[3-3] ព្រះយេស៊ូវ បានយាងមក តាមរយៈ ទឹក ព្រះលោហិត និងព្រះវិញ្ញាណ (១យ៉ូហាន ៥:១-១២)

មានមនុស្សតែមួយប្រភេទប៉ុណ្ណោះ ដែលព្រះរាប់ជាសុចរិត។ ពួកគេគឺជាអ្នកដែលមិនមានបាបនៅក្នុងចិត្តរបស់ពួកគេ។ ទ្រង់ទទួលស្គាល់តែអ្នកដែលជឿលើការពិតទាំងបីប៉ុណ្ណោះ៖ ព្រះយេស៊ូវដែលជាព្រះ បានយាងចុះមកផែនដីនេះជាសាច់ឈាម បានទទួលបុណ្យជ្រមុជនៅក្នុងទន្លេយ័រដាន់ និងបានបង្ហូរព្រះលោហិតនៅលើឈើឆ្កាង ដើម្បីដោះអំពើបាបទាំងអស់របស់យើងចេញ។ 
ព្រះរាប់អស់អ្នកដែលជឿតាមដំណឹងល្អអំពីសេចក្តីប្រោសលោះ ជាសុចរិត ពីព្រោះពួកគេជឿយ៉ាងត្រឹមត្រូវលើគ្រប់យ៉ាងដែលទ្រង់បានធ្វើសម្រាប់យើង។ ពួកគេជឿថា ព្រះយេស៊ូវបានយាងមក និងទទួលបុណ្យជ្រមុជ ដើម្បីដោះអំពើបាបទាំងអស់របស់ពួកគេចេញ និងថា ទ្រង់បានទទួលយកការជំនុំជម្រះនៃការសុគតនៅលើឈើឆ្កាងជំនួសយើង ហើយទ្រង់បានមានព្រះជន្មរស់ពីសុគតឡើងវិញ។
គ្រប់ការទាំងនេះត្រូវបានសម្រេច ដោយសារសេចក្តីស្រឡាញ់របស់ព្រះ។ ព្រះយេស៊ូវបានយាងចុះពីស្ថានសួគ៌ ហើយមានបន្ទូលថា «អស់អ្នកដែលនឿយព្រួយ ហើយផ្ទុកធ្ងន់អើយ ចូរមកឯខ្ញុំ ខ្ញុំនឹងឲ្យអ្នករាល់គ្នាឈប់សំរាក» (ម៉ាថាយ ១១:២៨)។ 
ប៉ុន្តែ ព្រះមិនទទួលស្គាល់អស់អ្នកដែលជឿលើព្រះលោហិតរបស់ព្រះយេស៊ូវតែមួយមុខនោះឡើយ ពីព្រោះពួកគេនៅតែមានបាបនៅក្នុងចិត្តរបស់ពួកគេនៅឡើយ។ តើព្រះយេស៊ូវទទួលស្គាល់អ្នកណាថាបានសង្រ្គោះហើយ?
សេចក្តីជំនឿលើបុណ្យជ្រមុជរបស់ព្រះយេស៊ូវ ព្រះលោហិតទ្រង់ និងការពិតថា ទ្រង់គឺជាព្រះ។ ការពិតទាំងនេះពិតជាចាំបាច់សម្រាប់     សេចក្តីសង្រ្គោះរបស់អ្នកខ្លាំងណាស់។ «នៅពេលខ្ញុំបានមកផែនដីនេះ និងបានទទួលបុណ្យជ្រមុជពីលោកយ៉ូហាន-បាទ្ទីស ខ្ញុំបានដោះអំពើបាបទាំងអស់របស់អ្នកចេញរួចហើយ។ ខ្ញុំធ្វើបន្ទាល់ថា អំពើបាបទាំងអស់របស់លោកិយនេះត្រូវបានផ្ទេរមកឯខ្ញុំរួចហើយ ហើយខ្ញុំក៏បានសងថ្លៃឈ្នួលនៃអំពើបាបទាំងអស់នោះនៅលើឈើឆ្កាងរួចហើយផងដែរ។ ដូច្នេះ ខ្ញុំបានសង្រ្គោះអ្នករួចហើយ។»
ទៅកាន់អស់អ្នកដែលជឿលើការពិតទាំងបីនេះ ព្រះយេស៊ូវមានបន្ទូលថា «មែនហើយ អ្នកបានសង្រ្គោះហើយ។ អ្នកត្រូវបានរាប់ជាសុចរិត និងបានធ្វើជាកូនរបស់ព្រះហើយ»។ ហើយអ្នកក៏អាចបានសង្រ្គោះផងដែរ បើសិនអ្នកជឿលើបុណ្យជ្រមុជរបស់ព្រះយេស៊ូវ ព្រះលោហិតទ្រង់ និងព្រះវិញ្ញាណ។ ចំណែកអ្នកដែលជឿលើព្រះលោហិត និងព្រះវិញ្ញាណតែប៉ុណ្ណោះ នៅតែមានបាបនៅក្នុងចិត្តរបស់ខ្លួន។
នៅក្នុងនគររបស់ព្រះ មានសេចក្តីពិតតែមួយប៉ុណ្ណោះ។ ហើយក៏មានយុត្តិធម៌ សេចក្តីស្មោះត្រង់ និងសេចក្តីសប្បុរសផងដែរ ប៉ុន្តែមិនមានសេចក្តីកុហក និងល្បិចកលណាមួយនៅលើស្ថានសួគ៌សោះឡើយ។

