ដោយសារការរាតត្បាតនៃជម្ងឺកូវីឌ១៩ និងការរំខានដល់សេវាកម្មប្រៃសណីយអន្តរជាតិ
យើងបានផ្អាកជាបណ្តោះអាសន្ននូវ "សេវាកម្មសៀវភៅបោះពុម្ពដោយឥតគិតថ្លៃ" របស់យើង។
នៅក្នុងស្ថានភាពបែបនេះ យើងមិនអាចផ្ញើសៀវភៅទៅកាន់លោកអ្នកបានឡើយ។
សូមអធិស្ឋានសម្រាប់ការរលាយបាត់យ៉ាងឆាប់រហ័សនូវជម្ងឺរាតត្បាតនេះ និងការដំណើរការឡើងវិញនូវសេវាកម្មប្រៃសណីយ។
សូមអធិស្ឋានសម្រាប់ការរលាយបាត់យ៉ាងឆាប់រហ័សនូវជម្ងឺរាតត្បាតនេះ និងការដំណើរការឡើងវិញនូវសេវាកម្មប្រៃសណីយ។
مضمون 8: پاک رُوح
[8-18] سچیائی جیہڑی تہاڈی رُوح پاک دی بھرپوری پاؤن وچ اَگوائی کردی اے < یشوع ۴:۲۳>
> یشوع ۴:۲۳<
”کیوں جے خداوند تہاڈےخدانے جدتیک تُسیں پار نہ لنگ گئے یردن دے پانی نوں تہاڈے اگے توں ہٹا کے سُکا دتاجس طرحاں خداوند تہاڈے خدا نے بحرِ قُلزم نال کیتا پئی اوہنوں ساڈے اگوں ہٹا کے سُکا دتا جد تیک پئی اسیں پار نہ لنگ گئے۔ “
دریائے یردن دا واقعہ سانوں کیہ سکھاؤندا اے؟
ایہہ سانوں سکھاؤندا اے پئی یسوع مسیح پورے طور تے پاپ پاروں پیداہوئی موت نوں تے نسلِ انسانی لئی بعدوں آؤن والی عدالت نوں مُکا چکیا سی۔
ہُن میَں ایس سوہنی خوشخبری دی سچیائی دے بارے گل بات کرنا چاہواں گا جیہڑی سانوں روح پاک دی بھرپوری پاؤن دی اجازت دیندی اے۔ موسیٰ دی موت باہجوں، خُدا نے یشوع نوں اسرائیل دے آگودے طور تے مقرر کیتا۔ موسیٰ پرانے عہد نامے وچ شریعت دا نمائندہ سی۔ جے موسیٰ اسرائیل دے لوکاں دے نال یردن دے دریا توں پارلنگ گیاہوندا تے کنعان اپڑ چکیا ہوندا، تےفیر یشوع لئی لوکاں دا آگو بننالوڑی دا نہ ہوندا۔ فیروی، خُدانے موسیٰ نوں کنعان دی دھرتی دے بالکل اگے دے علاقے تائیں اپڑن دے قابل بنایا تے اوہنوں ایہدے وچ داخل ہون توں روک دِتا۔
ساڈے خُداوند نے سانوں موسیٰ تے یشوع نوں دِتا
موسیٰ پرانے عہد نامے وچ شریعت دا نمائندہ، اسرائیل دے لوکاں نوں کنعان وچ نہ لَے جاسکیا۔ جے اوہ شریعت دے راہیں اَگوائی پاکے ایس طرحاں کرچکیا ہوندا ،تد فیر ایہہ ساڈی مکتی لئی خدا دے منصوبے دے خلاف ہوندا۔ کوئی بندہ خدا دی شریعت دے اگے اپنے پاپاں توں مکت نئیں ہوسکدا کیوں جے کوئی وی شریعت نوں قائم نئیں رکھ سکدا۔ کیوں جے شریعت صرف پاپ نوں جانن لئی اے (رومیوں۳ :۲۰)۔
خُدادا بندے نوں شریعت دین دی وجہ اوہنوں پاپ دا علم عطا کرنا، شریعت نوں اوہدا استاد بناؤنا تے اوہنوں مسیح تیک لیاؤنا سی تاں پئی اوہ ایمان دے راہیں راستباز ٹھہر سکے (گلتیوں۳: ۲۴)۔ کیوں جے شریعت یسوع نوں لبھن لئی اک آگو دے علاوہ کُجھ نئیں سی، ایس لئی لوکاں نوں یسوع دی لوڑ سی، تے یسوع نوں ایسے ای پاروں ایس دنیا وچ آؤنا سی۔ خُد انے یشوع نوں جو کرن دی ہدایت دِتی ، اوہ اسرائیل دے لوکاں نوں یردن دے دریا پار کرن تے کنعان دن دی دھرتی وچ داخل ہون لئی حکم دینا سی۔
