مضمون 9: رومیوں (رومیوں دی کتاب اُتے تفسیر)
[1-5باب] اوہ جیہڑے سچ نوں بدی ہیٹھاں لکاؤندے نیں <رومیوں ۱:۱۸ ۔ ۲۵>
>رومیوں ۱:۱۸ ۔ ۲۵>
” کیوں جے خُدا دا غصہ اوہناں بندیاں دی ساری بے دینی تے بدی اُتے اَسماں اُتوں وکھالی دیندا اے جیہڑے سچ نوں بدی ہیٹھاں لکاؤندے نیں۔کیوں جےجو کُجھ خُدا بارے پتہ لگ سکدااے اوہ اوہناں دے دل وچ وکھالی دیندااے ۔ایس لئی پئی خُدا نے اوہنوں ،اوہناں اُتے وکھادتا ۔ کیوں جے اوہدیاں نہ وکھالی دین والیاں صفتاں مطلب اے اوہدی مُڈھلی طاقت تے خُدا ہونا جگ دے بناؤن ویلے توں لَے کے بنایاں ہویاں شیواں دے سبب ،پتہ لگ کے صاف وکھالی دیندی اے ۔ ایتھوں تیک پئی اوہناں کول کوئی بہانہ نئیں ہیگا ۔ ایس لئی پئی اوہنوں نوں خُدا دا پتہ تاں لگ گیا پر اوہدی خُدا ہون مطابق اوہدی وڈیائی تے شکر گزاری نہ کیتی سگوں جھوٹے خیالاں وچ پھس گئے تے اوہناں دے کم عقل دلا ں اُتے ہنیرا ہوگیا ۔ اوہ اپنے آپ نوں سیانے دس کے بے عقلے ہوگئے ۔تے ہمیش تیک رہن والے خُدا دے جلال نوں برباد ہون والے بندیاں تے پرندیاں تے چَوکھُرے ڈنگراں تے کیڑے مکوڑیاں دی شکل وچ بدل دتا ۔ ایس لئی خُدا نے اوہناں دے دلاں دیاں آساں مطابق اوہناں نوں گندے کم کرن لئی چھڈ دتا پئی اوہناں دے بدن آپس وچ بے شرمی دے کم کرن ۔ایس لئی پئی اوہناں نیں خُدا دی سچیائی نوں بدل کے جھوٹ بنا دتا تے خُدا دے بنائے بندیاں تے شیواں دی بوہتی پوجا تے بندگی کیتی ،نہ پئی اوس سارے جگ نوں بناؤن والے خدا دی کیتی ، جیہڑا ہمیش تیکر تعریف کرن دے لائق ہیگااے۔ آمین۔ “
کیہدے اُتے خُدا نوں غصہ آؤندااے ؟
اسیں ویکھ سکدے آں پئی پولُس نے بالکل اِنج ای خوشخبری دی منادی کیتی جویں اسیں خوشخبری دی منادی کردے پئی آں ۔ کیہدے اُتے خُدا نوں غصہ آؤندااے ۔۔۔؟ خُدا دی سزا پاپیاں لئی ظاہر ہوئی جیہڑے سچ نوں بدی ہیٹھاں لکاؤندے نیں ،مطلب اے ، جیہڑے پاپ وچ ہیگے نیں تے سچیائی نوں اپنے جھوٹے خیالاں ہیٹھاں لکا کے رکھدے نیں ۔
پولُس جیہڑا پئی رسول ہیگااے تے صاف صاف دسدااے پئی سب توں پہلاں ،خُدا دا غصہ اوہناں اُتے وکھالی دیندا اے جیہڑے سچیائی نوں بدی ہیٹھاں لکا کے رکھدے نیں ۔ خُدا اوہناں نوں سزادیوے گا ۔ کیہڑا غصہ خُدا دے غصے وانگر ہووے گا ؟ خُدا دا غصہ اوہناں دے بدن تے رُوح دونواں نوں دوزخ وچ ساڑ دیوے گا۔
سانوں ایہہ نئیں سوچنا چاہی داپئی صرف بدن نوں ای سزا ملے گی کیوں جے بندیاں وچ رُوح وی ہیگی اے ۔ ایس لئی خُدا بدن تے رُوح دونواں نوں سزا دیوےگا ۔ایتھے ایہو جیہے بوہتے لوک ہیگے نیں جیہڑے خُدا دی سچیائی نوں اپنے دنیاوی خیالاں وچ بدل لیندے نیں ۔ایتھے ایہو جیہے لوک وی ہیگے نیں جیہڑے پاپ دا بانا پا کے راستباز دے خلاف ہوندے نیں ۔خُدا دا غصہ تے اوہدی سزا اوہناں اُتے نظر آؤندی اے جنہاں نیں پاپ دے راہیں اپنے دلاں نوں سخت کیتا تے خُدا دے خوف نوں نہ منیا ۔
پولُس رسول رومیوں ۱ : ۱۷ وچ فرماؤندااے ، ” راستباز ایمان رکھ کے جیوندا رہوے گا ۔ “ اوہ اِنج وہ آکھدا اے پئی خُدا دا غصہ تے سزا اوہناں اُتے نظر آؤندااے جیہڑے سچ نوں بدی ہیٹھاں لکاکے رکھدے نیں ۔
بے یقین خُدا دے غصے ہیٹھاں نیں
خُدا نے جگ وچ اصل مکتی بنائی ۔ خُدادی محبت تے سچیائی دھرتی اُتے رَل مِل گئی اے ۔ایس لئی خُدادی محبت تے سچیائی توں اکھ پرتاؤن دا کوئی بہانا وی باقی نئیں ہیگااے ۔ خُدا اوہناں ساریاں نوں سز ادیوے گا جیہڑے سچیائی دی خوشخبری اُتے ایمان نئیں لیاؤندے تے جیہڑے ایہدے خلاف ہیگے نیں ۔
آؤ اوہناں لوکاں بارے سوچیے جنہاں نیں اصل خوشخبری دی محبت نئیں پائی ہیگی ۔اسیں اوہ ویکھ سکدے آں جو کُجھ خُدا نے بنایااے: مطلب اے ،پانی ،گھاہ ،رُکھ،اَسمان پرندے وغیرہ ۔ ایہہ شیواں کویں خُدا دے بناؤن توں اَڈ بن سکدیاں سَن ۔پاک بائبل دسدی اے ، ” ایس لئی پئی ہر گھر نوں کوئی نہ کوئی بناؤندااے پر جنہے ساریاں شیواں بنائیاں اوہ خُدا ہیگا اے ۔ “ (عبرانیوں۳: ۴) کیہ
ایہہ اوہناں دا پاپ نئیں ہیگا پئی اوہ خُدا تے سچیائی دے کلام اُتے ایمان نئیں لیاؤندے؟
ایس لئی ، اوہناں لئی ایہو ای چنگا ہیگااے پئی خُدا اوہناں نوں سزا دیوے جیہڑےپاپاں دی معافی دے فضل اُتے ایمان نئیں لیائے ۔ اوہ پیڑھی او پیڑھی خیال بارے سوچدے نیں ۔ اوہ ایس گل اُتے اڑے رہندے نیں پئی ایہہ سارا جگ اپنے آپ ترقی کردے ہوئیاں بنیا اے ۔ اوہناں دی سوچ ہیگی اے پئی سب توں پہلاں ،گھٹوگھٹ ڈیڑھ کروڑ ورہے پہلاں ،ایتھے اک بوہت وڈا دھماکہ ہویا جنہوں بِگ بینگ آکھدے نیں ، تے فیر اِنج ہویا پئی یکدم حیاتی بن گئی ۔ اوہ آکھدے نیں پئی حیاتی دا سچ بدلداگیا ،تے ایہہ مچھیاں، ڈنگراں تے اخیروچ بندیاں وچ بدل گئی ۔جے ایہہ خیال ٹھیک ہیگاسی تاں انسانی پیڑھی اک یاں دو ہزار ورہیاں بعد کسے ہو ر حیاتی وچ بدل جاندی ۔
” ایس لئی پئی اوہدیاں نہ نظر آؤن والیاں صفتاں مطلب اے اوہدی مُڈھلی طاقت تے خُدا ہونا جگ دی پیدائش دے ویلے توں بنائیاں ہوئیاں شیواں دے راہیں پتہ لگ کے صاف نظر آؤندی اے ۔ایتھوں تیک پئی اوہناں کول کوئی ہور بہانہ نئیں ہیگا۔ “ (رومیوں ۱:۲۰)۔ بھاویں لوک خُدا دے کمال تے اوہدی قدر ت دے اوّلے کم ویکھ سکدے نیں پئی خُدا جیوندااے تاں فیروی اوہ خُدا دے منکر ہوندے تے اوہنوں رد کر دیندے نیں ۔بے ایمان خُدا دے غصے ہیٹھاں ہیگے نیں ۔بوہتے لوک خُدا دے شکرگزار ناں ہوندے تےنہ ای اوہدے ناں نوں جلال دیندے سَن ،ایس لئی ،سواوہناں دے خیال نکمے ہوندے نیں ۔ اوہناں دے نیانے دل اُتے ہنیرا ہوگیا : اوہ اپنے آپ نوں دانے سمجھ کے بے عقلے بن گئے ، تے ہمیش تیک رہن والے خُدا دے جلال نوں برباد ہون والے بندیاں تے پرندیاں تے چَوکھُرے ڈنگراں تے کیڑے مکوڑیاں دی شکل وچ بدل دتا ۔خُدا دی سزا ظاہری طوراُتے اوہناں بندیاں نوں اُڈیکدی پئی اے ۔اوہ جیہڑے نویں سریوں نئیں جمے خُدا کولوں سزا پاؤن گے ۔بھاویں اوہ یسوع اُتے ایمان رکھن یاں نہ رکھن ۔
خُدا بے ایماناں نوں اوہناں دی گندگی وچ چھڈ دیندااے
” ایس لئی خُدا نے اوہناں دے دلاں دیاں آساں مطابق اوہناں نوں گندگی وچ چھڈ دتا پئی اوہناں دےبدن آپس وچ بے عزت کیتے جان ۔ ایس لئی پئی اوہناں نیں خُدا دی سچیائی نوں بدل کے جھوٹ بنا دتا تے خُدا دے بنائے بندیاں تے شیواں دی بوہتی پوجا تے بندگی کیتی ،نہ پئی اوس سارے جگ نوں بناؤن والے خدا دی کیتی ، جیہڑا ہمیش تیکر تعریف کرن دے لائق ہیگااے۔آمین۔ ایسے سبب توں خُدا نے اوہناں نوں گندیاں کماںوچ چھڈ دتا ۔ ایتھوں تیک پئی اوہناں دیاں زنانیاں نیں اپنے بدنی کم نوں بدن دے کم دے خلاف بدل دتا ۔ ایسے طرحاں بندے وی زنانیاں نال بدنی کم چھڈ کے بندیاں نال گندے کم کرکے مست ہوگئے مطلب اے بندیاں نیں بندیاں نال مونہہ کالا کرن والے کم کرکے اپنے آپ وچ، اپنے چنگی راہوں بھٹکن دے سبب پھل پایا ۔ “ (رومیوں ۱: ۲۴ ۔ ۲۷)۔
