कोविड-19 और आंतरराष्ट्रीय डाक सेवा में रुकावट की वजह से हमने कुछ समय के लिए 'निःशुल्क मुद्रित किताबों की सेवकाई' को निलंबित किया हुआ है।
इन परिस्थितियों को देखते हुए हम इस समय आपको किताबें भेजने में असमर्थ है।
प्रार्थना करे कि यह महामारी जल्द ही खत्म हो जाए और डाक सेवा फिर से शुरू हो जाए।
مضمون 9: رومیوں (رومیوں دی کتاب اُتے تفسیر)
[2-2 باب] اوہ جیہڑے خُدا دے فضل نوں ردّ کردے نیں <رومیوں ۲:۱ ۔ ۱۶>
>رومیوں ۲:۱ ۔ ۱۶>
”ایس لئی ، اے توہمت لاؤن والے !تُوں کوئی کیوں ناں ہوویں ،تیرے کول کوئی بہانہ نئیں ہیگا کیوں جے جیہڑی گل دی تُوں دوجے نوں توہمت لاؤندا ایں ،اوسے دا تُوں اپنے آپ نوں قصوروار بناؤندااے ۔ ایس لئی تُوں جیہڑا توہمت لاؤندااے آپ اوہو ای کم کردا ایں ۔ تے سانوں پتہ ہیگا اے پئی ایہو جیہے کم کرن والیاں نوں سزا خُدا ولوں واجبی ہوندی اے ۔ اے انسان ! تُو جیہڑا ایہو جیہے کم کرن والیاں اُتے توہمت لاؤندا ایں تے آپ اوہو ا ی کم کرداایں کیہ ایہہ سمجھدا ایں پئی تُوں خُدا دی سزا توں بچ جاویں گا ؟ یاں تُوں اوہدی مہربانی تے تحمل تے صبر دی دولت نوں کُجھ نئیں جان دا تے نئیں سمجھدا پئی خُدا دی مہربانی تینوں توبہ ول کھچ لیاؤندی اے۔ سگوں تُوں اپنی سختی تے توبہ توں اَڈ دل دے سبب اوس عذاب دے دن لئی اپنے واسطے غصہ کھٹ دا پیاایں جیہدے وچ خُدا دا سچا انصاف ظاہر ہووے گا ۔ اوہ ہر کسے نوں اوہدے کماں مطابق بدلہ دیوے گا۔جیہڑے نیکیاں کرن وچ پُختہ ارادہ کر کے جلال تے عزت تے ہمیشگی دےطالب ہوندے نیں ، اوہناں نوں ہمیشہ دی حیاتی دیوے گا ۔پر جیہڑے نکھیڑے پاؤن والے تے سچ نوں ناں منن والے سگوں بدی کرن والے نیں اوہناں اُتے غصہ تے عذاب ہووے گا۔ تے دُکھ تے پریشانی ہر اک بدکار دی جان اُتے آوے گی ۔پہلوں یہودی دی۔فیر یونانی دی جان اُتے ۔پر جلال تے عزت تے سلامتی ہر اک نیک بندے نوں ملے گی ۔پہلاں یہودی نوں فیر یونانی نوں۔ کیوں جے خُدا کسے دا طرف دا ر نئیں ہیگا اے ۔ ایس لئی پئی جنہاں نیں شریعت جانیوں اَڈ پاپ کیتا اوہ شریعت توں اَڈ برباد وی ہون گے تے جنہاں نیں شریعت نوں جان کے پاپ کیتا اوہناں نوں سزا شریعت مطابق ملے گی ۔کیوں جے شریعت نوں سُنن والے خُدا دے اگے راستباز نئیں ہوندے سگوں شریعت اُتے عمل کرن والے راستباز بنائے جان گے ۔ ایس لئی پئی ، جدوں اوہ قوماں جنہاں نیں شریعت نئیں سُنی اپنے بدن نال شریعت دے کم کردیاں نیں تاں شریعت ناں رکھدیاں ہویاں اوہ اپنے لئی آپ اک شریعت ہیگے نیں ۔ایس لئی اوہ شریعت دیاں گلاں اپنے دلاں اُتے لکھیاں ہوئیاں وکھاؤندیاں نیں ۔تے اوہناں دا دل وی اوہناں گلا ں دی گواہی دیندااے تے اوہناں دے اکھٹے خیال یاں تاں اوہناں اُتے توہمت لاؤندے نیں یاں اوہناں نوں معذوررکھدے نیں۔جیہڑے دن خُدا میری خوشخبری مطابق یسوع مسیح دے راہیں بندیاں دیاں لُکیا ں ہویاں گلاں دا انصاف کرے گا۔ “
شرع دے عالم سدا دوجے لوکاں دا شریعت دے مطابق انصاف کردے نیں ، بھاویں اوہ آپ شریعت اُتے عمل کرن دے لائق نئیں ہیگے
آؤ شریعت بارے گل کریے ۔ پولُس رسول نے اوہناں یہودیاں نوں آکھیا جیہڑے شریعت اُتے گل مکاؤندے نیں۔ ” ایس لئی ، اے توہمت لاؤن والے !تُوں کوئی کیوں ناں ہوویں ،تیرے کول کوئی بہانہ نئیں ہیگا کیوں جے جیہڑی گل دی تُوں دوجے نوں توہمت لاؤندا ایں ،اوسے دا تُوں اپنے آپ نوں قصوروار بناؤندااے ۔ تے سانوں پتہ ہیگا اے پئی ایہو جیہے کم کرن والیاں نوں سزا خُدا ولوں واجبی ہوندی اے ۔ اے انسان تُو جیہڑا ایہو جیہے کم کرن والیاں اُتے توہمت لاؤندا ایں تے آپ اوہو ا ی کم کرداایں کیہ ایہہ سمجھدا ایں پئی تُوں خُدا دی سزا توں بچ جاویں گا ؟ “(رومیوں ۲:۱ ، ۳)۔شرع نوں منن والے سوچدے نئیں پئی اوہ خُدا دی بوہت عزت کردے نیں ۔ایس طرحاں دے لوک خُدا اُتے اپنے سچے دلوں ایمان نئیں لیاؤندے ،سگوں اوہ اپنے کماں دی گل کردیاں ہوئیاں اپنے آپ وچ جھوٹا گھمنڈ کردے نیں ۔ایہو جیہے لوک دوجیاں نوں قصور وار سمجھدے نیں تے اپنے آپ نوں دوجیاں توں چنگا سمجھدے نیں ۔ پر اوہ دوجیاں نوں خُدا دے کلام مطابق سزاپاؤن والے سمجھدے نیں ،بھاویں اوہ ایس گل اُتے دھیان ای نئیں لاؤندے پئی اوہ آپ وی بالکل اوہو جیہے ای نیں ،جنہاں اُتے اوہ توہمت لاؤندے نیں تے بالکل اوہو ای خطا کردے پئےنیں جویں پئی دوجے لوک کردے نیں ۔
مثال طور اُتے ، بھاویں اوہ آپ تاں سبت دیہاڑے نوں پاک نئیں من دے ،پر دوجیاں نوں ایہنوں خُدا دے حکم مطابق منن دی تعلیم دیندے نیں ۔اوہ دوجیاں نون تاں شریعت دا آکھا منن تے اوہدے پِچھے ٹُرن بارے آکھدے نیں ،پر اوہ آپ ایہدے مطابق نئیں چلدے ۔ پولُس رسول نیں ایس طرحاں دے لوکاں نوں آکھیا ، ” اے انسان ! تُو جیہڑا ایہو جیہے کم کرن والیاں اُتے توہمت لاؤندا ایں تے آپ اوہو ا ی کم کرداایں کیہ ایہہ سمجھدا ایں پئی تُوں خُدا دی سزا توں بچ جاویں گا ؟ “
