟کیہ اِک نبی ویکھن نوں؟میَں تُہانوں آکھداآں پئی نبی توں وڈے نُوں ۔“
پُرانے زمانہ وِچ، نبی بادشاہواں توں وڈے سمجھے جاندے سَن۔ یوحنا اصطباغی بادشاہ توں ودھ کے تےنبی توں وی ودھ کےسی۔ اوہ پُرانے عہدنامہ دے سارے نبیاں توں وڈاسی ۔ سچیائی وِچ،یوحنا،آخری سردارکاہن تے اِنسانی پیِڑھی دانمائندہ ،پہلے ،سردارکاہن، ہارون توں وی بوہتاخاص سی ۔یسوُع نیں خُود گواہی دِتی پئی یوحنا اجیہاسی۔
کیہڑااِنسانی پیِڑھی دانمائندہ اے؟خُود مسیِح دے بعد ،ایس دھرتی اُ تے سب تو ں اُچیرا شخص
کیہڑا اے؟یوحنا اصطباغی ۔” میَں تُہانوں آکھداآں پئی نبی توں وڈے نُوں ۔ایہہ اوہو ای اے جیہدی بابت لکِھیااےپئی ویکھ میَں اَپنا پیغمبر تیرے اَگے گھل داآں جیہڑاتیری راہ تیار کرےگا۔“
یوحنا اصطباغی نیں گواہی دِتی پئی پاپ دے خلاف جنگ دا خاتمہ ہوچُکیااے۔” ویکھو ایہہ خُدادابَرّہ اے جیہڑادُنیاداپاپ چُکی لےجاندااے۔“ ایہہ یوحنا اصطباغی سی جِنہیں گواہی دِتی پئی یسوع نیں دُنیادےسارےپاپ چُک لئے۔
متی ١١:١١ وِچ، ” میَں تُہانوں سچ آکھ داآں پئی جیہڑے زنانیاں وِچوں پیداہوئے نیں اوہناں وِچوں یوحنا بپتسمہ دین والےتوں وڈاکوئی نئیں ہویا۔“ کیہ زنانیاں وِچوں پیدا ہون والیاں دے وِچکاریوحنا اصطباغی توں وڈاکوئی ہوراِنسان سی؟
ایہدے توں کیہ مُراد اے، ’ زنانیاں وِچوں پیداہون والے؟ ‘ ایہدے توں مُراد ساری اِنسانی پیِڑھی اے۔ آدم تے حواتوں اَڈ، سارے لوک زنانیاں وِچوں پیداہوئے نیں ۔ آہو،زنانیاں وِچوں پیداہو ن والیاں وِچوں ،یوحنااصطباغی توں وڈاکوئی ہور نئیں ہویا۔ ایس لئی اوہ آخری سردارکاہن تے اِنسانی پیِڑھی دانمائندہ اے۔ یوحنا اصطباغی ، سردار کاہن،نبی تے ساری اِنسانی پیِڑھی دانمائندہ سی۔
پُرانے عہدنامہ وِچ،ہارون تے اوہدے پُتراں نُوں خُدا وَلوں مقرر کیتا گیا سی پئی ہمیشہ لئی
خدمت کرن ۔سارے پاپاں داہارون تے اوہدے پُتراں دے راہیں دُور کیتاجانا ضرور سی ۔ خُدانیں اِنج مقررکیتاسی ۔
جے ہورکوئی شخص لاویوں وِچوں اُٹھ کے سامنے آیاہونداتےاوہناں نیں اِیناں وانگر کرن دی جُرأت کیتی ہوندی،تے اوہ پکےطورتے مرگئے ہوندے ۔اوہ صرف مذبح اُتے اَگ جلان لئی لکڑیاں جمع کرن، پسُواں دی کھل لان،چربی اِکٹھی کرن ،آندارں نُوں صاف کرن، تے گندنُوں خیمہ توں باہر لےجاسکدے سن۔ جے اوہناں نیں جان بُجھ کے جِسمانی طورتے کاہناں دی خدمت انجام دین دی جُرأت کیتی ہوندی تے اوہناں دا انجام صرف موت ہوندا۔ایہہ خُدادی شریعت سی ۔اوہ حدنُوں پار نئیں کرسکدے سَن۔
زمین اُتے ،یوحنا اصطباغی توں وڈاہورکوئی شخص پیدا نئیں ہویا ۔ اوہ سارے فانی اِنساناں وِچوں سب تووڈاسی ۔”تے یوحنا بپتسمہ دین والےدےدِناں تو ہن تیکر اَسمان دی بادشاہی اُتےزورہوندارہیااےتے زورآور اوہنوں کھوہ لیندے نیں ۔“
لوکاں دی مکتی اوس ویلے توڑ چڑھی ،جدوں یوحنا اصطباغی نیں یسوُع نُوں بپتسمہ دِتاتے یسوُع اُتے ایمان لیان والے اَسمان دی بادشاہی وِچ داخل ہوسکدے نیں کیوں جے اوہ ایمان دے راہیں راستبازبن جاندے نیں۔
آؤاَسیں ہُن ویکھیےیوحنا دے پیو نیں اَپنے پُتردی کس طرحاں گواہی دِتی ۔
یوحنا دے پیو ،زکریاہ دی گواہی
کیہ زکریاہ نیں اَپنے پُتردےبارےنبُوّت کیتی؟
یوحنا اوہدے لوکاں نُوں مکتی داعِلم دین دے راہیں خُداوند دی راہ رتیارکرےگا
آؤلوقا١:۶۷۔٨۰ پڑھیے۔”تے اوہدا پیو زکریاہ رُوح القدّس نال بھرگیاتےنبُوّت دی رُوح نال آکھن لگاپئی ۔ خُداوند اِسرائیل دے خُدا دی حمد ہووےکیوں جے اوہنےاَپنی اُمت اُتے دھیان کرکےایہنوں چھُٹکارہ دِتا ۔تے اَپنے خادم داؤد دے گھرانے وِچوں ساڈےلئی مکتی دا سنگ کڈھیا ۔(جِویں اوہنے اَپنے پاک نبیاں دی زُبانی آکھیاسی پئی جیہڑے دُنیادے شروع توں ہوندے آئے نیں)یعنی سانُوں ساڈے وَیریاں توں تے سارے کینہ رکھن والیاں دے ہتھوں مکتی بخشی ۔تاں پئی ساڈے پیودادے اُتے رحم کرےتےاَپنے پاک عہدنُوں یادفرمائے ۔یعنی اوس قسم نُوں جیہڑی اوہنے ساڈے پیوابرہام نال کھادی سی ۔ پئی اوہ سانُوں ایہہ عنایت کرےگاپئی اَپنے وَیریاں دے ہتھو ں چھُٹ کے ۔اوہدے حضُور پاکیزگی تے راستبازی نال عمر بھر بے خوف اوہدی عبادت کریے۔ تے اَے لڑکے تُوں خُدا تعالیٰ دا نبی اَکھواویں گاکیوں جے تُوں خُداوند دی راہوں تیارکرن لئی اوہدےاَگے اَگے چلیں گا ۔ تاں پئی اوہدی اُمت نُوں مکتی دا عِلم بخشیں جیہڑا ایہناں نُوں پاپاں دی معافی توں حاصل ہویا ۔ ایہہ ساڈے خُدادی عین رحمت نال ہووے گاجِیہدے سبب نال عالمِ بالا دا سورج ساڈے تے طلوع کرےگا ۔ تاں پئی اوہناں نُوں جیہڑے ہنیرے تے موت دے پرچھاویں وِچ بیٹھے نیں چانن بخشے تے ساڈےپیراں نُوں سلامتی دی راہ اُتے پاوے۔تے اوہ لڑکا وڈاہوندا تے رُوح وِچ قوت حاصل کرداگیا تے اِسرائیل اُتے ظاہر ہون دے دِن تیکر جنگلاں وِچ رہیا۔“
زکریاہ نے دو گلاں دی پیشن گوئی کیتی ۔اِنج پئی سارے لوکاں دا بادشاہ آوے گا ۔۶۸آیت تو ں لے کے ۷۳تیکر،اوہنے خوشی دی نبُوّت کیتی پئی خُداوند اَپنے وعدے نہیں بھُلیایعنی یسوُع بالکل اوسے طرحاں جِویں خُدا نے ابرہام نال وعدہ کیتا سی ،اوہدی نسل نُوں اوہدے دُشمناں توں بچاؤن لئی کواری مریم توں پیدا ہویا۔
آیت ۷۴دے وِچ، ” پئی اوہ سانُوں ایہہ عنایت کرےگاپئی اَپنے وَیریاں دے ہتھو ں چھُٹ کے ۔اوہدے حضُور پاکیزگی تے راستبازی نال عمر بھر بے خوف اوہدی عبادت کریے۔“ ایہہ ابرہام تے اسرائیل دے لوکاں نال خُدا دے کیتے ہوئے وعدے نُوں یاد کرنا سی تے اینے اوہ نبُوّت کیتی ، ” اوہ سانُوں ایہہ عنایت کرےگا، بے خوف اوہدی عبادت کریے۔“
۷۶آیت وِچ ،اوہنے اَپنے پُتر بارے نبُوّت کیتی ، ” تے اَے لڑکے تُوں خُدا تعالیٰ دا نبی اَکھواویں گاکیوں جے تُوں خُداوند دی راہوں تیارکرن لئی اوہدےاَگے اَگے چلیں گا ۔ تاں پئی اوہدی اُمت نُوں مکتی دا عِلم بخشیں جیہڑا ایہناں نُوں پاپاں دی معافی توں حاصل ہویا ۔ ایہہ ساڈے خُدادی عین رحمت نال ہووے گاجِیہدے سبب نال عالمِ بالا دا سورج ساڈے تے طلوع کرےگا ۔ تاں پئی اوہناں نُوں جیہڑے ہنیرے تے موت دے پرچھاویں وِچ بیٹھے نیں چانن بخشے تے ساڈےپیراں نُوں سلامتی دی راہ اُتے پاوے۔“