ایہہ عبارت کیہ دسن دی ہمت کردی اے ؟ خُدا اوہناں بندیاں نوں اوہناں دیاں ریجھاں وچ چھڈ دیندااے جیہڑے خُدا دیاں بنائیاں شیواں تے بندیاں دی غلامی تے اوہناں نوں پوجن وچ خوش ہوندے نیں ۔اوہ اوہناں نوں شیطان دی قید وچ وی چھڈ دیندااے ۔ خُدا شیطان نوں ڈِھل دے دیندااے پئی اوہناں دیاں ریجھاں مطابق اوہناں دے نال سلوک کرے ۔ ایس لئی ، لازمی ہیگااے پئی اسیں خُدا اُتے ایمان لیائیے تے کامل مکتی یافتہ بنئے۔” ایتھوں تیک پئی اوہناں دیاں زنانیاں نیں اپنے بدنی کم نوں بدن دے کم دے خلاف بدل دتا ۔ ایسے طرحاں بندے وی زنانیاں نال بدنی کم چھڈ کے بندیاں نال گندے کم کرکے مست ہوگئے مطلب اے بندیاں نیں بندیاں نال مونہہ کالا کرن والے کم کرکے اپنے آپ وچ، اپنے چنگی راہوں بھٹکن دے سبب پھل پایا ۔ “ ایہو ای خُدا دا منکر ہونا اے تے ایسے نال ایڈزدی بیماری بن دی اے ۔
خُدا نے بدنی کم دی اجازت دتی اے ۔ ایک بندے نوں اک زنانی نال رہنا چاہی دااے ۔پر ایہہ سچ ہیگااے پئی بندیاں نیں بندیاں نال تے زنانیاں نیں زنانیاں نال بدنی کماں نوں بدن نال پُٹھے کم کر کے بدل دتا اے ۔ ایہدے توں سانوں پتہ لگدااے اوہ خُدا دی بدن نال کم کرن دی دتی گئی اجازت توں مُکر گئے ۔رومیوں دے ناں خط ۱۹۰۰ ورہے پہلاں لکھیا گیا سی ۔ پولُس رسول نے پیشن گوئی کیتی پئی جیہڑا اپنے نفسانی حصیاں نوں بدن دے پُٹھے طریقے نال ورتدااے اوہناں نوں اپنی پُٹھی راہے پین دے بدلے سزا سہنی پوے گی ۔ اج کل خُدا دا کلام سچ مُچ پورا ہوندا پیا اے ۔سانوں پتہ ہیگااے پئی ایڈز دی بیماری خاص کر بندے دی بندے نال تے زنانی دے زنانی نال بدکاری دے سبب ودھدی پئی اے ۔
اوہناں لئی چنگی گل ایہہ ہیگی اے پئی اوہ اپنے جنسی پاپاں دی سزا پاؤن ۔خُدا دا غصہ اوہناں بندیاں اُتے نظرآؤندااے جیہڑے بدن دے کماں نوں پُٹھے طریقے نال کرن وچ بدل دے نیں ۔ اوہناں نوں ایڈز دی بیماری دی سزا ملنی چاہی دی اے ۔اصل وچ ایہہ بیماری خُدا اُتے بے ایمانی دے سبب آؤندی اے ۔خُدا بے ایماناں نوں گئی گواتی عقل دے حوالے کر دیندااے ۔ دوجے اَکھرا ں وچ ،اصل وچ ایہہ خُدا دی لعنت ہیگی اے ۔
اوہ خُدا دی راستباز ی دے خلاف ہیگے نیں
اوہ بندہ جیہڑا خُدانوں اپنے دل وچ نئیں رکھنا چاؤہندا ،اِنج ہیگااے، ” سو اوہ ہر طرحاں دی بدی ، لالچ تےمندیاں سوچاں نال بھر گئےتے سڑنا، خونی ، جھگڑالُو ، مکاری تے ویر کماؤن نال بھر گئے تے چغلی کرن والے ۔بھیڑے بول بولن والے ،خُدا اگے نفرتی تے دوجیاں نوں بے عزت کرن والے مغرور ،شیخی باز بدیاں دے بناؤن والے ،ماپیاں دے نافرمان ۔کم عقلے ۔ وعدہ خلاف دلوں محبت کرن توں سکھنے تے بے رحم ہو گئے ۔ ایتھوں تیک پئی اوہناں نوں خُدا دا ایہہ حکم یاد ہیگااے پئی اِنج دے کم کرن والے موت دی سزا دے حق دار ہیگے نیں ۔ پر فیروی نہ صرف آپ ای ایہو جیہے کم کردے نیں سگوں ہور وی اِنج کرن والیاں توں خوش ہوندے نیں۔“ (رومیوں ۱:۲۹ ۔ ۳۲)۔
کیہ جیہڑے ’ایہو جیہے کم کردے نیں ‘ اوہ بالکل ایہوای بدیاں کردے نیں ۔اوہ اِنج دے کم کرن والیاں نوں پسند وی کردے نیں ۔کیہ جیہڑےبندے خُدا دے خلاف ہیگے نیں ،اوہ خُدا دے کلام دا آکھا من دے نیں یاں کیہ اوہ چنگے کم کردے نیں ؟ نئیں ۔سگوں اوہ ایہہ آکھدیاں ہوئیاں راستبازاں نوں ستاؤندے نیں ، ” تسیں کافر ہیگے او “راستبازاں نوں یسوع اُتے ایمان لیاؤن دے بعد راستبازی اُتے ایمان لیاؤن دے سبب ستایا جاندااے۔ اوہ مبارک ہیگے نیں۔
لوک اوہناں نال ای ہمدردی وکھاؤندے نیں ،جیہڑے بدنی معجزے کردے نیں ۔فیر وی ، ایہہ آکھنا بوہت اولا ہیگااے ، پئی اسیں ویکھدے آں پئی اوہ دوجیاں نوں یسوع اُتے ایمان لیان تے پاپاں توں مکتی پاؤن نوں رد کردے تے بُرا مناؤندے نیں ۔ اِنج کرنا پاپ دی غلامی کرن دے برابر ہیگااے کیوں جے ناں تے اوہ خُدا اُتے ایمان رکھدے نیں تے ناں ای سچیائی دے کلا م دا آکھا من دے نیں ۔
ایس لئی ، بے ایمان تے شیطان آکھدا اے پئی اسیں ناں تاں مکمل پاک بناں گے تے ناں ای
پاپاں دی کامل معافی پاواں گے ،بھاویں اوہ سانوں یسوع مسیح اُتے ایمان لیاؤن دی اجازت دے دیندے نیں۔بے ایمان تے آکھا ناں منن والے سوچدے تے آکھدے نیں پئی لازمی ہیگا اے پئی اسیں یسوع اُتے ایمان لیائیےتاں پئی اَسمانی بادشاہی وچ جا سکیے بھاویں اوہناں دے دل پاپ بھرے ہیگے نیں ۔ ایس لئی اوہ اپنے آپ وچ سوکھے ہیگے نیں ، جدوں اوہ یسوع اُتے پاپیاں وانگر ایمان لیاؤندے نیں ۔بھاویں اوہ مسیحی ہیگے نیں پر فیروی اوہ خُدا نوں نئیں جان دے تے اوہدے اُتے ایمان نئیں لیاؤندے ، اوہ خُدا بارے جانیوں اَڈ ای اوہدی مخالفت کردے نیں ۔ اوہ خُدا دی راستبازی دے خلاف ہیگے نیں ۔ اوہ سارے پاپاں تے شیطان اگے متھاٹیک دے نیں ۔ اوہ وی ، جیہڑے بھاویں یسوع اُتے ایمان لیائے نیں پر نویں سریوں نئیں جمے ، اِنج ای ہیگے نیں ۔ ایتھے بوہت سارے مسیحی صرف ناں دے ای مسیحی ہیگے نیں جیہڑے حالے تیک نویں سریوں نئیں جمے ۔ جیہڑے پاپ نوں اپنے دل وچ رکھ کے یسوع اُتے ایمان لیاؤندے نیں ،اوہ خُدا دے سچے کلام تے نویں سریوں جمن والے مسیحیاں دے خلاف ہیگے نیں ۔ جنہاں نیں پاپاں توں معافی پا لئی اے تے یسوع مسیح دی سچیائی اُتے ایمان لیاؤن دے راہیں پاک کیتے گئے نیں ۔
اوہ جیہڑے نویں سریوں نئیں جمے ، نویں سریوں جمن والیاں دے خلاف ہیگے نیں
پولُس رسول پاک بائبل وچ فرماؤندا اے پئی خُدا دا غصہ اوہناں بندیاں اُتے وکھالی دیندااے جیہڑے سچ نوں بدی ہیٹھاں لکا کے رکھدے نیں ۔اوہ ایہہ وی آکھدا اے پئی خُدا دی سزا اوہناں دی ساری بے دینی تے بدی اُتے اَسمان اُتوں وکھالی دیندی اے ۔ سچیائی بارے ہر گل پوری ہوئی اے ۔ سچیائی ایہہ ہیگی اے پئی خُدا وند نے ساڈے سارے پاپ مکادتے نیں ۔ خُدا اپنی سزا اوہناں دے خلاف قائم کردااے جیہڑے سچیائی دے خلاف ہیگے نیں تے اوہنوں لکا کے رکھدے نیں ۔ سانوں خُدا دے کلام دے راہیں سکھنا چاہی دااے پئی سارے اِنج دے ایماندار جیہڑے نویں سریوں نئیں جمے ،اوہ اوہناں نوں سزا دیوے گا ۔ بھاویں اوہ یسوع اُتے ایمان رکھدے نیں فیر وی خُدا اوہناں نوں جیہڑے نویں سریوں نئیں جمے ، سزا دیوے گا ۔
ایہو جیہے ایماندار جیہڑے نویں سریوں نئیں جمے ، نویں سریوں جمن والیاں دے خلاف اپنے دلاں وچ ویر نال بھرے ہوئے اوہناں اُتے توہمت لاؤندے نیں ۔ اوہ دوزخ وچ جان گے ۔ خُدا اوہناں نوں دوزخ وچ ساڑ دیوے گا ۔اوہ ویر نال بھرے ہوئے نیں تے اک دوجے دی چغلی کردے نیں ۔ایہو جیہے پاپی جیہڑے راستباز اں دے خلاف جنہاں نیں پاپاں توں مکتی پا لئی اے ،جھنڈبنا کے چغلی کردے نیں ،تاں اوہ سزا پاؤن دے حقدار ہیگے نیں ۔کیہ تسیں سمجھدے پئے او پئی میرا کیہ مطلب ہیگااے ؟ سانوں اوہناں نال ہمدردی وکھاؤنی چاہی دی اے ۔ او ہ اپنے پاپاں نال خُدا دی مخالفت ایہہ جانیوں اَڈ ای کردے نیں پئی اوہ تاں اوہدے خلاف چغلی کردے پئے نیں ۔ ” پاک ہونا اوہناں لئی بوہت اولا کم ہیگا اے ۔ ایہہ سچ مُچ اولا ہیگااے ۔“
