ကိုဗစ်-၁၉ကပ်ရောဂါနှင့်အပြည်ပြည်ဆိုင်ရာစာပို့လုပ်ငန်းဝန်ဆောင်မှုများပျက်ပြားခြင်းကြောင့်ကျွန်ုပ်တို့၏ 'အခမဲ့ပုံနှိပ်စာအုပ်ဝန်ဆောင်မှု' ကိုယာယီရပ်ဆိုင်းလိုက်သည်။
ဤအခြေအနေ၏အခြေအနေအရကျွန်ုပ်တို့သည်ယခုအချိန်တွင်သင့်အားစာအုပ်များမပို့နိုင်သေးပေ။
ဤကပ်ရောဂါသည်မကြာမီကုန်ဆုံးပြီးစာတိုက်လုပ်ငန်းပြန်လည်စတင်ရန်ဆုတောင်းပါ။
مضمون 11: خیمۂ اِجتماع
[11-9] سوختنی قربانی دی قربان گاہ وچ ظاہر ہون والا ایمان <خروج ۲۷:۱۔۸>
>خروج ۲۷:۱۔۸<
”تےتُوں کِکر دی لکڑ دی قربانگاہ پنج ہتھ لمی تے پنج ہتھ چوڑی بناویں ۔اوہ قربانگاہ چوکھونٹی تے اوہدی اُچیائی تِن ہتھ ہوئے ۔ تے تُوں اوس لئی اوہدیاں چونہہ نکراں اُتے سِنگ بناویں تے اوہ سِنگ تے قربانگاہ سارے اکو ای ٹوٹے دے ہون تے تُوں اوہناں نوں پِتل نال مڑھیں ۔ تے تُوں اوہدی سواہ چُکن لئی دیگاں تے بیلچے تے کٹورے تے سیخاں تےانگیٹھیاں بناویں ۔ اوہدے سارے بھانڈے پِتل دے بناویں ۔ تے اوس لئی پِتل دی جالی دی جھنجری بناویں تے اوس جالی دے چونہہ کونیاں اُتے پِتل دے چار کڑے لاویں ۔ تے اوس جھنجری نوں قربانگاہ دے چونہہ پاسیاں دیاں نکراں دے ہیٹھاں ایس طرح لاویں پئی اوہ اُچیائی وچ قربان گاہ دے اَدھ دُور تیک اپڑے ۔ تے تُوں قربانگاہ لئی کِکر دی لکڑ دیاں چوباں بنا کے اوہناں نوں پِتل نا ل مڑھیں ۔ تے تُوں اوہناں چوباں نوں کڑیاں وچ پوا دیئیں پئی جد کدی قربانگاہ چُکی جائے اوہ چوباں اوہدیاں دونواں پاسے رہن ۔ تختیاں نال اوہ قربانگاہ بناویں تے اوہ خالی ہوئے ۔ اوہ اوہنوں اِنج ای بناؤن جویں تینوں پہاڑ اُتے وکھائی گئی اے ۔ “
مَیں سوختنی قربانی دی قربانگاہ وچ ظاہر کیتے گئے ایمان دے بارے گل بات کرنا پسند کراں گا ۔ جد اسرائیلی خُدا دی شریعت دیاں ۶۱۳ قانوناں تے حکماں وچوں کسے نوں توڑدے سن جیہڑ ے اوہناں نیں اپنی ہر روز زندگیاں وچ قیم رکھنے سن ، تے جد اوہ اپنے پاپاں نوں پچھان دے سن ، اوہ اوہدے ولوں مقرر کیتے گئے قربانی دے طریقے مطابق اپنیاں بے پاپ قربانیاں خُدا اگے چڑھاؤندے سن ۔ تھاں جتھے اوہ ایہہ قربانیاں چڑھاؤندے سن سوختنی قربانی دی قربانگاہ اے ۔ دوجیاں اکھراں وچ ، اسرائیلیاں نیں قربانی دے بے پاپ پشُو دے سِر اُتے اپنیاں ہتھاں نوں رکھن ، ایہدی گردن وڈن تے ایہدا لہو لین ، ایس لہو نوں سوختنی قربانی دی قربانگاہ دیاں سنگاں اُتے لاؤن تے باقی زمین اُتے ڈوہلن تے قربانگاہ اُتے ایس قربانی دے گوشت نوں ساڑن دے راہیں اپنیاں پاپاں دی معافی پائی ۔
سوختنی قربانی دی قربانگاہ دارُوحانی مطلب کیہ اے ؟
سوختنی قربانی دی قربانگاہ ، کاچھ وچ دونواں لمائی تے چوڑائی وچ ۲۵.۲ میٹر(۵.۷فٹ)تے اُچیائی وچ۳۵.۱میٹر(۵.۴فٹ)سی تے پِتل مَڑھی ہوئی کِکر دی لکڑ نال بنی ہوئی سی ۔ جد کدی اسرائیلی سوختنی قربانی دی ایس قربانگاہ نوں ویکھدے سن ، اوہ احساس کردے پئی اوہ ایہو جیہے نیں جیہڑے اپنی عدالت وچ قید ہو گئے سن تے اپنی سزا توں بچن دے لائق نئیں سن ۔ تے بالکل جویں قربانی دا پشُو موت دے حوالے کیتا جاندا سی ، اوہ وی احساس کردےسن پئی اوہناں نیں وی اپنیاں پاپاں دے سببوں مرنا سی ۔ پر اوہ ایمان رکھن لئی وی آئے پئی مسیحا ایس زمین اُتے آئے گا تے دکھ جرن دے راہیں تے اوہناں دیاں پاپاں دے سببوں قربانی دے پشُو وانگر موت دے حوالے کیتے جان دے راہیں اوہناں دے پاپاں نوں دھوئے گا ۔
سوختنی قربانی دی قربانگاہ یِسُوعؔ مسیح ساڈے مکتی داتا دا اک پرچھانواں سی ۔ جویں بے پاپ پشُو ہتھاں دے رکھے جان تے ایہدا لہو وگا کے قربان کیتے جاندے سن ۔ یِسُوعؔ مسیح خُدا دے پُتر وانگر ساڈے کول آیا تے ساڈیاں ساریاں پاپاں دی سزا چُک لئی ۔ بالکل جویں پُرانے عہد نامے دے قربانی دے پشُوآں نوں ہتھاں دے رکھے جان تے اوہناں دا لہو وگاؤن دے راہیں ساریاں پاپاں نوں قبول کرنا پیندا سی ، اوہنے دُنیا دے ساریاں پاپاں دے لدے جان نوں اپنے آپ اُتے یوحنا کولوں بپتسمہ لین دے راہیں قبول کیتا، تے سولی اُتے اپنا لہو وگاؤن دے راہیں ایہناں پاپاں دی سزا چُک لئی ۔