ایتھے اوہنے آکھیا، ” تاں پئی اوہدی اُمت نُوں مکتی دا عِلم بخشے جیہڑا ایہناں نُوں پاپاں دی معافی توں حاصل ہویا ۔“ اوہنے کیہدے راہیں آکھیا پئی مکتی داعِلم بخشیاجاوےگا؟یوحنا اصطباغی دے راہیں۔ کیہ تُسیں ایہہ سب ویکھ سکدے او؟ خُدادے کلام دے سبب یوحنا اصطباغی دے راہیں سانُوں ایہہ علم بخشیاجاناسی پئی یسوُع خُدا داپُتراے، جِنہے دُنیا دے سارے پاپ اَپنے اُتے لے لئے۔
ہُن آؤاَسیں مرقس باب ١ اُتے غورکریے، ” یسوُع مسیِح خُدا دے پُتردی خوشخبری دا شروع۔جِویں یسعیاہ نبی دی کتاب وِچ لِکھیااے پئی ویکھ میَں اَپنا پیغمبر تیرے اَگے گھلدا آں جیہڑاتیری راہ تیارکرےگا۔بیابان وِچ پکارن والے دی آواز آندی اے پئی خُداوند دی راہ تیارکرو۔اوہدی راہ سِدھی کرو۔یوحناآیاتےبیابان وِچ بپتسمہ دینداتے پاپاں دی معافی لئی توبہ دے بپتسمہ دی منادی کرداسی ۔تے یہودیہ دے ملک دے سارے لوک تے یروشلم دےسارےرہن والےنکل کےاوہدے کول گئے تے اوہناں نیں اَپنے پاپاں دا اِقرار کرکے دریائے یردن وِچ اوہدے کولوں بپتسمہ لیا۔“ (مرقس۱:۱۔۵)
جدوں اِسرائیلیاں نیں یوحنا اصطباغی کولوں سُنیا،تے اوہ غیر قوماں دے بُتاں دی عبادت توں
پھِرے تے اوہناں نیں یوحنا اصطباغی کولوں بپتسمہ لیا۔پر یوحنا نیں گواہی دِتی ،”میَں تُہانوں پانی نال بپتسمہ دِتاتاں پئی تُسیں خُداوَل پَرتو ۔پرخُداداپُترآوےگاتےاوہ میرے کولوں بپتسمہ لوےگا کیوں جے تہاڈےسارےپاپ ایسے طریقے نال اوہدے اُتے منتقل ہوجان ۔تےجےتُسیں اوہدے بپتسمہ اُتے ایمان لیاؤندے او،جس طرحاں میرے کولوں بپتسمہ لے رہے او،تُہاڈے سارےپاپ بالکل ایسے طرحاں اوہدے اُتے لدے جان گے۔ جس طرحاں پُرانے عہد نامہ وِچ ہتھ رکھن دے راہیں پاپ لدے جاندے سَن۔“ایہہ سی ،یوحنا نیں کیہ گواہی دِتی ۔
یسوُع دے یردن وِچ بپتسمہ لین دی سچیائی دامطلب سی پئی اوہنوں موت دے دریا وِچ بپتسمہ دِتا گیا
سی۔اَسیں جنازے اُتے گاؤندے آں،” ♪بھوری جیہی سوہنی اُڈیک توں بعد اَسیں سوہنے کنڈے اُتے مِلاں گے،اَسیں سوہنے کنڈے اُتے مِلاں گے۔♪ “ جدوں اَسیں مردے آں ،اِسیں دریائے یردن نُوں پارکراں گے۔ دریائے یردن موت دا دریا اے۔ یسوُع نُوں ایس موت دے دریاوِچ بپتسمہ دِتاگیا،کیوں جے اوتھے اوہنے دُنیا دے سارے پاپ چُک لئےتے ”پاپ دی مزدوری موت اے۔“
بپتسمہ جیہڑاساڈے پاپ منتقل کردااے
نویں عہدنامہ وِچ ہتھاں دا مشابہ کیہ اے؟
یسوُع دا بپتسمہ
متی ٣:١٣۔١۷ وِچ اَسیں پڑھدے آں، ” اوس ویلے یسوُع گلیل توں یردن دے کنارے یوحنا کول اوہدے کولوں بپتسمہ لئی آیا۔پریوحنا ایہہ آکھ کے اوہنوں منع کرن لگا پئی میَں آپ تیرے کولوں بپتسمہ لین دا محتاج آں تے تُوں میرے کول آیں ؟یسوُع نیں جواب وِچ اوہنوں آکھیاہُن توں ہون ای دےکیوں جےسانُوں ایسے طرحاں ساری راستبازی پوری کرنا مناسب اے ۔ایہدے تے اوہنے ہون دِتا۔تے یسوُع بپتسمہ لےکے اوسے ویلے پانی دے اُتے آیا تے ویکھو اوہدے لئی اَسمان کھل گیا تے اوہنے خُدادے رُوح نُوں کبوتر دی شکل وِچ اُتردیاں تے اَپنے اُتے آندیاں ویکھیا۔ تے ویکھواَسمان اُتوں ایہہ آواز آئی پئی ایہہ میرا سوہنا پُتراے جِیہدے توں میَں خوش آں۔“
یسوُع دریائے یردن اُتے آیا تے یوحنا اصطباغی کولوں بپتسمہ لیا ۔اوہنے یوحنا نُوں حکم دِتا، ”مینوں بپتسمہ دے۔“ یوحنا نیں جواب دِتا، ” پرمیَں آپ تیرے کولوں بپتسمہ لین دا محتاج آں تے تُوں میرے کول آیں ؟ “ اَسمانی تے زمینی سردارکاہن اِک دُوجے نال ملے۔
عبرانیوں دے خط دے مطابق ،یسوُع مسیِح ملکِ صدق دے طورتے ابدتیک سردار کاہن ایں ۔ ایہدا مطلب اے یسوُع اِنسانی نسب نامہ دے بغیر اے ۔اوہ نہ تے ہارون دی پیِڑھی وِچوں سی تے نہ ای کِسے زمینی بندے دی پیِڑھی وِچوں ایں ۔ اوہ خُداداپُتر ،یعنی ساڈا بناؤن والااے ۔اوہ جیہڑا ہے سوہے؛ایس لئی ،اوہ بے نسب نامہ ایں ۔یسوع نے اَسمانی قوت تےجلال نُوں چھڈدِتا تے اَپنے لوکاں نُوں بچاؤن لئی زمین اُتے آگیا ۔
اوہدے ایس دُنیا وِچ آؤن دا مقصد اوہناں سارے پاپیاں نُوں بچانا سی جِنہاں نیں ابلیس دی مکاری دے سبب دُکھ جھلیا ۔ نالے ہور اوہنے یوحنا کولوں بپتسمہ لین دے سبب دُنیا دے سارے پاپ اَپنے اُتے لے لئے۔”یسوُع نیں جواب وِچ اوہنوں آکھیاہُن توں ہون ای دےکیوں جےسانُوں ایسے طرحاں ساری راستبازی پوری کرنا مناسب اے ۔ ایہدے تے اوہنے ہون دِتا۔“
” ہُن توں ہون ای دے “ ہون ای دے!یسوُع نیں سارے اِنساناں دے نمائندہ نُوں حکم دِتا تے بپتسمہ لین لئی اَپنا سرجھکادِتا ۔پُرانے عہد نامہ وِچ جدوں قربانی نُوں خُدادے حضُور چڑھایاجانداسی تےسردارکاہن پاپاں دی قربانی دے پسُودے سراُتے ہتھ رکھن نال ایہدے اُتے پاپ لد دیندے سَن۔ کسے دے ہتھ رکھن‘ توں مراد اے ’ منتقل کرنا۔‘
یسوُع نیں یوحنا اصطباغی کولوں بپتسمہ لیا ۔ ایہدے توں مراد اوہوای سی جیہڑا پُرانے عہدنامہ
وِچ ہتھ رکھن توں سی ،یعنی ’ اُتے منتقل کرنا ‘ ، ’ دفن ہونا ‘ ،’دھویاجانا ‘ ،تے ’قربانی چڑھانا ‘ ، ایہناں ساریاں دا اِکو ای مطلب اے ۔نواں عہدنامہ سچیائی اے جد کے پُراناعہدنامہ پرچھاواں ایں۔
پُرانے عہدنامہ وِچ جدوں پاپی بَرّے اُتے اَپنے ہتھ رکھداسی ،تے اوہدا پاپ بَرّے اُتے منتقل ہوجانداسی تے بَرّےنُوں قربان ہونا پینداسی ۔ جدوں اوہ بَرّہ مرجانداتے اوہنوں دفن کر دِتاجانداسی ۔ جیہڑا شخص اوہدے اُتے ہتھ رکھدا اوہدے پاپ اوس بَرّے اُتے منتقل ہوجاندے سَن ،ایس لئی بَرّہ پاپاں دی وجہ توں ذبح کیتاجانداسی؛جے پاپ بَرّےاُتے منتقل ہوجاندے سَن، تے کیہ جِنہیں قربانی دے نظام دے مطابق بَرّےنُوں پیش کیتا ،پاپ دے اَڈ ہو سکداسی؟ آہو۔