خُدا دی سزا اوہناں لئی ظاہرہوئی اے ،جیہڑے اپنی بدی کرکے خُدا دے خلاف ہیگے نیں ۔ اوہ لوک جیہڑے اِنج کردے نیں ،اوہ ایناں کماں توں خوش ہوندے نیں جیہڑے پولُس نے دسے نیں ۔ اوہ چغلی کرن والے تے توہمت لاؤن والے بن کے راستباز بنن نوں چنگیاں سمجھدے نیں ۔ جیہڑے مسیحی نویں سریوں نئیں جمے ،اک دوجے دی چغلی کردے تے راستباز اُتے توہمت لاؤندے نیں ۔اوہ راستبازاں دی کنڈ پِچھے بُریائی تے اوہناں توں نفرت کردے نیں ،آپس وچ شیخی ماردے ،تے جھنڈ بناکے بدیاں دے منصوبے بناؤندے نیں ۔کیہ تہانوں پتہ ہیگااے پئی اوہ کویں بُریاں دی نصیحت کردے نیں ؟ اوہ اک دوجے نال مل کے بدیاں کردے نیں ۔ اوہ راستباز دی مخالف اِنج دے نعریاں نال کردے نیں ،جویں پئی ، ” آؤ یسوع اُتے بوہتا ایمان لیائیے ۔ودھیاطرحاں دے ایمان ول دھیان کریے ۔آؤ جگ لئی نُور بنیے “ایہو جیہے پاپ کرنا سوکھا کم نئیں ،ایس لئی اوہ ایناں پاپاں نوں منن لئی اپنے آپ نوں پکیا ں کر لیندے نیں ۔
ایس لئی زبور ۲:۴ ،وچ خُدافرماؤندااے ، ” اوہ جنہے اَسمان اُتے تخت لایا اے ہسے گا۔ “ خُداوند اوہناں دا مذاق اُڈاوے گا۔ کیوں جے دھرتی دے بادشاہ خُدا دے خلاف ہیگے نیں۔’ اوہ! ایہہ اولی گل ہیگی اے ۔مینوں کدی کُجھ ناں ہووےگا ،ایس توں ہٹ کے پئی تسیں مینوں للکاریا اے ۔ اے لوکو تسیں مینوں سزا لئی رشوت دیندے او ۔‘ خُدا سزا دے ویلے نوں اُڈیکداپیا اے ،کیوں جے ایہہ بوہت مذاقیہ گل ہیگی اے ۔
جیہڑے راستباز لئی سزا بھال دے نیں خُدا اوہناں نوں سزا دیوےگا
اوہ جیہڑے خُدا دی سچیائی دے خلاف ہیگے نیں تے نویں سریوں نئیں جمے پاپ کر دے نیں ۔
جیہڑے نویں سریوں جم پئے نیں اوہ وی اپنے بدن وچ ادھورے تےنفرت رکھدے نیں ۔پر، اصل وچ ایہہ بالکل وکھرا ہیگااے ۔ اسیں خُدا تے سچیائی اُتے ایمان رکھدے آں ۔ اسیں خُدا دے راہیں پاپاں توں معافی پائی اے ۔ پر اوہ لوک جیہڑے بالکل ای خُدا اُتے ایمان نئیں رکھدے ۔ایہہ لوک ’ خُدا دی راستبازی تے خُدا دی سچیائی دے خلاف ہیگے نیں ‘ ” سو اے توہمت لاؤن والیا!تُوں بھاویں جیہڑا وی ایں،تیر ےکول کوئی بہانہ نئیں ہیگا کیوں جے جیہڑی گل بارے تُوں دوجے اُتے توہمت لاؤندا ایں ،اوسے بارے تُوں اپنے آپ نوں قصوروار بناؤنداایں ،ایس لئی پئی تُوں جیہڑی توہمت لاؤنداایں ،آپ اوہو ای کم کرداایں ۔ “(رومیوں ۲ :۱)۔
پولُس رسول اوہناں یہودیاں تے مسیحیاں نال جیہڑے نویں سریوں نئیں جمے تے جیہڑے صرف شریعت بارے گھمنڈ کردے نیں ،اوہناں بارے گل کردااے ۔ اوہ دوجیاں نوں ایہہ آکھدیاں ہوئیاں قصور وار بناؤندے نیں ، ” کسے دا لہو ناں وگاؤنا، زناناں کرنا ، چوری ناں کرنا تے صرف خُدا نوں مننا ۔ “بھاویں اوہ آپ شریعت اُتے عمل نئیں کردے ۔صرف خُدا تے اوہدے پُتر جیہڑے نویں سریوں جمے نیں ،خُدا دے کلام مطابق قصوروار بنا سکدے نیں ۔
اِنج دے لوک ای سزا پاؤندے نیں ،کیوں جے اوہ راستبازاں نوں اپنی من مرضی نال قصور وار بناؤندے نیں ۔خُدااوہناں ساریاں نوں سزا دیوے گا جیہڑے نویں سریوں نئیں جمے ،صرف ایناں آکھنا ایں ، شریعت والے یہودیاں تے مسیحیاں نوں ۔ خُدا نوں اوہناں اُتے غصہ آوےگا جیہڑے دینی جنڈری پِچھے شریعت دے راہیں ٹُردے نیں ،جد پئی اوہ نویں سریوں نئیں جمے ہیگے ،تے اوہناں دا ایمان ہیگا اے پئی جے اوہ شریعت پِچھے ناں ٹُرن تاں اوہ دوزخ وچ جان گے تے جے اوہ خُدا دی شریعت دا آکھنا منن ،تاں ای اوہ اَسمان دی بادشاہی وچ جان گے ۔ ایمان دار بندہ اوہ ہیگااے جیہڑا یسوع اُتے ایمان لیاؤن دے بعد راستباز بن دااے ناں پئی شریعت دے راہیں ۔لازمی ہیگااے پئی اوہناں تے ساڈے وچ فرق ہووے۔ جیہڑے نویں سریوں جمیوں اَڈ ای خُدا اُتے ایمان لیاؤندے تے پاک حیاتی بسرکردے نیں ،اوہ راستباز داانصاف اپنے وانگر ای کردے نیں۔
پر خُدا لازمی طور اُتے اوہناں نوں سزا دیوے گا ۔ اوہناں نوں تاں ایہہ پتہ ای نئیں ہیگا پئی اوہ اپنے وانگر اپناانصاف کردے پئے نیں ۔ اوہ ، اے بندیو ،تسیں جیہڑے پاپاں توں معافی پاؤن توں اڈ ای اپنے خراب ایمان نال راستباز دا انصاف کردے او، تسیں خُدا دے فضل تیک نئیں اپڑ سکو گے ، کیہ تسیں سوچدے او پئی تسیں خُدا دی سزا توں بچ سکدے او ؟ خُدا ایہو جیہے لوکاں نوں ضرور سزا دیوےگا ۔
خُدا دی سزا واجبی اے
” تے سانوں پتہ ہیگا اے پئی ایہو جیہے کم کرن والیاں دی سزا خُدا ولوں واجبی طور اُتے ہوندی اے “ (رومیوں ۲:۲)۔جیہڑے نویں سریوں جمیوں اَڈ ای دوجیاں دا انصاف کردے نیں بھاویں اوہ یسوع اُتے ایمان رکھن تاں وی سانوں یقین ہیگا اے پئی خُدا دی سزا اوہناں دے خلاف واجبی طور اُتے ہووے گی ۔
خُدا پاپیاں نوں دوزخ وچ سُٹ دا اے،تے کیوں جے اوہدی سچیائی اصل ہیگی اے تے کیوں جے خدا دی سزا واجبی ہیگی اے ۔ بھاویں کوئی دوزخ وچ جاندا اے یاں نئیں ایہدا مکا پہلاں توں مقرر کیتی گئی اوس تعلیم اُتے بالکل نئیں ہیگا ،جیہڑی ایہہ منادی کردی اے پئی ،خُدا کُجھ لوکاں نوں تاں محبت کردااے ، تے کئیاں نال کسے شرط توں اَڈ نفرت کردااے ۔ خُدا نے سارا جگ بناؤن توں پہلاں ای ساریاں بندیاں نوں مسیح یسوع وچ چُن لیا سی ۔(رومیوں ۱ : ۴)
ہر بندہ جیہڑا ایہہ ایمان لیاؤندااے پئی یسوع مسیح نے اوہدے سارے پاپاں نوں مکا دتا اے ، پاپاں توں مکتی پاؤندااے ۔ خُدا نے ایہہ مُڈھوں ای مقرر کر دتا اے ۔ ایس لئی ، اوہ سارے جیہڑے نویں سریوں نئیں جمے ،اوہ یسوع اُتے ایمان لیاؤن تاں وی دوزخ وچ جان گے ۔ اوہ خُدا دے انصاف مطابق دوزخ وچ جان گے تے ایہوای سچ ہیگااے ۔
خُدا دا انصاف ،جیہڑا پاپیاں نوں دوزخ وچ سُٹ دااے ،واجبی ہیگااے ۔ کاہدے لئی ؟ کیوں جے اوہناں نیں خُدا دی وڈی محبت نوں رد کردتا تے ناں تاں خُدا دی دتی گئی مکتی نوں پایاتے ناں ای اوہدے اُتے ایمان لیائے ۔ ایس سچیائی مطابق جیہڑے نویں سریوں نئیں جمے ایہو ای اوہناں لئی واجب ہیگا اے پئی اوہ دوزخ وچ جان ۔
کئی اِنج آکھن گے ، ” کاہدے لئی خُدا نے میرے تیک خوشخبری دی منادی نئیں گھلی سی؟ “ کیہ اوہنے اِنج نئیں کیتا ؟ خُدا نے تاں کئی واری خوشخبری دی منادی تہاڈی لئی گھلی اے ۔ اپنیاں اکھاں کھول کے مکتی پاؤن دی ہمت کرو۔ایس جگ وچ تھوڑے جیہے گرجے ہیگے نیں جیہڑے اصل خوشخبری دی منادی کردے نیں ۔ ایس لئی، جے تسیں سچ مُچ ایناں کلیسیاواں تیک اپڑدے او تاں تسیں ایس سچیائی نوں پا سکدے او ۔میرا معاملہ اِنج ہیگا اے پئی میَں سچ مُچ اینوں پاؤن دی بوہت ہمت کیتی ! اک پیغام دے بعد ،جدوں میَں حالے تیک نویں سریوں نئیں جمیا ساں ،میَں دعا کیتی ، ” اے خُداوندا ، بھاویں میَں ایس طریقے نال لوکاں وچ تیرے کلام دی منادی کیتی اے پر فیر وی میَں خُدا دے اگے پاپی ہیگا واں ۔ جیہڑیاں گلاں میَں لوکاں نوں دسدا پیاساں ،مینوں اِنج لگدا سی پئی جویں میَں اپنے آپ نوں دسدا پیاساں ۔میَں پاپی ہیگا واں ۔ میرے نال ملاقات تے مہربانی کر کے مینوں بچا لَے۔ “
مینوں نئیں پتہ پئی میَں سچیائی نوں پاؤن لئی کنی بوہتی ہمت کیتی اے ۔ خُدا دا دل اوہناں نوں ملن نوں کردا اے جیہڑے اوہنوں لبھدے نیں ۔خُدا ایتھوں تیک پئی اوہناں لوکاں نوں وی مکتی دینا چاؤہندااے جیہڑے اوہنوں نئیں لبھدے ۔ ” جیہڑے میرے لوک نئیں سن اوہناں نوں اپنے لوک آکھاں گا تے جیہڑی میری پیاری نئیں سی اوہنوں پیاری آکھاں گا ۔ “ (رومیوں ۹ : ۲۵) خُدا فرماؤندااے پئی اوہ ساڈا مکتی داتا ہیگااے جیہڑا سانوں مکتی دین لئی ایس جگ وچ آگیا ۔ اوہ لوک جیہڑے بوہت ریجھ نال خُدا نوں ویکھن لئی بے چین ہیگے نیں لازمی طور اُتے اوہنوں پاؤن گے ۔ کئی لوکاں نوں خُدا نے اپنا جلوہ نئیں وکھایا پر جدوں خوشخبری دے مناد اوہناں کول آکے خوشخبری دی منادی کردے نیں تاں اوہناں نوں وی خُدا نال ملاقات دا ویلا مل جاندااے ۔ کئی لوک خوشخبری دلوں سُنن گے تے کئی نئیں ۔ اوہ بندے جیہڑے دوزخ وچ جان گے برباد ہوجان گے کیوں جے اوہناں نیں خوشی دی منادی نوں رد کردتا ۔