موسیٰ دی موت باہجوں، خدا نے اوہناں دی اوہناں دے نویں آگو یشوع راہیں کنعان دی دھرتی وچ داخل ہوؤن لئی اَگوائی کیتی۔ یشوع نے لوکاں دے عہُدے داراں نوں ایہہ آکھدیاں ہویاں حُکم دتا ، ”تُسیں لشکر دے وچکار توں ہو کے لنگو تے لوکاں نوں ایہہ حکم دیو پئی تُسیں اپنے اپنے لئی راہ دیاں شیواں تیار کر لووو کیوں جے تِن دیہاڑیاں وچ تہانوں ایس یردن توں پار ہوکے اوس ملک اُتے قبضہ کرن نوں جانا اے جنہوں خُداوند تہاڈا ا خُدا تہانوں دیندا اے تاں پئی تُسیں اوہدے وارث ہو جاوو۔“ (یشوع ۱:۱۱)۔
خدا نے یشوع نوں موسیٰ راہیں ممکن نہ ہوؤن باہجوں کنعان وچ داخل ہوؤن دا حکم دِتا۔ خُدا نے ایہہ آکھ کے یشوع نوں حکم دِتا ، ”تے اوہناں کاہناں نوں جیہڑے عہد دے صندو ق نوں چُک دے نیں ایہہ حکم دیتا پئی جد تُسیں یردن دے پانی دے کنارے اپڑو تے یردن وچ کھڑے رہنا۔تے یشوع نے بنی اسرائیل نوں آکھیا پئی کول آکے خُداوند اپنے خُدا دیاں گلاں سُنو۔ تے یشوع آکھن لگیا ایس توں تُسیں جان لووگے پئی زندہ خُدا تہاڈے وچکاراے تے اوہو ای ضرور کنعانیاں تے حتیاں تے حوریاں تے فرزیاں تے جرجاسیاں تے اموریاں تے یبوسیاں نوں تہاڈے اگے توں دور کرے گا۔ “یشوع۳ :۸۔۱۰)۔
موسیٰ دی موت باہجوں، خُدا نے یشوع نوں اسرائیل داآگومقرر کیتا تے اوہنوں اسرائیل دے لوکاں دے نال کنعان دی دھرتی وچ داخل ہونے دا حکم دتا۔ یشوع نام دا مطلب ” رہائی دلاؤن والا (مکتی داتا) “ اے جیہڑا ”یسوع “ یاں ”ہوسیع“ دا مترادف اکھراے۔ خُدا دے اک خادم یشوع نے لوکاں دی اَگوائی کردیاں ہویاں کاہناں نوں عہد دا صندوق چُکن تے یردن دے دریانوں پار کرن دا حکم دِتا۔ جدوں صندوق چُکن والے کاہناں نے اپنے پیر پانی وچ ڈبوئے ( کیوں جے فصل دے ویلے دے دوران یردن اپنے کناریاں توں باہر بہندا اے)، تد فیر پانی جیہڑا دریا دے اُپر والے پاسے توں آؤن دیا سی رُک گیا تے اَدم شہر جیہڑا ضرتان دے برابر اے توں کافی دُوررک گیا۔ انج پانی جیہڑا میدان دے دریایعنی دریایِ شور، توں تھلے جانداسی، وکھرا ہوگیا تے لوک عین یریحو دے سامنے پارلنگ سکے (یشوع۳ :۱۵۔۱۶)۔
ایس کہانی دے راہیں خُدا سانوں سکھاؤندااے پئی اوہ پورے طور تے پاپ پاروں پیدا ہوئی موت تے باہجوں آؤن والی نسل انسانی لئی عدالت نوں مُکاکرچکیا سی۔ دوجے اکھراں وچ، خداوند یسوع مسیح ساڈے مکتی داتا نے نسل انسانی دے سارے پاپاں نوں چُک لیا جدوں اوہنے یوحنا اصطباغی توں بپتسمہ لیا تے مصلوب ہُویا سی۔ ایس طریقے نال اوہنے نسل انسانی نوں کنعان دی اوس دھرتی تائیں اوہناں دی اَگوائی کرن دے راہیں اوہناں دے پاپاں توں بچا لیا، جیہڑی اسمان دی بادشاہی نوں ظاہر کردی اے۔
یردن دادریاا وہ تھاں اے جِتھے نسل انسانی پاک کیتی گئی سی
یردن دے دریاتوں پار لنگن دے ویلے دے آل دوالے دے تاریخی واقعات جس طرحاں پرانے تے نویں عہد نامے وچ بیان کیتے گئے، شاندار طور تے ضروری واقعات سن جنہاں نے نسل انسانی دے پاپاں پاروں پیدا ہوئی لعنتاں تے عدالت توں پکی رہائی ول اَگوائی کرنی سی۔