اِنج آکھ لووپئی ایہہ رومال پاپ اے تے ایہہ مائیکروفون ، بَرّہ اے۔جدوں میَں اپنے ہتھ ایس
مائیکروفون اُتے رکھدا آں ،تے ایہہ پاپ ایس مائیکروفون ،یعنی بَرّے اُتے منتقل ہو جاندااے۔خُدا نیں خُود فیصلہ کیتا پئی اِنج ہووےگا ۔ ” اَپنے ہتھ اوہدے اُتے رکھو۔“ پُرانے عہد نامہ دے دَور وِچ پاپاں توں مکتی حاصل کرن لئی اِک شخص نُوں اَپنےہتھ قربانی دے سراُتے رکھنے پیندے سَن ۔ایہدے بعد ،اوہ بےپاپ بن سکداسی ۔ایسے طرحاں ،یسوُع دے بپتسمہ توں مراد دھونا ،دفن ہونا تے دُنیا دے پاپاں نُوں اوہدے اُتے منتقل کرنا سی ۔ ایہہ بالکل صحیح اے پئی ایہدا کیہ مطلب اے ۔
ساری راستبازی نُوں پوراکرن داکیہ مطلب اے؟
ایہدا مطلب یسوع اُتے پاپاں نُوں منتقل کرن دے راہیں سارے پاپاں نُوں دھونا اے
ایس لئی ،جدوں یسوُع نُوں دُنیا دے سارے پاپ چُکن لئی بپتسمہ دِتاگیا ،تے کیہ واقعی سارے پاپ اوہدے اُتے لد دِتے گئے سن ؟ دُنیا دے سارے پاپ یسوُع اُتے منتقل کردِتے گئے تے سارے لوکاں نُوں مکتی مل گئی ۔ ایہہ بالکل اِنج سی جِویں پُرانے عہدنامہ وِچ قربانی دے پسُو اُتے پاپ لد دِتے جاندے سَن۔ یسوُع گلیل توں یردن اُتے آیا تے یوحنا نُوں آکھیا، ” ہُن تُوں ہون ای دے کیوں جے سانُوں ایسے طرحاں ساری راستبازی پوری کرنی مناسب اے۔“ (متی۳:۱۵)۔
فیر ،یوحنا نیں یسوُع نُوں بپتسمہ دِتا ۔یسوُع نیں یوحنا نُوں دَسیا پئی بپتسمہ لین دے سبب اوہناں لئی
ساری راستبازی پوری کرنا مناسب اے ’ ساری راستبازی‘ توں مرا د اے’ بالکل ٹھیک تے مناسب ۔ ‘ ’ ایسے طرحاں‘ ،دُوجے لفظاں وِچ ، بپتسمہ دے طریقے نال ، ساری راستبازی پوری ہوئی سی۔ ایہدے توں ایہہ مرادسی پئی یوحنا دا یسوُع نُوں بپتسمہ دینا ٹھیک سی تے یسوُع دا یوحنا کولوں بپتسمہ لینا،یعنی سارے پاپاں نُوں یسوُع اُتے لدن دی لوڑسی۔
خُداوندیسوُع دے بپتسمہ ، سولی اُتے اوہدی قربانی تے ساڈے ایمان دی بنیاد اُتے سانُوں مکتی
بخش دااے۔ ”سارے لوک پاپ دے سبب دُکھ پاؤندے نیں تے اَپنے پاپاں دی وجہ توں اِبلیس ہتھو ں دُکھ سہندے نیں۔ ایس لئی ،ایہناں دے بچن تے اَسمان اُتے جان لئی ،تینوں ، اِنسانی پیِڑھی دے نمائندہ تے ہارون دی نسل دے طورتے ،مینوں سارے لوکاں لئی بپتسمہ دینا چاہیدا اے ۔میَں تیرے کولوں ،یوحنا، بپتسمہ لواں گا ۔ فیر مکتی داکم توڑ اَپڑےگا ۔“
یوحنا نیں جواب دِتا، ” میَں سمجھ گیا۔ “
ایس لئی ،یوحنا نیں یسوُع نُوں بپتسمہ دِتا ۔ اوہنے یسوُع دے سر اُتے اَپنے ہتھ رکھے تے دُنیا دے سارے پاپ یسوُع اُتے لد دِتے ۔ اِنج ، یسوُع اوہ مکتی داتابن گیاجِنہیں ساڈے سارے پاپ دھودِتے ۔ ہُن ،اوہدی مکتی اُتے ایمان لیان نال اَسیں بچ سکدے آں ۔کیہ تُسیں ایمان رکھدے او؟
یردن اُتے اوہدے بپتسمہ دے بعد ،سارے اِنساناں دے نمائندہ دے ہتھاں دے راہیں ،یسوع نیں اَپنی خدمت وِچ پہلا کم ایہہ کیتا پئی اوہ اَپنے سر اُتے دُنیا دے سارے پاپ چُک کے ساڈھے تِن ورہے تیکر سفر تے منادی کردارہیا ۔
اوہنے زنادے کم وِچ پھڑی جان والی زنانی نُوں دَسیا ، ” میَں وی تیرے اُتے حکم نئیں لاندا “ اوہ اوہدے اُتے حکم نئیں لا سکدا سی ،ایس لئی پئی اوہنے زنانی دے سارے پاپ اَپنے اُتے لے لئے سَن تے اوہناں دی خاطر اوہ صلیب اُتے اَپنی جان قربان کرن لئی تیار سی ۔ گتسمنی دے مقام اُتے دُعاکردے ہویاں ،اوس نیں تِن واری اَپنے پیو اَگے درخواست کیتی ، پئی جے ہوسکے تے ایہہ پیالہ میرے توں ٹال دے پر چھیتی ای ایس گل نوں پِچھاں سُٹ کے آکھیا ،”تے فیر وی میری نئیں سگوں تیری ای مرضی پوری ہووے۔“
”ویکھو!ایہہ خُدا دابَرّہ اے جیہڑا دُنیا دا پاپ چُکی لے جاندااے۔“
یسوُع نیں کِنّے پاپ چُک لئے؟
دنیا دے سارے پاپ
یوحنا١:۲۹ بیان کردااے، ” دُوجے دِن اوہنے یسوُع نُوں اَپنے وَل آؤندیاں ویکھ کے آکھیاویکھو ایہہ خُدادابَرّہ اےجیہڑا دُنیا دا پاپ چُکی لےجاندااے۔“ یوحنا اصطباغی نے یسوُع نُوں بپتسمہ دِتا تے دُوجے دِن ،یسوُع نُوں اپنے ول آؤندے ویکھ کے لوکاں نُوں دَسیا، ” ویکھو !ایہہ خُدادابَرّہ اےجیہڑا دُنیا دا پاپ چُکی لےجاندااے۔“ ایہہ اوہدی گواہی سی ۔
خُدا دا پُتر ایس دُنیا وِچ آیا تے اوہنے ایس دُنیا دے سارے پاپ چُک لئے ۔یوحنا اصطباغی نیں دُوجی وارگواہی دِتی ۔یوحنا ١:٣٥۔٣۶ وِچ لِکھیا اے ، ” دُوجے دِن فیر یوحنا تے اوہدے چیلیاں وِچوں دو شخص کھلوتے سَن ۔اوہنے یسوُع اُتے جیہڑا جارہیا سی نظرکرکے آکھیاویکھو ایہہ خُدادابَرّہ اے!“
خُدادابَرّہ ایس سچیائی دی گواہی دیندا اے پئی یسوُع پُرانے عہدنامہ وِچ ظاہر کیتی گئی قربانی دا سچا تے حقیقی وجود اے،جیہڑی اِسرائیل دے پاپاں د ی خاطر قربان ہوندی سی ۔ میرے تےتُہاڈے لئی ،خُداداپُتّر تےساڈاخالق ، ایس دُنیا وِچ آیا تے ساڈے سارے پاپاں نُوں؛ ایس دُنیا دی پیدائش توں خاتمہ دے دِن تیکر روز مرّہ دے پاپ توں لےکےساڈی ساری بدکاریاں تیکر ،ساڈی کوتاہیاں توں لےکےساڈیاں خطاواں تیکرچُک لیا۔ اوہنے بپتسمہ تے صلیب اُتے اَپنا خون وگان دے راہیں سانُوں مکتی
بخشی ۔
یسوُع نیں ساڈے سارے پاپ چُکےتےسانُوں ،یعنی ایمانداراں نُوں، کامل مکتی بخشی ۔ کیہ تُسیں ایس گل نُوں سمجھ سکدے او؟ ” ایہہ خُدادابَرّہ اے جیہڑا دُنیاداپاپ چُکی لے جاندااے۔“
گھٹوگھٹ دوہزاروَرہے لنگھ چُکے نیں جدوں اوہ ایس دُنیا وِچ جمیا،تے ٣۰ ویں مسیحی صدی وِچ ، یسوُع نیں ساڈےسارےپاپ چُک لئے۔اِک بعد اَز مسیح اوہ وَرہاسی جدوں یسوُع پیدا ہویا سی۔اَسیں مسیِح توں پہلاں دے دَور نُوں قبل اَز مسیِح آکھدےآں۔ گھٹوگھٹ دو ہزار وَرہے لنگھ چُکے نیں جدوں
یسوُع ایس دُنیا وِچ آیا۔
سَن ٣۰ بعد اَز مسیِح وِچ ،یسوُع نیں یوحنا اصطباغی کولوں بپتسمہ لیا، تے دُوجے دِن یوحنا نیں پُکارکے لوکاں نُوں آکھیا ،”ویکھو!ایہہ خُدادابَرّہ اے جیہڑا دُنیاداپاپ چُکی لےجاندا اے۔“ ، ”ویکھو!“ اوہنے لوکاں نُوں دَسیا پئی یسوُع اُتے ایمان لیاؤ ،جِنہیں ساڈے سارے پاپ چُک لئے ۔اوہ گواہی دے رہیا سی پئی یسوُع خدا دا بَرّہ اے،اجیہا جِنہیں سانُوں سارےپاپاں توں مکتی بخشی۔