خُدا دی سچیائی دے مطابق جیہڑے دوزخ وچ جان گے اوہناں لئی ایہو ای چنگا ہیگااے پئی برباد ہون لئی دوزخ وچ سُٹے جان ۔ جیہڑے خُدا دی بادشاہی وچ جان دے حقدار ہیگے نیں بھاویں اوہ کوئی بوہت وڈا کم نہ کرن ،تاں وی اوہ ٹھیک پچھان دے مطابق ایس بادشاہی تیک اپڑدے نیں ۔ ایہہ سب کُجھ خُدا دے سچے انصاف راہیں ہوندااے ۔
خُدالوکاں نوں اپنی حمایت ولوں نئیں گن دا تاں پئی اک نوں تاں دوزخ وچ تے دوجے نوں اَسمان دی بادشاہی وچ گھل دیوے ۔ سگوں ایہدی تھاں اُتے ،اوہ سچا انصاف کردااے ۔ ایس لئی ، لازمی ہیگا اے پئی اسیں خوشخبری دی منادی کریے ۔ ” سُن بندیا! تُوں جیہڑا اِنج دے کم کرن والے اُتے توہمت لاؤنداایں تے آپ اوہو ای کم کرداایں ،کیہ تُوں اِنج سمجھدا ایں پئی تُوں خُدا دی سزا توں بچ جاویں گا ؟ یاں تُوں اوہدی مہربانی تے تحمل تے صبر دی دولت نوں کُجھ نئیں جان دا تے نئیں سمجھدا
پئی خُدا دی مہربانی تینوں توبہ ول کھچ لیاؤندی اے۔ “ (رومیوں ۲ :۳ ۔ ۴)۔
یسوع نے اپنی محبت راہیں شروع توں ای ایس جگ دے پاپاں نوں مکا دتااے
پولُس نے اوہناں دینی مسیحیاں تے پاپی یہودیاں نوں آکھیا ،جنہاں نیں حالے تیک مسیح دی محبت نئیں پائی سی تے ناں ای نویں سریوں جمے سَن پئی ایہو جیہاں دی سزا حق مطابق ہووے گی ۔ اوہ دوزخ وچ جان لئی مقرر ہوئے نیں ۔پر خوشخبری کیہ ہیگی اے ؟ رومیوں ۲:۴وچ خُدا فرماؤندا اے ، ”یاں تُوں اوہدی مہربانی تے تحمل تے صبر دی دولت نوں کُجھ نئیں جان دا تے نئیں سمجھدا پئی خُدا دی مہربانی تینوں توبہ ول کھچ لیاؤندی اے۔ “ خُدا دی محبت ساریاں لوکاں اُتے وکھائی گئی اے تے سچیائی نال چھا گئی اے ۔
کسے نوں وی خُدا دی مکتی دے فضل توں اک پاسے نئیں رکھیا گیا ۔ یسوع نے سارے جگ دے سارے پاپاں نوں مکادتا اے ۔ یسوع نے سانوں کامل کر دتا اے ۔کیہ اوہنے صرف ساڈے وڈے وڈے پاپاں نوں ای مکایا اے تے ساڈے ہر دیہاڑے دے پاپاں نوں اوس ویلے معاف کردااے جدوں اسیں اوہدے کولوں معافی منگدے آں ؟ نئیں۔ یسوع نے شروع توں ای جگ دے سارے پاپاں نوں اِکو ای واری مکا دتا اے ۔فیر وی ، جیہڑے خُدا دے خلاف ہیگے نیں تے اوہدی مہربانی تے محبت نوں کُجھ نئیں جان دے ۔ ” یسوع نے کویں سانوں مکتی دتی ؟ بھاویں کوئی ناں کوئی پاپ میرے کولوں ہو جاندااے تاں فیر کویں میَں آکھ سکدا ہاں پئی میَں پاک ہیگا واں ؟ ایہہ تاں عقل دا گھاٹا ہیگا اے بھاویں اوہ ساڈا خُداوند خُدا تے مکتی داتا ہیگا اے تاں وی پاپ میرے کولوں جان دیاں ہوئیاں یاں ناں جاندیاں ہوئیاں ہو جاندااے ۔جد پئی ایہہ پاپ میرے کولوں ہو جاندے نیں تاں فیر کویں میرے سارے پاپ معاف ہوگئے ؟ “
ایہہ لوکاں دی بدنی سوچ ہیگی اے ،ایتھوں تیک پئی خُدا جگ دے سارے پاپاں نوں اپنی محبت راہیں شروع توں ای مکا چُکیا اے ۔خُدابندیاں دے ادھورے پن تے کمزوریاں نوں جان دااے (پئی بدن لگاتار پاپ وچ ڈگدااے )۔ایس لئی ، اوہنے بپتسمہ تے سولی اُتے اپنا لہوروڑھن دے راہیں اِکو ای وارجگ دے سارے پاپاں نوں مکا دتا ۔ خُداوندبندیاں دی بدنی کمزوریاں جان دا اے ۔ ” میَں تہانوں مکتی دتی کیوں جے مینوں پتہ ہیگااے پئی جدوں تیک تسیں بدن دے تنبُو وچ ہیگے او ،پاپ گھڑی مُڑی تہاڈے کولوں ہو جاوے گا ۔ “
خُداوند نے جگ دے سارے پاپاں نوں دھو دتا اے ۔ خُداوند نے سانوں مکتی پاؤن راہیں قبول
کیتاا ے ۔خُداوند نے پاپیاں دے پاپ دا مُل اُتاریا تے اوہناں نوں اپنی طاقت تے راستبازی نال پاک کیتا (یسوع نے یردن دے دریا اُتے یوحنا بپتسمہ دین والے کولوں بپتسمہ لیا)۔ خُداوند نے سانوں اپنے پُتر تے مبارک بناؤن دے لائق بنایا تے ساڈے پاپاں دا مُل اپنے لہو نال دے کے سانوں ایس لائق بنایا پئی اَسمان دی بادشاہی وچ جا سکیے ۔ خُداوندنے پاپیاں نوں اپنے راستباز پُتراں وچ بدل دتا ۔
لازمی ہیگا اے پئی بے ایمان توبہ کرن تے اپنے دلاں نوں خُداوند ول پرتاؤن
”یاں تُوں اوہدی مہربانی تے تحمل تے صبر دی دولت نوں کُجھ نئیں جان دا تے نئیں سمجھدا پئی خُدا دی مہربانی تینوں توبہ ول کھچ لیاؤندی اے۔ “ خُدا دے ایہہ بول اوہناں لئی ہیگے نیں جیہڑے خُدا دی مہربانی ، تحمل تے صبر دی دولت دے منکر ہوندے نیں تے دوزخ وچ جاندے نیں ۔ ایہہ لازمی گل ہیگی اے پئی یسوع نے سارے جگ دے پاپاں نوں دُور کر دتا اے تے ایہہ پئی خوشخبری سارے جگ وچ ودھ گئی اے ۔پر لوک اوہدے اُتے ایمان نئیں لیاؤندے ،ایس لئی اوہ حالے تیک دوزخ وچ جاندے نیں ۔اسیں اوہدی مہربانی تے تحمل تے صبر دی دولت نوں کُجھ نئیں جانیا ،تاں وی یسوع نے ساڈے ساریاں دے پاپاں نوں مکا کے سانوں دوزخ دی اگ توں بچایا تے سانوں سب ایمان لیاؤن والیاں نوں کامل مکتی دتی ۔ایتھو ں تیک پئی بھاویں دوزخ وچ جانا ای سانوں پسند سی تاں وی اوہنے سانوں مُل اَڈمکتی دےدتی ۔
ایس لئی مکتی پاؤن لئی لازمی ہیگا اے پئی اسیں یسوع دے پانی تے لہو اُتے ایمان لیائیے۔ایمان لیائیے تے بے مُلی مکتی پائیے ۔ دوزخ اوہ تھاں ہیگی اے جیہڑی خُدا نے اوہناں لئی بنائی اے جیہڑے اوہدی مکتی دے فضل تے اوہدی مہربانی تے تحمل دی دولت نوں کُجھ نئیں جان دے ۔بے ایمان تاں پہلوں ای اپنے لئی دوزخ دی ٹکٹ خرید چُکے نیں ۔ اوہ لوک جنہاں دے لیکھاں وچ دوزخ ہیگی اے ،توبہ کرن تے لازمی ہیگااے پئی اپنے دلاں نوں خُداوند ول پرتاؤن ۔ جدوں تیک تسیں اصل خوشخبری اُتے ایمان نئیں
لیاؤندے تسیں وی اَسمان دی بادشاہی نوں خُدا حافظ آکھدے او۔
لوک خُدا دی محبت نوں نندن دے سبب دوزخ وچ جاندے نیں
” سگوں تُوں اپنی سختی تےتوبہ توں اَڈ دل دے سبب اوس عذاب دے دن لئی اپنے واسطے غصہ کھٹ دا پیاایں جیہدے وچ خُدا دا سچا انصاف ظاہر ہووے گا ۔“ (رومیوں ۲:۵)۔ اوہ لوک جنہاں دا دل توبہ توں اَڈ ہیگااے تے اوہ لوک جیہڑے توبہ نئیں کردے دوزخ دی اَگ وچ سُٹے جان گے ۔ کئی لوک ایس لئی دوزخ وچ جاندے نیں کیوں جے اوہناں نیں خُدادی وڈی محبت نو ں نند دِتا اے ۔اوہ پاپی جیہڑے ضدی دلاں نال خُدا دی سچیائی نوں نند دے تے اپنے خیالاں ول مُڑدے نیں ،اپنے پاپاں دا پھل پاؤن لئی دوزخ وچ سُٹے جان گے ۔ اوہ جیہڑے خُدادی محبت پاؤن توں منکر ہوندے تے ہولی ہولی پاکیزگی تیک اپڑن لئی صرف توبہ دیاں دعاواں ای کردے رہندے نیں اوہ لازمی طور اُتے دوزخ وچ سُٹے جان گے۔ اوہ خُداوند دی محبت دے مُنکر ہون دے سبب خُدادے غصے نوں اوہدے ظاہر ہون تے اوہدی واجبی عدالت دے آؤن تیک رکھ چھڈ دے نیں ۔
اپنی مکتی دے منصوبے وچ ، خُدانے پاپیاں نوں مکتی دین تے راستباز بناؤن دا فیصلہ کیتا ، ایتھوں تیک پئی اوہنے شیطان ،جنہے سانوں پاپ وچ پھسایا ،دے ساہمنے سانوں مکتی دتی تے راستباز بنایا ۔ خُدانے سانوں مکتی دین تے پاک بناؤن لئی اپنے اِکلے پُتر نوں ایس جگ وچ گھلیا۔ پر پاپیاں نیں اوہنوں نہ منیا ۔ اوہناں نیں خُدا دی محبت دی خوبی نوں رد کردیاں ہوئیاں اوہدے عذاب دے پیالے نوں بھر دتا تے اوہدی واجبی سزا تے ظاہر ہون تے غصے دے دن تیک لئی اپنےلئی اکٹھیاں کیتا ہویا اے ۔خُدا دی واجبی سزا اوہناں ساریاں نوں جیہڑے اپنے دلاں وچ پاپ رکھدے نیں دوزخ وچ سُٹ دیوے گی ۔
