[11-12] វាំងនន និងសសរនៃទីបរិសុទ្ធ (និក្ខមនំ ២៦:៣១-៣៧)

ទីបរិសុទ្ធ

ខ្ញុំចង់ឆ្លុះបញ្ចាំងអំពីអត្ថន័យខាងវិញ្ញាណ ដែលមាននៅក្នុងសសរនៃទីបរិសុទ្ធ និងពណ៌នៃវាំងននរបស់វា។ រោងឧបសថដែលយើងកំពុងតែពិចារណានៅទីនេះ មានបណ្តោយប្រវែង ១៣.៥ ម៉ែត្រ និងទទឹងប្រវែង ៤.៥ ម៉ែត្រ ហើយត្រូវបានបែងចែកជាពីរបន្ទប់គឺ ទីបរិសុទ្ធ និងទីបរិសុទ្ធបំផុត។ នៅក្នុងទីបរិសុទ្ធ មានជើងចង្កៀងមួយ តុតាំងនំប៉័ង អាសនាគ្រឿងក្រអូប ហើយនៅក្នុងទីបរិសុទ្ធបំផុត មានហិបសញ្ញា ដែលគេដាក់ទីសន្តោសប្រោស។
រោងឧបោសថមានទីបរិសុទ្ធ និងទីបរិសុទ្ធបំផុត ហើយនៅគ្រប់ជ្រុងទាំងអស់ត្រូវបានព័ទ្ធទៅដោយក្តាឈើនាងនួន ដែលមានទទឹងប្រវែង ៧០សង់ទីម៉ែត្រ និងកម្ពស់ ៤.៥ ម៉ែត្រ។ ហើយនៅឯទ្វាររោងឧបោសថ មានដាក់សសរឈើនាងនួនចំនួនប្រាំ ដែលត្រូវបានស្រោបដោយមាស។ ទ្វារនេះ ដែលគេចូលពីទីលានខាងក្រៅទៅក្នុងរោងឧបោសថ ត្រូវបានធ្វើពីវាំងននអំបោះពណ៌ផ្ទៃមេឃ ពណ៌ស្វាយ និងពណ៌ក្រហម និងសំពត់ខ្លូតទេសវេញយ៉ាងខ្មាញ់។ 
នៅទីលានខាងក្រៅនៃរោងឧបោសថ មានសសរចំនួនហុកសិប ដែលសសរនីមួយៗមានកម្ពស់ ២.២៥ ម៉ែត្រ។ ហើយទ្វារទីលាន ដែលត្រូវបានដាក់នៅជ្រុងខាងកើត ក៏ត្រូវបានធ្វើពីអំបោះពណ៌ផ្ទៃមេឃ ពណ៌ស្វាយ និងពណ៌ក្រហម ត្បាញជាមួយសំពត់ខ្លូតទេសផងដែរ ហើយគេត្រូវតែឆ្លងកាត់ទ្វារទីលានខាងក្រៅនេះ ទើបគេអាចចូលទៅទីលានរោងឧបោសថបាន។ នៅទីលានរោងឧបោសថនេះ មានអាសនាតង្វាយដុត និងចានក្លាំលង្ហិន។ 
បើសិនឆ្លងកាត់ទីលានទាំងពីរនេះ គេអាចចូលទៅដល់ទ្វាររោងឧបោសថ ដែលមានកម្ពស់ ៤.៥ ម៉ែត្របាន។ ទ្វារោងឧបោសថនេះមានសសរចំនួនប្រាំ ដែលមានជើងធ្វើពីប្រាក់។ ដូចទ្វារចូលទីលានរោងឧបោសថដែរ ទ្វាររោងឧបោសថត្រូវបានធ្វើពីវាំងននអំបោះពណ៌ផ្ទៃមេឃ ពណ៌ស្វាយ និងពណ៌ក្រហម និងសំពត់ខ្លូតទេសវេញយ៉ាងខ្មាញ់ ហើយត្រូវបានព្យួរនៅលើទំពក់មាសនៅពីលើសសរទាំងប្រាំ។ វាំងនននេះបែងចែករវាងផ្នែកខាងក្រៅ និងផ្នែកខាងក្នុងនៃរោងឧបោសថ។ 