یسوُع نے ساڈےسارےپاپ چُک لئےتےپاپ دے خلاف ساڈی ہمیش دی جنگ نُوں ختم کر دِِتا ۔ہُن اَسیں پاپ توں اَڈ آں کیوں جے خُدادےپُتر نے اوہناں نُوں چُک لیا۔ یوحنا اصطباغی نیں گواہی دِتی پئی یسوُع نیں دُنیا دےسارےپاپ چُک لئے جِنہاں وچ میرے تے تہاڈے پاپ وی شامل نیں۔ ”اوہ گواہی لئی آیا پئی نُوردی گواہی دےتاں پئی سبھے اوہدے راہیں ایمان لیاؤن ۔“ (یوحنا۱:۷)۔
یوحنا دی گواہی دے اَڈ اَسیں کِس طرحاں جان سکدے ساں۔ پئی یسوُع نیں ساڈے پاپ چُک لئے؟بائبل مقدّس سانُوں بڑی واراں دَسدی اے پئی اوہ ساڈی خاطرمویا،پرصرف یوحنا اصطباغی نیں واضح طورتے گواہی دِتی پئی اوہنے ساڈے سارے پاپ چُک لئے۔
دُنیا داپاپ کِنّاپاپ اے؟
دُنیا دے شروع تو ں لے کے اخیرتیکر اِنسان ذات دےسارےپاپ
یسوع دی موت دے بعد بوہتیاں نیں ایس سچیائی دی گواہی دِتی ،پر صرف یوحنا نیں ایہہ گواہی اوسے ویلےدِتی جدوں اوہ زندہ سی ۔ بے شک ،یسوُع دے چیلیاں نیں وی یسوُع دی مکتی دی گواہی دِتی ۔ اوہناں نیں گواہی دِتی پئی یسوُع نیں ساڈےسارے پاپ چُک لئے یعنی اوہ ساڈا مکتی داتااے ۔
یسوع نیں دُنیاداپاپ چُک لیا۔پڑھن والے بھائیو،ہُن ایس ویلے تُہاڈی عمر خورے سووَرہے نئیں اے کیہ تُسیں سوورہےدے او؟یسوُع نیں اوس ویلے دُنیا دے سارے پاپ چُکے جدوں اوہدی عمر ٣۰ ورہے سی۔ آؤ ایس خاکے اُتے غور کریے۔
اِنج آکھو پئی ایہہ آدم دا یسوُع توں چارہزاروَرہےپہلاں دا دَورسی جدوں پہلااِنسان پیدا ہویا۔ ایس ویلے دوہزار وَرہیاں توں بھورا اجیہا اُتے اے جد یسوُع آچُکیا اے ۔ سانوں ایہہ وی پتہ نئیں پئی دُنیا داسلسلہ کدتیکر باقی رہوےگا،پرخاتمہ لازمی طورتےہون والا اے۔ اوہ فرماؤندا اے ، ” میَں الفاتے اومیگا ،اول تے آخر ،ابتداتے انتہاآں۔“(مکاشفہ ۲۲:۱۳)۔
ایویں ،پکے طورتے خاتمہ ہووےگا۔تے اَسیں ایس نقطے اُتے آں جیہڑا ۲۰۲۰ وَل اشارہ کررہیا اے ۔ یسوُع نیں ٣۰ بعد اَز مسیِح وِچ ساڈے پاپ چُک لئے ، تےایہہ اوہدے صلیب اُتے جان دین تو ں تِن وَرہے پہلاں ہویا۔
”ویکھو!ایہہ خُدادابَرّہ اے جیہڑا دُنیاداپاپ چُکی لےجاندااے۔“ اوہنے دُنیا دے پاپ چُک لئے ،یعنی میرے تے تُہاڈے پاپ۔اَسیں یسوع دی پیدائش توں گھٹوگھٹ دوہزاروَرہے بعددے دَور وِچ آں تے یسوُع دے پاپ چُکن دے دوہزاروَرہے بعد دے دَوروِچ حیاتی بسرکررہے آں۔ اَسیں ہُن وی حیاتی لنگھاندے تے اَسیں دِن رات ایس دَور وِچ لگاتار پاپ کردے آں، فیروی ،یسوُع خُدا دا بَرّہ اے جِنہیں پہلاں ای دُنیا دے پاپ چُک لئے ۔
اَسیں اوسے ویلے ایس دُنیا وِچ حیاتی لنگھانا تے پاپ کرنا شروع کر دے آں جس گھڑی ساڈی
پیدائش ہوجاندی اے۔ کیہ اَسیں اَپنی پیدا ئش دے ویلے توں ای پاپ کردے آں، یاں اَسیں ایویں نئیں کردے؟— اَسیں اِنج ای کردے آں— آؤ اَسیں ایس گل دا جائزہ لیئے ۔اَپنی پیدائش دے دِن توں دس وَرہے دی عمر تیک ،اَسیں پاپ کردے آں یاں نئیں کردے ؟— اَسیں پاپ کردےآں —تے فیر ،کیہ اوہ پاپ یسوُع نیں چُکے یاں نئیں ؟—آہو اوہنے چُک لئے—کیوں جے سارے پاپ یسوُع نیں چُک لئے سَن ایس لئی اوہ ساڈا مکتی داتا اے۔ جے اوس نیں اِنج نئیں کیتا،تے فیر او کِویں ساڈامکتی داتا ہوسکدااے ؟ سارے پاپ یسوُع نیں چُک لئے ۔
١١توں ۲۰ وَرہے دی عمر تیک ،کیہ اَسیں پاپ کردے آں،یاں نئیں ؟ اَسیں اَپنے دِلاں وِچ تے
عملی طورتے پاپ کردےآں۔ ۔ ۔ ۔ اَسیں اِنج کرن وِچ بوہت ماہرآں ۔ سانُوں سکھایاگیا اے پئی پاپ
نہ کریےپر اَسیں فطرت تو ں مجبور اِنج کرن وَل دھیان رکھدے آں۔
خُدا سانُوں دَسدا اے پئی یسوُع نیں اوہناں سارےپاپاں نُوں چُک لیا ۔اوہ جان دا اے اَسیں کِنّے پاپی ساں ایس لئی ،اوہنے پہلاں ای ایہناں پاپاں نُوں چُک لیا۔
اَسیں ایس دُنیا وِچ عام طورتے کِنّی دیر تیکر زندہ رہندے آں ؟آؤ فرض کریے ایہہ گھٹوگھٹ ۷۰وَرہے نیں ۔ جے اَسیں سارے پاپاں نُوں اِکٹھاکریے جیہڑے اَسیں اوہناں ستر وَرہیاں دے وِچ کیتے ،تے ساڈاکِنّاں وزن ہووے گا ؟جے اَسیں اوہناں نُوں اَٹھ ٹن وزن چُکن والے ٹرکاں اُتے لد دِیے،تے خورے اَسیں سووزن چُکن والے ٹرکاں توں وی بوہتیاں وِچ ختم ہو جائیے۔
بھوراوچارکرن دی کوشش کرو اَسیں اپنی پوری حیاتی وِچ کِنّے پاپ کراں گے۔ کیہ اوہ دُنیا دے پاپ نیں، یاں نہیں؟ اوہ دُنیا دے پاپاں دا حصہ نیں ۔ اَسیں پیدائش توں ،١۰سال تیک ، ١۰ توں۲۰تیک ، ۲۰ توں ٣۰ ورہے تیک۔ ۔ ۔ ۔جد تیکر اَسیں مرنئیں جاندے ، پاپ کردے آں ، پر اوہ سارے پاپ دُنیا دے پاپاں وِچ شامل نیں جیہڑے پہلاں ای یسوُع اُتے اوہدے بپتسمہ دےراہیں منتقل ہوگئےسَن ۔
اِنسان دا مکتی داتا،یسوُع مسیِح
یسوُع نیں کِنّے پاپ چُک لئے؟
ساڈے پیو دادادے،ساڈے ،ساڈی اولاد دے دُنیا دے آخرتیک دےسارے پاپ
یسوُع سانُوں دَسدااے پئی اوہنے سارے پاپاں نُوں دھون لئی جِسم وِچ جنم لیا۔ پر یسوُع ، خُود ای بپتسمہ نہیں لے سکداسی ،ایس لئی خُدانیں اَپنے خادم یوحنا نُوں اَگے گھلیا ، جیہڑا پوری اِنسانی پیِڑھی دا چُنیاہویا نمائندہ سی ۔جِویں ایہہ لِکھیاہویا اے، ’ اوہداناں عجیب مشیر خدائے قادرابدیت داپیوتے سلامتی دا شہزادہ ہووے گا۔‘ اوہنے خُوداپنی حکمت تے اپنی مشورت دے راہیں اَپنے اَگے لوکاں دا نمائندہ گھلیا، تے یسوُع ،خُود خُدا دا پُتر،دُنیا دے سارےپاپاں نُوں اَپنے اُتے چُکن لئی جِسم وِچ آیا ۔ کیہ ایہہ خُدا دے
ڈونگھے فضل دی عجیب مکتی نئیں؟