ایس طرح سوختنی قربانی دی قربانگاہ سانوں وکھاندی اے پئی یِسُوعؔ مسیح نےاپنے بپتسمے نال اپنے آپ اُتے ساڈیاں ساریاں پاپاں نوں چُک لیا ، سولی اُتے مر گیا ، فیر مویاں وچوں جیوں اُٹھیا تے اِنج سانوں بچا چُکیا اے ۔
اپنیاں پاپاں توں معافی پاؤن لئی ، اسرائیلیاں نوں سوختنی قربانی دی قربانگاہ اُتے قربانی دے پشُو دینے پیندے سن
جد اسیں احبار دی کتاب دے باب ۴ نوں ویکھدے آں ، تاں اسیں ویکھدے آں پئی جد کدی مسح کیتے ہوئے کاہن ، اسرائیل دے سارے جھُنڈ ، کسے بادشاہ یا عام لوکاں وچوں کسے نے پاپ کیتا ، اوہناں نیں خُدا دے اگے اک قربانی دا پشُو لیاؤن ، اپنے ہتھ اوہدے سِر اُتے رکھن ،ایہنوں ذبح کرن ، ایہدا لہو وگاؤن تے ایہنوں سوختنی قربانی دی قربانگاہ اُتے لَے جان تے خُدا دے اگے چڑھاؤن دے راہیں اپنے پاپاں دی معافی پائی ۔
سچیائی دے اک معاملے وانگر ،جویں ایہہ سوختنی قربانی دی قربانگاہ سی جتھے اسرائیلی ہر دیہاڑے اپنے پاپ دیاں قربانیاں چڑھاؤندے سن ، ایہو جیہا کوئی دن نئیں لنگھیا ، جد ایہہ مصروف نہ ہوئے ۔ اسرائیلی جیہڑے اپنیاں پاپاں توں مکتی پاؤنا چاہندے سن اوہناں نیں بے پاپ پشُو نوں تیار کیتا تے ایہنوں سوختنی قربانی دی قربانگاہ اُتے اپنے قربانی دے پشُو وانگر خُدا اگے چڑھایا ۔ پاپیاں نیں اپنے سارے پاپ قربانی دے پشُو اُتے ایہدے سِر اُتے اپنیاں ہتھاں نوں رکھن دے راہیں لدے ، تے ایہناں پاپاں دی سزا لئی ، ایہدا گل وڈ کے ایہدا لہو کڈھیا ۔ فیر کاہن قربانی دے پشُو دا ایہہ لہو سوختنی قربانی دی قربانگاہ دیاں سنگاں اُتے لاؤندے سن ، تے ایہدا گوشت تے چربی قربانگاہ اُتے ساڑ دیندے سن ۔ ایس طرح اسرائیلیاں نیں اپنیاں پاپاں دی معافی پائی ۔
ایس توں ہٹ کے پئی ایہہ پاپ کِنے کیتا سی ، بھاویں اوہ اسرائیلیاں دا آگُو ہوئے ، وڈا کاہن ، عام کاہن ، سارے لوک یا عام لوکاں وچوں کوئی وی ، اوہناں نوں اپنے پاپ دی معافی قربانی دا اک پشُو لیاؤن دے راہیں ، جویں پئی اک بلد ، بکری ، یا لیلا تے ایہنوں قربانی دے پشُو وانگر خُدا دے اگے چڑھاؤن دے راہیں پاؤنی پیندی سی ۔
پاپیاں یا اوہناں دیاں آگُوآں نوں قربانی دے سِر اُتے اپنے ہتھ رکھنے پیندے ،ایہنوں ذبح کرنا پیندا ، ایہدا لہو سوختنی قربانی دی قربانگاہ دیاں سنگاں اُتے لاؤنا پیندا ،باقی لہو زمین اُتے ڈوہلنا پیندا سی ، تے اِنج اپنے قربانی دے پشُو دی چربی ساڑدے جیہڑی اوہناں نوں اوہناں دیاں پاپاں توں معاف کردی سی ۔ ایس لئی ، بوہت ساریاں لوکاں نوں سوختنی قربانی دی قربانگاہ اُتے اپنے قربانی دے پشُو لیاؤنے پیندے سن ، قربانیاں دے سِراں اُتے اپنیاں ہتھاں نوں رکھنا ، اوہناں دا لہو کڈھنا تے ایہنوں کاہناں نوں دینا پیندا سی ۔
جد سوختنی قربانی دی قربانگاہ اُتے قربانیاں چڑھائیاں جاندیاں سن ، تاں ایہہ قربانی دے پشُوبےپاپ ہوندے سن ۔ تے جد پاپی خُدا نوں قربانیاں چڑھاؤندے سن ، تاں اوہناں نوں خُدا دے اگے بے پاپ پشُوآں نوں لیاؤنا پکی گل ہوندی سی تے صرف ایہناں بے پاپ پشُوآں دے سِراں اُتے اوہناں دے ہتھ رکھن دے راہیں اوہناں دے پاپ اوہناں اُتے لدے جاند ے سن ۔ ایس طرح ، کجھ وی نئیں چھڈیا جا سکدا سی جد قربانی دا پشُو چڑھایا جاندا سی ۔
عام طریقے نال ، پاپ کرن والے بندے نوں اپنے قربانی دے پشُو دے سِر اُتے اپنیاں ہتھاں نوں رکھنا پیندا سی ، پر جد اسرائیل دے ساریاں لوکاں نیں پا پ کیتا ، ایہدے آگُو وڈیرے قربانی دے پشُو اُتے اپنیاں ہتھاں نوں رکھدے سن (احبار ۴ : ۱۵)۔ لازمی،قربانی دے پشُو نوں جیہدے سِر اُتے ہتھ رکھے جاندے سن ایہدا گل وڈن تے ایہدا لہو کڈھن دے راہیں ذبح ہونا پیندا سی ۔ تےاخیریں،ایہنوں قربانگاہ اُتے ساڑناپینداسی۔