មានស្នែងប្រាក់បួននៅលើជ្រុងទាំងបួននៃអាសនាតង្វាយដុត ដែលគេដាក់នៅក្នុងទីលានរោងឧបោសថ។ នៅក្នុងព្រះគម្ពីរ ស្នែងទាំងនេះបង្ហាញពីការជំនុំជម្រះបាប (យេរេមា ១៧:១; វិវរណៈ ២០:១១-១៥)។ នេះបង្ហាញប្រាប់យើងថា ដំណឹងល្អនៃឈើឆ្កាងមានបុណ្យជ្រមុជដែលព្រះយេស៊ូវបានទទួល ជាមូលដ្ឋានគ្រឹះ។ ដូច្នេះ សាវកប៉ុលបាននិយាយថា «ដ្បិតខ្ញុំគ្មានសេចក្តីខ្មាស ចំពោះដំណឹងល្អនៃព្រះគ្រីស្ទទេ ពីព្រោះជាព្រះចេស្តានៃព្រះ សំរាប់នឹងជួយ សង្គ្រោះដល់អស់អ្នកណាដែលជឿ» (រ៉ូម ១:១៦)។ ហើយនៅក្នុង ១កូរិនថូស ១:១៨ គាត់សរសេរថា «ដ្បិតដំណឹងពីឈើឆ្កាង នោះជាសេចក្តីចំកួត ដល់អស់អ្នកដែលកំពុងតែវិនាស តែជាព្រះចេស្តានៃព្រះ ដល់យើងរាល់គ្នាដែលកំពុងតែបានសង្គ្រោះវិញ»។ 
ស្នែងទាំងអស់របស់អាសនាតង្វាយដុតប្រកាសយ៉ាងច្បាស់លាស់ថា ការជំនុំជម្រះដ៏សុចរិត និងសេចក្តីសង្រ្គោះរបស់ព្រះត្រូវបានបំពេញសម្រេចទាំងស្រុង តាមរយៈបុណ្យជ្រមុជរបស់ព្រះយេស៊ូវ ការសុគតរបស់ទ្រង់នៅលើឈើឆ្កាង និងការមានព្រះជន្មរស់ពីសុគតឡើងវិញរបស់ទ្រង់។ 

យើងត្រូវតែជឿតាមសេចក្តីពិតដែលត្រូវបានបើកសម្តែងនៅក្នុងពណ៌ទាំងបួននៃទ្វារវាំងនននៃរោងឧបោសថ