کاہدے لئی ؟ کیوں جے خُدا نے سارے جگ دے پاپاں نوں مکا دتا اے تے ایس جگ وچ ہر کسے نوں ایمان دے راہیں مکتی دتی اے ۔ پر بے ایمان لازمی طور اُتے دوزخ دی اگ وچ جان گے ۔ اوہ ضدی ہیگے نیں تے ایسے ضد دے سبب دوزخ وچ جاندے نیں ۔سو اخیریں اوہ اپنے ایس عقل دے گھاٹے اُتے رون گے ۔ جے پاپی خُدا دی وڈی محبت نوں قبول نئیں کردے تاں اوہ دوزخ وچ جا ن گے۔
لوک سوچدے نیں پئی خُدا بے انصاف ہیگااے کیوں جے اوہ اپنی طاقت دے میچے مطابق کئی لوکاں نوں دوزخ وچ تے کئیاں نوں اَسمان دی بادشاہی وچ گھلدا اے ۔ پر،ایہہ سچ نئیں ہیگا ۔ خُدا نے دوزخ اوہناں لوکاں لئی بنائی اے جنہاں نیں اوہدی محبت تے سچیائی توں منکر ہوکے ضد نوں چنگیاں جانیا ،تاں پئی اوہناں دے رہن لئی اک ٹھیک تھاں ہووے ۔
پاک بائبل دسدی اے پئی دوزخ ایہو جیہا دریا ہیگا اے جیہڑی اگ دے گندھک نال بلدی اے ۔اوتھے اوناں لئی جنہاں نیں پاپ نوں چنگیاں جانیاں ول کھاندے ہوئے گندے کیڑے ہیگے نیں ۔ ہو سکدا اے پئی اوہ رون ، ” نئیں نئیں۔ میَں ایہو جیہی تھاں نوں پسند نئیں کردا ۔ “ پر خُدا آکھے گا ، ” میَں تہاڈے سارے پاپ دھوتے سَن پر تسیں آکھیا پئی جے میَں پاپ وچ وی رہواں تاں بہشت وچ جانا تاں میرے لئی سوکھی گل ہیگی اے ۔ ایس لئی ، میَں ایہہ کیڑے تہانوں تہاڈے بیلی بنن لئی انعام وچ دیندا ہاں ،کیوں جے تسیں پاپاں توں معافی دی پرواہ ای نئیں کیتی ۔ “پاپی آکھن گے” نئیں ،خُداوند ، میَں ایناں نوں پسند ای نئیں کردا۔ “
خُداوند آکھے گا ، ” بھاویں تسیں اینوں پسند نئیں کردے تاں وی تسیں ایسے لئی رولا پاؤندے ہوندے سی ۔ “ میَں راستبازی دا خُدا ہیگا واں جو کُجھ تہانوں پسند ہیگا اے میَں تہانوں دیندا ہاں ۔ میَں اوہناں ساریاں نوں دوزخ دا انعام دیواں گا جیہڑے اپنے دلاں وچ پاپ نوں پسند کردے نیں ۔ایہوای خُدا دی واجبی سزا ہیگی اے ۔ جدوں تیک بندہ ایس دھرتی اُتے رہندااے ، پاپ اوہدے کولوں ہو ای جاندااے پر فیر وی اوہناں نوں خُدا دی اوس خوشخبری اُتے دھیان دینا چاہی دااے جنہے جگ دے پاپاں نوں مکایا اے ۔
لوک ایس لئی دوزخ وچ جاندے نیں کیوں جے اوہناں دے دل سخت ہیگے نیں ۔ سانوں خُدا دے اگے ضدی نئیں ہونا چاہی دا۔ سانوں ایمان لیاؤنا چاہی دااے پئی اوہنے شروع توں ای جگ دے پاپاں نوں مکا دتا سی ۔ بھاویں ایہہ نظر نئیں آؤندا پر فیر وی تہانوں ایمان لیاؤنا چاہی دااے ۔
خُدا سانوں دسدا اے پئی اوہنے شروع توں ای ساڈے نال محبت رکھی
خُدا سانوں دسدا اے پئی اوہنے شروع توں ای ساڈے نال محبت رکھی ۔ ” میَں شروع توں ای تہاڈے پاپ مکا دتے سَن ۔“ تہانوں ایس سچ اُتے ایمان لیاؤنا چاہی دااے ۔ جدو ں خُدا آکھدا اے پئی اوہنے اَسمان تے دھرتی بنائی اے تاں سانوں ایس اُتے ایمان لیاؤنا چاہی دااے کیوں جے خُدا دا اکلام سچاہیگااے ۔ ایمان خُدا دے کلام اُتے یقین رکھیاں شروع ہوندااے ۔ لوک صرف اوس شے اُتے ایمان رکھدے نیں جیہڑی اوہناں دی نکی جیہی عقل وچ آجاندی اے تے اوہدے اُتے ایمان نئیں لیاؤندے جنہوں اوہ نئیں سمجھدے ۔ بے ایمان جیہڑے خُدا اُتے ایمان نئیں لیاؤندے پئی خُدا نے ساریاں پاپیا ں نوں اوہناں دے پاپاں توں مکتی دتی اے ، اوہ دوزخ وچ جان گے ۔اوہ اوہناں وچوں ہیگے نیں جنہاں نے دوزخ جان لئی اپنے ذہناں نوں تیار کر لیا اے ۔
ایتھے کُجھ گنتی دے مسیحی ہیگے سَن جنہاں نے بوہت مشہوری کیتی ، ” میَں خُدا اَگے من دا ہاں پئی جدوں تیک میَں مر نئیں جاندا میَں اک پاپی ہیگا واں ۔“ اوہ مرگیا تے لازمی طور اُتے دوزخ وچ گیا ۔ اوہنے خُدا نوں آکھیا پئی ، ” میَں اعلان کرکے منیا پئی میَں خُدا دے اگے اک پاپی ہیگا واں تے اوہدے اگے کدی وی راستباز نئیں بن سکدا۔ “ اوہنے اپنے مرن ویلے تیک اپنے پاپی ہون بارے دھیان کیتا ۔اوہنے خُدا دی محبت تے سچیائی نوں اخیری ساہواں تیک نندیا ۔ فیر خُداوند نے آکھیا ، ” تسیں اپنے خیالی ایمان وچ بوہتے ایماندار ہیگے او !تہاڈے ایمان مطابق تہاڈے لئی ایہو ای چنگا ہیگا اے پئی تسیں دوزخ وچ جاوو ۔ میَں تہانوں ایس لئی دوزخ وچ گھلدا ہاں ایس لئی پئی پاپی اَسمان دی بادشاہی وچ کدی جا نئیں سکدے ۔ “
جے میَں ایمان لیانداہوندا ،
فیر اوہ بندہ جنہے آکھیا سی ،” میَں اعلان کر کے من دا ہاں پئی میَں مرن دیہاڑے تیک پاپی ہیگا واں“ دوزخ وچ گیا ۔ایتھوں تیک پئی خُدا ایہو جیہے لوکاں دی مدد ای نئیں کردا ۔ اوہ نہ صرف آپ اعلان کر کے آکھدے نیں پئی اوہ پاپی ہیگے نیں ،سگوں اوہ دوجے ایمانداراں نوں وی جیہڑے اوہناں دے پِچھے چلدے نیں ،ایہہ سکھاؤندے نیں پئی اسیں مرن دیہاڑے تیک پاپی ہیگے آں تے جدوں تیک اسیں خُدا دے اگے لیائے جاواں گے ،اوس ویلے وی اسیں پاپی ای ہوواں گے ،سو ایہو جیہاں دی اخیر آؤن والے ورہیاں وچ دوزخ ای اے ۔“ ایس لئی ، بوہتے ایماندار وی ایہو جیہی دینی راہ اُتے ٹُردے نیں ۔ خُدا نے فرمایا پئی پاپی دوزخ وچ جان گے ۔ پر، اج کل مسیحیت وچ بوہتے مسیحی ایس تعلیم پِچھے ٹُردے نیں۔ خُدا نے فرمایا پئی ایہو جیہے پاپی دوزخ دی اگ دے انگاریاں وچ ایہہ آکھدے ہوئیاں ہمیش دا رونا کرن گےتے دند پیسن گے ۔”جے میَں ایمان لیاندا ہوندا ، جے میَں صرف ایسے اُتے ایمان لیاندا ہوندا۔ “
”جے میَں ایس سچ اُتے ایمان لیاندا ہوندا پئی یسوع نے میرے سارے پاپاں نوں مکا دتا تے اپنیاں سوچا ں چھڈ دیندا،تاں میَں اَسمانی بادشاہی وچ جان دے لائق ہوندا! “ ”جے میَں ایمان لیاندا ہوندا: جے میَں صرف ایہدے اُتے ایمان لیاندا ہوندا۔“ بوہتے لوک اِنج ای بڑ بڑ کردے ہوئیاں دوزخ وچ جاندے پئے نیں ۔اوہ آکھن گے ، ” جے،جے،جے میَں ایمان لیاندا ہوندا، جے میَں سچیائی نوں پاؤندا ،تاں میَں وی اوہدا پُتر بنن دے لائق ہو چُکیاہوندا ۔“ ” کیوں جے میَں ایناں ضدی ہو گیا ساں۔۔۔“
اسیں جیہڑے راستباز ہیگے آں اوس ویلے خُدا نوں پُچھاں گے ، ” خُداوند ، مہربانی کرکے سانوں دس پئی پاپی ہُن کیہ کردے پئے نیں۔اوہ جنہاں نیں سانوں راستبازاں نوں ستایا ۔“ ” نئیں ،میرے بچیو،ایہہ تہاڈے لئی چنگا نئیں کیوں جے تہاڈا دل اوہناں نوں جان کے دُکھی ہو جاوے گا ۔ کیہ تسیں سچ مُچ اوہناں لوکاں نوں ویکھنا چاؤہندے او ،تسیں اوہناں نوں جان کے دُکھی ہوو گے ؟ “ ” مہربانی کر کے سانوں صرف اک واری وکھا دے ! “ خُدا سانوں کسے دن وکھا دیوے گا ایس لئی پئی اوہ بوہت کرم کرن والا اے ۔ سو ایس طرحاں فرض کرو پئی اسیں ایہہ ویکھدے آں ۔ اسیں اوتھے بوہت سارا رونا تے رولا سُناں گے : ”جے میَں ایمان لیاؤندا،جے میَں ایمان لیاندا ہوندا “ فیر اسیں حیران ہوواں گے پئی ، ” ایہہ رولا کاہدا ہیگا اے ؟ کیہ اوہ گاؤندے پئے نیں ؟ “ ”دھیان نال سُنو پئی اوہ گاؤندے پئے نیں یاں روندے پئے نیں ۔“ بندے تے زنانیاں ایناں انگاریاں وچ کورس گاؤندے تے روندے پئے نیں ،”جے میَں ایمان لیاندا ہوندا ۔“