ایس لئی سڑدے ہوئے گوشت ، چربی تے لکڑ دا دُھوں سدا سوختنی قربانی دی قربانگاہ دے آلے دوالے دی تھاں اُتے بھریارہندا سی ، تے ایہدے سنگ تے ایہدے ہیٹھاں دی تھاں ساری قربانی دے پشُوآں دے لہو نال بھجی رہندی سی ۔ سوختنی قربانی دی قربانگاہ پاپ توں معافی دی تھاں سی جتھے اسرائیلیاں دیاں پاپا ں نوں صاف کرن لئی خُدا نوں قربانی دے پشُو چڑھائے جاندے سن ۔
سوختنی قربانی دی قربانگاہ ،جتھے دُھوں کدی اُٹھنوں نا رُکیا ، کاچھ وچ دونویں لمائی تے چوڑائی وچ ۲۵.۲ میٹر(۵.۷فٹ) مربع نما،تے اُچیائی وچ۳۵.۱ میٹر(۵.۴ فٹ)سی۔ پِتل دی جالی دی اک انگیٹھی ایہدے وچکار رکھی گئی سی تے دُھوں لگاتار قربانیاں وچوں اُٹھدا سی جیہڑیاں ایس انگیٹھی اُتے لکڑدی اگ نال بالیاں جاندیاں سن ۔ ایس طرح ، اوہ تھاں جھتے قربانیاں بالیاں جاندیاں سن تے خُدا نوں چڑھائیاں جاندیاں سن سوختنی قربانی دی قربانگاہ سی ۔
سوختنی قربانی دی قربانگاہ دے سارے بھانڈے پِتل نال بنے ہوئے سن
سوختنی قربانی دی قربانگاہ دے بھانڈے جیہڑے سواہ نوں ہٹاؤن تے چُکن لئی ورتے جاندے سن اوہ سارے پِتل دے بنے ہوئے سن ۔ سوختنی قربانی دی قربانگاہ آپ وی پِتل نال مَڑھی ہوئی کِکر دی لکڑ نال بنائی گئی سی تے ایسے طرح قربانگاہ تے اوہدے بھانڈے سارے پِتل دے بنے ہوئے سن ۔
سوختنی قربانی دی قربانگاہ دا ایہہ پِتل اک خاص رُوحانی مطلب رکھدا اے ۔ پِتل دا مطلب خُدا دے اگے پاپ دی عدالت اے ۔ ایس طرح ، سوختنی قربانی دی قربانگاہ اک ایہو جیہی تھاں اے جیہڑی سانوں واضح طریقے نال وکھاؤندی اے پئی پاپیاں نیں اپنیاں پاپاں لئی لازمی سزا پاؤنی اے ۔ خُدا ناکامیوں بغیرلوکاں نوں اوہناں دے پاپاں لئی لازمی جرم وار ٹھہرائے گا ۔ اوہ تھاں جتھے قربانی دے پشُو کفارے لئی پاپیاں بدلے ساڑن دے راہیں سزا پاؤندے سن ایہہ سوختنی قربانی دی قربانگاہ سی ، تے قربانگاہ اپنے آپ تے ایہدے سارے بھانڈے پِتل دے بنے سن ؛ ایس طرح ، ایہہ شیواں سانوں دسدیاں نیں پئی ہر پاپ دی کامل یقین نال ایہدی سزا ضروری اے ۔
قربانگاہ سانوں وکھاؤندی اے پئی اپنےپاپاں دے سببوں ، لوک لعنتی ٹھہرائے جان تے موت دے حوالے کیتے جان دے حقدار نیں ، پر سوختنی قربانی دی قربانگاہ اُتے اپنا قربانی دا پشُو لیاؤن تے ایہنوں خُدا نوں دین دے راہیں ، اوہ اپنے پاپاں توں دُھل سکدے نیں ، پاپ دی معافی پا سکدے نیں ،تے اِنج فیر زندہ رہ سکدے نیں ۔ ایتھے اوہ قربانیاں جیہڑیاں سوختنی قربانیاں دی قربانگاہ اُتے چڑھائیاں جاندیاں سن ساریاں سانوں دسدیاں نیں پئی یِسُوعؔ مسیح دا بپتسمہ ،تے اوہدا لہو وگاؤنا ایمانداراں دے پاپاں نوں معا ف کر چُکیا اے ۔ ایس لئی ایہہ ایمان جنہے سوختنی قربانی دی قربانگاہ اُتے قربانی دا پشُو چاہڑیا اوہ نویں عہد نامے دے زمانے وچ یِسُوعؔ مسیح دےبپتسمے تے لہو اُتے ایمان دےطوراُتے جاری رہندا اے ۔
جد اسیں یِسُوعؔ مسیح اُتے اپنے مکتی داتا وانگر ایمان رکھدے آں ،سانوں لازمی اپنا ایمان خُدا اُتے رکھنا چاہی دا اے جیہڑا یِسُوعؔ دے بپتسمے تے اوہدے لہو اُتے ساڈے پاپ توں معافی اُتے ایمان رکھدااے ۔ پُرانے عہد نامے وچ ، ایہہ ایمان اوس ایمان نال مِلدا اے جیہڑا اسمانی ، ارغوانی تے لال دھاگے تے مہین وٹے ہوئے کتان نال اُنے گئے خیمۂ اجتماع دے برانڈے دے پھاٹک وچ کھُلدا تے اندر جاندا اے ۔
ساریاں قربانیاں جیہڑیاں سوختنی قربانی دی قربانگاہ اُتے چاہڑیاں جاندیاں سن اوہ یِسُوعؔ مسیح نوں ظاہر کردیاں نیں
یِسُوعؔ مسیح نے کیہ کیتا جد اوہ ایس زمین اُتے آیا؟ اسیں پاپی ساں ؛اسیں خُدا دے خلاف پاپ کر چُکے ساں تے اوہدی شریعت تے حکماں نوں توڑچُکے ساں ۔ پر ساڈے ایہناں ساریاں پاپاں نوں مکاؤن لئی یِسُوعؔ مسیح نے یوحنا کولوں بپتسمہ لیا تے جگ دے پاپاں نوں اپنے اُتے چُک لیا ، تے اِنج سولی اُتے اپنا لہو وگایا ۔ بالکل جویں قربانی دا پشُو ایس اُتے ہتھاں دے رکھے جان نال لدے گئے اسرائیلیاں دے پاپاں نوں چُکدا سی ،تے اِنج ذبح کیتا جاندا تے سوختنی قربانی دی قربانگاہ اُتے ساڑیا جاندا سی ، ایس لئی پئی یِسُوعؔ مسیح ایس زمین اُتے بے پاپ قربانی دے لیلے وانگر آیا تے بپتسمہ لیا ، فیر اوہنے سولی اُتے اپنا قربانی دا لہووگایا تے ساڈی تھاں اُتے ایس اُتے مر گیا ۔ دونویں اپنیاں ہتھاں تے پیراں اُتے کِل ٹھوکے جان تے اپنا لہو وگاؤن دے راہیں ، ساڈے خُداوند نے ساڈیاں پاپاں دی سزا دی تھاں اُتے ، ساڈے بدلے ساریاں پاپاں دی سزا نوں جریا ۔ ایس طرح ، اوہ سانوں ساڈیاں ساریاں پاپاں تے لعنت توں بچا چُکیا اے ۔
