ខ្ញុំចង់ពិភាក្សាអំពីជំនឿដែលត្រូវបានបើកសម្តែង នៅក្នុងអាសនាតង្វាយដុត។ នៅពេលជនជាតិអ៊ីស្រាងែលបានបំពានច្បាប់ទាំង៦១៣មាត្រានៃច្បាប់របស់ព្រះ និងបញ្ញត្តរបស់ព្រះ ដែលពួកគេត្រូវតែគោរពតាមនៅក្នុងជីវិតប្រចាំថ្ងៃរបស់ពួកគេ ហើយនៅពេលពួកគេបានទទួលស្គាល់អំពើបាបរបស់ពួកគេ ពួកគេបានថ្វាយទៅកាន់ព្រះនូវតង្វាយឥតខ្ចោះរបស់ពួកគេ ដែលស្របតាមប្រព័ន្ធថ្វាយយញ្ញបូជា ដែលព្រះបានបង្កើតឡើង។ ហើយកន្លែងដែលពួកគេបានថ្វាយតង្វាយទាំងនេះ គឺជាអាសនាតង្វាយដុត។ នៅក្នុងន័យផ្សេង ជនជាតិអ៊ីស្រាអែលបានទទួលការអត់ទោសបាប ដោយការដាក់ដៃរបស់ពួកគេលើក្បាលរបស់សត្វយញ្ញបូជាឥតខ្ចោះ ការអាករ និងការបង្ហូរឈាមវា ការប្រោសឈាមវាទៅលើស្នែងនៃអាសនាតង្វាយដុត និងការចាក់ឈាមដែលនៅសល់ទៅលើដី និងការដុតសាច់យញ្ញបូជានេះនៅលើអាសនា។ 

តើអាសនាតង្វាយដុតមានអត្ថន័យខាងវិញ្ញាណ យ៉ាងដូចម្តេច?

តង្វាយទាំងអស់ដែលត្រូវបានថ្វាយជាយញ្ញបូជានៅលើអាសនាតង្វាយដុត បើកសម្តែងពីព្រះយេស៊ូវគ្រីស្ទ

តើព្រះយេស៊ូវគ្រីស្ទបានធ្វើអ្វីខ្លះ នៅពេលទ្រង់យាងមកផែនដីនេះ? យើងមានបាប គឺយើងបានធ្វើបាបទាស់នឹងព្រះ ហើយបានបំពានក្រិត្យ វិន័យ និងបញ្ញត្តរបស់ទ្រង់។ ប៉ុន្តែដើម្បីដោះអំពើបាបទាំងអស់របស់យើងចេញ ព្រះយេស៊ូវគ្រីស្ទបានទទួលបុណ្យជ្រមុជពីលោកយ៉ូហាន ហើយទទួលយកអំពើបាបរបស់លោកិយនេះដាក់លើអង្គទ្រង់ ហើយដូច្នេះ បានបង្ហូរព្រះលោហិតទ្រង់នៅលើឈើឆ្កាង។ ដូចដែលតង្វាយយញ្ញបូជាបានទទួលយកអំពើបាបរបស់សាសន៍អ៊ីស្រាអែល តាមរយៈការដាក់ដៃលើ ហើយត្រូវបានគេសម្លាប់ និងដុតនៅលើអាសនាតង្វាយដុត ដោយសារព្រះយេស៊ូវគ្រីស្ទបានយាងមកផែនដីនេះ ក្នុងនាមជាតង្វាយយញ្ញបូជាដ៏ឥតខ្ចោះ ហើយបានទទួលបុណ្យជ្រមុជ នោះទ្រង់អាចបង្ហូរព្រះលោហិតទ្រង់នៅលើឈើឆ្កាង និងសុគតជំនួសយើងបាន។ តាមរយៈការត្រូវគេវាយដែកគោលនៅលើព្រះហស្ត និងព្រះបាតទាំងពីររបស់ទ្រង់ និងការបង្ហូរព្រះលោហិត ព្រះអម្ចាស់បានទទួលយកទោសនៃអំពើបាបរបស់ យើង។ ដូច្នេះ ទ្រង់បានសង្រ្គោះយើងចេញពីអំពើបាប និងទោសទាំងអស់របស់យើង។ 