(رومیوں ۲:۳ )۔
شرع اُتے عمل کرن والے خُدا دے اگے چنگے بندے نئیں بن سکدے ۔شریعت سانوں مکتی نئیں دے سکدی ،ایسے طرحاں جے ساڈی دینی جندڑیاں دی بنیاد شریعت اُتے ہیگی اے تاں خُدا سانوں سزا دیوے گا ۔ شرعی جندڑیاں خُدا نوں ناراض کردیاں نیں ۔اوہ جنہاں نیں مکتی نئیں پائی ، اوہ شرعی ایمان رکھدے نیں ۔ او ہ دوجیاں نوں دسدے نیں پئی اوہ شریعت مطابق حیاتی بسر کرن ،پر اوہناں نوں اِنج نئیں آکھنا چاہی دا اے ۔
بوہت چِر پہلے ،ساڈے ملک وچ بوہتے مسیحی اِنج کردے ہوندے سَن ۔ شرعی پادریاں نیں اوہناں زنانیاں نوں جیہڑیاں نقلی چھلیاں والے وال بناؤندیاں ،اوہناں نوں ایہہ آکھ کے جھڑکاں دیندے پئی اوہ دوزخ وچ جان گئیاں ۔جے اسیں اوہناں دیاں ہدایتاں ہیٹھاں ہوندے جنہاں نیں اپنی کلیسیا دے بندیاں نوں ایس طرحاں دی تعلیم دتی ،تاں فیر سانوں لازمی طور اُتے ایمان لیاؤنا پوے گا پئی اوہ جیہڑیاں چھلیاں والے وال بناؤندیاں نیں ،اوہ اپنے آپ دوزخ وچ چلیاں جاندیاں ہون گئیاں ۔ جیہدے بارے ۱۵ توں ۲۰ ورہے پہلاں دسیا جاندا رہیا ، اوہ ایہو ای سارا کُجھ ہیگا سی ۔ جے اک زنانی بُلاں اُتے سُرخی لاؤندی اے ،تاں ایہدا مطلب ہیگا اے پئی پادریاں دیاں ہدایتاں مطابق اوہ زنانی تاں دوزخ وچ چلی گئی ہونی اے ۔
ایہہ لوک شرع والے لوک ہیگے سَن ۔ اوہ بدنی طور اُتے خُدا دے اگے پاک بن دے نیں :لوکاں نوں ایہہ سکھاؤندے نیں پئی بُلیاں اُتے سُرخی ناں لاؤن یاں چھلیاں والے وال ناں بناؤن ، سدا چنگے بن کے چلن تے ناں ای کوئی ایس طرحاں دیاں شیواں خریدن تے ناں ای ویچن ۔ ایہہ شرع نوں منن والے ایتھوں تیک پئی آپ ریاکار سَن فیر وی ایمانداراں نوں دسدے پئی خُدا دے کلام دے نظر وچ کیہڑیاں شیواں ٹھیک ہیگیاں نیں تے کیہڑیاں غلط ۔
یہودی بالکل اِنج ای سَن
یہودی بالکل اِنج ای سَن۔اوہ اوپریاں قوماں نوں ایہہ گلاں آکھدیاں ہویاں شریعت مطابق اوہناں نوں قصور وار بناؤندے سَن ، ” اوہ لوک خُدا نوں نئیں جان دے تے بُتاں اگے متھے ٹیک دے نیں “۔اوہ جنگی لوک ہیگے نیں تے دوزخ جان دے لائق ہیگے نیں ۔پر اوہ آپ خُدا توں ودھ کے دوجے دیوتیاں تے ایس جگ دی دوجیاں دنیاوی شیواں نوں بوہت چنگیاں سمجھدے سَن ۔
” ایس لئی ، اے توہمت لاؤن والے !تُوں کوئی کیوں ناں ہوویں ،تیرے کول کوئی بہانہ نئیں ہیگا کیوں جے جیہڑی گل دی تُوں دوجے نوں توہمت لاؤندا ایں اوسے دا تُوں اپنے آپ نوں قصوروار بناؤندااے ۔“ یہودی دوجے لوکاں نوں شریعت مطابق قصوروار بناؤندے سَن ، پر اوہ آپ ایناں گلاں اُتے عمل کدی نئیں کردے سَن ۔اگانہہ ہور،جیہڑے خُدا دی راستبازی اُتے یاں یسوع دی مکتی اُتے دلوں ایمان نئیں لیاؤندے ،اوہ سوچدے نیں پئی اوہ خُدا دے کلام دے بالکل مطابق جندڑی بسر کردے نیں پر اوہ صرف یہودیاں وانگر ای ہیگے نیں ،جیہڑے خُداوند اُتے ایمان نئیں لیائے ۔
شرع اُتے عمل کرن والیاں نوں سزا لازمی طور اُتے ملے گی
خورے ایتھے ساڈی نویں جوان نسل ایس طریقے نال دینی جندڑی اُتے کدی ناں چلے ہون۔ پر اوہ جیہڑے پُرانے زمانے وچوں ہیگے نیں جنہاں خورے شریعت نال بھریاایہو جیہا کلام پہلوں سُنیا ہووے ۔ پادری اوہناں نوں جیہڑے چھلیاں والے وال بناؤندے سَن ،صرف ایس لئی جھڑکدے ہوند ے سَن کیوں جے ایہنوں ویکھدیاں دل وچ گندیاں گلاں آؤندیاں سَن ۔اج کل پادری ایہو جیہاں گلاں نئیں کر سکدے ۔ پہلاں وانگر ہُن اِنج آکھنا پئی ’ کامل طور اُتے پاک بننا ‘ یاں ’ راستباز‘ ہونا توہمت لاؤن والی گل بن گئی اے ۔ ایہدا مطلب ایہہ ہیگا اے پئی مسیحیت وچ کُجھ تبدیلی آئی اے ۔ جھوٹے اُستاد وی سوچے سمجھیوں اَڈ جھوٹ نئیں بول سکدے کیوں جے اوہناں دی کلیسیا نوں وی کتاباں تے کیسٹاں راہیں اصل خوشخبری دسی گئی اے ۔ ایس لئی اوہ اپنے سُنن والیاں نوں بے سبب پیغام نئیں سنا سکدے ۔
سب توں خاص گل جنہوں جانن دی لوڑی ہیگی اے اوہ ایہہ ہیگی اے پئی ،ایہہ شرع سکھاؤن والے جیہڑے یسوع مسیح دی کامل مکتی نوں ردّ کردے نیں تے جیہڑے شریعت مطابق دینی جندڑیاں پِچھے ٹُردے نیں ،خُدا دے اگے ایہو جیہاں دی سزا واجبی ہووے گی ۔
چوتھی آیت خُدا دی سزا بارے دسدی اے ،آؤ ایہنوں پڑھیے ،” یاں تُوں اوہدی مہربانی تے تحمل تے صبر دی دولت نوں کُجھ نئیں جان دا تے نئیں سمجھدا پئی خُدا دی مہربانی تینوں توبہ ول کھچ لیاؤندی اے۔ “ خُدا شرع سکھاؤن والیاں نوں سزادیوے گا ۔ اے بھراوو،شرع والا ایمان خُدا دی مخالفت کردا اے ۔ شریعت اُتے عمل کرن والے اپنے اصولاں نال ،جنہاں دی بنیاد اوہناں دے اپنے کماں اُتے ہیگی اے ،خُدا دی محبت دے خلاف ہیگے نیں ۔ شرع دی گل سُنن والے مکتی دی خوشخبری نوں اکھاں توں پراں کردے نیں ،جیہڑی ایہہ دسدی اے پئی خُدا اپنی مہربانی تے تحمل تے صبر دی دولت نال اوہناں سارے پاپاں تے بدیاں نوں معاف کر چُکیا اے ۔
جیہڑے دینی حیاتیاں ،شریعت مطابق بسر کردے نیں،خُدا اوہناں نوں سزادیوے گا ۔ پر بوہت سارے لوک خُدا دے اگے اپنی جندڑیاں شریعت مطابق بسر کردے نیں ۔ سانوں اِنج دا خیال نئیں کرنا چاہی دا،کیوں جے اسیں مکتی پا لئی اے ،ایس لئی سانوں سزا نئیں ملے گی ۔ پولُس رسول نے آکھیا پئی شریعت اُتے عمل کرن والے مکتی نئیں پاسکدے ،سگوں اوہناں دا انصاف ہووے گا تے اوہ سزاپاؤن گے ۔ سانوں پتہ ہونا چاہی دا اے پئی کس طرحاں دے لوک شریعت مطابق جندڑیاں دی اَگوائی کردے نیں ،تاں پئی اسیں آمنے سامنے ہوکے اوہناں وچ خوشخبری دا منصوبہ ودھا سکیے ۔
یہودیاں سمیت جگ وچ بوہت سارے شریعت اُتے عمل کرن والے نیں
پولُس رسول نے صرف ایس سچ بارے ای گل نئیں کیتی پئی یسوع نے جگ دے سارے پاپاں نوں مکا دتا اے ۔ اوہنے ایہدے بارے وی گل کیتی اے ،کویں اوہ لوک جیہڑے یہودیاں وانگر شریعت وچ رہ کے دینی جندڑیاں بسر کردے نیں ، خُدا دے خلاف ہیگے نیں تے اوہناں نوں سزا ملے گی ۔ اوہ خُدا دی اوس محبت نوں اک پاسے سُٹ دے نیں ،جیہدے راہیں اوہنے ساڈے اُتے اپنا رحم وکھایا ۔ اوہ پاپاں دی معافی دی خوشخبری نوں اک پاسے سُٹ دے نیں ،جیہڑی ایہہ آکھدی اے پئی خُدا نے ساڈے سارے پاپاں نوں مکایا اے کیوں جے اسیں اوہدے اگے ترس کھان دے لائق ہیگے ساں ۔
کیہ تہاڈے آلے دوالے ایہو جیہے شریعت نوں منن والےنئیں ہیگے جیہڑے ایس طرحاں دیاں دینی جندڑیاں بسر کردے نیں ؟ ایتھے بوہت سارے شریعت نوں منن والے ہیگے جیہڑے ایمان رکھدے نیں پئی خُدا جگ اُتے ترس نئیں کھاندا تے ایہہ وی آکھدے نیں پئی اوہنے ساڈے سارے پاپاں نوں نئیں مکایا ۔فیروی ،کئی ایہو جیہے ہیگے نیں جیہڑے خُدا دی محبت نوں من دے نیں تے اوہدے اگے ’راستباز ‘ اکھواؤندے نیں ۔ایتھے شریعت سکھاؤن والے وی ہیگے نیں جیہڑے خُدا دی محبت نوں رد کردے نیں تے حالے تیک خُدا دی مکتی نوں اپنے خیالاں وچ کُجھ نئیں جان دے ۔ اوہ بوہتے سارے ہیگے نیں تے لنگھے ویلے ول دھیان کردے نیں ۔
میَں چاؤہندا ہاں پئی تسیں جانو ،تہاڈے آلے دوالے ایہو جیہے بوہتے لوک ہیگے نیں جیہڑے خُدا دی مہربانی تے تحمل تے صبر دی دولت نوں ایس طرحاں کُجھ نئیں جان دے ،جویں پئی یہودیاں نیں کیتا سی ۔ کیہ ایہہ سچ ہیگا اے یاں جھوٹ ؟ —آہو ،ایہہ سچ ہیگا اے ،ایتھے ایہو جیہے بوہت سارے لوک ہیگے نیں — شریعت نوں منن والے خُدا دے اگے دوجیاں نوں کُجھ نئیں سمجھدے ۔ شریعت نوں منن والے کنوں کُجھ نئیں جان دے ؟ خُدا دی کامل مکتی نوں ۔
یہودیاں سمیت بوہت سارے لوک جیہڑے ایس جگ وچ رہندے نیں ،ایس سچ نوں کُجھ نئیں جان دے پئی یسوع خُدا دا پُتر ہیگا اے ۔یہودی اسرائیل دے لوک ہیگے نیں ۔ اوہ آکھدے نیں ، ” کویں اوہ خُدا دا پُتر ہیگااے؟ اوہ صرف نبیاں ورگا ہیگا اے ۔“ اوہ یسوع نوں صرف اِنج ای من دے نیں ۔ اسرائیلیاں نیں خُدا دے پُتر دا انکار کیتا تے یسوع دے مونہہ اُتے ایہہ آکھدے ہوئیاں اپنے ہتھاں نال چپیڑاں ماریاں پئی ، ” اوہنے کفر بولیا اے “ (متی ۲۶:۶۵)۔ اوہ ہُن وی اوہنوں کُجھ نئیں جان دے ۔ یہودیاں نے خُدا نوں کُجھ نئیں جانیا کیوں جے اوہ اوہدے پُتر اُتے ایمان نئیں لیائے ۔ ایہہ سوچن والی گل ہیگی اے پئی اسرائیلیاں نیں یسوع نوں بے عزت کیتا ،کیوں جے او ہ اوہدے اُتے ایمان نئیں لیائے سَن ۔ فیر وی ، اوپریاں قوماں وچکار شریعت نوں منن والے کیہڑی شے نوں کُجھ نئیں جان دے؟ اوہ خُدا دی محبت تے راستبازی دی دولت نوں کُجھ نئیں جان دے ۔
شریعت نوں منن والے اپنی ہر گل اپنے کماں اُتے مکاؤندے نیں
شریعت نوں منن والے فرقیاں وچ ،اوہ اپنے پِچھےچلن والیاں نوں ایہہ تعلیم سکھاؤندے نیں پئی جے کوئی تہاڈی سجی گل اُتے چپیڑ مارے تاں کھبا وی اوہدے ول کر دیوو۔اوہناں نوں کدی وی غصہ نئیں کرنا چاہی دا اے ۔ اوہ ایہہ ہدایتاں وی دیندے نیں پئی کویں تعلیم دی منادی کرنی ،بوہت چنگے طریقے نال ٹُرنا ،کویں ہسنا ،تے ایسے طرحاں دیاں ہور گلاں ۔اوہناں دے خیال وچ اوہ کلام بارے بوہت کُجھ جان دے تے زور دیندے نیں پئی اوہناں دے صرف وڈے پاپ ای معاف کیتے گئے سَن ،پر اوہ ہر دیہاڑے دے پاپاں دی معافی ،ہر دیہاڑے توبہ دیاں دعاواں دے راہیں پاؤندے نیں ۔