یِسُوعؔ مسیح نے جیہڑا ایس سوختنی قربانی دی قربانگاہ دا اصل جوہر بن گیا اے ، جد اوہ ایس زمین اُتے آیا کیہ کیتا ؟ یِسُوعؔ مسیح سانوں اپنے بپتسمے نال اپنے آپ اُتے ساڈے سارے پاپ چُکن ، سولی اُتے چڑھن تے سولی اُتے مرن تے فیر مویاں وچوں جیوں اُٹھن دے راہیں بچا چُکیا اے ۔ ساڈا خُداوند ایس زمین اُتے آیا ، ساڈی لازمی مکتی کامل کیتی تے فیر اسمانی بادشاہی اُتے چلا گیا ۔
اسیں جیہڑے بچ نئیں سکدے سگو ں ہر روز پاپ کردے آں
سوختنی قربانی دی قربانگاہ دا اک دوجا مطلب وی اے ، جیہڑا ”چڑھنا“ اے ۔ سچیائی دے اک معاملے وانگر تُسیں تے مَیں ہر روز پا پ کردے آں ۔ ایس لئی ،سانوں سدا خُدا اگے اپنا قربانی دا پشُو چڑھاؤنا پیندا اے ،تے ایہدے سببوں ، ساڈیاں پاپاں دی سزا دا دُھوں سدا خُدا ول چڑھدا پیا اے ۔کیہ کوئی ایہو جیہا دن وی اے جد تُسیں پاپ نئیں کردے سگوں کامل طریقے نال رہندے او ؟ اسرائیلیاں دے قربانیاں دے پشُو لگاتا ر دتے جاندے سن ایتھوں تیک پئی کاہن ایہہ قربانیاں چڑھا کے بوہت چوکھے تھک جاندے سن جیہڑیاں اسرائیلیاں دے بے گنت پاپاں نوں معاف کردیاں سن تے ہور اوہناں نوں نئیں دتا جاسکدا سی ۔ ایس لئی پئی اسرائیلیاں نیں شریعت نوں توڑیاتے ہر روز خُدا دے خلاف پاپ کیتا ، اوہناں نوں ہر روز اپنیاں قربانیاں دے پشُو دینے پیندے سن ۔
موسیٰ نے ، اسرائیل دا آگُو ہوندیاں ہویاں ، اسرائیلیاں دے اگے شریعت دے ۶۱۳ قانون تے خُدا دیاں حکماں دا اعلان کیتا : ”سو ہُن جے تُسیں میری گل منو تے میرے حکم اُتے چلو تاں ساریاں قوماں وچوں تُسی ای میری خاص مِلکیت ٹھہرو گےایس لئی پئی ساری دھرتی میری اے ۔ تے تُسیں میرے لئی کاہناں دا اک ملک تے پاک قوم ہوووگے ۔“(خروج ۱۹ : ۵ ۔ ۶)۔
فیر اسرائیلیاں نیں وعدہ کیتا ، ”جو کُجھ خُداوند نے فرمایا اے اوہ سارا اسیں کراں گے ۔ “(خروج ۱۹ : ۸)۔ایس لئی اسرائیلیاں نیں پچھانیا تےایس خُدا اُتے ایمان رکھنا چاہیا جیہڑا موسیٰ اگے ظاہر ہویا تے اوہناں دے سچے خُدا وانگر اوہدے راہیں اوہناں نال گل کیتی ،تے اوہناں نیں خُدا کولوں اپنی راکھی چاہی ۔جیہڑا کُجھ خُدا نے اوہناں نوں آکھیا سی اوہنوں چالو رکھدیاں ہویاں ، اوہ نا صرف اوہدے خاص ملکیت بننا چاؤہندے سن ،سگوں کاہناں دا ملک تے اک پاک قوم وی جیہڑی خُدا نال رشتہ رکھدی سی ۔ ایس طرح ، اوہناں نیں خُدا دیاں ساریاں حکماں نوں قیم رکھن دی کوشش کیتی جیہڑے اوہ اوہناں نوں دے چُکیا سی ۔
کیہ خُدا نوں پہلوں ای پتہ سی پئی اسرائیلی پاپ کرن گے ؟ لازمی اوہنوں پتہ سی ۔ ایہو ای سبب اے پئی خُدا نے موسیٰ نوں سیِنا پہاڑ اُتے بلایا ، اوہنوں رویا وچ خیمۂ اجتماع وکھایا ، ایہدی شکل تفصیل نال واضح کیتی ، اوہنوں بناؤن لئی آکھیا ،تے ایہدے مطابق ایہنوں بنوایا ۔ تے اوہنے قربانی دا طریقہ وی قائم کیتا جیہدے راہیں ایس خیمۂ اجتماع وچ قربانیاں چڑھائیاں جاندیاں سن ۔
جد اسرائیلیاں نیں خُدا اگے پاپ دی قربانی دینی چاہی ، اوہناں نوں اک بے پاپ بلد ، بھیڈ ، بکری ،لالی یا کبوتر لیاؤنا پیندا سی ؛ تے کُجھ منع کیتیاں ہویاں شیواں نوں چھڈ کے ،اوہناں نوں اپنی قربانی دے پشُو اُتے ایہدے سِر اُتے اپنیاں ہتھاں نوں رکھن دے راہیں اپنیاں پاپاں نوں لدن دا پکا یقین کرنا پیندا سی (احبار ۱: ۱۔۴)۔تے فیر اوہ اوہدا گل وڈ کے اوہدا لہو کڈھدے تے ایس لہو نوں کاہناں نوں دیندے ۔اوہناں دے کاہن فیر ایس لہو نوں لیندے ، ایہنوں سوختنی قربانی دی قربانگاہ دیاں سنگاں اُتے لاؤندے ، باقی لہو نوں زمین اُتے ڈوہلدے قربانی دے پشُو نوں ٹوٹے ٹوٹے وہڈدے ، ایہناں ٹوٹیاں نوں قربانگاہ اُتے رکھدے ، تے اوہناں نوں ساڑن دے راہیں خُدا اگے چڑھاؤندے سن ۔