 

តើអ្នកណាគឺជា «ពួកទទឹងច្បាប់»?
អ្នកដែលមិនជឿលើបុណ្យជ្រមុជរបស់ព្រះយេស៊ូវ

 

«នៅថ្ងៃនោះ នឹងមានមនុស្សជាច្រើននិយាយមកខ្ញុំថា ឱព្រះអម្ចាស់ៗអើយ តើយើងខ្ញុំមិនបានទាយដោយនូវព្រះនាមទ្រង់ ហើយដេញអារក្សដោយនូវព្រះនាមទ្រង់ ព្រមទាំងធ្វើការឫទ្ធិបារមីជាច្រើន ដោយនៅព្រះនាមទ្រង់ទេឬអី?» (ម៉ាថាយ ៧:២២)។
 ព្រះមិនដែលទទួលស្គាល់កិច្ចការទាំងនេះរបស់មនុស្ស ដើម្បីអនុញ្ញាតឲ្យពួកគេចូលទៅក្នុងនគររបស់ទ្រង់ឡើយ។ «នោះខ្ញុំនឹងនិយាយដោយត្រង់ថា អញមិនដែលបានស្គាល់ឯងរាល់គ្នាទេ នែ ពួកទទឹងច្បាប់អើយ ចូរថយចេញពីអញទៅ» (ម៉ាថាយ ៧:២៣)។
«ទូលបង្គំបានថ្វាយផ្ទះពីរដល់ទ្រង់ ហើយក៏បាលះបង់ជីវិតរបស់ទូលបង្គំសម្រាប់ទ្រង់ផងដែរ។ តើទ្រង់មិនបានទតឃើញទេឬអី? រហូតដល់ដង្ហើមចុងក្រោយរបស់ទូលបង្គំ ទូលបង្គំមិនបានបដិសេធទ្រង់ឡើយ។ តើទ្រង់មិនបានទតឃើញទេឬអី?»
«អញ្ចឹង តើអ្នកមានបាបនៅក្នុងចិត្តរបស់អ្នកដែរឬទេ?»
«មែនហើយ ព្រះអម្ចាស់។ ទូលបង្គំមានបាបបន្តិចបន្តួច។»
«អញ្ចឹង ចូរថយចេញពីខ្ញុំទៅ! នៅទីនេះ មិនអនុញ្ញាតឲ្យមនុស្សមានបាបមកឡើយ។»
«ប៉ុន្តែទូលបង្គំបានទទួលទុក្ករកម្មសម្រាប់សេចក្តីជំនឿរបស់ទូលបង្គំនៅក្នុងព្រះអម្ចាស់!»
«ទទួលទុក្ករកម្ម? អ្នកចង់មានន័យយ៉ាងដូចម្តេច? អ្នកបានស្លាប់ ដោយសារតែភាពមានះរបស់អ្នកប៉ុណ្ណោះ។ តើអ្នកបានជឿលើបុណ្យជ្រមុជ និងឈាមរបស់ខ្ញុំដែរទេ? តើខ្ញុំបានធ្វើបន្ទាល់នៅក្នុងចិត្តរបស់អ្នកថា អ្នកគឺជារាស្រ្តរបស់ខ្ញុំដែរទេ? អ្នកមិនបានជឿលើបុណ្យជ្រមុជរបស់ខ្ញុំ ហើយខ្ញុំមិនដែលធ្វើបន្ទាល់ថា អ្នកគឺជារាស្ត្ររបស់ខ្ញុំឡើយ ប៉ុន្តែអ្នកប្រកាន់ខ្ជាប់តាមសេចក្តីជំនឿរបស់អ្នក និងបានស្លាប់ដោយសារវា។ តើខ្ញុំបានធ្វើបន្ទាល់សម្រាប់អ្នកពីពេលណា? អ្នកបានធ្វើវា ដោយខ្លួនឯងសោះ។ អ្នកបានស្រឡាញ់ និងព្យាយាមបង្កើតសេចក្តីប្រោសលោះ ដោយខ្លួនឯង។ តើអ្នកយល់ទេ? ឥឡូវនេះ ចូរទៅតាមផ្លូវរបស់អ្នកចុះ។»
ព្រះយេស៊ូវបានប្រាប់យើងឲ្យក្រោកឡើង និងបញ្ចេញពន្លឺ។ អ្នកដែលបានសង្រ្គោះ អាចខ្លាចគ្រីស្ទបរិស័ទ និងពួកហោរាក្លែងក្លាយជាច្រើន ហើយមិនបញ្ចេញពន្លឺទេ! ប៉ុន្តែអណ្តាតភ្លើងដ៏តូចមួយអាចបង្កើតជាភ្លើងដ៏ធំមួយបាន។ បើសិនយើងឈរយ៉ាងក្លាហាន និងធ្វើបន្ទាល់ពីសេចក្តីពិត លោកិយទាំងមូលនឹងទទួលបានពន្លឺហើយ។
«ចូរក្រោកឡើង ហើយភ្លឺមកចុះ ដ្បិតពន្លឺរបស់ឯងបានមកដល់ហើយ សិរីល្អនៃព្រះយេហូវ៉ាក៏បានរះឡើងដល់ឯងដែរ ដ្បិតមើល សេចក្តីងងឹតនឹងគ្របលើផែនដី ហើយសេចក្តីសូន្យសុងនឹងគ្របលើអស់ទាំងជនជាតិ តែព្រះយេហូវ៉ាទ្រង់នឹងរះឡើងភ្លឺដល់ឯង ហើយគេនឹងឃើញសិរីល្អនៃទ្រង់ស្ថិតលើឯង» (អេសាយ ៦០:១-២)។
ព្រះយេស៊ូវបង្គាប់ឲ្យយើងក្រោកឡើង ហើយបញ្ចេញពន្លឺ ពីព្រោះភាពងងឹតនៃសេចក្តីមិនពិត ដែលជាដំណឹងល្អក្លែងក្លាយបានគ្របដណ្តប់លោកិយទាំងមូលហើយ។ មានតែអ្នកដែលជឿលើព្រះយេស៊ូវប៉ុណ្ណោះ ទើបអាចស្រឡាញ់ទ្រង់បាន ហើយអ្នកដែលមិនបានសង្រ្គោះ មិនអាចស្រឡាញ់ទ្រង់បានឡើយ។ ហេតុអ្វី? ពីព្រោះពួកគេគ្រាន់តែនិយាយអំពីសេចក្តីស្រឡាញ់ ប៉ុន្តែមិនអាចស្រឡាញទ្រង់ពិតប្រាកដបានឡើយ បើសិនពួកគេមិនជឿតាមសេចក្តីពិតទាំងស្រុង។