ایہہ بڑی حیرانی دی گل اے، کیہ ایہہ اِنج نئیں ؟ ایویں ، صرف اِکوواری یوحنااصطباغی کولوں بپتسمہ لین دے راہیں ،اوہنے پوری دُنیا بھردے اِنساناں دےپاپ دھودِتے تے صلیب اُتے جان دین دے سبب ہراِک نُوں،اِکو واری تے ہمیش لئی ،رہاکردِتا ۔ ایہدے بارے سوچو ۔آؤ اَپنے سارےپاپاں اُتے ۲۰ توں٣۰ ،٣۰توں ۴۰،۴۰توں ۶۰ ، ۷۰ تیک ،سوسال دی عمر تیکر دے ،تےتُہاڈے بچیاں دے پاپاں اُتے وی غورکریے۔ کیہ اوہنے اوہناں دے سارےپاپ مٹادِتے یاں اوہنے نہیں مٹائے ؟ جی ہاں ، اوہنے اِنج ای کیتا ۔اوہ یسوُع مسیِح ،یعنی پوری اِنسانی پیِڑھی دانمائندہ اے ۔
کیوں جے یوحنا اصطباغی نیں ساڈے سارے پاپ یسوُع اُتے لد دِتے ۔ تے کیوں جے خُدا نیں اِنج ای منصوبہ تیارکیتا سی ،ایس لئی اَسیں یسوُع اُ تے ایمان لیاؤن دے راہیں مکتی حاصل کر سکدے آں ۔
کیہ میَں تے تُسیں پاپی آں؟کیہ ساڈےسارے پاپ یسوُع اُتے لددِتے گئے یاں نئیں؟— اَسیں آئندہ توں پاپی نئیں کیوں جے پہلے ای ساڈے سارے پاپ یسوُع اَپنے اُتےلےچُکیا اے—
کون ایہہ آکھن دی جُرأت رکھدا اے پئی دُنیاوِچ پاپ موجوداے؟یسوُع نیں دُنیادے سارے پاپ چُک لیے ۔ اوہ جان داسی پئی اَسیں پاپ کراں گے ، ایس لئی اوہ ساڈے مستقبل دےوی پاپ چُک کےلےگیا۔ ساڈے وِچوں کُجھ لوکاں د ی عمر حالے ٥۰وَرہے وی نئیں ہوئی تے کُجھ لوکاں نیں ہُن تیکر اپنی اَدھی عمر وی نئیں لنگھائی ،پراَسیں اپنے بارے گل کردے آں ،جِنہاں وِچ میَں وی شامل آں،جِویں پئی اَسیں ابدتیکر حیاتی بسرکراں گے۔
ساڈے وِچوں بوہت سارے لوک سرکشی دی حیاتی بسرکردےنیں۔مینوں ایس گل دی ایس طرحاں وضاحت کرن دی اجازت دیوو۔ مئی دے مہینہ دی مکھی دی حیاتی دے کُل ویلےدا اَدھ کِنّاں ہوندااے ؟ ایہہ تقریباً ١۲گھنٹے دا ہوندااے۔
”میرے خدایا !میری اِک شخص نال ملاقات ہوئی تے اوہنے میرے اُتے مکھی مارگھمایا!قریب سی پئی میَں مرن لئی میدی جاندی ،تے تُسیں جان دے او، میَں اپنی اَدھی عمر وِچ ایہو جیہے کِسے ظالم شخص دے نال کدی نئیں ملی۔“ ایہہ بس ۱۲ گھنٹے زندہ رئی سی تے گل کرنا بند نئیں کرسکدی۔ پر ، اوہدی ادھی زندگی پہلے ای لنگ چکی سی۔
شام دے ست یاں اُٹھ وجے ، اوہنے اپنی حیاتی دے چانن نُوں مٹھا پیندے ویکھیا تے کُجھ ای دیر بعد،مرگئی ۔کُجھ مکھیاں ۲۰گھنٹے ،زندہ رہندیاں نیں، کُجھ ۲١،تے کُجھ ۲۴گھنٹے دی لمبی عمرگزار دیاں نیں۔ خورے اوہ اپنی لمبی عمردےتجربے بیان کرن پر ایہہ سانُوں کِس طرح نظر آؤندا اے ؟ جدوں اَسیں ۷۰ یاں ٨۰ وَرہے دی عمر بسرکرلیندے آں ۔تے خورےاَسیں آکھدے آں ،” مینوں ہنساؤن دی کوشش نہ کرو۔“ اوہناں دا تجربہ ساڈی نظر وچ بالکل کُجھ نہیں ۔
آؤ ایہہ مثال خُدا تے اپنے تعلق اُتے عائد کریے ۔خُدا ابدی اے۔ اوہ ابدیت تیکر قائم رہندااے۔ اوہ دنیا دے شروع ہون تے ختم ہوجان دا فیصلہ کردا اے۔ جد اوہ ابد تیکر قائم رہندا اے تے اوہ ابدی وقت دے سانچے توں ودھ کے ہمیشہ تیک زندہ اے ۔ اوہ اپنی ابدیت دے اُتوں ساڈے تے
نظر کردااے۔
اِک واری د ی گل اے، اوہ دُنیا دے سارے پاپ چُک لے گیا،صلیب اُتے مرگیا تے ایہہ آکھیا، ” تمام ہویا۔“ اوہ تِن دن بعد مویاں وِچوں جی اُٹھیا تے اَسمان اُتے چلا گیا اوہ ہُن ابدیت وِچ قائم اے۔ ہُن ،اوہ اُتوں ساڈے وِچوں ہر اِک نُوں ویکھ رہیا اے۔
اِک شخص کہندا ے ، ” اے سوہنے بھائی ، میَں بوہت پاپ کیتے نیں ۔بھاویں میَں صرف ۲۰ وَرہے لنگھائے نیں میَں بوہت سارے پاپ کیتے نیں۔ “ ”میَں صرف٣۰ وَرہے حیاتی بسر کیتی تے بوہت سارے پاپ کیتے نیں ۔ایہہ بوہت ای زیادہ نیں ۔ میَں بھلا کِویں پاپاں توں مکتی پا سکنا آں؟ “
پرساڈاخُدااپنی ابدیت وِچ آکھےگا،” میرے نال مذاق نہ کرو۔ میَں نہ صرف ہُن تیکر تہاڈے پاپ معاف کردِتے سگوں تہاڈے پیو دادادےجیہڑے تہاڈے توں پہلاں پیدا ہوئے سَن تے تُہاڈے بالاں دیاں ساریاں پیِڑھیاں دے پاپ معاف کردِتے نیں، یعنی جیہڑی تُہاڈی موت توں بعد حیاتی بسرکرن گئیاں۔“ اوہ ابدی ویلے دے سانچے وِچوں تُہانوں ایہہ آکھدااے ۔ کیہ تُسیں ایہدے اُتے ایمان رکھدے او؟ایہدے اُتے ایمان رکھوتے مکتی دی اوس نعمت نُوں حاصل کرو، جیہڑی تہُانوں مفت دِتی گئی اے۔ اَسمان دی بادشاہی وِچ داخل ہووو۔
اپنے خیالاں وِچ اپنے آپ نُوں قید نہ کروسگوں خُدادے کلام اُتے ایمان رکھو ۔ سانُوں ایسے طرحاں ساری راستبازی پوری کرنا مناسب اے۔ ساری راستبازی خُدادےبَرّے دے راہیں جِنہیں دُنیا دےپاپ چُک لئے پوری کردِتی گئی ۔ یسوُع دُنیا دے سارے پاپ چُک کے لے گیا ۔ کیہ اوہنے اِنج کیتا یاں نئیں کیتا ؟اوہنے اِنج ای کیتا ۔
یسوُع نیں صلیب اُتے اپنے آخری ساہ توں بالکل پہلے کیہ آکھیا؟
” تمام ہویا “
یسوُع مسیِح نیں اپنے بپتسمہ دے راہیں، دُنیا دےسارے پاپ چُک لئے، پنطس پیلاطُس دے کٹہرے وِچ اوہدے اُتے موت دا فتویٰ دِتاگیاتے اوہنوں سُولی اُتے چاہڑیا گیا ۔
”تےاوہ اپنی صلیب آپ چُک کے اوس جگہ تیکر باہر گیا جیہڑی کھوپڑی دی تھاں اَکھواندی اے۔ جیہداترجمہ عبرانی وِچ گُلگتا اے۔اوتھے اوہناں نیں اوہنوں تے دوہوربندیاں نُوںمصلوب کیتا۔اِ ک نُوں ایدھرتے اِک نُوں اودھرتےیسوُع نُوں وِچکار ۔تے پیلاطُس نیں اِک تختی لِکھ کے صلیب اُتے ٹنگ دِتی ۔اوہدےاُتےلکِھیاسی ۔یسوُع ناصری یہودیاں دابادشاہ ۔ایس تختی نُوں بوہت سارے یہودیاں نیں پڑھیا۔ ایس لئی پئی اوہ تھاں جِتھے یسوُع مصلوب ہویا سی شہرےدےلاگےسی تے اوہ عبرانی ،یونانی تے لاطینی وِچ لِکھی ہوئی سی۔ “ (یوحنا ۱۹:۱۷ ۔۲۰)
آؤبھوراغورکریے۔اوہدے صلیب اُتے مصلوب ہون دےبعدکیہ ہویا، ” ایہدے بعد جدوں یسوُع نیں جان لیاپئی ہُن ساریاں گلاں پوریاں ہوگئیاں نیں تاں پئی نوِشتہ پورا ہووے تے آکھیامیَں پیاسا آں۔اوتھے سرکےنال بھریاہویا اِک بھانڈارکھیاسی۔ ایویں اوہناں نیں سِرکےوِچ ڈبوئے ہوئے سپنج نُوں زُوفےدی ٹہنی اُتے دھرکراوہدے منہ نال لایا ۔تےجدوں یسوع نیں اوہ سرکہ پیتا تے آکھیا تمام ہویاتےسرجھُکاکےجان دے دِتی ۔“ (یوحنا ۱۹:۲۸۔۳۰)
سرکہ پین دے بعد اوس نیں آکھیا،” تمام ہویا! “تےاَپناسِرجھُکاکےجان دے دِتی ۔اوہ سچی مُچی مرچُکیا سی ۔یسوُع مسیِح تِن دن بعد دوبارہ مُردیاں وِچوں جی اُٹھیاتے اَسمان اُتے چڑھ گیا۔