ایس طرح اسرائیلی اپنیاں پاپاں توں معاف ہو سکدے سن ۔ جد قربانی ساڑی جاندی سی ، اوہناں نوں نا صرف اوہدا گوشت ساڑنا پیندا سی ، سگوں ایہدی کھل نوں وی لاؤہنا پیندا تے اوہدی ساری چربی نوں اوجری تے جگر سمیت ساڑنا پیندا سی ۔ ایس طریقے نال ، خُدا اسرائیلیاں دے پاپاں نوں معاف کردا سی ۔
ساریاں پاپاں توں معافی پاؤن دا اِکو طریقہ
جد اسیں اپنے آپ نوں ویکھدے آں ، اسیں سارے اصل وچ پچھان سکدے آں پئی اسیں ہر ویلے پاپ کرن توں سوا کُجھ نئیں کر سکدے ۔اسیں اپنیاں زندگیاں سدا پاپ کردیاں ہویاں بسر کردے آں ۔ اسیں وکھ وکھ طریقیاں نال بے گنت پاپ کردے آں ، بھاویں ایہہ ایس لئی اے پئی اسیں ماڑے آں ، بوہت عیبی آں ، یا بوہت لالچی آں ، یا بوہت تگڑے آں ۔ ایتھوں تیک پئی اوہناں وچکار جیہڑے یِسُوعؔ اُتے اپنےمکتی داتا وانگر ایمان رکھدے نیں ، کوئی وی اِنج دا نئیں ہیگا جیہڑا پاپ نہ کردا ہوئے ۔
ساڈے لئی جیہڑے سدا ایس طریقے نال پاپ کردے آں ایتھو ں تیک پئی اسیں خُدا اُتے ایمان رکھدے آں ، ایہناں پاپاں توں معافی پاؤن تے مکتی یافتہ ہون لئی اِکو طریقہ یِسُوعؔ مسیح دے بپتسمے اُتے ایمان رکھنا اے ۔ اوہ آپ ای خُدا اے جیہڑا پانی تے لہو دے راہیں آیا (۱۔یوحنا ۵: ۶)؛اوہ ایس زمین اُتے اسمانی ،ارغوانی تے لال دھاگے تے مہین وٹے ہوئے کتان دے راہیں سوختنی قربانی دی قربانگاہ دے قربانی دے لیلے وانگر آیا ۔جد اوس یِسُوعؔ نے ساڈیاں پاپاں نوں بپتسمہ لین دے راہیں اپنےآپ اُتے چُک لیا تے سولی اُتے اپنا لہو وگاؤن تے ایس اُتے مرن دے راہیں ساڈیاں پاپاں دا مُل اُتار دتا ، تاں اسیں کویں ایمان دے راہیں پاپ توں معافی پا نئیں سکدے ؟ ساڈے مسیحا یِسُوعؔ مسیح دی مکتی دے سببوں ، ایمان دے راہیں تُسیں تے مَیں اِکو ای وار سدا لئی اپنیاں پاپ د ی معافی پا سکدے آں ۔
بھاویں اسیں بِنا شک سدا پاپ کردے آں ۔ بپتسمے دی مکتی تے لہو دے سببوں جیہڑی یِسُوعؔ مسیح نے پوری کیتی جد اوہ ایس زمین اُتے آیا ، اسیں اپنیاں ساریاں پاپاں توں چھُٹ سکدے آں ۔ ساڈے خُداوند نے اپنے بپتسمے نال اپنے آپ اُتے ساڈیاں پاپاں نوں چُک لیا ، دُنیا دے پاپاں نوں سولی اُتے لَے گیا تے سولی اُتے چڑھ گیا تے اِنج سانوں ساڈیاں پاپاں توں کامل طریقے نال چھڈا چُکیا اے ۔ ساڈیاں پاپاں لئی بپتسمہ لین ، اپنے سولی اُتے چڑھن نال ، ساڈیاں ساریاں پاپاں دی سزا جرن تے فیر مویاں وچوں جیوں اُٹھن دے راہیں ،اوہ سانوں کامل طریقے نال بچا چُکیا اے جیہڑے ایس سچیائی اُتے ایمان رکھدے آں ۔ بھاویں اسیں بچ نئیں سکدے ساں سگوں اپنیاں پاپاں لئی لعنتی ٹھہرائے جاندے ، مکتی دی محبت تے فضل دے سببوں جیہڑی یِسُوعؔ سانوں اسمانی ،ارغوانی تے لال دھاگے دے راہیں دے چُکیا اے ، تُسیں تے مَیں ایمان دے راہیں مکتی یافتہ ہو گئےآں ۔ دوجیاں اکھراں وچ ، خُدا سانوں ساڈیاں پاپاں توں بچا چُکیا اے ۔ ایہہ اوس اُتے ایمان رکھن دے راہیں اے پئی اسیں اپنیاں ساریاں پاپاں توں چھڈائے گئے آں ۔ ایہہ ہے سوختنی قربانی دی قربانگاہ سانوں کیہ وکھاؤندی پئی اے ۔
تُسیں خورے سوچ سکدے او پئی خیمۂ اجتماع دے اندر ہرشے سوہنی سی ، پر جے تُسیں سچ مُچ ایہدے برانڈے وچ گئے ہوندے ، تاں تُسیں اک اچرج تے ناپسند نظارے نوں ویکھو گے ۔ سوختنی قربانی دی پِتل دی قربانگاہ ، اک مستطیل نما شکل وچ ،ہرویلے دُھوں تے اگ نوں باہر کڈھدیاں ہویاں ڈراؤندی پئی ہوئے گی ۔ پِتل دی قربانگاہ پاپیاں لئی اُڈیکدی پئی ہوئے گی ، ایہدی زمین لہو نال بھجی ہوئی ہوئے گی ،تے کوئی وی احساس کرے گا پئی ایہہ پاپ دی سزا دی تھاں سی ۔ ایس لئی پئی ایہہ تھاں اوہ تھاں سی جتھے ہر روز قربانی دے پشُو چاہڑے جاندے سن ، تُسیں سڑدے ہوئے گوشت تے لکڑدی بو وچ پھس جاؤ گے ۔