یردن دے دریادا موت دے دریا دے طور تے حوالہ دِتا جاندا اے ، تے دریا دی اخیری حد بحیرئہ مردار اے۔ اکھر یردن دا مطلب اے ”اجیہادریا جیہڑاصرف تھلے نوں وَگدا اے، مطلب موت دے ول“ یا ں ”ڈُب جانا، دبانا، تھلے نوں زور لاؤنا، لڑنا۔“ ایہہ صاف طور تے انسانیت دے پاپاں دی تاریخ ول اشارہ کردا اے۔ ایس دریا وچ، یسوع نے اپنے بپتسمہ دے راہیں، پاپاں دے سارے بہاونوں پایا جیہڑے کسے نسل انسانی دے راہیں مُک نئیں سکدے سن، تے ایہدے باہجوں صلیب اُتے مرگیا تے ایس طرحاں ایہناں دے پاپاں لئی نسل انسانی دی تھاں عدالت نوں قبول کر لیا۔
اسیں آدم تے حوا دی اولادکس پاسے رُخ کیتے ہوئے آں؟ کیوں جے خلق کیتیاں ہویاں ساریاں شیواں پاپ دے نال جم دیاں نیں، اوہ پاپ کردیاں نیں، تے اوہناں پاپاں دی قیمت دے طور تے، اوہ موت ول جاندیاں نیں۔ انسانیت دی تاریخ توں،ساری خلقت اپنے جمن ویلے توں تباہی ول ودھ رہی اے۔ گو بھانویں اوہ اپنی پاپی فطرت نوں قابو کرن دی بوہت کوشش کردی اے تد وی اوہ ایس طرحاں نئیں کرسکدی ، تے ایہہ اپنے پاپاں لئی اک اٹل عدالت ول ودھن دئی اے ۔
فیروی خدا نے پاپ تے عدالت دے بہاونوں وڈیا۔ خدا نے یشوع دی اسرائیل دے لوکاں نوں یردن دے دریا نوں پار کراؤن دے راہیں کنعان دی دھرتی وچ جاؤن لئی اَگوائی کیتی۔ ایہہ یشوع لئی خُدا دی مرضی سی۔ ایہہ کہانی ایہہ دس پاؤندی اے پئی پاپ توں مکت ہوؤن لئی، سانوں لازمی طورتے پاپاں دی قیمت ادا کرنی چاہی دی اے، جیہڑی پئی موت اے، تے ایس قیمت دے راہیں، اسیں اپنے سارے پاپاں توں پاک ہوندے آں تے اسمان وچ داخل ہوندے آں ۔
پرانے عہدنامے وچ، جد وں کاہناں نے جیہڑے عہد دا صندوق چُکے ہوئے سن اپنے پیر پانی وچ ڈبوئے تد فیر دریا دا بہاؤرُک گیا تے ایہہ اک سُکی زمین وچ بدل گیا ۔ ایہنے اسرائیل دے لوکاں نوں دریا پارلنگن دی اجازت دِتی۔ ایہہ پاپ دی اوہ معافی سی جیہڑی صرف اوہناں نوں دِتی گئی سی جیہڑے ایس سوہنی خوشخبری اُتے ایمان رکھدے سن۔ ایہہ پانی تے روح دی اوہ خوشخبری سی جیہنے نسل انسانی لئی پاپ دی قیمت ادا کیتی، تے اسیں ایس سوہنی خوشخبری اُتے ایمان رکھن دے راہیں روح پاک دی بھرپوری پاؤن لئی آچکے آں۔
جنرل نعمان
نعمان، جیہڑا سلاطین دی دوجی کتاب دے ۵ با ب وچ ظاہر ہوندا اے، اِرام دی فو ج دا اک اچیراتے وڈا سردار سی جیہنے اپنے ملک نوں ایہدے دشمناں توں بچایا سی ۔ اوہ اک کوڑھی وی سی جیہڑا ایس لعنت پاروں ہر شے نوں گوّآن دا لیکھ رکھدا سی۔ پر باہجوں اوہنے خوشخبری سُنی پئی اوہ ایس لعنت توں بچ سکدا سی۔ ایہہ آکھیا گیا پئی جے اوہ خدا دے اک خادم نال ملن جاوے جیہڑا اسرائیل وچ رہندا سی ، اوہ شِفا پاسکدا سی ۔ ایہہ اک چھوٹی جئی لونڈی سی جیہنے ایہہ خبر اپڑائی۔ اوہنے آکھیا ، ” کاش میرا آقا اوس نبی دے گھر ہوندا جیہڑا سامریہ وچ اے تے اوہ اوہنوں اوہدے کوڑھ توں شفا دے دیندا ۔ “ ۲۔سلاطین ۵:۳)۔