شریعت اُتے ایمان رکھنا وی کُجھ اِنج ای اے ۔ایہہ شیواں وی لوکاں نوں خُدا دی محبت تے مکتی دی دولت ولوں انھیاں کردیاں نیں ۔ اوہ آکھدے نیں ، ” تسیں گھمنڈ نال آکھ سکدے او پئی تہاڈے وچ پاپ نئیں ہیگا تے تسیں راستباز ہیگے او ،تے ایہہ پئی تہاڈے ایمان لیاؤن دے سبب پئی یسوع نے تہاڈے سارے پاپاں نوں مکادتا اے ، پاپاں توں مکتی پا چُکے او ! “ اوہناں دا خیال ہیگااے پئی جے بھاویں اوہ اصل وچ راستباز نئیں ہیگے تاں وی خُدا اوہناں نوں راستباز آکھ کے بلاؤندااے ۔ سارے شریعت نوں منن والے ایناں جھوٹیاں تعلیماں اُتے ایمان لیاؤندے نیں ۔ ایس لئی ، سانوں ایناں شرع سکھاؤن والیاں کولوں وکھ ای رہنا چاہی دا اے ۔
یسوع اُتے ایمان لیاؤن دے بعد ،کیہ ہر دیہاڑے توبہ دیاں دعاواں نال پاپاں توں معافی پاؤنا ، شریعت نوں مننا اے؟ کیہ ایہہ اِنج نئیں ہیگا ؟— آہو ، ایہہ اِنج ای اے — کیہ ایہہ شریعت دے کماں دی بنیاد توں اے یاں اِنج نئیں ہیگا ؟ — آہو، ایہہ اِنج ای اے — ایہہ ایمان نال نئیں ہیگا ۔ اوہ جیہڑے ایہہ مشہوری کردے نیں پئی اوہ شریعت دے کماں دے سبب جیوندے نیں ، اوہ شریعت نوں منن والے نیں ۔ساڈے آلے دوالے ایس طرحاں دے بے گنت لوک ہیگے نیں ۔
پولُس جیہڑا رسول سی اوہنے وی یسوع مسیح اُتے ایمان لیا کے پاپاں توں کامل مکتی پائی سی ۔ پر اِسرائیلی جیہڑے پُرانے عہد نامے دی شریعت دے مطابق ایمان لیاؤندے نیں ۔ یہودیت اُتے یقین رکھدے نیں ۔ کیہ اوہ سارے جیہڑے ایناں وانگر ہیگے نیں ،شریعت نوں منن والے ہیگے نیں یاں نئیں ؟ اوہ اوہناں وچوں سَن جنہاں نیں شریعت نوں منیا سی :تے بدنی کماں دی تعلیم سکھائی ،مثال طور اُتے کویں کسے نوں ٹُرنا چاہی دااے ،کیہ کُجھ کسے نوں کرنا چاہی دااے یاں کیہ کُجھ کسے نوں نئیں کرنا چاہی دا۔
ایس لئی ،پولُس رسول غصہ وچ ایناں لوکاں نوں قصور وار بناؤندااے ۔ اوہنے ایہہ بوہت چنگا کیتا ۔ اج کل دے مسیحی وی شریعت دے مطابق شرع والیاں جندڑیاں بسر کردے نیں ۔اوہ ایمان رکھدے نیں پئی بھاویں اوہ ایمان رکھن سبب پاک ہیگے نیں ، تاں وی اوہناں دے پاپ ہر دیہاڑے دیاں دعاواں دے سبب معاف کیتے جاندے نیں ۔ اوہ شریعت نوں من دے نیں تے اوہناں دا ایمان شرع والا ایمان ہیگا اے ۔
بوہتے پادری ایہہ بوہت آکھدے نیں پئی ، ” اسیں مکتی یافتہ ہیگے آں “ پر اوہ اخیر وچ آکھدے
نیں ، ” پر سانوں اوس پاپ لئی جیہڑا اسیں کیتا اے ،اقرار کرنا تے توبہ کرنی چاہی دی اے ۔“ ایہہ پادری شریعت نوں منن والے ہیگے نیں ۔اوہ اپنی مکتی لئی اپنے کماں اُتے یقین رکھدے نیں ، ایتھوں تیک پئی اوہ یسوع اُتے ایمان ای نئیں لیاؤندے یاں اوہدے اُتے یقین ای نئیں کردے ۔
مکتی پاؤن توں پہلاں کیہ اسیں شریعت نوں منن والے ہیگے ساں ؟— آہو۔ اسیں اِنج ای ساں ۔ نویں سریوں جمن توں پہلاں ،اسیں سوچدے ساں پئی چنگے کم کرکے اسیں مکتی پا سکدے آں ۔ ایس جگ وچ بوہت سارے لوک ہیگے نیں جنہاں دا خیال بالکل اِنج ای اے ۔ خُدا اوہناں نوں دسدا اے پئی توبہ کرو۔ ” ایس لئی توبہ کرو تے پرت آوو تاں پئی تہاڈے پاپ مکائے جان تے اِنج خُداوند ولوں خوشی دے دیہاڑے آؤن ۔“ (اعمال ۳:۱۹)۔پر ایہہ لوک توبہ نئیں کردے ۔کنے ڈھیٹ ہیگے نیں اوہ ! ایس طرحاں ، پولُس رسول اک واری فیر ڈھیٹ بارے گل کردااے ۔
شریعت نوں منن والے اعلان کرکے آکھدے نیں پئی اوہ مرن دیہاڑے تیک پاپی ہیگے نیں
آؤرومیوں ۲:۵ول دھیان کریے ” سگوں تُوں اپنی پتھر دلی تے توبہ توں اَڈ دل دے مطابق اوس ڈاہڈے دن لئی اپنے واسطے غصہ کماؤنداپیا ایں جیہدے وچ خُدا دا سچا انصاف نظر آوے گا ۔ “ اوس دیہاڑے تیک خُدا نوں غصہ دواؤنداایں ۔جیہڑے دیہاڑے خُدا دا سچا انصاف شریعت نوں منن والیاں اُتے وکھالی دیوے گا ۔
پر شریعت نوں منن والے ایہہ اقرار کرن گے پئی اوہ خُدا دے اگے پاپی ہیگے نیں ۔ ایس لئی اوہناں نیں گلے اُتے چھُریاں رکھیاں ہوئیاں نیں پئی من مرضی کرن ۔ جدوں اوہ بربادی نوں ویکھدے نیں ،تاں اوس ویلے تیک خُدا دے اگے اقرار کرن گے پئی اوہ پاپی ہیگے نیں ۔کئی لوک آکھدے نیں پئی اوہ خُدا دے اگے پکے پکے اپنے مرن دیہاڑے تیک پاپی ہیگے نیں ۔ کنے من مرضی کرن والے ہیگے نیں اوہ ! اوہ ایس لئی آکھدے نیں پئی اوہ پاپی ہیگے نیں کیوں جے اوہ خُدا دے کلام دے مطابق جندڑی بسر نیں کرسکدے ،جے اوہ یسوع اُتے ایمان لیاؤن، تاں وی اوہ خُدا دے اگے راستباز نئیں بن سکدے ۔
خُدا کیہ آکھدا اے ؟ اوہ آکھدااے ، ” کیوں جے تسیں کلام دے مطابق جندڑی بسر نئیں کر
سکدے او،میَں تہانوں مکتی دتی اے ۔ میَں تہاڈے سارے پاپاں نوں مکا دتا اے تے تہانوں کامل مکتی دتی اے ۔“ اوہ ناں تاں یسوع اُتے ایمان لیائے تے ناں ای خُدا دی راستبازی نوں جنہیں اوہناں نوں پاپاں توں مکتی دتی من دے نیں ۔ایہدی تھاں اُتے ، اوہ مرن دیہاڑے تیک اپنے پاپی ہون دی گل کردےرہندے نیں کیوں جے اوہ شریعت دے کماں تے یسوع مسیح اُتے ایمان ، دونواں دے راہیں مکتی پاؤن دی ہمت کردے نیں ۔ اوہناں نوں پتہ ہونا چاہی دااے پئی ویلا آگیا اے ،جد اوہناں دے ایمان تے اوہناں دے کماں دی اوہناں نوں سزا ملے گی ۔