سوختنی قربانی دی قربانگاہ دے ہیٹھاں لہو اک دریا وانگر وگدا پیا ہوئے گا ۔ جد کدی اسرائیلیاں نیں پاپ کیتا اوہ خیمۂ اجتماع وچ اپنا قربانی دا پشُو لیاؤندے ، ایس اُتے اپنیاں ہتھاں نوں رکھن دے راہیں اپنیاں پاپاں نوں لد دے ، ایہدا گل وڈدے ایہدا لہو کڈھدے تے ایہہ لہو کاہناں نوں دیندے سن ۔ فیر کاہن ایہہ لہو سوختنی قربانی دی قربانگاہ دیاں سنگاں اُتے لاؤندے تے باقی زمین اُتے ڈوہل دیندے سن ۔
فیر اوی قربانی نوں ٹوٹے ٹوٹے کردے تے ایہدیاں گُردیاں تے چربی نال ، ایہدا گوشت انگیٹھی اُتے رکھدے تے اوہناں نوں ساڑدے ۔ جد لہو کڈھ لیا جاندا تاں ایہہ پہلوں تاں بالکل ، لال رنگ دا وگدا ہویا مائع اے ۔پر کُجھ دیر بعدوں ، ایہہ سُک جانداتے لیسلا ہو جاندا ۔ جے تُسیں سچ مُچ خیمۂ اجتماع وچ جاندے ، تاں تُسیں ایس ڈراؤنے لہو نوں ویکھ چُکے ہوندے ۔
جد وی اسرائیلیاں نیں خُدا دیاں حکماں نوں توڑیا سوختنی قربانی دی قربانگاہ د ے راہیں ، اوہناں نیں منیا پئی اوہناں نیں قربانگاہ اُتے اپنی قربانی د یاں پشُوآں وانگر مرنا سی ۔کیوں ؟ ایس لئی پئی خُدا نے اپنا وعدہ اوہناں نال لہو نال بنھیا سی ۔ ”جے تُسیں میری شریعت نوں منو گے ، تاں تُسیں میرے لوک تے کاہناں دا ملک بن جاؤگے ، پر جے تُسیں ایس اُتے عمل کرن وچ ناکام رہے تاں تہانوں لازمی ایہناں قربانی دیاں پشُوآں وانگر جیہڑے مارے جاندے نیں مرنا چاہی دا اے ۔ “ اِنج خُدا نے لہو نال اپنا وعدہ بنھیا ۔ ایس طرح ، اسرائیلیاں نیں ایہنوں اک دتی گئی سچیائی وانگر قبول کیتا پئی جے اوہ پاپ کردے نیں تے شریعت نوں توڑدے نیں ، اوہناں نیں اپنا لہو وگاؤنا سی ۔
سچیائی دے اک معاملے وانگر ، ناصرف اسرائیلی ، سگوں خُدا اُتے ایمان رکھن والیاں نوں وی اپنیاں پاپا ں لئی سارا قربانی دا لہو دینا چاہی دا اے ۔ ایہہ سانوں وکھاؤندا اے پئی کوئی وی جیہڑا خُدا دے اگے پاپ کردا اے تے ایس لئی اپنے دل وچ پاپ رکھدا اے ،بھاویں اوہ کناں ای نِکا ہوئے یاوڈا ، ایہدے نتیجے وانگر ایس پاپ دی سزا نوں جرنا چاہی دا اے ۔ بھاویں شریعت دی عدالت —یعنی پاپ دی مزدوری موت اے — خُدا دے اگے ہر اک اُتے لاگُو ہوندی اے ، پر بوہت سارے لوک ایہو جیہے نئیں ہیگے جیہڑے اصل وچ خُدا دی کچہری توں ڈردے نیں تے اِنج اپنے آپ نوں اوہدے قربانی دے طریقے وچ وکھائی گئی خُدا دی مکتی دی شریعت نال جوڑن دی کوشش کردے نیں
سوختنی قربانی دی قربانگاہ سانو ں دسدی اے پئی شریعت دے مطابق جیہڑی پاپ دی مزدوری نوں موت وانگر مقرر کردی اے ، یِسُوعؔ مسیح سانوں خیمۂ اجتماع دے برانڈے دے پھاٹک وچ وکھائے گئے اسمانی ، ارغوانی ، تے لال دھاگے تے مہین وٹے ہوئے کتان دے راہیں ساڈیاں پاپاں تے سزا توں بچاچُکیا اے ۔ ساڈے لئی جیہڑے سدا پاپ کردے آں تے ساڈیاں پاپاں لئی لازمی لعنتی ٹھہرایا جانا چاہی دا اے ، مسیح اک بندے دے بدن وچ ایس زمین اُتے آیا ، ساڈے انسانی پیِڑھی دیاں ساریاں پاپاں نوں یوحنا کولوں بپتسمہ لین دے راہیں اپنے پِنڈے اُتے چُک لیا ، دُنیا دے ایہناں پاپاں نوں سولی اُتے لَے گیا ، سولی اُتے چڑھ گیا تے ایس اُتے اپنا لہو وگایا ، ڈاہڈے دکھ دے تکلیفاں جریاں ، اپنے آپ نوں قربان کیتا ، تے اِنج تہانوں تے مینوں ساڈیاں ساریاں پاپاں توں بچا چُکیا اے ۔
ایہہ ایس لئی اے پئی مسیح نے اپنا پِنڈا قربان کیتا تے اِنج سانوں بچا چُکیا اے یعنی تُسیں تے مَیں ایمان دے راہیں اپنیاں ساریاں پاپاں توں چھڈائے جاسکدے آں ۔ دوجیاں اکھراں وچ ، اوہناں بدلے جیہڑے اپنیاں پاپاں دے سببوں مرن توں بچ نئیں سکدے سن ، یِسُوعؔ مسیح نے اپنے بپتسمے نال اپنے آپ اُتے اوہناں دیاں ساریاں پاپاں نوں چُک لیا ، مرن تیک سولی اُتے رہیا ، فیر مویاں وچوں جیوں اُٹھیا تے اِنج اوہناں نوں اوہناں دیاں ساریاں پاپاں تے سزا توں بچا چُکیا اے ۔