اوہنے ایس خبر اُتے ایمان رکھیا تے اسرائیل نوں گیا۔ جد اوہ الیشع دے گھر دے اگے اپڑیا ، الیشع نے اوہنوں آکھن لئی، اک قاصد گَلیا، ”یردن وچ ست واری غوطہ مار تے تیرا جثہ فیر بحال ہو جاوے گا تے تُوں پاک صاف ہوویں گا۔“ (۲۔سلاطین ۵:۱۰)۔ اک معجزاتی علاج دی آس رکھن والا، نعمان ناراض ہو گیا تے اپنے باپ دادا دے ملک نوں واپس جاؤن دا فیصلہ کیتا۔ فیروی اوہدے خادم دی دلی درخواست پاروں، اوہنے الیشع دی فرمانبرداری کیتی تے تھلے گیا تے اپنے سارے جثے نوں یردن وچ ست واری غوطہ دتا۔ اوتھے، اوہدا گوشت، اک واری فیراک چھوٹے بچے دی چمڑی دے وانگر بحال ہوگیا۔
ایسے طریقے نال، اسیں جان دے آں پئی سانوں اپنے سارے پاپاں توں معاف ہون لئی، لازمی طورتے اپنے ذاتی خیال چھڈنے چاہی دے نیں تے ایہنوں قبول کر لینا چاہی دا اے جو کجھ بائبل وچ لکھیا ہویا اے ۔تدسانوں سوہنیاں برکتاں دتیاں جاؤن گیاں۔ جیہڑا کوئی رہائی پاؤنا چاؤہندا اے اوہنوں لازمی طور تے خدا دے کلام دی فرمانبرداری کرنی چاہی دی اے تے اوہدے اُتے پورے طور تے ایمان رکھنا چاہی دا اے۔
بائبل آکھدی اے پئی دنیا دے سارے پاپ یسوع دے بپتسمہ تے لہو دی خوشخبری دے راہیں دھوئے گئے سن۔ سانوں لازمی طورتے اوسے طریقے نال نئیں سوچنا چاہی دا اے جس طرحاں نافرمان نعمان نے سوچیا۔ اسیں پانی تے روح دی خوشخبری دے اِڈ اپنے پاپاں توں پاک نئیں ہوسکدے ۔ ایس لئی سانوں اپنے سارے پاپاں توں معاف ہوؤن لئی، لا زمی طورتے پانی تے روح دی ایس سوہنی خوشخبری اُتے ایمان رکھنا چاہی دا اے۔ جس طرحاں نعمان پانی وچ اپنے جثے نوں سَت واری ڈبون دے راہیں پاک ہو گیا، بالکل اوسے طرحاں اسیں وی ایمان رکھدے آں پئی اسیں یسوع دے بپتسمہ، سولی چڑھن تے جی اٹھن دی ایس سوہنی خوشخبری اُتے ایمان رکھن دے راہیں اپنے پاپاں توں پاک ہوسکدے نیں۔ سانوں لازمی طورتے ایس خوشخبری اُتے بالکل اوسے طرحاں ایمان رکھنا چاہی دا اے جس طرحاں ایہہ موجوداے۔
یردن دے دریا اُتے ایس معجزے نے آدم دی ساری نسل لئی اک برکت نوں پیش کیتا مطلب سارے پاپاں دے بہاؤنوں وڈ دتا تے عدالت نوں مُکا دتا۔ ساری نسل انسانی شیطان ولوں بہکائے جاؤن باہجوں آدم تے حوا دے پاپ کرن پاروں باغِ عدن تون کڈھ دتی گئی سی۔ فیروی، یردن دا واقعہ اوہ سوہنی خوشخبری سی جیہڑی ساری نسل انسانی دی باغِ عدن ول پرت آؤن وچ اَگوائی کردی اے۔
یردن دے دریا دا واقعہ
بائبل ایس خوشخبری نوں بیان کردی اے پئی یسوع نے یردن اُتے سارے پاپ اپنے اُتے چُک لئے۔ ” ہن تُوں ہوؤن ای دے کیوں جے سانوں ایس طرحاں ساری راستبازی پوری کرنا مناسب اے۔ “ (متی۳ :۱۵)۔ بائبل بیان کردی اے پئی سارے پاپ یسوع اُتے لَد دِتے گئے سن جدوں اوہنے یردن دے دریا اُتے بپتسمہ لیا۔ دوجے اکھراں وچ، یسوع دا بپتسمہ اوہ واقعہ سی جیہنے پاپ دی اوس زنجیرنوں کٹیا جیہڑی ساری نسل انسانی نوں بنھے ہوئے سی۔ یسوع نے پاپ دا خاتمہ ایسے طرحاں کیتا تے ایہدے باہجوں سانوں صلیب اُتے لہو دے نال رہائی پیش کیتی۔