آؤاَسیں عبرانیوں ١۰:١۔۹ وَل دھیان کریے۔” کیوں جے شریعت جیہدے وِچ آن والیاں چنگیاں شیواں دا پرچھاواں ایں تے ایہناں شیواں دی اصلی صورت نئیں ایہناں اِکوای طرحاں دیاں قربانیاں جیہڑیاں ہر وَرہے بلاناغہ گزرانیاں جاندیاں نیں کول آن والیاں نُوں بالکل کامل نئیں کرسکدیاں۔ ورنہ ایہناں دا چڑھانا ختم نہ ہوجاندا؟کیوں جےجدوں عبادت کرن والے اِکو واری پاک ہوجاندےنیں تے فیر ایہناں دا دِل ایہناں نُوں پاپی نہ ٹھہراندا۔سگوں اوہ قربانیاں سال بہ سال پاپاں دی یاد دلاندیاں نیں ۔کیونکہ ممکن نئیں پئی ٹہگیاں تے بکریاں دا خون پاپاں نُوں دُورکرے۔ ایس لئی اوہ دُنیا وِچ آن ویلے آکھدااے پئی توں قربانی تے نذرنُوں پسند نہ کیتا ۔ سگوں میرے لئی اِک بدن تیارکیتا۔ پوری سوختنی قربانیاں تے پاپاں دی قربانیاں توں تُوں خوش نہ ہویا۔اوس ویلے میَں آکھیا پئی ویکھ میَں آیا آں۔(کتاب دے ورقیاں وِچ میری نسبت لِکھیا ہویااے ) تاں پئی اَے خدا!تیری مرضی پوری کراں ۔ اُتے تے اوہ آکھدااے پئی تُوں قربانیاں تے چڑھاوےتے پوری سوختنی قربانیاں تے پاپ دی قربانیاں نُوں پسند نہ کیتا تے نہ ایہناں نال خوش ہویا حالاں پئی اوہ قربانیاں شریعت دے مطابق چڑھائیاں جاندیاں نیں۔ اوہ فیر آکھدا اےپئی ویکھ میَں آیا آں تاں پئی تیری مرضی پوری کراں ۔ایویں اوہ پہلے نُوں ختم کرد اے تاں پئی دُوجے نُوں قائم کرے۔“
سدادی مکتی
یسوُع اُ تے ایمان رکھن توں بعد اَسیں کِویں ہرروزپاپاں دامسئلہ حل کرسکدے آں؟
ایہہ پک کرن دے راہیں پئی یسوُع پہلا ں ای اپنے بپتسمہ دی معرفت سارے پاپ مٹا چُکیا اے
دُوجے لفظاںوچ، شریعت یعنی قربانی دا نظام ،آن والیاں چنگیاں شیواں داپرچھانواں ایں۔ پُرانے عہدنامہ دی قربانیاں یعنی بھیڈاں تے بکریاں نیں ساڈےاُ تےظاہر کیتا پئی یسوُع مسیِح ایسے طرحاں ساڈےسارےپاپاں نُوں چُکن لئی آوےگاتاں پئی سارے پاپ دُورکر دیوے۔
پُرانے عہدنامہ دےسارے لوک داؤد،ابرہام ،باقی سبھے وی جان دے تےایمان رکھدے سَن پئی قربانی دانظام اوہناں لئی کیہ مطلب رکھداسی ۔ ایہہ نظام ظاہرکرداسی پئی مسیحا،مسیِح ( مسیِح دامطلب ممسوح بادشاہ اے)کِسے دِن آوےگاتےاوہناں دے سارے پاپ دھو وے گا۔ اوہناں نیں اپنی مکتی اُتے
ایمان رکھیا تے ایمان دے سبب مکتی حاصل کیتی ۔
شریعت اگانہہ دی چنگیاں شیواں داپرچھانواں سی۔دن بدن تے سال بہ سال ،اوہناں دے پاپاں دیاں قربانیاں چاڑھن نال سانُوں کامل مخلصی حاصل نئیں ہوسکدی سی ۔ایس لئی اِک کامل تے ازلی
بے پاپ شخصیت یعنی خُدادے پُتر نُوں ایس زمین تے آناپیا۔
تے یسوع آکھیا،پئی اوہ اپنے پیو دی مرضی نُوں پورا کرن آیا اے،جِویں پئی کتاب دے ورقیاں وِچ اوہدی بابت لِکھیا سی ۔ ”تے فیر ایہہ آکھدااےپئی ویکھ میَں آیاآں تاں پئی تیری مرضی پوری کراں ۔ایویں اوہ پہلے نُوں ختم کردااے تاں پئی دُوجے نُوں قائم کرے۔“ سانُوں ایس لئی اپنےپاپاں توں مکتی ملی جِویں پُرانے عہد نامہ وِچ لکِھیا اے۔ یسوُع مسیِح نے ساڈے پاپ چُک لئے تے ایس لئی وی پئی اَسیں اوہدےاُ تے ایمان رکھدے آں۔
آؤعبرانیوں ١۰:١۰پڑھیے۔ ” اوسے مرضی دے سبب اَسیں یسوُع مسیِح دے بدن دے اِکوواری قربان ہون دے راہیں پاک کیتے گئے آں۔“ اوسے مرضی دے سبب اَسیں یسوُع مسیِح دے اِکوواری تےہمیش لئی قربان ہون دے راہیں پاک ہوگئے آں۔ کیہ اَسیں پاک ہوگئے آں یاں نئیں؟— اَسیں پاک ہوگئے آں—
ایہدا کیہ مطلب اے؟ خُدا باپ نیں اپنے پُتر نُوں گھلیا تے بپتسمہ دے راہیں ساڈے سارے پاپاں نُوں اوہدے اُتے لد دِتا۔ اوہنے قبول کیتا تے اِکو وارتےہمیش لئی اوہناں دی صلیب اُتے سزادِتی ۔ اِنج ،اوہنے سانُوں سب نُوں خلاصی بخشی جیہڑے پاپ دے سبب دُکھ جھل رہے ساں۔ ایہو خُدا دی مرضی سی ۔
سانُوں رہائی بخشن لئی ، یسوُع نیں خُود نُوں ،اِکووارتےہمیش لئی ، قربان کردِتا ،تاں پئی اَسیں پاک ہوسکیے۔ اَسیں پاک ہوگئے آں کیوں جے یسوُع نیں خُود ساڈے سارے پاپاں لئی قربانی دِتی تے ساڈے لئی مر گیاتاں پئی سانُوں سزابرداشت نہ کرنی پوے۔
پُرانے عہدنامہ دی قربانی ہرروز چڑھائی جاندی سی ایس لئی پئی سارے روز مرّہ دے پاپاں نُوں دُور کرن لئی اِک ہورقربانی چڑھاؤن دی لوڑ ہوندی سی ۔
یسوُع دا پطرس دے پیردھون دارُوحانی مطلب
کیہ کوئی ہورپاپ موجود اے جیہدے لئی سانُوں لازمی طورتے توبہ دی دُعا منگنی چاہی دی اے؟
جی نئیں
یوحنا ١٣باب وِچ ،اِک کہانی پائی جاندی اے جیہدے وِچ یسوُع پطرس دے پیر دھوندا اے۔ اوہنے پطرس نُوں ایہہ سکھان لئی اوہدے پیر دھوئے پئی پطرس آئندہ وی پاپ کرے گاتے اوہ پہلاں ای ایہناں ساریاں پاپاں توں رہائی بخش چُکیا سی ۔ یسوُع جان دا سی پئی پطرس مستقبل وِچ وی دوبارہ پاپ کرے گا ،ایویں اوہنے اِک بھانڈے وِچ پانی پایا تے اوہدے پیردھوتے۔
پطرس نیں ناں کرن دی کوشش کیتی ۔پریسوع نیں آکھیا، ” جو میَں کرداآں تُوں ہُن نئیں جان دا پر بعدوں سمجھیں گا۔“ ایس حوالے دا جیہڑامطلب اے اوہ ایہہ ہے پئی ، ’ تُوں ایہدے بعد فیر پاپ کریں گا ۔تُوں میرا انکار کریں گا تے اپنے سارے پاپاں دے دھوئے جان دے بعد فیرپاپ کریں گا۔ ایتھوں تیکر پئی تُوں میرے اَسمان تے چُکے جان دے بعد وی پاپ کریں گا ۔ایویں میَں اِبلیس نُوں خبردارکرن لئی تیرے پیر دھونداآں پئی تینوں نہ اَزمائے کیوں جے میَں پہلاں ای تیرے مستقبل دے پاپ چُک لئے نیں۔‘
کیہ تُہاڈے خیال وِچ اوہنے سانُوں ایہہ دَسن لئی پطرس دے پیر دھوتے پئی اَسیں ہرروز توبہ کریے؟جی نئیں ۔ جے سانُوں ہرروز مکتی پاؤن لئی توبہ کرنی پیندی ،تے ایہدامطلب ایہہ ہے پئی یسوُع ساڈے سارے پاپاں نُوں اِکوواری تے ہمیش لئی نئیں اُٹھاچُکیا۔
پریسوُع نیں آکھیا پئی اوہنے سانُوں اِکوواری تے ہمیش لئی پاک کردِتا ۔جے سانُوں ہرروز توبہ کرنی پیندی تے اَسیں وی پُرانے عہد نامہ دے دَور وِچ واپس چلے جاندے۔فیرکون راستباز ٹھہرسکداسی ؟ کیہڑا کامل طورتے مکتی حاصل کرسکداسی ؟ایتھوں تیکر پئی خُدااُتے ایمان رکھن دے باوجود ،کیہڑا پاپ دےاَڈ حیاتی بسرکرسکداسی ؟