جد اسیں سوختنی قربانی دی ایس قربانگاہ نوں ویکھدے آں تاں ، اسیں ایہہ ایمان رکھن لئی آؤندے آں ۔ ایہہ ویکھدے ہویاں پئی قربانی دا پشُو ہر ویلے قربانگاہ اُتے دتا جاندا سی ، اسیں احساس کر سکدے تے ایمان رکھد سکدے آں پئی بھاویں ایہہ اسیں آں جنہاں نوں ساڈیاں ہر روز دے پاپاں دے سببوں مرنا اے ، خُدا نے سانوں اپنیاں قربانی دیاں پشُوآں وچ نئیں بدلیا ، سگوں ساڈی تھاں اُتے ساڈا خُداوند اپنے آپ ایس زمین اُتے آیا تے ساڈی مکتی پوری کیتی ۔ بپتسمہ لین ، سولی اُتے اپنا لہو وگاؤن تے فیر مویاں وچوں جیوں اُٹھن دے راہیں یِسُوعؔ سانوں بچا چُکیا اے ۔
ایہو ای سبب اے پئی خُدا باپ نے اوہناں نوں پاپ کرن توں لعنتی ٹھہران دی بجائے اسرائیلیاں دے قربانی دے پشُو نوں قبول کیتا تے اوہناں دیاں ساریاں پاپاں نوں معاف کیتا ۔ اسرائیلیاں نوں اپنی قربانی دے پشُو اُتے ایہدے سِر اُتے اپنیاں ہتھاں نوں رکھن دے راہیں اپنیاں پاپاں نوں لدن دے لائق بناؤن دے راہیں ،تے اوہناں نوں ایہناں دی تھاں اُتے ذبح کرن دے راہیں تے اوہدا لہو ، گوشت تے چربی چڑھاؤن دے راہیں ، خُدا اسرائیلیاں دے پاپاں نوں دھو چُکیا اے ۔ ایہہ خُدا دے فضل تے اوہدی محبت توں علاوہ کُجھ ہور نئیں سی ۔
خُدا ساڈے نال صرف شریعت دے راہیں نئیں نبڑیا
جے خُدا نے مینوں تے تہانوں ، تے ساریاں اسرائیلیاں نوں صرف اپنی شریعت دے مطابق سزا دینی سی تاں ، فیر کنے لوک ایس زمین اُتے زندہ رہن گے ؟ جے خُدا سانوں صرف اپنی شریعت دے راہیں کچھدا تے سزا دیندا اے ، تاں ساڈے وچوں کوئی اک دن وی زندہ نئیں رہے گا ۔ ساڈے وچوں بوہتے لوک ایتھوں تیک پئی چویہہ گھنٹیاں لئی وی باقی نئیں رہن گے ، سگوں صرف تھوڑیاں منٹاں وچ مرجان گے ۔ ساڈے وچوں کُجھ صرف اک گھنٹے وچ مر سکدے نیں جد پئی دوجے خورے دساں گھنٹیاں لئی زندہ رہ سکدے نیں ، پر فرق تھوڑا ای اے— کسے وی طرح ، اسیں سارے مرن دے حقدار ہوواں گے ۔ لوک ۶۰ ، ۷۰، ۸۰ تے ایتھوں تیک پئی ایس توں وی اگے تیک زندہ رہن دے لائق نئیں ہون گے ۔ کُجھ ای چر پِچھوں ہر کوئی لعنتی ٹھہرایا جائے گا ۔
سوچو ایس صبح کیہ واقع ہویا ۔تہاڈا پُتر ساری رات پارٹی وچ رہن دے بعدوں ہُن وی بستر ے توں باہر نکلن دی کوشش کردا پیا اے ۔ تہاڈی زنانی اوہنوں جگاؤن دی کوشش کردی پئی اے ۔ اخیریں اک رولا ودھدا اے ، تہاڈا پُتر اپنی ماں نال اوہنوں جگاؤن لئی رولا پاؤندا اے ، تے تہاڈی زنانی تہاڈے پُتر نال اوہدے رولا پاؤن اُتے رولا پاؤندی پئی اے —تے اِنج سرگی ویلے جھگڑا شروع ہوندا اے ۔ اخیریں ، ایتھے ماں تے پُتر دونویں ای خُدا دے اگے پاپ کردے نیں ، تے ایہناں وچوں کوئی وی اج تیک زندہ نئیں رہے گا ، ایس لئی پئی اوہ دونویں ایس پاپ لئی سزایافتہ ہون گے ۔
پر خُداساڈے نال صرف اپنی جائز شریعت نال نئیں نبڑیااے ۔ ”اوہنے ساڈیاں پاپاں دے مطابق ساڈے نال سلوک نئیں کیتا تے ساڈیاں بدکاریاں دے مطابق سانوں بدلہ نئیں دتا“(زبور ۱۰۳ : ۱۰)۔
سانوں راستباز شریعت دےراہیں سزادین توں بوہت دُور ، خُدا نے ایہدی بجائے ، ایس راستباز شریعت نوں پورا کرن لئی قربانی دے پشُو نوں تیار کیتا جیہڑا ساڈی تھاں لوے گا ۔ ایس قربانی دے پشُو اُتے ساڈیاں پاپاں نوں ایس اُتے ساڈیاں ہتھاں دے رکھے جان نال لدن دے لائق بناؤن دے راہیں ،تے سانوں ساڈی اپنی زندگی دی بجائے ایس قربانی دالہو اوہنوں دین دے لائق بناؤن دے راہیں ، خُداساڈی اپنی زندگی دی بجائے قربانی دے پشُو دی زندگی نوں قبول کر چُکیا اے، تے انسانی پیِڑھی دے ساریاں پاپاں نوں معاف کر چُکیا اے ، نال ای ساڈے تے بنی اسرائیل دے ،تے سانوں اوہناں ساریاں توں بچا چُکیا اے تے سانوں فیر زندہ رہن دے لائق کر چُکیا اے ۔ تے ایمانداراں نوں اوہناں دیاں پاپاں توں بچاؤن دے راہیں ، خُدا اوہناں نوں اپنے ذاتی لوک بنا چُکیا اے ۔ ایس طرح خُدا نے اسرائیلیاں نوں خُدا دے ملک دے کاہن بنایا ۔