ដែលបានយាងមកធ្វើជាខ្លឹមសារពិតប្រាកដនៃអាសនាតង្វាយដុត តើព្រះយេស៊ូវគ្រីស្ទបានធ្វើអ្វី នៅពេលទ្រង់យាងមកផែនដីនេះ? ទ្រង់បានសង្រ្គោះយើង ដោយការទទួលយកអំពើបាបទាំងអស់របស់យើងដាក់លើអង្គទ្រង់ ការជាប់ឆ្កាង និងការសុគតនៅលើឈើឆ្កាង និងការមានព្រះជន្មរស់ពីសុគតឡើងវិញ។ ព្រះអម្ចាស់បានយាងមកផែនដីនេះ បានបញ្ចប់សេចក្តីសង្រ្គោះរបស់យើង ហើយបន្ទាប់មក ទ្រង់បានយាងឡើងទៅនគរស្ថានសួគ៌វិញ។ 

របៀបតែមួយគត់ ដើម្បីទទួលបានការអត់ទោសសម្រាប់អំពើបាបទាំងអស់

នៅពេលព្រះយេស៊ូវគ្រីស្ទបានទទួលយកអំពើបាបរបស់យើង និងទោសនៃអំពើបាបទាំងនេះ តាមរយៈបុណ្យជ្រមុជ ហើយនៅពេលទ្រង់បានសង្រ្គោះអ្នក និងខ្ញុំចេញពីអំពើបាបរបស់យើង ដោយថ្វាយអង្គទ្រង់ជាតង្វាយយញ្ញបូជាជំនួសយើង យើងទាំងអស់គ្នាត្រូវមានជំនឿដែលនិយាយថា «អរព្រះគុណ ព្រះអម្ចាស់!»។ ទោះបីជាមនុស្សជាច្រើនងាយនឹងមានការប៉ះពាល់ចិត្តពីរឿងស្នហា រឿងជីវិត ឬរឿងចេញពីដួងចិត្តក៏ដោយ ក៏ចិត្តរបស់ពួកគេចំពោះសេចក្តីស្រឡាញ់ដ៏ឥតលក្ខខណ្ឌរបស់ព្រះ ពួកគេបែរជាត្រជាក់ដូចជាទឹកកកទៅវិញ។ នៅពេលព្រះគុណមានភាព អស្ចារ្យ ដែលព្រះអម្ចាស់ទទួលបុណ្យជ្រមុជ និងសុគតនៅលើឈើឆ្កាងសម្រាប់យើង នៅតែមានមនុស្សអាក្រក់ដែលមិនអាចស្គាល់ពីព្រះគុណនេះ ហើយមិនអរព្រះគុណដល់ទ្រង់សម្រាប់ព្រះគុណនេះសោះ។ 
ព្រះយេស៊ូវគ្រីស្ទ ដែលជាព្រះរាជបុត្រានៃព្រះ បានយាងមកផែនដីនេះ ហើយបានធ្វើជាតង្វាយយញ្ញបូជាសម្រាប់យើង។ ទ្រង់បានទទួលយកអំពើបាបទាំងអស់របស់យើងដាក់លើអង្គទ្រង់ តាមរយៈបុណ្យជ្រមុជ ហើយបានថ្វាយអង្គទ្រង់ជាតង្វាយយញ្ញបូជា តាមរយៈការលះបង់រូបអង្គទ្រង់នៅលើឈើឆ្កាង។ ទ្រង់ត្រូវបានទះកំផ្លៀង សម្រាត វាយ បៀតបៀន និងកៀបសង្កត់ ដោយសារតែយើង។ នេះហើយគឺជារបៀបដែលទ្រង់បានសង្រ្គោះយើង។ ដោយសារការជឿតាមសេចក្តីពិតនេះ ដែលយើងបានធ្វើជាកូនរបស់ព្រះ។ នេះគឺជាការលើកទឹកចិត្តដ៏អស្ចារ្យបំផុត និងជាព្រះគុណដ៏អស្ចារ្យរបស់ព្រះ ដែលពាក្យសម្តីមិនអាចបរិយាយបានឡើយ។ នៅពេលនេះគឺជារបៀបដែលព្រះបានសង្រ្គោះយើង វាធ្វើឲ្យខ្ញុំលំបាកយ៉ាងខ្លាំង ដែលមើលឃើញថា មនុស្សជាច្រើននៅតែមិនជឿ និងអរព្រះគុណដល់ទ្រង់ សូម្បីតែបានស្តាប់ឮហើយក៏ដោយ។