តើអ្នកជឿថា ព្រះអម្ចាស់បានសង្រ្គោះយើង ដោយការយាងមកផែនដីនេះ តាមរយៈព្រះរាជកិច្ចនៃសំពត់ខ្លូតទេសវេញយ៉ាងខ្មាញ់ និងអំបោះពណ៌ផ្ទៃមេឃ ពណ៌ស្វាយ និងពណ៌ក្រហមដែរទេ? អំបោះពណ៌ស្វាយមានន័យថា ព្រះយេស៊ូវគឺជាព្រះទ្រង់ផ្ទាល់ អំបោះពណ៌ផ្ទៃមេឃមានន័យថា ព្រះយេស៊ូវដ៏ជាព្រះបានប្រសូតមកជាមនុស្សម្នាក់ ហើយបានទទួលយកអំពើបាបរបស់យើង ដោយការទទួលបុណ្យជ្រមុជនៅលើផែនដីនេះ ហើយអំបោះណ៌ក្រហមមានន័យថា ព្រះយេស៊ូវគ្រីស្ទដែលបានទទួលយកអំពើបាបទាំងអស់របស់យើង បានថ្វាយរូបកាយដ៏មានតម្លៃរបស់ទ្រង់ជាយញ្ញបូជានៅលើឈើឆ្កាង។ ដូច្នេះ យើងចាំបាច់ត្រូវតែជឿថា ព្រះយេស៊ូវដែលបានទទួលបុណ្យជ្រមុជ និងមានព្រះជន្មរស់ពីសុគតឡើងវិញ បានសង្រ្គោះអ្នក និងខ្ញុំយ៉ាងគ្រប់លក្ខណ៍។ 
មានតែអ្នកដែលពិតជាជឿតាមសេចក្តីពិតនេះប៉ុណ្ណោះ ដែលអាចធ្វើជាអ្នកបម្រើពួកជំនុំរបស់ព្រះបាន។ សសរទ្វាររោងឧបោសថសំដៅទៅលើអ្នកបម្រើ ការងារពួកជំនុំ។ សសរទាំងនោះបង្ហាញប្រាប់យើងថា មានតែអ្នកដែលជឿតាមរបៀបនេះប៉ុណ្ណោះ ដែលជារាស្ត្ររបស់ព្រះ ហើយថា មានតែមនុស្សបែបនេះប៉ុណ្ណោះ ដែលព្រះអាចប្រើជាសសរ និងអ្នកបម្រើការងាររបស់ទ្រង់បាន។ 
សំពត់ខ្លូតទេសពណ៌សវេញយ៉ាងខ្មាញ់ប្រាប់យើងថា អ្នកដែលបានធ្វើជារាស្ត្ររបស់ព្រះ គឺជាមនុស្សសុចរិត ដែលបានទទួលការអត់ទោសសម្រាប់អំពើបាបរបស់ខ្លួន ដោយការជឿតាមសេចក្តីពិតនៃអំបោះពណ៌ផ្ទៃមេឃ ពណ៌ស្វាយ និងពណ៌ក្រហម។ ព្រះអម្ចាស់របស់យើងបានយាងមកផែនដីនេះ ហើយបានសង្រ្គោះពួកមនុស្សមានបាប តាមរយៈបុណ្យជ្រមុជដែលទ្រង់បានទទួលពីលោកយ៉ូហាន និងព្រះលោហិតទ្រង់នៅលើឈើឆ្កាង។ ដោយសារព្រះអម្ចាស់បានសង្រ្គោះយើង ដោយការលះបង់ព្រះជន្មដ៏មានតម្លៃរបស់ទ្រង់ផ្ទាល់ យើងត្រូវតែជឿលើទ្រង់ដែលបានយាងមក ដោយទឹក និងឈាម (១យ៉ូហាន ៥:៦)។ 
អំបោះពណ៌ស្វាយសំដៅទៅលើការពិតថា ព្រះយេស៊ូវគឺជាស្តេចលើអស់ទាំងស្តេច។ នៅក្នុងន័យផ្សេង យើងត្រូវតែជឿថា ព្រះអម្ចាស់បានសង្រ្គោះយើង ដែលជាមនុស្សទាបថោក និងពេញដោយអំពើបាប ដោយការលះបង់ព្រះជន្មដ៏មានតម្លៃរបស់ទ្រង់ ហើយថា ទ្រង់បានយកយើងធ្វើជារាស្ត្ររបស់ទ្រង់។ ឥឡូវនេះ បើសិនយើងគ្រាន់តែជឿតាមសេចក្តីពិតនេះនៅក្នុងចិត្តរបស់យើង នោះដោយសារសេចក្តីជំនឿរបស់យើងលើសេចក្តីសង្រ្គោះដ៏គ្រប់លក្ខណ៍ យើងទាំងអស់គ្នាអាចត្រឡប់ជាមនុស្សសុរិតដែលឥតមានបាបបាន។ ដូច្នេះ យើងត្រូវតែអរព្រះគុណដល់ព្រះ សម្រាប់ការប្រទានឲ្យយើងនូវអំណោយទានសេចក្តីជំនឿនេះ ដើម្បីឲ្យយើងអាចមានសេចក្តីជំនឿនេះបាន។ 