یردن بپتسمہ دا دریا سی جیہنے ساڈے سارے پاپ پاک کر دِتے تے سانوں خُدا دی شریعت نوں پوریاں کرن دے قابل کیتا، ” کیوں جے پاپ دی مزدوری موت اے “ (رومیوں۶ :۲۳)، کیوں جے یسوع نے یردن دے دریا اُتے بپتسمہ لین تے سولی اُتے مرن دے راہیں مزدوری ادا کر دتی۔ ایہہ ایہوا ی سوہنی خوشخبری اے جیہڑی ساڈے خُداوند نے نسل انسانی نوں دتی۔
نسل انسانی دے سارے پاپ آدم توں چالو ہوئے، پر یردن دے دریا اُتے یسوع دے بپتسمہ تے اوہدے سولی اُتے وگن والا لہو دے نال پورے طور تے رُک گئے۔ کوئی پاپ باقی نئیں رہیا یسوع دے بپتسمہ دا شکر ہووے۔ ایہہ کِنی با برکت سوہنی خوشخبری اے۔ اسیں ایس سوہنی خوشخبری اُتے ایمان رکھن دے راہیں پاپاں دے بھنور دے بہاؤ توں آزاد ہوگئے، اپنے سارے پاپاں توں پاک ہو گئے تے خُدا دی رہائی دی شریعت وچ پاک بن گئے آں۔ ایس طرحاں، یسوع دا بپتسمہ تے سولی اُتے وگن والا لہو اوہ خوشخبری اے جیہڑی ساری نسل انسانی نوں بچاؤندی اے۔ سانوں ایس اُتے لائق طور تے ایمان رکھنا چاہی دااے۔ ” جو کجھ اعتقاد توں نئیں اوہ پاپ اے۔ “ (رومیوں۱۴ :۲۳)، خُداوند آکھدا اے۔ ایس طرحاں اسیں صرف تد ای با برکت ہوندے آں جدوں اسیں ایس سوہنی خوشخبری اُتے ایمان رکھدے آں۔
کیہ تُسیں حالے تیک وی اپنے دل وچ ایہہ سچیائی ہوندیاں ہویاں پاپ رکھدے او پئی سارے پاپ یسوع اُتے لَد دتے گئے سن جد وں اوہنے یوحنا ہتھوں بپتسمہ لیا؟ یسوع نے دنیا دے سارے پاپاں نوں اپنے اُتے چُک لیا۔ جو کجھ وی بائبل وچ لکھیا ہویا اے اوہنوں تہانوں قبول کرنا چاہی دا اے ۔ صرف یسوع دا بپتسمہ تے اوہدے سولی اُتے وگن والے لہو دی خوشخبری ای تہاڈے پاپ نوں مٹاسکدی اے تے تہانوں موت تے دوجیاں ساریاں لعنتاں توں بچاؤندی اے۔ بپتسمہ دا مطلب ”دھویا جانا، غوطہ لینا، دفن ہونا، لَدے جانا، تے منتقل ہونا “ اے۔
ساری نسل انسانی یسوع دے راہیں دتی گئی ایس سوہنی خوشخبری اُتے ایمان رکھن پاروں اپنے پاپاں توں معافی ہو سکدی اے۔ یسوع نے اپنے آپ نوں ایسے پاروں’ اسمان وچ داخل ہوؤن دی راہ‘ آکھیا۔ اسیں اسمان وچ داخل ہو سکدے آں تے اوہدے اُتے ایمان رکھن دے راہیں ابدی حیاتی پاسکدے آں۔ ایہہ ساڈا خداوند ای اے، جیہنے سانوں روح پاک دی بھرپوری بخشی۔ اسیں اوہدے بپتسمہ تے لہو اُتے ایمان رکھن دے راہیں اپنے پاپاں دی ساری عدالت توں آزاد واں۔
لعنت مُک گئی تے دریاسُکی زمین وچ بدل گیا کیوں جے جنہاں کاہناں نے عہد دا صندوق چُک رکھیا سی اوہناں نے ایمان دے راہیں پانی وچ اپنے پیر ڈبوئے۔ خدادا منصوبہ ایہو ای سی ، تے یسوع دے بپتسمہ تے اوہدے لہو نے ایس منصوبے نوں پوریاں کیتا۔ ایہہ کِنی سوہنی خوشخبری اے۔ ایہہ مکتی دی شریعت سی تے ایہدے توں اِڈ ساڈی مکتی دی کوئی صورت نئیں سی۔ اوہ لوک جیہڑے ایس سوہنی خوشخبری اُتے ایمان رکھدے نیں اوہ ہُن یردن دے دریاتوں پارلنگ سکدے نیں تے کنعان دی دھرتی وچ داخل ہو سکدے نیں۔ پانی پورے طور تے سُک گیا دا مطلب ایہہ و ے پئی دنیا دے سارے پاپ یسوع اُتے لَدّے گئے سن تے اوہدی ساڈی تھاں عدالت ہوئی ۔ ایہہ ایہو ای خوشخبری اے جیہڑی سانوں روح پاک دی بھرپوری عطا کردی اے۔