” سگوں تُوں اپنی پتھر دلی تے توبہ توں اَڈ دل دے مطابق اوس ڈاہڈے دن لئی اپنے واسطے غصہ کماؤنداپیا ایں جیہدے وچ خُدا دا سچا انصاف نظر آوے گا ۔ “(رومیوں ۲ : ۵)۔ پولُس رسول دا مطلب ہیگااے، ” کنے ڈھیٹ ہیگے او تسیں ۔تسیں اپنی پتھر دلی تے توبہ توں اَڈ دل دے مطابق سزا پاؤندے او ۔ تسیں اوہدا غصہ کماؤندے او۔“ ایس گل توں ہٹ کےپئی بھاویں کوئی اوہدے اُتے ایمان لیاوے یاں ناں لیاوے یسوع مسیح نے ساڈے سارے پاپاں نوں مکا دتا اے ۔ ایس طرحاں ہر اک یسوع مسیح دے سبب اپنے سارے پاپاں توں مکتی پا سکدا اے ۔ اسیں ایس سچیائی اُتے اصل ایمان لیاؤن دے سبب مکتی پائی پئی یسوع مسیح نے ساڈے سارے پاپاں نوں مکا دتا اے ۔ اسیں شریعت دے سبب بچ نئیں سکدے ایتھوں تیک پئی اسیں ہر دیہاڑے دی جندڑی وچ معافی پاؤن لئی توبہ کیتی اے، ایس لئی سانوں اوپریاں قوماں دے دیناں ولوں مونہہ موڑکے یسوع مسیح ول آؤنا چاہی دااے ۔ مرن دیہاڑے تیک پاپ کردے رہنا ساڈانصیب اے ، ایس لئی اسیں شریعت دے کماں نال راستباز نئیں بن سکدے ،پر خُداوند اُتے ایمان لیاؤن دے سبب بن سکدے آں ۔
کیہ تسیں خُدا دے اگے مرن دیہاڑے تیک راستباز ہون دا دعویٰ کردے او ؟ یاں کیہ تسیں مشہوری کردے او پئی تسیں مرن دیہاڑے تیک پاپی رہوو گے تے کُجھ نئیں کر سکدے — اسیں مشہوری کردے آں پئی اسیں راستباز ہیگے آں — کیہ ایہہ صرف اک بوہت فکر کرن والی گل دے سبب ہو سکدا اے ؟ کُجھ لوک ایہہ آکھ سکدے نیں پئی ایہہ اک یکدم خیال وانگر ہیگا اے ۔ کیہڑا ایس طرحاں دی تعلیم نوں سوکھے طریقے نال سمجھے گا ؟ کوئی نئیں ۔
فرض کرو پئی کوئی تہانوں ہر دیہاڑےتعلیم سکھاؤندااے ۔تسیں بوہت پکے ہوکے ایہہ آکھ کے مقابلہ کروگے ، ” اِنج کیوں ہیگا اے ؟ فیر ؟ فیر کیہ ہویا ؟ “ کیہ بوہتے لوک ایس طرحاں دی جوابی گل نئیں کردے؟ اسیں صرف اوس ویلے ایمان لیاؤندے آں جدوں اسیں سچے دلوں کسے شے نوں من لیندے آں ، پئی ایہہ سچ ہیگی اے ۔ جے اک بندہ سانوں بائبل توں ہٹا کے سوہنے اَکھراں راہیں سانوں کسے شے اُتے ایمان لیاؤن لئی پُٹھی راہیں پاؤندااے تاں فیر ایہہ کدی اِنج دا کم نئیں کرے گا ۔ ایتھوں تیک پئی بھورا جیہا وی کم نئیں کرے گا ۔سانوں پتہ ہیگا اے پئی بندہ بوہت من مرضی کردا اے ،پر جے ایہہ خُدا دا کلام اے تاں اسیں ملائم دل بن جاندے تے سچیائی اُتے ایمان لیاؤندے آں ۔
شریعت نوں منن والے کویں ڈھیٹ ہیگے نیں
اوہ کویں من مرضی کردے نیں ۔ اوہ ایہہ اعلان کرکے آکھدے نیں پئی اوہ اپنی جندڑیاں دے اخیری ساہ تیک پاپی ہیگے نیں ۔ ایتھے بوہت سارے لوک ہیگے نیں جیہڑے یہودیت اُتے ایمان رکھدے نیں ۔کیہ اج کل ایتھے مسیحیاں دے وچکار بوہت سارے ایہو جیہے لوک ہیگے نیں جیہڑے اصل وچ یہودیت اُتے یقین کردے نیں ؟ یاں کیہ ایہو جیہے لوک نئیں ہیگے ؟ — آہو بوہت سارے ایہو جیہے لوک ہیگے نیں — ” خُداوند ،اک پاپی آیا اے ۔ مہربانی کر کے میرے پاپ معاف کردے ۔“ بوہت سارے ایہو جیہے لوک ہیگے نیں جیہڑے اعلان کرکے آکھدے نیں پئی اوہ خُدا دے اگے پاپی ہیگے نیں کیوں جے اپنی ہردیہاڑے دی کمیاں تے پاپاں اُتے اپنی سوچ مطابق دھیان کردے نیں ۔ ایتھوں تیک پئی جگ وچ اک ارب توں بوہتے مسیحی ہیگے نیں تے اک کروڑ توں بوہتے مسیحی کوریاوچ رہندے نیں ،ایہہ لوک شرع نوں من دے نیں ۔
شرع نوں منن والے فریسیاں وانگر ہیگے نیں
پانی تے رُوح دی خوشخبری نوں منن توں پہلاں میَں وی شریعت نو ں منن والا ساں ۔ میَں سوچدا ہوندا ساں ، ”پئی میَں کویں راستباز بن سکدا ہاں ،ایتھوں تیک پئی ہر دیہاڑے پاپ میرے کولوں ہو جاندااے ؟ “پر ہُن ایہہ اِنج نئیں ہیگا ۔ تہانوں پتہ ہیگا اے پئی بوہتے لوک ڈھیٹ طریقے نال رہندے نیں ۔بائبل دے مطابق ایہو جیہے لوکاں دی تھاں کتھے ہیگی اے ؟ کیوں جے اوہ اپنی سخت دلی تے توبہ توں اَڈ دل مطابق خُدا نوں غصہ دواؤندے نیں ،ایس لئی اوہ دوزخ وچ جان گے ۔شریعت نوں منن والیاں نوں وی اک واری سچے دل نال توبہ کرنی چاہی دی اے ۔ ایس لئی ایس جگ وچ رہندیاں ہویاں اوہناں نوں شکرگزارہونا چاہی دا اے تے سچ مُچ ایمان رکھنا چاہی دااے پئی یسوع مسیح نے اوہناں دے سارے پاپاں نوں اِکو ای واری مکا دتا اے ۔