کیہڑا توبہ دے راہیں پاپ توں پاک ہوسکدااے؟اَسیں بِنا رُکے ہرروز پاپ کردے آں ، ایس
لئی اَسیں کس طرحاں ہراِک تے وکھرےوکھرے پاپ دی معافی منگ سکدے آں؟کِویں اِسیں اینے ڈھیٹ ہوسکدے ساں پئی مخلصی لئی ہرروز اوہنوں تنگ کردے؟ اَسیں دِن دے ڈُبن اُ تے اپنے صبح دے پاپاں نُوں بھُلن دے عادی آں،تے شام دے پاپاں نُوں صبح ویلے ۔ ساڈے لئی اپنے سارے پاپاں توں مکمل طورتے توبہ کرنا ناممکن ایں۔
ایویں یسوُع نُوں اِکوواربپتسمہ دِتا گیا تےاوہنے اِکو ای وار خُود نُوں صلیب اُتے قربان کردِتا تاں پئی اَسیں سبھے اِکوواراِکو ویلے پاک ہوسکیے۔ کیہ تُسیں ایہہ سمجھ سکدےاو؟ سانوں اِکو وار تے ہمیش لئی ساڈے سارے پاپاں توں رہائی حاصل ہوگئی ۔ہرواری توبہ کرکے سانُوں رہائی حاصل نئیں ہوندی ۔
سانُوں ایس ایمان دے سبب ساڈے سارے پاپاں توں مکتی بخشی گئی اے پئی یسوع نیں ساڈے یعنی تُہاڈے تے میرے سارے پاپ چُک لئے۔
”تے ہر اِک کاہن کھلوکے ہرروزعبادت کردااے تے اِکو طرحاں دیاں قربانیاں گھڑ ی مُڑی چڑھاندااے جیہڑیاں بالکل پاپاں نُوں دُور نئیں کر سکدیاں ۔ پرایہہ شخص ہمیش لئی پاپاں دے واسطے اِکوای قربانی چڑھاکے خُدادے سجے پاسے جا بیٹھا۔تے اوسے ویلے توں اُڈیک وِچ اے پئی اوہدے ویری اوہدے پیراں ہیٹھاں دی چوکی بنن۔کیوں جے اوہنے اِکوقربانی چڑھان نال ایہناں نُوں ہمیش لئی کامل کردِتااےجیہڑے پاک کیتے گئے نیں۔ تے رُوح اُلقّدس وی سانُوں ایہہ ای دَسدااے کیوں جے ایہہ آکھن توں بعد پئی ۔ خُدافرماؤندااےجیہڑا عہد میَں اوہناں دِناں دے بعد اوہناں نال بنھاں گا اوہ ایہہ ہے پئی میَں اپنے قانون اوہناں دے دِلاں اُتے لِکھا ں گاتےاوہناں دے ذہن وِچ پاواں گا۔ فیراوہ ایہہ آکھدااے پئی اوہناں دےپاپاں تے بے دینیاں نُوں فیر کدی یادنہ کراں گا۔ تے جدوں اوہناں دی معافی ہوگئی اےتےفیرپاپ دی قربانی ہورنئیں رہی۔“(عبرانیوں ۱۰:۱۱۔۱۸)
اُتلی اَٹھارہویں آیت وِچ،ایہدا کیہ مطلب اے؟،”جد اوہناں دی معافی ہوگئی۔“ ایہدا
مطلب اے پئی خُود پاپ دا ،کوئی وی پاپ کیوں نہ ہووے ، اَڈ شر ط دے ، ہمیشہ لئی کفارہ دِتاگیا اے۔خُدانیں ایہناں نُوں معاف کردِتااے تے سانُوں سب نُوں معاف کر چُکیا اے۔ کیہ تُسیں ایس اُتے ایمان رکھدے او۔”تے جدوں اوہناں دی معافی ہوگئی اےتےفیرپاپ دی قربانی ہورنئیں رہی ۔“
آؤ ایتھوں تیکر ہرشے دا خلاصہ بیان کریے۔دُوجے لفظاں وِچ، جے یوحنا اصطباغی نیں یسوُع
اُتے ہتھ نہ رکھے ہوندے ،جے اوہنے یسوُع نُوں بپتسمہ نہ دِتا ہوندا،تےکیہ اَسیں مکتی حاصل کر سکدے ساں؟نئیں،بالکل وی نئیں!آؤ پُٹھاسوچیے۔جے یسوُع نیں یوحنا اصطباغی نُوں سارے اِنساناں دے نمائندہ دے طورتے نہ چُنیاہوندا تے اوہدے راہیں سارے پاپ اپنے اُتےنہ لئے ہوندے،تے کیہ اوہ ساڈے سارے پاپ دھوسکداسی ؟ اوہ نئیں دھوسکداسی ۔
خُدادی شریعت سچی اے ۔ ایہہ بے عیب اے۔اوہ ایویں نئیں آکھ سکداپئی اوہ ساڈا مکتی داتاسی تے اوہنے ساڈے سارے پاپ چُک لئے۔اوہنوں عملی طورتےساڈے پاپ چُکنےسَن۔ کیوں جےیسوُع ، خُدا،کیوں ساڈے کول جِسم وِچ آیا؟اوہ اپنے بپتسمہ دے راہیں اِنسان ذات دے سارےپاپ چُکن دے سلسلہ وِچ آیا۔ یسوع جان داسی پئی ساڈے دِلاں تے ذہناں توں سارے پاپ نئیں مِٹ سکدے سَن ،جدوں تیک اوہ جِسم وِچ اَبدی قربانی دےطورتے پیش ہون لئی نہ آجاندا۔
جے یسوُع نُوں بپتسمہ نہ دِتا گیاہوندا تے ساڈے پاپ قائم رہندے ۔جے ساڈے پاپاں نُوں اوہدے اُتے پہلا ں لدن توں اَڈ اوہنوں مصلوب کر دِتاگیا ہوندا،تے اوہدا مرنا بے فائدہ ہوجاندا،اوہدا ساڈےنال کوئی تعلق نہ ہوندا۔ایہہ مکمل طورتے بےفائدہ ہوندا۔
ایویں،جدوں اوہنے ٣۰ وَرہےدی عمر توں اپنی عوامی خدمت شروع کیتی تے اوہ دریائے یردن اُتے یوحنااصطباغی کولوں بپتسمہ لین لئی آیا ۔اوہدی عوامی خدمت دی ابتدا ٣۰ وَرہےدی عمر توں ہوئی تے ٣٣ وَرہےدی عمر تے مُک گئی ۔٣۰ وَرہےدی عمر وِچ اوہ یوحنا اصطباغی دے کول آیا تاں پئی اوہدے کولوں بپتسمہ لوے۔”ہُن توں ہون ای دے کیوں جے سانُوں ایسے طرحاں ساری راستبازی پوری کرنا مناسب اے تاں پئی سارے لوک بچ سکن تے راستبازبن سکن ۔ساڈے لئی اِنج کرنا مناسب اے ۔ ہُنے ای ،
مینوں بپتسمہ دے۔“ جی ہاں ،یسوُع مسیِح نُوں سارےلوکاں دی مکتی لئی بپتسمہ دِتا گیا۔
کیوں جے یسوُع نُوں بپتسمہ دِتا گیا تے اوہنے ساڈے پاپ چُک لئے،تے ساڈے سارے پاپ یوحنااصطباغی دے ہتھ رکھن دے سبب اوہدے اُتے منتقل ہوگئے ایس لئی خُود خُدا نیں اَپنیاں اَکھاں یسوُع توں ہٹالیئاں جدوں اوہ سولی اُتے مررہیاسی ۔ بھانویں یسوُع اوہدا اِکو اِک پُترسی ،تے فیر وی اوہنے اپنے پُترنُوں قربان کرنا سی ۔
خُدا محبت اے ،پراوہنوں اپنے پُتر نُوں مرن دی اجازت دینی سی ۔ایہدے بعد ،تِن گھنٹے تیک سارے ملک وِچ ہنیرا چھایارہیا ۔یسوُع مرن توں تھوڑی دیر پہلاں چِلّایا، ” ایلی ایلی لماشبقتنی “ جیہدا مطلب اے، ” اے میرے خُدا!اے میرے خُدا!تُوں مینوں کیوں چھڈدِتا؟ “ یسوُع نیں ساڈے سارے پاپ موہڈیاں اُتے چُک لئے تے صلیب اُتے ساڈی خاطر بے رحم سزا نُوں برداشت کیتا۔ ایویں،اوہنے سانُوں مکتی بخشی ۔یسوُع دے بپتسمہ دے اَڈ ،اوہدی موت بے معنی ہوندی ۔
کیہ تُسیں پاپی یاں راستباز شخص او؟
اِک راستباز شخص اوہ اے جیہڑا اپنے دِل وِچ پاپ نئیں رکھدا
یسوُع جے بپتسمہ دے راہیں ساڈےسارےپاپ اَپنے اُتے لئے اَڈ صلیب اُتے مرگیا ہوندا تے ،اوہدی موت مکتی نُوں پورانہ کرپاندی۔سانُوں کامل رہائی بخشن لئی ،یسوُع نیں یوحنا سارے اِنساناں دے نمائندہ کولوں بپتسمہ لیاتےصلیب اُتے سزانُوں برداشت کیتا،تاں پئی اوہ سب جیہڑے اوہدے اُتے ایمان لیان مکتی پاسکن ۔