خدا جنہے نسل انسانی نوں پیدا کیتا، اوہ جان دا اے پئی بندے دی ذہانت دا میعار (IQ) تقریباً ۱۱۰ توں ۱۳۰ درجے تائیں ہوندااے۔ ایس لئی اوہ رُوح پاک نوں پاؤن دی سچیائی نوں گورکھ دھندا نئیں بنا سکدا۔ خدا نے یسوع دے بپتسمہ تے اوہدے سولی اُتے وگن والے لہو نال اوہناں دے سارے پاپاں نوں اپنے اُتے چُک لیا۔ اوہنے پانی تے روح دی خوشخبری اُتے ایمان رکھن دے راہیں روح پاک نوں پاؤناسوکھا بنایا تاں پئی اوہ سارے ایہنوں جانن۔ تُسیں وی ایس سوہنی خوشخبری اُتے ایمان رکھن دے راہیں روح پاک دی بھرپوری نوں جان پاؤ گے۔
بائبل دے لکھے مطابق، اسیں اَکلا توبہ دیاں دعاواں کرن دے راہیں روح پاک نئیں پاسکدے۔ کجھ لوک سوچدے نیں پئی روح پاک اوہناں دیاں وکھریاں وکھریاں دعاواں پاروں بخشی ہوئی کوئی شے اے ۔ پرایہہ بالکل وی سچ نئیں ۔ روح پاک اوہناں نوں دِتا جاندا اے جیہڑے ایس سوہنی خوشخبری اُتے ایمان رکھدے نیں، تے ایہہ اوہناں نوں خدا دے پُتر بناؤن لئی ضروری اے۔ مطلب پئی روح پاک دی بھرپوری ایس گل دی اک ضمانت سی پئی کوئی بندہ خدا دا پُتر بن چکیا اے۔ خدا اوہناں نوں روح پاک دیندا اے جیہڑے خدا اُتے ایس یقین دہانی لئی ایمان رکھدے نیں پئی اوہ اوہدے پُتر نیں۔
جے لوک یسوع اُتے ایمان رکھدے نیں پر ایس خوشخبری نوں نئیں جان دے یا ں ایمان نئیں رکھدے نیں، اوہ ایس سچیائی اُتے پراعتماد نئیں ہو سکدے پئی اوہناں دے سارے پاپ یسوع اُتے منتقل ہوگئے سن۔ ایس لئی سارے لوکاں نوں لازمی طورتے جاننا تے ایمان رکھنا چاہی دا اے پئی یسوع دا بپتسمہ تے اوہدا سولی اُتے وگن والا لہو ایہہ سوہنی خوشخبری اے جیہنے اوہناں دے پاپاں نوں مٹا دِتا۔
کون گواہی دیندا اے پئی یسوع نے دنیا دے سارے پاپاں نوں اپنے اُتے چُک لیا؟ یوحنا اصطباغی گواہی دیندا اے ۔ پئی اوہنے یوحنا ہتھوں بپتسمہ لیا تے دُنیا دے سارے پاپاں نوں اپنے اُتے چُک لیا جانا ایہو ای منصوبہ سی جیہڑا خدا نے بنایا سی۔ (احبار۴ :۱۳۔۲۱، ۱۶ :۱۔۳۰)۔ کنہےاوس منصوبے نوں پوریاں کیتا؟ یسوع نے کیتا۔ کون پکے طور تے ایس منصوبے دی تکمیل دی ضمانت دیندا اے؟ روح پاک دیندا اے۔ تثلیث وچ خُدا نے یسوع دے بپتسمہ تے اوہدے سولی اُتے وگن والا لہو دے نال سانوں اپنے پُتر بناؤن لئی پاپ دی معافی نوں پوریاں کیتا۔ روح پاک ساڈے وچ وسَدّاتے ایس گل دی ضمانت دیندا اے پئی جدوں یسوع نے خُدا دا منصوبہ پورا کیتااسیں اپنے سارے پاپاں توں بچائے گئے ساں۔
کیہ ا یس دُنیا وچ شیواں ساہ لین وانگر پیچیدہ نظر آؤندیاں نیں؟ تے تہاڈیاں سوچاں کِنیاں پریشان نیں؟ کوئی بندہ ایس سوہنی خوشخبری اُتے ایمان نئیں رکھ سکدا جد تیک اوہ اپنیاں سوچاں نوں نئیں چھڈدا۔ اج دی مسیحیت دی الہی تعلیم جیہدے اُتے بوہت سارے لوک ایمان رکھدے نیں ایہہ وے پئی ’ موروثی پاپ منتقل ہویا سی، پر روز دیہاڑے دے پاپ تد ای معاف ہوندے نیں جد وں کوئی بندہ توبہ دیاں دعاواں کردا اے۔