پر، اوہ توبہ کرن بارے بوہت ڈھیٹ ہیگے نیں ۔ ایہناں لوکاں اُتے ترس آؤندا اے ۔ایس لئی ایناں نوں توبہ کرنی چاہی دی اے تاں وی اوہ نئیں کردے ۔بوہت سارے لوک ہیگے نیں جیہڑے فریسیاں وانگر رویہ رکھدے نیں ۔ اوہ کلیسیا وچ بوہت موم دل ہو کے لوکاں نال ملدیاں ہوئیاں آکھدے نیں ، ” تسیں کیہو جیہے او؟ کیہ کردے او ؟ “ جد پئی اپنی کچھاں وچ بائبل پھڑی ہوئی اے ۔ جدو ں اوہ اتوار نوں گرجے وچ عبادت کراؤندے نیں ،اوہ ادھیاں اکھاں کھول کے گھمنڈی طریقے نال لوکاں نوں ملدے نیں ۔ ایتھوں تیک پئی اوہ یسوع توں وی بوہتی ایناں اُتے خُدائی نظر رکھن دی ہمت کردےنیں ۔ ایہہ کنا ں چنگا ہووےگا ،جے اوہ ہر دیہاڑے ایسے طرحاں سچ مُچ خُدائی لوک ہون ؟
کیہ تہانوں پتہ اے پئی شریعت نوں منن والے پادریاں دیاں زنانیاں کیہ آکھدیاں نیں ؟ اوہ آکھدیاں نیں پئی جدوں اوہناں دے خاوندپُلپٹ اُتے پیغام دیندے نیں تاں اوہ بوہت خوش ہوندیاں نیں ،کیوں جے اوہناں دے خاوند بوہت ، ” پاک تے موم دل “ طریقے نال کلام دیاں گلاں کردے نیں ۔ پر جدوں اوہ گھر جاندے نیں اوہ یکدم بدل جاندے نیں ۔ اِک واری ، شریعت نوں منن والے اک پادری دی زنانی نے پُلپٹ دے پِچھے ای اپنا اوون ، کمبل تے چاؤل وغیرہ لیا کے ،ڈیرہ بنا لیا ۔ کیوں جے اوہدا خاوند گھر وچ اک عادی مجرم وانگر ہیگا سی ،پر پُلپٹ دے پِچھے موم دل سی ۔ پادری نے اوہنوں پُچھیا پئی اوہ اوتھے کیہ کردی سی ۔اوہدی زنانی نے آکھیا پئی اوتھے رہنا چاہوے گی ،کیوں جے اوہ اوہدے نال پُلپٹ دے پِچھے موم دلی نال گل کردا تے پُلپٹ دے پِچھے اوہدی آواز ملائم ہیگی اے ،پر گھر جا کے اوہ غصے نال بھریا مینوں دکھی کرےگا ۔
سانوں خوشخبری دی منادی کرنی چاہی دی اے
بیلیاں وانگر دسدا پیا واں پئی ،میَں اپنی زنانی دیاں نظراں وچ اپنے آپ نوں گوا لیا اے ۔ایس
لئی پئی میری زنانی آکھدی اے ، ” تینوں صرف اِکو ای شے خوشخبری دی فکر ہوندی اے ۔ “ میَں سارے کم ٹھیک نئیں کر سکدا کیوں جے میَں اک ادھورا بندہ ہیگا واں ۔پہلاکم ، جیہڑا میَں ٹھیک کرنا ایں ، اوہ خُدا دا کم ہیگااے ، دوجا ، مینوں اپنے گھر دا بندوبست کرنا چاہی دااے ۔ تیجا ، میَں دوجے کم کرنے نیں ۔ ایہہ میرے ودھ چڑھ کے کرن والے کم ہیگے نیں ۔ ایہہ صرف ایس لئی نئیں کیوں جے میَں اک پادری ہیگا واں ۔میَں ایہہ ایس لئی کردا ہاں کیوں جے میَں انجیل دی خدمت دا کم کردا پیاہاں ۔ میَں اپنے سارے کماں توں بعد خوشخبری دا کم نئیں کر سکدا ۔ایس لئی ، میَں خوشخبری دی منادی ول بوہت دھیان دیندا ہاں تے انجیل دی منادی دے بعد اپنے سارے دوجے کماں ول دھیان دیندا ہاں ۔ میَں نئیں سوچدا پئی اپنے سارے کماں نوں کرن دے بعد میَں کسے طرحاں وی انجیل دی منادی کر سکدا ہاں ۔
شریعت نوں منن والے جدوں پُلپٹ اُتے کھلوندے نیں تاں اوہناں دا کم فرشتیاں وانگر ہوندا اے ۔اوہ ایمانداراں نوں سکھاؤندے نیں پئی اپنے پاپاں اُتے اتھرو وگاوو ۔ہر اک شرع نوں منن والے نوں یسوع اُتے ایمان لیاؤن دے بعد پاپاں توں معافی پاؤنی چاہی دی اے کیوں جے فیر ای کوئی اصل وچ خوش ہو سکدا اے ،پئی اوہ پاک ہیگا اے ۔ صرف ایہو ای اک راہ ہیگا اے جیہدے نال ہر کوئی اپنی رُوح نوں خوش کر سکدا اے ۔ لوک اپنی جندڑیاں دےوچکار پاپ تے نکمیاں حرکتاں کر لیندے نیں ،تے ایس طرحاں جےکسے دے دل وچ پاپ ہیگا اے ، تاں اوہ اوہدے لئی دوزخ توں وی بوہتا خطرناک ہووے گا ۔ خُدا ایس طرحاں دے لوکاں نوں سزا دیوے گا ۔
میَں گل کیتیوں بِنا رہ نئیں سکدا پئی بوہتے لوک خُدا دے اگے اپنے لئی خُدا نوں غصہ دواؤندے نیں ۔اوہ جیہڑے نہ توبہ کردے ،نہ بدل دے تے نہ یسوع مسیح اُتے ایمان لیاؤندے نیں ،ایتھوں تیک پئی اصل ایمان دی نقل کردے پئےنیں ، خُدا دے غصے دے راہیں اوہناں نوں سزا ملے گی ۔ اوہ خُدا نوں دھوکہ نئیں دے سکدے ، بھاویں اسیں اوہدے اگے اصل ایمان لیائیے یاں ناں لیائیے ،اسیں اوہنوں دھوکہ نئیں دے سکدے ۔جے اسیں ایمان نہ لیاندا تاں اسیں سزا پاواں گے ۔ اوہ جیہڑے اصل ایمان نئیں رکھدے ،اوہناں اُتے خُدا دا عذاب اُترے گا ۔ اوہ دوزخ دی بلدی ہوئی اَگ وچ سڑ جان گے ۔ایتھے بوہتے لوک ہیگے نیں ،جیہڑی اپنی بے ایمانی دے سبب دوزخ وچ سڑ جان گے ۔
ایس لئی ،لازمی ہیگا اے پئی اسیں انجیل دی منادی کرئیے ۔سانوں لگاتار خُدا دے کلام نوں وی ودھاؤنا ایں ۔ سانوں ہر ویلے اکٹھیاں ہونا ، خوشخبری اُتے دھیان کرنا تے صرف آپنے لئی ای نئیں سوچنا چاہی دا ،سگوں دوجیاں نوں وی ایہدے بارے دسنا چاہی دا اے ۔ایہدا مطلب اے ،لوک سانوں دُکھ پوہنچاؤندے تے خُدا دی محبت نوں کُجھ نئیں جان دے نیں ،تاں وی سانوں ،لوکاں نوں خُدا دے عذاب توں بچاؤن لئی انجیل دی منادی کرنی چاہی دی اے ۔
لازمی ہیگا اے پئی اسیں ہیٹھاں دسے گئے کلام نوں جانیے ۔ساڈے آلے دوالے بوہت لوک ہیگے نیں جنہاں اُتے خُدا دا عذاب اُترے گا ۔ سانوں بوہت سوچ سمجھ کے دھیان کرنا چاہی دااے پئی اسیں جے اوہناں نوں قصور وار خُدا دے انصاف ولوں کردے آں ،تاں کیہ خُدا خوش ہووے گا ؟ اسیں اوہناں نوں ایسے حال وچ نئیں چھڈ سکدے ،جیہڑے وچ اوہ ہیگے نیں ۔ چنگی طرحاں سوچ سمجھ کے ، سانوں لازمی خوشخبری دی منادی سارے جگ وچ کرنی چاہی دی اے ۔