ضدی لوک جدوں تیک اپنی ضدی راہ ٹھیک نہ کر لین ،اوس ویلے تیک اوہ دوزخ وچ جان گے ۔ سچ مُچ سانوں پکے ارادے نال سچیائی نوں پُختگی نال پھڑن دی لوڑ ہیگی اے ۔ بندے نوں فیصلہ کریوں اَڈ نئیں ہونا چاہی دا۔ جدوں ساڈے ارادے پکے نیں تاں سانوں پکے ارادے رکھنے چاہی دے نیں ۔ سانوں ساریاں نوں سچے رستے اُتے ٹُرنا چاہی دااے ۔ ایس لئی پئی جدوں سانوں ایس پُختہ ارادے دی لوڑ ہوندی اے تاں اسیں اینوں چھڈ دیندے آں ۔
خُدا ہر بندے نوں اوہدے کماں مطابق بدلہ دیوے گا
خُدا ” ہر کسے نوں اوہدے کماں مطابق بدلہ دیوے گاجیہڑے نیکیاں کرن وچ پُختہ ارادہ کر کے جلال تے عزت تے ہمیشگی دےطالب ہوندے نیں ، اوہناں نوں ہمیشہ دی حیاتی دیوے گا “ (رومیوں۲:۶۔ ۷)۔خُداہر بندے نوں اوہدے کماں مطابق بدلہ دینداتے اوہدا انصاف کردا اے ۔ ’بدلہ ‘ دا مطلب ہیگا اے پئی ’ کماں راہیں اوہناں دے راہیں اوہداپھل پاؤنا ۔‘ اوہ کیہو جیہے بندے ہیگے نیں ،جیہڑے نیکیاں وچ پُختہ ارادہ کر کے جلال تے عزت تے ہمیشگی دےطالب ہوندے نیں ؟ ایہہ اوہو ای بندہ اے جیہڑا یسوع دی کامل مکتی اُتے ایمان لیاؤندا اے ۔
جگ وچ بوہت سارے لوک ہیگے نیں ،پر خُدا صرف اوہناں نوں ہمیش دی حیاتی دا انعام دیندا اے جیہڑے اوہدی راستبازی لئی دُکھرے جردے نیں ۔ ایس گل توں ہٹ کے پئی دوجے لوک اوہناں دے بارے کیہ آکھدے نیں ۔اوہ ایس سچیائی اُتے ایمان لیاؤندے نیں۔ خُدا ہمیش دی بادشاہی دا انعام اوہناں ساریاں نوں دیندا اے جیہڑے راستباز بننا چاؤہندے تے نیکی دے کماں والی حیاتی وچ ٹُرن دی تمنا رکھدے نیں ۔اوہ نیک کماں وچ پُختہ ارادہ کر کے جلال تے عزت تے ہمیشگی دےطالب ہوندے نیں ،تے خُدا دے پُتر بننا چاؤہندے نیں ۔ اوہ صبر کردے تے نیک کماں وچ پُختہ ارادہ کر کے خُدا دی راستبازی دے پِچھے ٹُردے تے تمنا کردے نیں ۔ خُدااوہناں لوکاں نوں ہمیش دی حیاتی دیندااے۔خُدا ایہنا ں نوں ہمیش لئی جیوندے رہن تے ایناں نوں اپنے پُتر بنن دی اجازت دیندااے ۔ خُدا دے پُتر خُدا دی بادشاہی دے مالک ہیگے نیں ۔
” پر جیہڑے نکھیڑے پاؤن والے تے سچ نوں ناں منن والے سگوں بدی کرن والے نیں اوہناں اُتے غصہ تے عذاب ہووے گا۔ “ (رومیوں ۲:۸)” پر اوہناں اُتے “ اوہناں لوکاں دے جھُنڈ دی گل کردااے جیہڑے مبارک لوکاں دے خلاف ہیگے نیں ۔اوہناں اُتے جیہڑے سچ نوں ناں منن والے سگوں بدی کرن والے نیں ایہوجیہاں اُتے خُدا داعذاب تے غصہ ہوندا اے ۔خُدا ایہو جیہاں نوں دوزخ وچ سُٹ دا اے ۔ جیہڑے نویں سریو ں نئیں جمے تے نہ ای سچ نوں منن والے سگوں نکھیڑے پاؤن والے نیں ۔ اوہ سارے رَل کے سچیائی دی مخالفت کردے نیں ۔
جیہڑے نویں سریو ں نئیں جمے اوہ نکھیڑے پاؤن والے نیں تے اوہ اوہناں دے جھُنڈ نوں چنگیاں جان دے نیں ۔ کوریا دی تاریخ مطابق ،ساڈے پیو دادے نے سیاسی مشکلاں وچ جھُنڈ بنائے تے اک دوجے نال لڑائی کیتی ۔ جتن والے لوک سچ وچ رہندیاں ہویاں فیصلہ کردے نیں پئی بادشاہ کیہڑا ہووے گا ۔ جدوں ’ لی ‘ گھرانیاں دا بادشاہ بن دا تاں لی گھرانیاں دے بندیاں نوں معاشرے دے اُچے عہدے دتے جاندے سَن جد پئی دوجیاں نوں باہر کڈھیا جاندا یاں دُکھ دتے جاندے سَن ۔پر جدوں شاہی تخت ’ کِم‘ خنوادے وچ جاندا ،تاں ہر شے یکدم بدل جاندی سی ۔لوک اپنے فائدے لئی ٹولیاں بناؤندے
، ناں پئی انصاف پاؤن لئی ۔
اج کل دی مسیحیت وی بالکل اِنج ای اے ۔اوہ فرقے تے ٹولیاں بناؤندے نیں ۔کاہدے لئی ؟ پئی اک ٹولی وانگر سچیائی دے نافرمان بن سکن ۔ بھاویں یسوع نے جگ پاپ مکا دتے نیں تاں وی اوہ سارے رَل کے آکھدے نیں پئی اوہ پاپاں بھرے ہیگے نیں ۔ اوہ اِنج آکھدے ہوئیاں راستباز بنن دا بہانہ کردے نیں پئی پاپ بھرے ہون وچ ٹھیک ہیگے نیں جد پئی اوہ سچی راہوں پھرے ہوئے نیں ۔خُدا وند آکھدااے پئی جیہڑے اپنے آپ نوں راستباز سمجھدے نیں ، اوہ غلط ہیگے نیں تے ایہہ پئی اوہ سارے دوزخ دی راہ ویکھدے نیں ۔
جیہڑے حق تے خُدا دا آکھامن دے نیں اوہ خُدا دے کلام دا آکھا من دے نیں ۔اسیں راستباز ایمان رکھدے آں پئی خُدا دا انصاف واجبی ہیگااے ۔
کیہ مسیحی فرقے سانوں اَسمانی بادشاہی وچ گھل سکدے نیں ؟
مسیحی فرقے سانوں اَسمانی بادشاہی وچ نئیں گھل سکدے نیں ؟میری گھروالی نے جدوں اپنی سس نوں آکھیا پئی ، ”اک دینی فرقہ تہانوں اَسمانی بادشاہی وچ نئیں گھل سکدا “ تاں اوہ بوہت غصے وچ آگئی ۔ بیلیاں وانگر دسدا پیاہاں ،مینوں نئیں پتہ پئی کاہدے لئی میری ماں اوہدے ایس دعویٰ کرن اُتے غصے وچ آگئی ۔ کیہ تہاڈے خیال وچ کوئی دینی فرقہ تہانوں اَسمانی بادشاہی وچ گھل سکدا اے ؟ اسیں اِکلّے اِکلّے خُدا دے کلام اُتے ایمان لیا کے مکتی پاؤندے تے اَسمانی بادشاہی وچ جاندے آں ۔ کیہ پریسبٹیرین گرجے دا فرقہ تہانوں اَسمانی بادشاہی وچ گھل سکدا اے ؟ کیہ بپتسمہ دین والا گرجے دا فرقہ تہانوں گھل سکدا اے ؟ کیہ ہولی نیس (پاکیزگی )گرجا اِنج کر سکدااے ؟ کیہ سیونتھ ڈے ایڈوینٹسٹ گرجا اِنج کر سکدااے ؟ نئیں ۔ اسیں ایس اِنج کر کے ای اَسمانی بادشاہی وچ جا سکدے آں جدوں اسیں پاپاں دی اوس معافی اُتے ایمان لیاؤندے آں جیہڑی یسوع نے سانوں دتی اے ۔
سانوں خُدا دی کلیسیا وچ رہنا چاہی دااے
پولُس رسول نے صاف صاف طور اُتے پاپیاں نوں جیہڑے دوزخ وچ جان گے ،راستبازاں توں جیہڑے اَسمانی بادشاہی وچ جان گے ،سارے مسیحیاں توں وکھ کر دتا اے ۔یہودیاں تے یونانیاں وانگر خوشخبری ساریاں لئی اِکو جیہی ہیگی اے ۔ ایتھے یہودیاں نوں اِسرائیلیاں وانگر دسیا گیا اے تے یونانیاں نوں اوپریاں قوماں وانگر دسیا گیا اے ۔ خُدا لوکاں دے وکھالے طور اُتے نظر آؤن ول نئیں ویکھدا ۔خُدادی نظر او س بندے اُتے ہوندی اے جیہڑا سچے دلوں خُدا دے کلام اُتے ایمان لیاؤندااے ۔ کیہ تسیں ایمان رکھدے او پئی یسوع خُدا ہیگا اے؟کیہ تسیں ایمان رکھدے او پئی یسوع ساڈا مکتی داتا ہیگا اے ؟ اسیں صرف اوس ویلے ای اَسمانی بادشاہی وچ جا سکدے آں جدوں اسیں ایمان رکھیے پئی یسوع نے اپنے بپتسمے نال جگ دے سارے پاپاں نوں مکا دتا اے ۔ سانوں ایس اُتے ایمان لیاؤنا اےتے ایہدے ولوں مونہہ نئیں موڑنااے۔ پاک روح جیہڑا ساڈے اندر وسدا اے ساڈے ایمان نوں قائم رکھدا تے جدوں اوکھا ویلا ساڈے اُتے آؤندااے ،تاں ساڈے ویریاں نوں ہراؤندااے ۔ سانوں احتیاط کرنی اے۔
بائبل وچ، اک کہانی دسی گئی اے ،جیہدے وچ چونہہ قِسماں دیاں زمیناں بارے دسیا گیا اے ،پر کُجھ زمین اوہناں دی نشانی دسدی اے جیہڑے مکتی نئیں پا سکدے ۔ اوہناں تھاواں اُتے بیج کھلاریا گیا تے جدوں ای اُگیا مرگیا ۔ ایہہ بالکل مرے ہوئے بیج وانگر اے ۔ ایہدی اخیر بالکل موت ہیگی اے ۔فیر کیہ اسیں اپنے آپ وچ اپنے آپ نوں قائم رکھ سکدے آں ؟ نئیں ۔اسیں اپنے ایمان نوں صرف اوس ویلے ای قائم رکھ سکدے آں ،جدوں خُداوند سانوں ہر مشکل نوں سہن دی طاقت دیوے تے ہر اک رُوحانی بیماری توں چنگیاں کرے پئی اسیں انگور دے اصلی رُکھ وچ پیوند ہو جائیے ۔