‘ فیروی، ایہہ پوری سچیائی ہوؤن توں بوہت دور اے؛ اصل وچ ایہہ جھوٹی خوشخبری اے۔ جے تُسیں ایہدے اُتے ایمان رکھدے او ،تدفیر تُسیں شروع توں لے کے اخیر تائیں بائبل نوں نئیں سمجھ سکدے، تے جس طرحاں ویلا گزردا جاندا اے تُسیں یسوع دی پیروی کرن وچ بوہتے توں بوہتیاں مشکلا ت دا تجربہ کروگے۔ ایہو ای وجہ اے پئی مسیحی لوکاں وچکار اجیہے لوک موجود نیں جیہڑے وکھریاں وکھریاں خوشخبریاں تے اک وکھرے خُدا اُتے ایمان رکھدے نیں۔
کجھ لوگ آکھدے نیں پئی اوہ ’دعاکرن‘ دےراہیں روح پاک دی بھرپوری پاؤندے نیں۔ ایہہ ستائش دے قابل تے وکھالی دیندا اے، پر بائبل بیان کردی اے پئی جدوں یسوع نے بپتسمہ لیا تے پانی توں باہر آیا تد فیرروح پاک اوہدے اُتے اک کبوتر دی شکل وچ اتریا ۔ ایہہ سچی خوشخبری اے تے روح پاک اوہناں اُتے آؤندا اے جیہڑے ایس خوشخبری اُتے ایمان رکھدے نیں۔
اگانہہ ہور، کجھ لوک آکھدے نیں پئی اوہ توبہ دیاں دعاواں کرن دے راہیں روح پاک نوں پاؤندے نیں۔ کیہ روح پاک دے دتا جاندا اے جد وں لوک معافی لئی اَکلی دعا منگدے نیں؟ خدا راستباز اے۔ روح پاک اَکلا ایس پاروں نئیں آؤندا کیوں جے اوہ اوہناں اُتے ترس کھاندا اے۔ ایہدے نال کوئی فرق نئیں پیندا پئی لوککِنے زور نال چلاؤندے تے دُعا کر دے نیں، روح پاک اوہناں وچ نئیں آسکدا ۔ اوہ صرف اوہناں اُتے آؤندا اے جیہڑے ایمان رکھدے نیں پئی خدا نے اوہناں نوں بچاؤن لئی اپنا منصوبہ پورا کیتااے۔ تہانوں لازمی طورتے ذہن وچ رکھنا چاہی دا اے پئی بھانویں تُسیں بوہت لمے چِر لئی خدا اگے چلاؤ یا ں تُسیں بوہت ڈاہڈے ول نال ایہدے لئی دعا کرو تُسیں پاک روح نئیں پا سکدے ۔ روح پاک انسان دی مرضی توں آزاداے۔
ایس دنیا وچ نسل انسانی دے تاریخی فیصلے تیک تے بدل سکدے نیں،پر ایس سوہنی خوشخبری تے روح پاک دی بھرپوری دی شریعت کدی وی تبدیل نئیں ہوندی ؛ مطلب اوہ کدی وی بدل نئیں سکدی۔ جے لوک ایس سوہنی خوشخبری نوں نئیں سمجھدے تد فیر اوہناں لئی ایمان دی سچے عقیدے ول جانا بوہت ای اوکھاہووے گا۔ ایسے پاروں ای بوہت سارے لوک روح پاک دی بھرپوری نئیں پاسکدے نیں۔ تُسیں کِنی ناراضگی محسوس کرو گے جے تُسیں یسوع اُتے ایمان رکھو پر صرف ایس پاروں برباد ہو جاووکیوں جے تُسیں ایس سوہنی خوشخبری نوں نئیں جان دے سو؟ بائبل آکھدی اے پئی کجھ لوکاں لئی یسوع دی ایہہ سوہنی خوشخبری اک ٹھوکر لاؤن والا پتھرتے مجرم ٹھہران والی چٹان اے۔
جے تُسیں یوحنا ہتھوں یسوع دے بپتسمہ دا بھید سمجھن دا فیصلہ کر چکے او،تد فیر تُسیں اپنے پاپاں توں وی معاف ہو سکدے او تے روح پاک دی بھرپوری وی رکھ سکدے او۔ اوہنے بپتسمہ لین، سولی اُتے مرن تے جی اٹھن دے راہیں سارے پاپیاں نوں بچالیا۔ مکتی جیہڑی یسوع نے سانوں دتی اوہ رہائی دا اک
راستباز طریقہ سی۔ اوہ سارے پاپیاں دا سچا مکتی داتا بن گیا، تے روح پاک دی بھرپوری دی تصدیق کیتی۔
صرف جے تُسیں ایہدے اُتے ایمان رکھدے او!