ដោយសារព្រះយេស៊ូវបានយាងមកផែនដីនេះ បានទទួលបុណ្យជ្រមុជ និងលះបង់ព្រះជន្មទ្រង់ អ្នក និងខ្ញុំបានសង្រ្គោះចេញពីអំពើបាបទាំងអស់របស់យើង។ ដូច្នេះ អេសាយ ៥៣:៥ និយាយថា «តែទ្រង់ត្រូវរបួស ដោយព្រោះអំពើរំលងរបស់យើង ក៏ត្រូវវាយជាំ ដោយព្រោះអំពើទុច្ចរិតរបស់យើងទេ ឯការវាយផ្ចាលដែលនាំឲ្យយើងបានជាមេត្រី នោះបានធ្លាក់ទៅលើទ្រង់ ហើយយើងរាល់គ្នាបានប្រោសឲ្យជា ដោយសារស្នាមរំពាត់នៅអង្គទ្រង់»។ 
យើងធ្វើបាបនៅពេលក្នុងជីវិតរបស់យើង។ ដើម្បីសង្រ្គោះយើងដែលត្រូវតែទទួលទោស ចេញពីអំពើបាបទាំងអស់របស់យើង ទណ្ឌកម្ម សេចក្តីវិនាស និងបណ្តាសា ព្រះអម្ចាស់បានចាកចោលបល្ល័ង្កនៅនគរស្ថានសួគ៌ ហើយបានយាងមកផែនដីនេះ។ ទ្រង់បានឱនសិរសារបស់ទ្រង់នៅចំពោះលោកយ៉ូហាន ហើយបានទទួលបុណ្យជ្រមុជ បាននាំអំពើបាបទាំងនេះទៅលើឈើឆ្កាង ហើយបានរងទុក្ខយ៉ាងខ្លាំងក្រៃលែង បានបង្ហូរព្រះលោហិតនៃទឹកព្រះទ័យទ្រង់ចុះមកដី បានមានព្រះជន្មរស់ពីសុគតឡើងវិញ បានធ្វើជាតង្វាយយញ្ញបូជាសម្រាប់យើង ហើយបានធ្វើជាព្រះនៃសេចក្តីសង្រ្គោះដ៏ពិតប្រាកដរបស់យើង។ 
តើអ្នកពិចារណាការពិតនេះ ហើយរក្សាវាទុកយ៉ាងជ្រៅនៅក្នុងចិត្តរបស់អ្នកដែរទេ? នៅពេលអ្នកស្តាប់ឮព្រះបន្ទូលព្រះ អ្នកគួរតែមានអំណរ និងជឿនៅក្នុងចិត្តរបស់អ្នកថា ព្រះយេស៊ូវគ្រីស្ទពិតជាបានយាងមកផែនដីនេះ ក្នុងនិស្ស័យជាមនុស្សម្នាក់ ហើយថា ទ្រង់បានទទួលបុណ្យជ្រមុជ បានសុគតនៅលើឈើឆ្កាង និងបានមានព្រះជន្មរស់ពីសុគតឡើងវិញ ដើម្បីសង្រ្គោះរាស្ត្ររបស់ទ្រង់ចេញពីអំពើបាបរបស់ពួកគេ។ បើសិនយើងបានដឹងថា យើងទាំងអស់គ្នាត្រូវតែប្រឈមនឹងស្ថាននរក នោះយើងអាចដឹងនៅក្នុងជម្រៅចិត្តរបស់យើងថា យើងពិតជាមានសេចក្តីអំណរ និង សេចក្តីអរព្រះគុណយ៉ាងខ្លាំងយ៉ាងណា សម្រាប់សេចក្តីសង្រ្គោះនេះ។ ទោះបីជាយើងចង់ជឿលើព្រះ ហើយបានធ្វើជារាស្ត្ររបស់ទ្រង់ក៏ដោយ ក៏គ្មានផ្លូវណាមួយ ដែលយើងអាចធ្វើដូច្នេះបានដែរ។ ប៉ុន្តែសម្រាប់អ្នក និងខ្ញុំ ដែលពិតជាដេញតាមការអត់ទោសបាបរបស់យើង ទ្រង់បានជួបយើង តាមរយៈព្រះបន្ទូលនៃសេចក្តីពិតថា ព្រះគ្រីស្ទបានយាងមកផែនដីនេះ បានទទួលបុណ្យជ្រមុជ បានសុគតនៅលើឈើឆ្កាង ហើយបានមានព្រះជន្មរស់ពីសុគតឡើងវិញ នៅថ្ងៃទីបី។ 
បើសិនគ្មានយញ្ញបូជារបស់ព្រះយេស៊ូវទេ តើយើងអាចទទួលបានសេចក្តីសង្រ្គោះរបស់យើងបានយ៉ាងដូចម្តេច? យើងមិនអាចទទួលបានឡើយ! បើសិនគ្មានបុណ្យជ្រមុជរបស់ព្រះយេស៊ូវ និងព្រះលោហិតទ្រង់នៅលើឈើឆ្កាងទេ ហើយបើសិនគ្មានសេចក្តីសង្រ្គោះនៃអំបោះខ្លូតទេសវេញយ៉ាងខ្មាញ់ពណ៌ផ្ទៃមេឃ ពណ៌ខ្វាយ និងពណ៌ក្រហម នៅក្នុងរោងឧបោសថទេ នោះសេចក្តីសង្រ្គោះគ្រាន់តែជាសុបិន្តនៅកណ្តាលរដូវក្តៅមួយសម្រាប់យើងប៉ុណ្ណោះ។ បើសិនគ្មានយញ្ញបូជារបស់ទ្រង់ទេ យើងមិនអាចបានរួចពីអំពើបាបរបស់យើង ហើយមិនអាចគេចពីទណ្ឌកម្មនៃអំពើបាបបានដែរ ប៉ុន្តែយើងត្រូវធ្លាក់ទៅក្នុងភ្លើងនរកដ៏អស់កល្បជានិច្ច ហើយរងទុក្ខនៅទីនោះ ជារៀងរហូតហើយ។ ប៉ុន្តែព្រះគ្រីស្ទបានសង្រ្គោះយើង ដោយការថ្វាយអង្គទ្រង់ជាតង្វាយយញ្ញបូជាសម្រាប់យើង ដូចជាតង្វាយយញ្ញបូជានៅក្នុងព្រះគម្ពីរសញ្ញាចាស់ផងដែរ។ 

សេចក្តីសង្រ្គោះនៃអំបោះពណ៌ផ្ទៃមេឃ ពណ៌ស្វាយ និងពណ៌ក្រហម ដែលត្រូវបានបំពេញសម្រេច នៅក្នុងព្រះគម្ពីរសញ្ញាថ្មី

បុណ្យជ្រមុជដែលព្រះយេស៊ូវបានទទួលពីលោកយ៉ូហាន គឺដូចគ្នានឹងការដាក់ដៃលើនៅក្នុងព្រះគម្ពីរសញ្ញាចាស់។ នៅក្នុងន័យផ្សេង វាគឺជាការដាក់ដៃលើនៅចំពោះអាសនាតង្វាយដុត នៅសម័យព្រះគម្ពីរសញ្ញាចាស់ ដើម្បីផ្ទេរអំពើបាបរបស់មនុស្សម្នាក់ទៅលើតង្វាយយញ្ញបូជា។ ដោយការយាងមកផែនដីនេះ និងការទទួលបុណ្យជ្រមុជ ព្រះយេស៊ូវ គ្រីស្ទបានបំពេញសម្រេចសេចក្តីសន្យានៃការដាក់ដៃលើ ដែលជាសេចក្តីសន្យាថា កាលណាមនុស្សមានបាបថ្វាយតង្វាយប្រចាំថ្ងៃ ពួកគេត្រូវតែដាក់ដៃរបស់ពួកគេលើក្បាលតង្វាយយញ្ញបូជា