خُدا دی کلیسیا انگور دی ویل ہیگی اے ۔خُداوند سانوں برکتاں ، شفاواں،تسلی تے دُکھاں نوں سہن دا ایمان دیندااے ،تاں پئی اسیں خُدا دی کلیسیا وچ رَل جائیے۔ پرجے اسیں انگور دے اصل رُکھ وچ قائم نہ ریے تاں ساڈے نال کیہ ہووے گا؟ اسیں بوہت چھیتی مر جاواں گے۔ بھاویں راستبازاں دے اندر بوہت سارے گُن تے طاقتاں ہیگیاں نیں ،تاں وی جے اسیں اپنے آپ نوں اپنی مرضی نال خُدا دی کلیسیا نال نئیں جوڑیا تاں اسیں شیطانی حملے دے خلاف کُجھ نئیں کر سکدے تے لازمی طور اُتے بیمار ہو جاندے آں ۔ کیہ تہانوں ایہہ پتہ ہیگااے ؟ اوہ ہولی ہولی ڈِگ پیندے نیں تے پہلاں توں وی بوہتے نکمے ہو جاندے نیں ۔ پاک بائبل فرماؤندی اے ،” تسیں دھرتی دے لون ہیگے او پر جے لون بے سوادا ہو جاوے تاں اوہ کیہڑی شے نال لونا کیتا جاوے گا ؟ فیر اوہ کسے کم دا نئیں سواہ ایہدے پئی باہر سُٹیا جاوے تے بندیاں دے پیراں ہیٹھاں لتاڑیاجاوے ۔“ (متی ۵:۱۳)۔
ایتھوں تیک پئی جے راستباز کلیسیا توں وکھ ہیگے نیں تاں فیر اوہ نکمے ہیگے نیں ۔ جدوں اوہ کلیسیا وچ رہندے نیں تاں اوہناں دی روشنائی ہوندی اے تے اوہ مبارک بن سکدے نیں ۔ پر جدوں اوہ کلیسیاتوں اوپرے ہوکے جیوندے نیں تاں اوہناں دے حال مندے ہو جاندے نیں تے جدوں اوہ کلیسیا توں رشتہ توڑ لیندے نیں تاں اوہ بھٹکن دے ٹوئے ول جاندے نیں ،اِنج اوہ جگ اُتے فتح نئیں پا سکدے ۔ کدوں تیک تسیں اپنے یقین نوں قائم رکھ سکدے نیں ؟ کدوں تیک تسیں خُدا دی کلیسیا توں وکھ ہو کے جیوندے رہ سکدے او؟ ایتھوں تیک پئی خُدا دے خادم وی اِنج فتح نئیں پا سکدے ۔ پر ،جے اسیں انگور دے اصلی رُکھ نال جُڑ جائیے ، ساڈے خنوادے بچ جان گے، تے بوہت سارے لوک ساڈے راہیں پاپاں توں معافی پا سکدے نیں ۔ لُوط اپنی جنسی تمنا دے بہکاوے دی لہر وچ آ کے کتھے گیا سی ؟ اوہ صدوم نوں گیا سی ۔ اوہ اوتھے بوہتا چِر رہیا سی ۔ پر کیہ پھل ملیا ؟ اوہ برباد ہوگیا ۔ پاک بائبل فرماؤندی اے پئی اوہ سارے جیہڑے لوطی سَن برباد ہوگئےسَن ۔ موآبی تے عمونی لُوط دیاں دھئیاں وچوں جمے سَن ۔
لُوط جیہڑا پئی راستباز بندہ سی ،کیوں اوہدی اولاد وچوں خُدا دے مخالف جم دے سَن ؟ ایس لئی پئی اوہ کلیسیا توں وکھ ہو گیا سی ۔کیوں میَں اپنے کسے وی بوہت اوکھے ویلے پریشان نہ ہویا ،ایہدا سبب ایہہ ہیگااے پئی خُدا نے اپنی کلیسیا دا آپ انتظام کیتا۔ جتھے راستباز اکٹھے ہوندے نیں اوتھے خُدا اپنی کلیسیا نوں برکت دیندااے تے اوہناں دا ایالی بن دا اے تے خُدا دی کلیسیا ہر اک پاک بندے لئی ہیگی اے ۔ ایہہ اوہدا وعدہ تے یقین کراؤنا ہیگااے ۔
” ایس لئی پئی جنہاں نیں شریعت جانیوں اَڈ پاپ کیتا اوہ شریعت توں اَڈ برباد وی ہون گے تے جنہاں نیں شریعت نوں جان کے پاپ کیتا اوہناں نوں سزا شریعت مطابق ملے گی ۔کیوں جے شریعت نوں سُنن والے خُدا دے اگے راستباز نئیں ہوندے سگوں شریعت اُتے عمل کرن والے راستباز بنائے جان گے ۔ ایس لئی پئی ، جدوں اوہ قوماں جنہاں نیں شریعت نئیں سُنی اپنے بدن نال شریعت دے کم کردیاں نیں تاں شریعت ناں رکھدیاں ہویاں اوہ اپنے لئی آپ اک شریعت ہیگے نیں ۔ایس لئی اوہ شریعت دیاں گلاں اپنے دلاں اُتے لکھیاں ہوئیاں وکھاؤندیاں نیں تے اوہناں دا دل وی اوہناں گلا ں دی گواہی دیندااے تے اوہناں دے اکھٹے خیال یاں تاں اوہناں اُتے الزام
لاؤندے نیں یاں اوہناں نوں بچاؤندے نیں۔“ (رومیوں ۲:۱۲ ۔ ۱۵)۔
اک بندہ جیہڑا اج کل گرجے نئیں جاندا خُدا دی شریعت نوں نئیں جان دا ۔فیر اوہدا دل ای اوہدے لئی شریعت بناؤندااے کیوں جے اوہ شریعت توں اَڈ ہیگااے ۔ بھاویں اوہ بدی کردا اے ،فیر وی اوہ اپنے دل وچ ایس چنگے تے مندے کم بارے جان دا اے ۔فیر، ایہہ اک پاپ ہیگا اے تے اوہنوں پاپاں توں مکتی پاؤن لئی خُدا نوں لبھنا چاہی دااے ۔جیہڑا وی خُدا نوں سچ مُچ لبھدا اے اوہنوں خُدا مل جاندااے ۔
سانوں خُدا کولوں اوہدا رحم لبھنا چاہی دااے تے اوہدے اُتے ایمان لیاؤنا چاہی دااے ۔ جدوں اسیں اپنے آپ نوں کُجھ نئیں جان دے آں تاں سانوں اوہدے اُتے ایمان لیاؤنا چاہی دااے ۔ سانوں ایمان رکھ کے جیونا چاہی دااے ۔سانوں لازمی طور اُتے خُدا دی کلیسیا وچ رَلنا چاہی دا اے۔سانوں خُدا نوں لبھنا تے اوہدی کلیسیا وچ رہنا چاہی دااے ۔ بھاویں اسیں ماڑے تے بھیڑے ای کیوں ناں ہوئیے ،تاں وی جدوں اسیں کلیسیا وچ رہیے ،تاں خُدا سانوں باہر نئیں کڈھے گا ۔
یہودیاں دا پاپ
پولُس رسول یہودیاں نوں اوہناں توں وکھرے کرن دے بعد جیہڑے اَسمانی بادشاہی وچ جاندے پئے نیں ، پورے میچے نال اوہناں نوں خوشخبری دی منادی کرنا شروع کردا اے۔
” سو جے تُو ں یہودی اکھواؤندا تے شریعت اُتے دھیان تے خُدا اُتے گھمنڈ کرداایں ۔ تے اوہدی مرضی جان دا تے شریعت دی تعلیم سُن کے چنگیاں گلاں پسند کردا ایں ۔ تے جے تُوں ایس گل اُتے وی یقین رکھدا ایں پئی میَں انھیاں نوں راہ وکھاؤن والا تے ہنیرے وچ پئے ہوئیاں لئی روشنائی ۔کم عقلیاں نوں سکھاؤن والا تے بچیاں دا اُستاد ہیگا واں تے تعلیم تے سچ دا جیہڑا نمونہ شریعت وچ ہیگا اے ،اوہ میرے کول ہیگااے ۔ سو تُو ں جیہڑا ہوراں نوں سکھاؤندا ایں اپنے آپ نوں کیوں نئیں سکھاؤندا ؟ تُوں جیہڑا تعلیم دیندا ایں پئی چوری نہ کریں ، آپ کیوں چوری کردا ایں ؟ تُوں جیہڑا آکھدا ایں پئی زناناں کریں آپ کیوں زناکردا ایں ؟ تُوں جیہڑا بُتاں نوں چنگیاں نئیں جان دا آپ کیوں مندراں نوں لُٹ دا ایں “(رومیوں ۲ :۱۷ ۔ ۲۲)۔
سانوں ہیٹھاں دتے ہوئے جملیاں نوں جانن دی لوڑ ہیگی اے ۔ خُدا نے اصل وچ یہودی قوم
نوں سدیا ایسے طرحاں خُدا دا کلام تے قربانی دے راہیں پاپاں توں معافی دا طریقہ وی اوہناں دے ہتھ دتا گیا اے ۔ اوہنے وعدہ کیتا پئی مسیحا یہودیوں دے راہیں ایس جگ وچ آوے گا تے اپنے ایس ارادے نوں یہودی نبیاں دے راہیں ظاہر کیتا ۔ ایسے طرحاں موسیٰ تے دوجے سارے وڈے نبی یہودی ہیگے سَن ۔ پر ،یہودی ایہہ سوچدے سَن پئی اوہناں نوں پتہ اے پئی اوہ خُدا نوں کویں خوش کرن گے تے اوہناں نوں ایہہ وی پتہ سی پئی اوہدی شریعت کیہ ہیگی سی کیوں جے اوہ بوہت شوق نال ایہنوں زبانی پڑھدے تے خُدا دے کلام نوں ہمیشہ یاد کردے پئی اوہدی شریعت کیہ ہیگی سی ۔ فیر وی ، پولُس رسول نے آکھیا ، ” سو جے تُو ں یہودی اکھواؤندا تے شریعت اُتے دھیان تے خُدا اُتے گھمنڈ کرداایں ۔ “ بھاویں یہودی خُدا اُتے گھمنڈ کردے تے اوہدی قربانیاں دی حدوں دُونی خدمت کردے سَن فیروی اوہ مکتی یافتہ نئیں ہیگے سَن ۔ جیہڑے یسوع اُتے کامل ایمان نئیں رکھدے اوہ بالکل بے ایمان وانگر نیں ۔ایہدا مطلب ایہہ ہیگا اے پئی اوہناں نیں ناں تاں خُدا دے وعدے اُتے یقین کیتا پئی اوہ اوہناں نوں اپنی قربانی دے طریقے وانگر مکتی دیوے گا تے ناں ای یسوع اُتے مکتی داتا ہون دا ایمان رکھیا ۔
ایہو جیہے یہودی دوزخ وچ جان گے کیوں جے اوہناں نیں یسوع دے مکتی داتا ہون اُتے ایمان نئیں رکھیا ۔اوہناں لئی میمنے دے سر اُتے گھڑی مُڑی ہتھ رکھنا بیکار ہو گیا اے ۔ اوہ سچ مُچ ایمان نئیں لیاؤندے پئی ، ’ ہاتھ رکھن ‘ دا مطلب ’پاپاں نوں لدنا ‘ ملاکی نبی دے ویلے تیک ،تے پُرانے عہد نامے دے اخیر تیک سی ۔اوہ داؤد دے ویلے تیک تاں ایہدے اُتے بوہت ایمان رکھدے سَن ،پر سلیمان دے ویلے توں اوہناں دا ایمان وگڑنا شروع ہو گیا سی ۔بادشاہی دے ونڈ پین دے دیہاڑیاں وچکار ، اوہناں نیں دوجیاں دیوتیاں ،مثال طور اُتے بعل تے عستارات دی پوجا کیتی ،بھاویں اوہ ہیکل وچ رسمی قربانیاں چڑھاؤندے سَن ۔ رسمی قربانیاں چڑھاؤنا بالکل خُدا اُتے ایمان ناں لیاؤن دے وانگر ہیگا اے ۔ جدوں اسیں خُدا اُتے ایمان لیاؤندے تے اوہدے کلام اُتے عمل کردے ہاں تاں خُدا نوں سکون ملدا اے ۔