جے تہاڈے گھر وچ کوئی ایس طرحاں دی شریعت نوں منن والا ہیگااے ،تاں سارا خنوادہ خُدا دے عذاب دے سبب سزاپاوے گا ۔ غصہ کیہ ہیگا اے ؟ اسیں آکھدے آں ، ” جے تسیں آکھا نہ منیا تاں تسیں مر جاووگے ۔“ جدوں بچے ماپیاں دا آکھا نئیں من دے ۔ فیر ماپے اپنے بچیاں نوں کُٹ مار کردے نیں ،جے اوہ بچیاں نوں ہور بوہتا برداشت نئیں کردے ۔بچے اپنی غلطیاں نوں من دے تے فیر معافی منگ دے نیں ۔ ماپے اپنے بچیاں نوں معاف کر دیندے نیں کیوں جے اوہ اوہناں لئی جان دیندے نیں ۔ چوتھی آیت وچ اِنج لکھیا اے ، ” یاں تُوں اوہدی مہربانی تے تحمل تے صبر دی دولت نوں کُجھ نئیں جان دا تے نئیں سمجھدا پئی خُدا دی مہربانی تینوں توبہ ول کھچ لیاؤندی اے۔ “ فیر وی ، کدوں تیک خُدا برداشت کردا اے ؟ خُدا ۷۰ ۔ ۸۰ ورہے تیک ،جدوں تیک اسیں ایس دھرتی اُتے ہیگے آں ،ساڈے بارے صبر کردااے ،پر لوک دو یا تِن واری برداشت کرن دے بعد اپنے بچیاں اُتے سوٹی ورتدے نیں ۔ خُدا ساڈی جندڑیاں دے مکن تیک صبر کردا اے ۔
خُدا نے ڈھیٹاں لئی دوزخ دی اگ تیاری کیتی اے
جدوں خُدا وند اپنے ہتھ وچ اِک سوٹی پھڑ لَے گا تاں ایہہ مک جاوے گا ۔ خُداوند نے شریعت نوں منن والیاں لئی بل دی ہوئی اَگ والی تھاں تیار کیتی اے ، جیہڑی اُبل دے ہوئے دھات دے پتھر تے گندھک والی اے ۔خُدااپنے غصے وچ مویاں نوں برباد ناں ہون والے بدن وچ جواندا اے ۔خُدااوہناں دے بدناں نوں ہمیشگی دیندااے ،تاں پئی اوہ ہمیشہ لئی پیڑ وچ پئے رہن ،تے اوہ اوہناں نوں گندھک دی اگ وچ سُٹ دیوے گا جیہڑی کدی ناں بجھے گی ۔ خُدادا غصہ اوہناں نوں ہمیشہ لئی جواندا اے پئی اوہ ہمیش لئی گندھک دی اگ وچ پئے ہوئے تڑپ دے رہن ۔ ایتھوں تیک پئی اوہناں دے بدن اگ توں بوہتے گرم ہیگے نیں ، تاں وی اوہ سڑن توں مردے نیں تے آکھدے نیں ، ” پئی اپنی اُنگل دا سرا پانی نال بھیوں کے میری جیبھ نوں گلا کرے کیوں جے میَں ایس اگ وچ تڑپ دا ہاں۔ “ (لوقا ۱۶ : ۲۴)۔
لازمی ہیگا پئی اسیں اوہناں رُوحاں کول انجیل دی منادی کرئیے کیوں جے ایہہ پکا سچ ہیگا اے پئی ایہو جیہاں نوں سزا ملے گی ۔ایہو ای سبب ہیگا اے پئی سانوں ایناں شریعت نوں منن والیاں کول انجیل دی منادی کرنی چاہی دی اے ،ہو سکدا اے پئی اوہ سانوں کُجھ ناں سمجھن تے دُکھ دین فیر وی سانوں اوہناں نوں خُدا دے غصے تے بربادی توں بچاؤنا چاہی دااے ۔ کیہ تسیں سمجھدے او پئی کیوں اسیں اپنی ساری ہمت کردے آں ،کاہدے لئی اسیں دوجیاں نوں بچاؤن وچ دل لاؤندے آں ، تے کیوں اسیں اپنے گرجے دے بوہتے پیسیاں نوں کتاباں راہیں مسیحی تعلیم وچ لاؤندے آں ؟ جے اسیں دولت صرف اپنے گرجے لئی خرچ کرئیے تاں اسیں امیر ہو سکدے آں ۔ اسیں چنگا کھانا کھا سکدے آں تے چنگی حیاتی بسر کرسکدے آں ۔
فیر وی ، بوہت ساری غیر رُوحانی شیواں سارے جگ وچ خوشخبری دی منادی لئی چاہی دیاں نیں ۔ کیہ تہانوں پتہ اے کیوں ؟ کیوں جے ایس طریقے نال ،دوجے لوکاں نوں وی بچایا جا سکدا اے ۔ایس لئی ،اسیں اپنے آپ نوں سارے جگ وچ انجیل دی منادی کرن لئی کھڑیاں کردےآں ۔ جے اسیں اِنج ناں کرئیے ،تاں کیہ ہو سکدا اے پئی دوجے لوک وی پاپاں توں معافی پالین گے ؟
جے اسیں تہاڈے تیک خوشخبری دی منادی ناں کیتی ہوندی ، تاں کیہ تسیں مکتی پا سکدے سو ، بھاویں تسیں پہلاں توں خُدا دے راہیں مکتی پاچُکے سو ؟ نئیں، تسیں اِنج نئیں کیتا سی ۔ساڈے وچوں سارے ای نویں سریوں جمن توں پہلاں شریعت نوں منن والے سَن ۔بھاویں ساڈا خیال ہیگا سی پئی اسیں یسوع اُتے ایمان رکھدے ،تاں وی اسیں پاپ کردے ساں ۔ جے اسیں ایس خوشی دی منادی نوں ناں سُن دے تاں اسیں ایس جگ وچ قصور وار ہو جاندے ۔
کیہ اسیں صرف اوہناں نوں دوزخ وچ مرن دئیے ؟نئیں ،اسیں اِنج نئیں کر سکدے ۔اسیں اوہناں نوں اِنج ای دوزخ وچ جاندیاں ہوئیاں نئیں ویکھ سکدے کیوں جے اسیں خُداوند دی خوشخبری تے مکتی نوں جان دے آں ۔ سانوں پتہ اے پئی کیہڑا دوزخ وچ جاوے گا تے کیہڑا اَسمانی بادشاہی وچ جاوے گا ۔ ایس لئی ، اسیں ایہناں دے فکر کردے تے دعا کردے تے خوشی دی بشارت دی منادی کردے آں ۔
ایہہ ایہدا سبب ہیگا اے پئی کیوں اسیں اپنے پیسے دی راکھی کردے تے ایس منسٹری اُتے اینی بوہتی رقم خرچ کردے آں ۔آؤ ایہدا سبب ہیٹھاں ویکھدے آں : اک رُوح نوں بچاؤنا ایس جگ وچ ہر شے مل جان توں چنگا ہیگا اے ۔
کیوں اسیں، شریعت نوں منن والیاں توں گھٹیا سمجھے جاندے تے دُکھ سہندیاں ہوئیاں انجیل دی منادی تحمل تے صبر نال کردے آں ،تاں ایہدا سبب ایہہ ہیگا اے پئی اوہناں رُوحاں نوں جیہڑیاں خُدا دےعذاب راہیں سزا پاؤن والیاں نیں ، اوہناں نوں بچایا جاوے ۔
تسیں سوچ سکدے او پئی ، ’ تہاڈے کول اصل خوشخبری اُتے ودھیا پڑھی جان والیاں کتاباں ہیگیاں نیں تے تسیں اوہناں نوں نکیاں کتاباں دی شکل وچ سارے جگ وچ ودھا سکدے او ۔ ‘ جے ایہہ اصل خوشخبری دی منادی کرن دا ودھیا طریقہ ہوندا ،تاں اسیں اِنج کردے ۔ پر ، بوہتی وار اسیں ہر ٹھیک طریقے نوں ورتن دی ہمت کیتی ،پر ایہہ کوئی ودھیا طریقہ ثابت ناں ہویا ۔
اسیں مناد خوشخبری دی منادی کُجھ کماؤن لئی نئیں کردے پئے ۔اوہ انجیل دی منادی روحاں نوں بچاؤن لئی کردے نیں ،کیوں جے اوہناں نوں پتہ ہیگا اے پئی پاپی لازمی طور اُتے دوزخ دی اگ دا بھانبڑ بن جان گے ۔ فیر وی ،ایس جگ وچ شریعت نوں منن والے مسیحیت دی خدمت کرن دا دعویٰ کردے نیں پر اصل وچ اوہ اپنی دنیاوی آساں پوریاں کرن لئی کم کردے نیں ۔ سانوں ایہدیاں لوڑاں نوں سمجھنا چاہی دا اے پئی کاہدے لئی شریعت نوں منن نوں خوشخبری دی تعلیم سکھائی جاوے ۔
سانوں ایہہ وی جانن دی لوڑ ہیگی اے خُدا نے سانوں اپنے ۱۰ حکماں وچ سبت دا دن پاک منن دا حکم کاہدے لئی دتا اے تےکیوں اوہناں لوکاں نوں پتھرمارمارکے جانوں ماریاگیا جنہاں نیں سبت نوں نئیں منیا سی ۔ سبت دا دن ایس گل ول اشارہ کردا اے پئی یسوع نے ساڈے سارے پاپ دھودتے سَن ۔ سانوں ایس گل نوں اپنے ذہن وچ رکھنا چاہی دا اے پئی یسوع نے ساڈے سارے پاپ دھو دتے سَن ۔ سانوں ایہہ سب کُجھ خُداوند اُتے ایمان رکھدیاں ہوئیاں ایہدی وی منادی کرنی چاہی دی اے ،جیہدے وچ ایہہ اصل گل ہیگی اے پئی خُداوند نے جگ دے پاپاں نوں مکا دتا اے ۔
اِنج لگدا اے پئی ایس پیغام وچ میَں اپنے مخالف لوکاں نوں تسلی دتی اے ۔پر سانوں اوہناں نال دلوں صاف ہونا چاہی دااے تے اوہناں نوں معاف کردینا چاہی دااے ۔ جے اسیں اپنے مونہاں نوں بند رکھا ں گے تاں اوہناں دا نصیب دوزخ وچ جانا بن جاوےگا ۔ اسیں خوشخبری نوں ودھاؤن والے ،شریعت نوں منن والیاں نوں ،ایہہ اجازت کدی وی نئیں دے سکدے پئی اوہ اپنے پیسے دھیلے تے اپنی
دنیاوی جان پچھان وکھاکے ،سانوں نکمے سمجھن۔
لازمی ہیگا اے پئی اسیں خوشخبری دی منادی اپنے خنوادیاں توں لَے کے دوجے لوکاں تیک کرئیے
لازمی ہیگا اے پئی اسیں خوشخبری دی منادی ساریاں لوکاں تیک کرئیے ۔ سانوں پتہ ہیگا اے پئی ساریاں رُوحاں ساڈے گھر دے جئیاں دیاں رُوحاں وانگر مہنگیاں ہیگیاں نیں ۔ سانوں دوجے لوکاں دیاں رُوحاں نوں مہنگیاں سمجھنا چاہی دااے ،کیوں جے خُدا دے اگے اسیں سارے اِکو جیہے ہیگے آں ۔
جدوں وی میَں منادی کرداہاں ،میَں مکتی دی خوشخبری دی گل کیتیوں اَڈ نئیں رہ سکدا ،کیوں جے رُوحاں دوزخ ول جاندیاں پئیاں نیں ۔سانوں اوہناں نوں دوزخ وچ سڑن توں بچاؤنا چاہی دا اے ۔ سانوں اپنے خنوادیاں تے بیلیاں وچ خوشخبری دی منادی کرنی چاہی دی اے ،جے ایہہ تہاڈے کول تہاڈی آس مطابق کُجھ چھڈدیاں نیں ،تاں کتاباں نال ایہدی منادی کرو،تے اوہناں شیواں لئی دعا کرئیے جنہاں دی سانوں لوڑ ہیگی اے ۔ سانوں بوہت سارے وکھ وکھ طریقیاں نال ایہدی منادی کرنی چاہی دی اے ۔ جدوں اک رُوح جِت لئی جاندی اے تاں اسیں اک جشن مناؤندے آں ۔ جدوں وی اسیں خوشخبری دی منادی کرن لئی تبدیل کرن والا اکٹھ رکھدے آں ، تاں اسیں رُوحاں نوں جِت لیندے آں ۔ کئی واری ،لوک جگ وچ واپس چلے جاندے نیں ،بھاویں اسیں اوہناں تیک خوشخبری پہنچاؤن دا اوکھے ہو کے انتظام کرد ے آں ۔فیر اسیں دُکھی ہو جاندے آں ۔پر اخیریں ، اسیں کسے وی پریشانی دا احساس کیتیوں اَڈ خوشخبری دی منادی کردے آں۔
میَں چاؤہندا ہاں پئی اج تسیں اک گل نوں جانو۔یاد رکھو پئی ساڈے آلے دوالے بوہت سارے شریعت نوں منن والے مسیحی ہیگے نیں تے سانوں لازمی طور اُتے اوہناں تیک خوشخبری دی منادی کرنی چاہی دی اے ۔ بھاویں شریعت اوہناں نوں پاپاں توں بچاؤن وچ اوہناں دی مدد نئیں کرسکدی ،تاں وی اوہ شریعت نوں منن دا فریب کر دے تے سوچدے نیں پئی اوہ ہر دیہاڑے توبہ دیاں دعاواں نال ای اپنے پاپاں دی معافی پاؤندے نیں ۔
اوہ ایس خوشخبر ی نوں رد کردے نیں جیہڑی ایہہ آکھدی اے پئی یسوع نے شروع توں ای
ساڈے پاپاں نوں مکا دتا سی ۔ اوہناں دے خیال وچ ، یسوع نے اوہناں دے ہر دیہاڑے دے پاپاں نوں چھڈ کے صرف وڈے پاپاں نوں مکایا ،کیوں جے اوہ پاپاں دی اصل معافی نوں نئیں جان دے ۔ اوہ جیہڑے مکتی دی سچیائی نوں نئیں جان دے ،شریعت نوں منن والے اکھواؤندے نیں ۔سانوں خُدا دی راستبازی دی خوشخبری دی منادی نال اوہناں نوں اوہناں دے پاپاں توں بچاؤنا چاہی دا اے ۔
Copyright © 2021 by The New Life Mission