ដើម្បីផ្ទេរអំពើបាបរបស់ពួកគេទៅលើវា ហើយកាលណាគេថ្វាយតង្វាយប្រចាំឆ្នាំនៅថ្ងៃទី១០ ខែ៧ ដែលជាថ្ងៃធួននឹងបាបដ៏ធំ ដែលសម្តេចសង្ឃត្រូវបានផ្ទេរអំពើបាបទាំងអស់ក្នុងរយៈពេលមួយឆ្នាំរបស់សាសន៍អ៊ីស្រាអែលទាំងមូល ទៅលើតង្វាយយញ្ញបូជា ដោយការដាក់ដៃរបស់គាត់លើក្បាលវា។ 
ដូចជាការដាក់ដៃលើនៅក្នុងព្រះគម្ពីរសញ្ញាចាស់ដែរ ដោយសារព្រះយេស៊ូវបានទទួលយកអំពើបាបទាំងអស់របស់លោកិយនេះ ដាក់លើអង្គទ្រង់ ដោយការទទួលបុណ្យជ្រមុជ ទ្រង់បានលាងសម្អាតអំពើបាបទាំងនេះចេញ ហើយដោយសារទ្រង់បានទទួលអំពើបាបទាំងអស់របស់មនុស្សជាតិដាក់លើអង្គទ្រង់ ទ្រង់បានទទួលយកទោសនៃអំពើបាបទាំងនេះជំនួសយើង ហើយបានធ្វើជាតង្វាយយញ្ញបូជា។ នេះហើយគឺជារបៀបដែលព្រះយេស៊ូវគ្រីស្ទអាចធ្វើជាព្រះនៃសេចក្តីសង្រ្គោះដ៏ពិតប្រាកដរបស់យើងបាន។ 
ដូច្នេះ យើងពិតជាត្រូវទទួលស្គាល់ថា ដោយសារអំពើបាបរបស់យើង យើងត្រូវតែប្រឈមនឹងទោស និងសេចក្តីស្លាប់របស់យើង។ យើងត្រូវតែដឹង និងមានអារម្មណ៍ពីការពិតនេះ។ ហើយយើងត្រូវតែដឹងថា ព្រះយេស៊ូវគ្រីស្ទដ៏ជាព្រះអង្គសង្រ្គោះ បានសង្រ្គោះយើង ដោយការយាងមកផែនដីនេះ និងការថ្វាយអង្គទ្រង់ជាតង្វាយយញ្ញបូជាជំនួសយើង គឺតាម រយៈព្រះរាជកិច្ចនៃសេចក្តីសង្រ្គោះរបស់ទ្រង់ តាមរយៈបុណ្យជ្រមុជ ការសុគតនៅលើឈើឆ្កាង និងការមានព្រះជន្មរស់ពីសុគតឡើងវិញ ព្រះយេស៊ូវគ្រីស្ទបានលាងសម្អាតយើង ចេញពីអំពើបាបទាំងអស់របស់យើង ហើយបានសង្រ្គោះយើងចេញពីអំពើបាបរបស់យើងទាំងស្រុង។ ហើយយើងក៏ត្រូវតែជឿផងដែរថា ព្រះយេស៊ូវបានប្រទានអំណោយទាននៃ សេចក្តីសង្រ្គោះដល់យើង គឺទ្រង់បានបំពេញសម្រេចសេចក្តីសង្រ្គោះរបស់យើង ហើយបានប្រទានសេចក្តីសង្រ្គោះដ៏ពេញលេញនេះដល់យើង ទុកជាអំណោយទានសម្រាប់យើង។ ព្រះយេស៊ូវបានបំពេញសម្រេចគ្រប់ទាំងសេចក្តីសុចរិតទាំងអស់ ដើម្បីឲ្យអ្នកណាដែលគ្រាន់តែជឿ និងទទួលយក នោះគាត់ពិតជានឹងបានសង្រ្គោះ។ 