តាមការពិត ការដែលយើងបានជឿតាមសេចក្តីពិតនេះគឺជាអំណោយទានមួយពីព្រះ។ ហើយសេចក្តីសង្រ្គោះចេញពីបាបរបស់យើងក៏ជាអំណោយទានមួយពីព្រះផងដែរ។ តើព្រះមិនបានសង្រ្គោះយើងចេញពីអំពើបាបរបស់យើង ដោយការលះបង់ព្រះជន្មដ៏មានតម្លៃរបស់យើងទេឬ? ដោយសារព្រះយេស៊ូវបានទទួលបុណ្យជ្រមុជ បានសុគតនៅលើឈើឆ្កាង បានមានព្រះជន្មរស់ពីសុគតឡើងវិញ និងបានប្រទានអំណោយទាននៃសេចក្តីសង្រ្គោះដល់យើង នោះយើងទាំងអស់គ្នាដែលជឿតាមដំណឹងល្អនេះ អាចទទួលបានអំណោយទាននៃសេចក្តីសង្រ្គោះនេះ ហើយបានធ្វើជារាស្ត្ររបស់ទ្រង់ផ្ទាល់បាន។ ទាក់ទងនឹងសេចក្តីសង្រ្គោះ ការប្រព្រឹត្តរបស់យើងផ្ទាល់មិនពាក់ព័ន្ធឡើយ។ យើងមិនអាចធ្វើអ្វីបានឡើយ ក្រៅពីគ្រាន់តែជឿលើព្រះយេស៊ូវគ្រីស្ទដែលបានយាងមក ដោយអំបោះពណ៌ផ្ទៃមេឃ ពណ៌ស្វាយ និងពណ៌ក្រហមប៉ុណ្ណោះ។ សេចក្តីសង្រ្គោះនេះហើយគឺជាអំណោយរបស់ព្រះសម្រាប់យើង។
សេចក្តីជំនឿនៅក្នុងព្រះយេស៊ូវចាប់ផ្តើម ដោយការគិតជាដំបូងអំពី «ការដែលយើងពិតជាត្រូវធ្លាក់ទៅស្ថាននរក ឬយ៉ាងណា»។ ហេតុអ្វី? ពីព្រោះនៅពេលយើងទទួលស្គាល់និស្ស័យបាបពិតប្រាកដរបស់យើងជាមុន យើងត្រូវតែជឿតាមសេចក្តីពិតថា ព្រះយេស៊ូវបានធ្វើជាតង្វាយយញ្ញបូជាសម្រាប់អំពើបាបរបស់យើង។ យើងអាចបានសង្រ្គោះ ទោះបើយើងកំពុងតែធ្វើបាបបាន ដោយសារអំណោយទាននៃសេចក្តីសង្រ្គោះពីព្រះអម្ចាស់ ដែលបានលះបង់អង្គទ្រង់ជំនួសយើង។ តើបានសង្រ្គោះ ដោយការគ្រាន់តែជឿលើព្រះដែរទេ? តើយើងបានធ្វើជារាស្ត្ររបស់ព្រះ ដោយសារសេចក្តីជំនឿដែរទេ? តើយើងពិតជាមានសេចក្តីជំនឿបែបនេះដែរទេ? តើយើងអាចសារភាពថា សេចក្តីសង្រ្គោះរបស់យើងគឺជាអំណោយទានរបស់ព្រះ មិនមែនជាការប្រព្រឹត្តរបស់យើងបានដែរទេ? ហើយតើយើងពិតជាបានទទួលស្គាល់ថា យើងទាំងអស់គ្នាត្រូវធ្លាក់ទៅស្ថាននរក មុនពេលយើងជឿលើអំណោយទាននៃសេចក្តីសង្រ្គោះ ដែលព្រះបានប្រទានឲ្យទេ? យើងត្រូវតែពិនិត្យមើលបញ្ហាទាំងនេះឡើងវិញម្តងទៀត។ 

រោងឧបោសថគឺជារូបភាពលម្អិតនៃព្រះយេស៊ូវ

សេចក្តីសង្រ្គោះនេះត្រូវបានរៀបចំទុកនៅក្នុងព្រះយេស៊ូវ គ្រីស្ទ តាំងពីមុនការបង្កបង្កើត