تنبو والی تھاں دے قربانی دے طریقے وچ ،اک بندے دے پاپ ،قربانی دے پسُو دے سِر اُتے اوہدے ہتھ رکھن نال لد دِتے جاندے سَن۔سو اوہ آپ تاں ایہدے اُتے ایمان نئیں لیاؤندے پر دوجیاں نوں ایہدی تعلیم سکھاؤندے نیں ،بھاویں اوہناں نوں پتہ ہیگا اے پئی کیہ ٹھیک ہیگا اے تے کیہ غلط فیر وی ایمان نئیں لیاؤندے ۔ ایہوای یہودیاں دا پاپ ہیگاسی ۔ خُدا دے کلام نوں سچیاں جاندیاں ہوئیاں اوہدے کلام اُتے ایمان ناں لیاؤنا تے کلام دی تعلیم لوکاں نوں سکھاؤنا ،ایہو ای اوہ پاپ ہیگا سی جیہڑا یہودی کردے سَن۔
ایہہ بالکل خُدا اُتے ایمان ناں لیاؤن وانگر ہیگااے ۔ ایہہ اک ودھن والا پاپ ہیگااے ۔ ” سو جے تُو ں یہودی اکھواؤندا تے شریعت اُتے دھیان تے خُدا اُتے گھمنڈ کرداایں ۔ تے اوہدی مرضی جان دا تے شریعت دی تعلیم سُن کے چنگیاں گلاں پسند کردا ایں ۔ تے جے تُوں ایس گل اُتے وی یقین رکھدا ایں پئی میَں انھیاں نوں راہ وکھاؤن والا تے ہنیرے وچ پئے ہوئیاں لئی روشنائی ۔کم عقلیاں نوں سکھاؤن والا تے بچیاں دا اُستاد ہیگا واں تے تعلیم تے سچ دا جیہڑا نمونہ شریعت وچ ہیگا اے ،اوہ میرے کول ہیگااے ۔ “(رومیوں ۲:۱۷ ۔ ۲۰)۔ پولُس یہودیاں وچکار بے یقینی دی گل کردااے ۔
پاپ نوں دل وچ رکھ کے یسوع اُتے ایمان لیاؤنا خُدا دی بے عزتی کرن دے برابر ہیگااے
اسیں یہودیاں دی ایس غلطی نوں اج دے کئی مسیحیاں وانگر سمجھ سکدے آں۔یہودی بالکل اوہناں وانگر ہیگے نیں جیہڑے یسوع اُتے ایمان نئیں لیائےپئی اوہ اوہناں نوں پاک کرن دے راہیں اوہناں دے سارے پاپاں نوں مکا چُکیااے ۔ ” تُوں جیہڑا شریعت اُتے گھمنڈ کردا ایں ، شریعت نوں ناں من کے خُدا دی کیوں بے عزتی کردا ایں ؟ کیوں جے تہاڈے سبب توں اوپریاں قوماں وچ خُدا دے ناں بارے کفر بولیا جاندااے۔ایس لئی اِنج لکھیا وی اے “(رومیوں ۲ :۲۳ ۔۲۴)۔جے اسیں یسوع اُتے کچا ایمان رکھدے آں تاں اسیں اوہدے ناں دی بے عزتی کردے آں ۔ جے اسیں یسوع دے کلام اُتے پکا ایمان نئیں لیاؤندے تے نویں سریوں نئیں جم دے تاں ایہہ وی خُدا دے ناں دی بے عزتی کرن وانگر ہیگااے ۔
نویں سریوں جمیوں اَڈ ای یسوع اُتے ایمان لیائی رکھنا خُدا دے ناں دی بے عزتی ہیگی اے ۔ ” ختنے دا فائدہ تاں ہیگااے پر شرط ایہہ ہیگی اے پئی تُوں شریعت اُتے عمل کریں پر جدوں تُوں شریعت دا آکھا ناں منیا ں تاں تیرا ختنہ مُک گیا ۔سو جے کوئی بے ختنہ بندہ شریعت دا آکھامنے تاں کیہ اوہدا بے ختنہ ہونا ختنے وانگر ناں سمجھیا جاوے گا؟ تے جیہڑا بندہ اپنی قوم دے سبب بے ختنہ رہیا جے اوہ شریعت نوں پوریاں کرے تاں کیہ تینوں جیہڑا کلام تے ختنہ دے ہوندیاں شریعت دا آکھیا نئیں من دا قصوروار ناں بنائے گا؟ ایس لئی پئی وکھالے دا کوئی یہودی نئیں ہوندا تے ناں اوہ ختنہ ہیگا اے جیہڑا وکھالے دا تے بدنی ہیگااے ۔ سگوں یہودی اوہو ای اے جیہڑا دلوں ہیگا اے تے ختنہ اوہو ای اے جیہڑا دل دا تے رُوحانی ہیگا اے ناں پئی بول کے۔ ایہو جیہے دی وڈیائی بندیاں ولوں نئیں سگوں خُدا ولوں ہوندی اے ۔ “(رومیوں ۲: ۲۵ ۔۲۹)۔سانوں ساریاں نوں یسوع دے کلام نوں سچے دل نال قبول کرنا چاہی دااے ۔
کیہڑا پہلوں آیا ختنہ یاں شریعت؟
کیہڑا پہلوں آیا ختنہ یاں شریعت؟خُدا نے اِسرائیل نوں پہلوں کیہ دتا سی ؟ ختنہ ۔ خُدا نے ابرہام نوں پہلاں ختنہ بارے دسیا ۔ ابرہام ۹۹ ورہیاں دا ہوگیا سی تاں وی اوہدا کوئی وارث نئیں جمیا سی ۔پر خُدا نے ۷۵ ورہیاں دی عمر وچ ابرہام نوں اک پُتر جیہڑا اوہدا وارث ہووے ، دین دا وعدہ کیتا سی ۔خُدا نے ابرہام نوں دسیا، ” باہر آجا، میَں اَسمان دے تاریاں وانگر تیری اولاد نوں ودھاواں گا ۔ “ابرہام خُدا دے کلام اُتے ایمان لیایا تے ۲۵ ورہیاں تیک ایس وعدے دے پورے ہون دی اُڈیک رکھی ۔اخیر نوں ایہہ وعدہ ۲۵ ورہیاں بعد پورا ہویا ۔ ایس لئی ، جدوں اوہ ۱۰۰ورہیاں دا ہویا تاں اوہنوں اوہدا وارث پُتر دتا گیا ۔ بھاویں اوہ اُڈیکدیاں ہوئیاں کُجھ پریشان وی ہویا تے بوہت ساریاں غلطیاں وی کیتیاں تاں وی اوہنے ۲۵ ورہیاں تیک خُدا دے وعدے دے پورے ہون دی اُڈیک رکھی ۔ خُدا نے اوہنوں تے اوہدی اولاد نوں وعدہ کیتی ہوئی دھرتی کنعان دا ملک دین دا وعدہ وی کیتا ،جیہڑا رُوحانی طور اُتے اَسمانی بادشاہی ول اشارہ کردااے ۔
اَسمانی بادشاہی دا وعدہ کرن دے بعد ، خُدا نے ابرہام تے اوہدے گھر وچ رہن والے ہر اک بندے لئی ختنہ دا نشان مقررکیتا ۔ خُدا نے اوہناں نو ں دسیا پئی ختنہ تہاڈے تے میرے وچکار اک وعدے دا نشان ہووے گا ۔ ایس لئی ، ابرہام نے اپنی کھلڑی وڈھ کے اپنا ختنہ کیتا ۔تے اوہدے گھر وچ رہن والے ہر بندے نے ایس رسم نوں پوریاں کیتا ۔ ختنہ اوس ایمان وانگر ہیگا اے ،جیہدے راہیں اسیں ایمان لیاؤندے تے سچی خوشخبری پاؤندے آں ۔
اِسرائیل دل دے ختنے دا منکر ہویا
پر،اِسرائیلی ابرہام دی اولاد ہون دا گھمنڈ کردے تے مختون ہون دے سبب ،شیخی مار کے اوپریاں قوماں توں پُچھدے ۔” کیہ تہانوں ختنہ دتا گیا اے؟ “ لازمی ہیگا اے پئی ساڈے دل دا ختنہ ہووے ۔ جدوں سانوں ایہہ کلام ملدا اے پئی یسوع نے جگ دے پاپاں نوں مکا دتا تے ایہدے اُتے سچے دلوں ایمان لیاؤندے آں ،تاں اسیں مکتی پاؤندے آں۔
اِسرائیل توں ودھ کے کسے دوجے ملک اُتے حملہ نئیں ہویا ہووے گا ۔اوہ گھٹوگھٹ ۲ہزار ورہیاں توں اینے وڈے دُکھ وچ ہیگے نیں ،جویں پئی اک بے گھربندہ اپنے گھر لئی ہووے ۔ خُدا نوں اِسرائیل اُتے غصہ آیا ۔کاہدے لئی ؟ کیوں جے اوہناں نے ایمان ناں لیانداسی ۔
وہ خُدا دے ناں بارے کفر بولدے نیں کیوں جے بھاویں خُدا نے اِسرائیل نال محبت کیتی تے اوہ چاؤہندا سی پئی اوہ اوہدے اُتے ایمان لیاؤن پئی خُدا نے اوہناں دے پاپ مکا دتے نیں ،تاں وی اوہ ایمان نئیں لیائے ۔اوہ اِسرائیل داایالی بن کے اوہناں دے ویریاں نوں ہراؤنا چاؤہندا سی تے اوہناں نوں برکت تے محبت تے جلال دینا چاؤہندا سی ۔
جے اوہ ایہدے اُتے سچے دلوں ایمان لیاؤن تے پاپاں توں معافی پاؤن تاں خُدا اوہناں نوں اپنا جلال دین تے اپنا پُتر بنن دا حق دے چُکیا اے ۔اِسرائیل دی مثال راہیں ،خُدا جگ دے سارے لوکاں نوں خبردار کردا اے پئی جے اوہناں نے اوہدے وعدے دا یقین ناں کیتا،تاں اوہناں نوں دوزخ دی اگ وچ سُٹیا جاوےگا ۔
خُدانے وعدہ کیتا اے پئی جیہڑا وی اوہدی سچی خوشخبری اُتے ایمان لیائے ،اوہ ساریاں نعمتاں جنہاں دا یسوع نے وعدہ کیتا اے ،بھاویں اوہ شریعت نوں پورا نئیں کرسکدا ،تاں وی پا سکدا اے ۔ خُدا دی سزا توں بچن دا صرف اِکو ای راہ ہیگا اے پئی خوشخبر ی اُتے ایمان لیاوو۔ ایہدے اُتے ایمان لیاوو، تاں تسیں مکتی پاوو گے تے دوزخ دی اگ توں بچن دے لائق ہوجاوو گے ۔
میَں چاؤہندا ہاں پئی خُداوند دا فضل ہر اِک رُوح اُتے چوکھا سارا ہووے۔
Copyright © 2021 by The New Life Mission