ដើម្បីធ្វើឲ្យយើងស្គាល់ពីការពិតនេះ ទ្វារចូលទៅទីលានរោងឧបោសថត្រូវបានត្បាញ ដោយអំបោះខ្លូតទេសវេញយ៉ាងខ្មាញ់ ពណ៌ផ្ទៃមេឃ ពណ៌ស្វាយ និងពណ៌ក្រហម។ នេះក៏ជាមូលហេតុដែលយើងនឹងមើលឃើញអាសនាតង្វាយដុតដំបូងគេ បើសិនយើងបើក និងចូលទៅតាមទ្វារចូលទៅទីលានរោងឧបោសថផងដែរ។ ហើយក៏តង្វាយដែលគេថ្វាយនៅលើអាសនាតង្វាយដុត ជាស្រមោលនៃវិធីសាស្ត្រនៃសេចក្តីសង្រ្គោះ ដែលព្រះយេស៊ូវគ្រីស្ទបានសង្រ្គោះយើងផងដែរ។ តង្វាយយញ្ញបូជានៅលើអាសនាតង្វាយដុតត្រូវតែទទួលយកសេចក្តីរំលងរបស់មនុស្សមានបាបដាក់លើខ្លួនវា តាមរយៈការដាក់ដៃលើ ហើយសម្រក់ឈាមរហូតដល់ស្លាប់ ជំនួសមនុស្សមានបាប។ បន្ទាប់មក គេប្រោសឈាមតង្វាយយញ្ញបូជាទៅលើស្នែងអាសនាតង្វាយដុត ហើយចាក់ឈាមដែលនៅសល់ទៅលើដី។ បន្ទាប់មក គេថ្វាយសាច់ និងខ្លាញ់របស់សត្វនោះនៅលើអាសនាទុកជាតង្វាយដុត។ ទាំងនេះគឺជាវីធីសាស្ត្រ ដែលគេថ្វាយតង្វាយយញ្ញបូជាទៅកាន់ព្រះ។ លក្ខណៈពិសេសទាំងនេះនៃតង្វាយយញ្ញបូជាគឺដូចគ្នានឹងវិធីសាស្ត្រដែលព្រះយេស៊ូវគ្រីស្ទបានធ្វើជាព្រះអង្គសង្រ្គោះរបស់យើង។ នៅក្នុងន័យផ្សេង តាមរយៈតង្វាយយញ្ញបូជា ព្រះបានបង្ហាញប្រាប់យើងថា ព្រះយេស៊ូវគ្រីស្ទនឹងយាងមកផែនដីនេះ ហើយសង្រ្គោះយើងតាមរបៀបនេះ។ 
នៅឯអាសនាតង្វាយដុត មនុស្សមានបាបត្រូវតែដាក់ដៃរបស់ខ្លួននៅលើសត្វយញ្ញបូជា ដោយមិនខកខាន។ នេះគឺជាមូលហេតុដែលរោងឧបោសថកំពុងតែប្រាប់យើងអំពីដំណឹងល្អអំពីទឹក និងព្រះវិញ្ញាណ។ ដោយបានយាងមកផែនដីនេះ ព្រះយេស៊ូវគ្រីស្ទបានទទួលបុណ្យជ្រមុជ ដើម្បីទទួលយកអំពើបាបរបស់មនុស្សជាតិដាក់លើអង្គទ្រង់។ បុណ្យជ្រមុជគឺជាគំរូពីសេចក្តីសង្រ្គោះដែលព្រះគ្រីស្ទបានទទួល ដើម្បីធ្វើជាតង្វាយយញ្ញបូជានៅចំពោះព្រះវរបិតា សម្រាប់មនុស្សមានបាបទាំងអស់នៅក្នុងលោកិយនេះ។
ឥឡូវនេះ តាមរយៈរោងឧបោសថនេះ យើងអាចមានជំនឿត្រឹមត្រូវ និងច្បាស់លាស់ហើយ។ ដូចដែលតង្វាយយញ្ញបូជាបានទទួលយកអំពើបាបរបស់ជនជាតិអ៊ីស្រាអែល នៅថ្ងៃធួននឹងបាប តាមរយៈការដាក់ដៃលើរបស់សម្តេចសង្ឃ ហើយដូចដែលគេត្រូវតែតង្វាយយញ្ញបូជាជំនួសឲ្យមនុស្ស ដោយសារអំពើបាបរបស់មនុស្សត្រូវបានផ្ទេរទៅលើវាហើយ (លេវីវិន័យ ១៦) ព្រះយេស៊ូវគ្រីស្ទបានយាងមកផែនដីនេះ ដើម្បីទទួលយកអំពើបាបរបស់យើងដាក់លើអង្គទ្រង់ ហើយធ្វើជាតង្វាយយញ្ញបូជារបស់យើង សម្រាប់អំពើបាបទាំងនេះ ហើយបានសង្រ្គោះយើងចេញពីអំពើបាប និងទោសទាំងអស់របស់យើង។ ឥឡូវនេះ យើងអាចជឿទាំងស្រុងលើសេចក្តីសង្រ្គោះនៃសេចក្តីស្រឡាញ់បាន។ ដោយសារការជឿតាមសេចក្តីពិតនេះ យើងអាចអរព្រះគុណ និងសងបំណុលទៅកាន់ព្រះ សម្រាប់សេចក្តីសង្រ្គោះនៃសេចក្តីស្រឡាញ់នេះ ដែលទ្រង់បានប្រទានឲ្យយើង។
មិនថាមនុស្សម្នាក់មានចំណេះដឹងខ្លាំងយ៉ាងណា អំពីរោងឧបោសថទេ បើសិនគាត់មិនជឿ នោះចំណេះដឹងទាំងនោះឥតមានប្រយោជន៍សម្រាប់គាត់ឡើយ។ ដូច្នេះ យើងត្រូវតែដឹង និងជឿលើសារៈសំខាន់នៃបុណ្យជ្រមុជរបស់ព្រះយេស៊ូវគ្រីស្ទ។ រោងឧបោសថមានទ្វារបី ដែលសុទ្ធតែត្រូវបានត្បាញ ដោយអំបោះខ្លូតទេសវេញយ៉ាងខ្មាញ់ ពណ៌ផ្ទៃមេឃ ពណ៌ស្វាយ និងពណ៌ក្រហម។ មនុស្សអាចពន្យល់ពីទ្វារនីមួយនៃរោងឧបោសថតាមរបៀបខុសៗគ្នា ដោយសារតែភាពល្ងង់ខ្លៅរបស់ពួកគេ។ 
នៅក្នុងលំដាប់លំដោលនៃអំបោះ ទីមួយគឺអំបោះពណ៌ផ្ទៃមេឃ បន្ទាប់មក អំបោះពណ៌ស្វាយ អំបោះពណ៌ក្រហម និងសំពត់ខ្លូតទេស។ លុះត្រាតែធ្វើទ្វារតាមរបៀបនេះ ទើបវាអាចជាទ្វារពិតប្រាកដនៃរោងឧបោសថបាន ពីព្រោះនៅសម័យព្រះគម្ពីរសញ្ញាចាស់ ព្រះបានបង្គាប់ឲ្យសាសន៍អ៊ីស្រាអែលសាងសង់វាតាមរបៀបនេះ។ 
មានមូលហេតុមួយដែលត្រូវតែធ្វើទ្វារតាមរបៀបនេះ។ មិនថាព្រះយេស៊ូវគ្រីស្ទបានប្រសូតមកក្នុងផែនដីនេះ ក្នុងនាមជាមនុស្សម្នាក់ តាម រយៈរូបកាយរបស់នាងក្រមុំព្រហ្មចារីម៉ារី ដើម្បីធ្វើជាព្រះអង្គសង្រ្គោះរបស់មនុស្សជាតិទេ បើសិនទ្រង់មិនបានទទួលបុណ្យជ្រមុជ ដើម្បីទទួលយកអំពើបាបរបស់យើងដាក់លើអង្គទ្រង់ជាមុនទេ នោះទ្រង់មិនអាចធ្វើជាព្រះអង្គសង្រ្គោះពិតប្រាកដរបស់យើងបានឡើយ។ ហើយបើសិនទ្រង់មិនបានទទួលបុណ្យជ្រមុជទេ ក៏ទ្រង់មិនអាចជាប់ និងសុគតនៅលើឈើឆ្កាងបានដែរ។ ដូច្នេះ គេត្រូវតែត្បាញអំបោះពណ៌ផ្ទៃមេឃជាមុន ដែលមានសារៈសំខាន់យ៉ាងខ្លាំង។