پرانے عہد نامے وچ بیان کیتا گیا اے پئی جدوں کاہناں نے یردن دے دریا وچ اپنے پیر ڈبوئے ، دریا سُکی زمین وچ بدل گیا۔ ایہہ ڈاہڈا معجزانہ اے پئی پانی رُک گیا، پر بوہتے معجزات حالے آؤن والے سن۔ جیہڑی شے بوہتی ستائش دے قابل اے اوہ ایہہ وے پئی دریا سُکی زمین وچ بدل گیا۔ ایس واقعہ نے خدا دی مکتی دی اک ضمانت دے طور تے خدمت کیتی، جنہےیسوع دے بپتسمہ تے اوہدے سولی اُتے وگن والے لہو دے راہیں پاپ دی معافی تک اَگوائی کیتی۔ سُکی زمین وچ رستے نے نمائندگی کیتی پئی دنیا دے سارے پاپ معاف کیتے جاؤن گے، یسوع دے بپتسمہ تے اوہدے سولی اُتے وگن والا لہو دا شکر ہووے۔ سارے پاپ آدم توں شروع ہوئے تے ساری نسل انسانی تائیں پھیل گئے پر عدالت دی لعنت یسوع دے بپتسمہ دے نال ختم ہوگئی۔ ہن اوہ سب جو سانوں کرن دی لوڑ اے اوہ ایمان رکھن تے روح پاک دی بھرپوری پاؤن دے راہیں اپنے پاپاں توں معافی حاصل کرنا اے ۔ کیہ تُسیں ایس سوہنی سچیائی اُتے ایمان رکھدے او پئی یسوع نے یردن دے دریا اُتے اپنے بپتسمہ دے راہیں تہاڈے سارے پاپاں نوں آپنے اُتے چُک لیا؟
تہانوں ایمان رکھنا چاہی دا اے پئی یسوع مسیح نے دنیا دے سارے پاپاں نوں چُک لے جاؤن لئی بپتسمہ لیا سی۔ اگانہہ ہور، تہانوں جاننا، سمجھنا تے ایمان رکھنا چاہی دا اے پئی اوہدا بپتسمہ کِنا ضروری سی۔ جے کاہن یردن وچ داخل نہ ہوند ے تد فیر اسرائیل دے لوک کامیابی نال کنعان دی دھرتی دے وچ داخل ہوؤن دے قابل نہ ہوندے۔ کنعان وچ داخل ہوؤن لئی بوہت پہلا قدم یردن دے دریا توں پارلنگنا سی۔ ایس لئی ،صرف جدوں اسیں عہد دے صندوق دے نال دریا توں پارلنگدے آں تد فیر اسیں کنعان دی دھرتی وچ داخل ہو سکدے آں۔ ایہہ سانوں سکھاؤندا اے پئی کوئی بندہ پانی تے روح دی خوشخبری اُتے ایمان رکھن دے راہیں اپنے پاپاں توں معافی حاصل کر سکدا اے۔
بائبل آکھدی اے پئی یسوع دا بپتسمہ خدادا کم سی۔ ایہہ کاہناں دے تعلق توں وی واقع ہویا۔ جس طرحاں یردن دے دریا دا پانی رُک گیا جد وں کاہناں نے پانی وچ اپنے پیر ڈبوئے، بالکل اوسے طرحاں دنیا
دے لوکوی ایس خوشخبری اُتے ایمان رکھن دے راہیں اپنے پاپاں توں بچ گئے نیں۔
روح پاک دی بھرپوری ایس خوشخبری اُتے قائم ایمان توں ملدی اے۔ یسوع دا بپتسمہ تے اوہدا سولی اُتے وگن والا لہو تہاڈے پاپ دی معافی تے روح پاک نوں پاؤن لئی اَگوائی کرن گے۔ پانی تے روح دی ایہہ سوہنی خوشخبری روح پاک دی بھرپوری پاؤن لئی بوہت لوڑی دی اے ۔
Copyright © 2021 by The New Life Mission