ایسی لئی ،یوحنااصطباغی دے دِن توں ہُن تیک اَسمان دی بادشاہی اُتے زور ہوندارہیا اے ۔ کیوں جےیوحنا اصطباغی نیں لوکاں دے سارے پاپ یسوُع اُتے لددِتے ،ساڈے پاپاں دا کفارہ ہوچُکیا اے۔ ایویں ہُن میَں تے تُسیں خُدا نُوں اَپناپیوآکھ کے پکار سکدے تے دلیری نال اَسمان دی بادشاہی وِچ
داخل ہوسکدے آں۔
عبرانیوں ١۰:١٨وِچ لکِھیااے ، ”تےجدوں اوہناں دی معافی ہوگئی اےتےفیرپاپ دی قربانی ہور نئیں رہی ۔“ کیہ تُسیں ہُن وی پاپی او؟ہُن یسوُع نیں پہلاں ای تُہاڈے قرضے اداکردِتےنیں ،کیہ تُہانو ں ہُن وی قرضے اداکرن دی لوڑ اے ؟
اِک شخص سی جِنہوں بوہت زیادہ دارُو نیں بوہت سارے قرضہ لین والیاں دا مقروض کردِتاسی ۔فیر،اِک دِن اوہدے پُتر نیں مہربانی کیتی تے اپنے پیودےسارے پُرانے بِل اَداکر دِتے۔ اوہدے پِئوتے مزید کوئی ہور قرضہ نئیں سی کوئی معنی نئیں رکھدااوہ ہر گھر توں کِنّاں قرضہ لے چُکیاسی۔
یسوُع نیں ساڈے لئی وی اِنج ای کیتااے۔ اوہنے ساڈے پاپاں لئی پیشگی وِچ ای لوڑ توں بوہتا اََََََََََََََََََََََدا کر دِتااے۔صرف ایہناں پاپاں لئی ای نئیں،جیہڑے اَسیں اپنی حیاتی دے وِچ کردے آں سگوں دنیا دے سارے پاپاں لئی وی ۔اوہ سارے یسوُع دے بپتسمہ دے ویلے اوہدے تے منتقل ہو گئےسَن ۔ کیہ
تُسیں ہُن وی پاپی او؟نئیں،تُسیں پاپی نئیں او۔
جے اَسیں شروع توں ایس مخلصی دی خوشخبری نُوں جانیا ہوندا ۔تےساڈے لئی یسوُع اُتے ایمان رکھنا کِنّاآسان ہوندا۔ پرجِویں ہُن ایں ،ایہہ بوہت سارے لوکاں نُوں محسوس ہوندااے پئی اوہ ایہدے بارے حیرانگی دااِظہارکردےنیں۔
پر ایہہ کوئی نویں شے نئیں اے ۔ایہداوجود اِنسان دے مُڈھ توں ای موجود اے۔ اَسیں صرف پہلاں ایہنوں جان دےنئیں ساں ۔پانی تے رُوح دی خوشخبری ہمیشہ توں کلامِ مقدّس وِچ درج سی تے ہمیشہ توں اثر رکھدی سی ۔ ایہہ ہر حال وِچ موجود رہی اے ۔ ایہہ میرے تے تُہاڈے پیدا ہون توں پہلاں بائبل وِچ موجودسی ۔ ایہہ زمین دی تخلیق دے ویلے توں اوتھے موجودرہی اے ۔
اَبدی مکتی د ی خوشخبری
سانُوں خُدادے سامنے کیہ کرنا چاہی دا اے؟
سانُوں لازمی طورتے اَبدی مکتی دی خوشخبری اُتے ایمان رکھنا چاہی دااے
یسوُع مسیِح ، نیں ساڈے سارے پاپ ساڈے توں دُورکردِتے،اوہنے میرے تے تُہاڈے پیداہون توں پہلاں اِنج کردِتا۔ اوہنے اوہناں سارے پاپاں نُوں دُور کر دِتا۔ کیہ تُسیں ہُن وی پاپ دے نال او؟— بالکل نئیں —فیر ایہناں پاپاں دے بارے کیہ خیال اے جیہڑے تُسیں کل کروگے؟اوہ وی دُنیا دےپاپاں وِچ شامل نئیں ۔
آؤ اَسیں ہُن ای کل دے پاپاں نُوں اپنےاُتوں لاہ لئیے ۔ہُن تیکر اَسیں جِنہے پاپ کر چُکے آں اوہ وی دُنیا دے پاپاں وِچ شامل سَن۔ کیہ اوہ پاپ شامل نہیں سَن؟کیہ اوہ وی یسوُع نیں چُکے یاں نئیں ۔ آہو،اوہ چُکے گئے نیں۔
فیر ،کیہ کل دے سارے پاپ وی یسوع اُتے لد دِتے گئے سَن؟آہو،اوہنے بغیر کِسے روک ٹوک
دے سارے پاپ چُک لئے۔ ایتھوں تیکرپئی اوہنے اِک وی پاپ پِچھے نئیں چھڈیا۔ پاک انجیل سانُوں دَسدی اے پئی اَسیں پورے دِل نال ایمان رکھیے پئی یسوُع نیں ساڈے سارے پاپ ، سِر توں لے کے پیراں تیکراِکوای ویلے ،چُک لئے،تےاوہناں سبھناں دی قیمت چُکادِتی ۔
” یسوُع مسیِح خُدادےپُتردی خوشخبری داشروع “ (مرقس۱:۱) اَسمان دی خوشخبری خوشی دی خبر اے ۔ اوہ ساڈے کولوں پُچھ دا اے ، ” میَں تُہاڈے سارے پاپ چُک لئے ۔میَں تُہاڈامکتی داتا آں۔کیہ تُسیں میرے اُتے ایمان رکھدے او؟ “ اَن گِنت لوکاں وِچوں ، صرف تھوڑے جیہے جواب دے چُکے نیں ۔ ”جی ہاں، میَں ایمان رکھداآں۔میَں ایمان رکھداآں بالکل جِویں تُوں مینوں دَسیا اے ۔ایہہ ایہنی سَوکھی گل سی پئی میَں ایہنوں فٹافٹ سمجھ گیا ۔“ جیہڑے اِنج اپنے عقیدیاں دا اِقرار کردے نیں اوہ ابرہام دی طرحاں راستباز بن جاندے نیں۔
پر دُوجے لوک ایہہ آکھ دے نیں ، ” میَں ایس گل اُتے ایمان نئیں رکھ سکدا۔ ایہہ مینوں بڑی نویں تے حیران کرن والی لگدی اے۔“
فیر اوہ پُچھدا اے ،”بھورامینوں ایہہ دَسوپئی کیہ میَں تُہاڈے سارے پاپ چُکے سَن یاں نئیں ؟“
” مینوں سکھاگیاسی پئی تُوں مورُوثی پاپ نُوں دُور کیتاسی نہ پئی میرےروز مرّہ دے پاپا ں نُوں ۔“
” میَں سمجھناں آں پئی جِویں تینوں دَسیا گیا اوہدے اُتے ایمان رکھن وِچ تُوں بوہت تیز ایں۔ تُوں ضرور جہنم وِچ جاویں گا ایس لئی پئی تینوں آکھن لئی میرے کول کُجھ وی نئیں ۔“
اوہدی مکمل مکتی اُتے ایمان رکھنا سانُوں بچا چُکیا اے۔اوہ سارے لوک جہنم وِچ جان گے جیہڑے ایس گل اُتے زوردیندےنیں پئی اوہ پاپ رکھدے نیں۔ ایہہ اوہناں دااپنا انتخاب اے۔
مکتی دی خوشخبری دا آغاز یوحنااصطباغی دی گواہی توں ہونداے ۔ کیوں جے یسوُع نیں یوحنا اصطباغی کولوں بپتسمہ لین دے سبب ساڈے سارے پاپاں نُوں دھودِتا ،ایس لئی ایمان لیا کے اَسیں راستباز بن جاندے آں۔
پولُوس رسوُل نیں ، اپنے خطاں وِچ یسوع دے بپتسمہ نُوں بڑا جَپیا۔گلتیوں ٣:۲۷ وِچ لِکھیا اے، ”تے تُسیں سب جِنہاں نیں مسیِح وِچ شامل ہون دابپتسمہ لیا مسیِح نُوں پالیا۔“ ’مسیِح وِچ شامل ہون دا بپتسمہ ‘لین دا مطلب ایہہ ہے پئی اَسیں اوہدے بپتسمہ اُتے ایمان رکھن دے راہیں مسیِح دے نال اِک آں ۔ جدوں یسوُع نیں بپتسمہ لیا ،تےساڈے پاپ یوحنا اصطباغی دے راہیں اوہدے اُتے منتقل ہوگئے ،تے اوہ مکمل طورتے دُھل گئے۔
١۔پطرس ٣:۲١ وِچ لِکھیا اے، ”تےاوسے پانی دا مشابہ وی یعنی بپتسمہ یسوُع مسیِح دے جی اُٹھن دے راہیں ہُن تُہانُوں بچاؤندااے ۔اوہدے توں جِسم دی ناپاکی دُور کرنا مُراد نئیں سگوں خالص نیّت نال خُدا دے طالب ہونا مُراد اے۔“ صرف اوہ لوک جیہڑے یوحنااصطباغی دی گواہی اُتے ،یعنی یسوع دے بپتسمہ تے صلیبی خون اُتے ایمان رکھدے نیں اَسمان وَلوں ، مکتی دا فضل حاصل کردے نیں ۔
اپنے دِل وِچ یسوُع دے بپتسمہ نُوں مکتی دے مشابہ دےطورتےقبول کروتے مکتی پاوو۔
Copyright © 2021 by The New Life Mission