ایتھے قربانی دے لیلے دا مطلب یِسُوعؔ مسیح توں علاوہ کوئی دوجا نئیں ہیگا ۔ ساڈیاں پاپاں دے سببوں ، یِسُوعؔ مسیح قربانی دا ایہہ لیلا بن گیا ،تے سانوں بچاؤن لئی جیہڑا پاپ دی سزا نوں جر چُکیا سی ، اوہنے اپنے بپتسمے نال اپنے آپ اُتے ساڈیاں ساریاں پاپاں نوں چُک لیا ، اپنا لہو وگایا تے سولی اُتے مرگیا ۔سانوں ساڈیاں پاپاں توں بچاؤن لئی ، خُدا دا اِکو اِک پُتر اک بندے دے بدن وچ ایس زمین اُتے آیا تے اپنے بپتسمے دے راہیں قربانی دا لیلا بن گیا ، ایہہ سارا کُجھ باپ دی مرضی نوں منن وچ اے ۔ یوحنا کولوں لَئے گئے اپنے بپتسمے نال اپنے آپ اُتے انسانی پیِڑھی دے پاپاں نوں چُکن دے راہیں ، سولی تیک دُنیا دے ایہناں پاپاں نوں لَے جان ، سولی اُتے چڑھن ، اپنا لہو وگاؤن تے اِنج اپنے آپ نوں قربان کرن دے راہیں،تے مرن تے فیر مویاں وچوں جیوں اُٹھن دے راہیں ، یسو ع تہانوں تے مینوں کامل طریقے نال بچا چُکیا اے ۔
جد اسیں مکتی دا کلام سانوں اِنج دسدیاں ہویاں سُن دے آں پئی یِسُوعؔ نے ، ساڈی تھاں اُتے ، بپتسمہ لیا ، سولی اُتے چڑھیا تے تِناں دناں پِچھوں فیر مویاں وچوں جیوں اُٹھیا ؛ تاں ساڈے دلاں اُتے بوہت اثر ہوندا اے ۔ ایس لئی پئی اوہ جیہڑا بے پاپ سی اوہنے ، ساڈی تھاں اُتے بپتسمہ لیا جنہے اوس اُتے ساریاں پاپاں نوں لدیا ،تے ایہناں پاپاں دے مُل وانگر ، اوہنے ہر طرح دے دُکھڑے ، ظلم ، پیِڑ ، تکلیف تے اخیریں موت نوں جریا ، جیہڑا سارا پہلوں ساڈے نال ہونا چاہی دا سی ۔ جد یِسُوعؔ اِنج سانوں ساڈیاں پاپاں توں بچا چُکیا اے ، تاں ایس سچیائی اُتے ایمان نا رکھن توں ودھ کے ہورکوئی بدنیتی نئیں ہو سکدی ۔
سانوں لازمی اسمانی ، ارغوانی تے لال دھاگے دے راہیں پوری کیتی گئی مکتی اُتے ایمان رکھنا چاہی دا اے
لوک ہیگے نیں جیہڑے ایس فضل دا احساس نئیں کر سکدے تے اوہدا بالکل وی شکر ادا نئیں کردے ۔
یِسُوعؔ مسیح ، خُدا دا پُتر ، ایس زمین اُتے آیا تے ساڈے لئی قربانی دا لیلا بن گیا ۔ اوہنے ساڈے سارے پاپ اپنے بپتسمے نال اپنے آپ دےجثے اُتے قبول کیتے تے سولی اُتے پِنڈا چاھڑن دے راہیں اپنے آپ نوں قربان کیتا ۔ اوہنوں چنڈاں ماریاں گئیاں ،ننگا کر دتا گیا ، ستایا گیا تے ظلم کیتا گیا ، ایہہ سارا کُجھ ساڈے لئی سی ۔ ایس طرح اوہ سانوں بچا چُکیا اے ۔ ایس سچیائی اُتے ایمان رکھن دے راہیں ای اسیں خُدا دے پُتر بن گئے آں ۔ ایہہ ساریاں توں وڈا خُدا ئی تعلیم اے، ایہہ ویکھ کے مینوں ڈاہڈا دکھ ہوندا اے پئی بوہت سارے لوک ایہنوں سُنن دے بعدوں وی ایمان نئیں رکھدے تے اوہدا شکریہ ادا نئیں کردے ۔
ایہہ ایس لئی اے پئی یِسُوعؔ ایس زمین اُتے آیا ، اپنا بپتسمہ لیا تے اپنے آپ نوں قربان کیتا پئی تُسیں تے مَیں ساڈیاں ساریاں پاپاں توں مکتی یافتہ ہو گئے آں ۔ ایس لئی یسعیاہ ۵۳ : ۵ کہندا اے ۔” ایتھوں تیک پئی اوہ ساڈیاں غلطیاں دے سببوں پھٹٹڑ کیتا گیا تے ساڈی بدکاری دے ہتھوں پھیہا گیا ۔ ساڈی ای خیر لئی اوس اُتے سیاست ہوئی تاں پئی اوہدے مار کھان نال اسیں چنگے ہوئیے۔ “
اسیں اپنیاں ساریاں زندگیاں پاپ کردے رہندے آں ۔ سانوں بچاؤن لئی ، جیہڑے ساڈیاں ساریاں پاپاں دی سزا ، بربادی تے لعنتاں توں بچ نئیں سکدے ساں سگوں لعنتی ہوندے ، ساڈے خُداوند نے اسمانی بادشاہی دا تخت پِچھےچھڈ دتا ، تے سارے راہ ایس زمین اُتے آگئے ۔ اوہنے یوحنا دے اگے اپنا سِر نیواں کیتا تے بپتسمہ لیا ، ایہناں پاپاں نوں سولی اُتے لَے گیا تے بھیڑے طریقے نال دکھ جریا ، تے اپنے دل دا سارا لہو زمین اُتے وگا دتا ،فیر مویاں وچوں جیوں اُٹھیا ، ساڈے لئی قربانی دا لیلا بن گیا ، تے ساڈی مکتی دا سچا خُدا بن گیا اے ۔
کیہ تُسیں ایس سچیائی دے بارے سوچدے او تے ایہنوں اپنے دلاں دیاں خانیاں وچ رکھدے او ؟ جد تُسیں کلام نوں سُن دے او ، تاں صرف ایہو ای ٹھیک اے پئی تہانوں ایمان رکھنا چاہی دا اے تے اپنیاں دلاں وچ چنگی طرح اثر لینا چاہی دا اے پئی یسو ع مسیح سچ مُچ ایس زمین اُتے اک بندے دے بدن وچ آیا ، تے ایہہ پئی اوہنے بپتسمہ لیا ، مرن تیک سولی اُتے رہیا ، تے اپنیاں لوکاں نوں اوہناں دیاں پاپاں توں بچاؤن لئی جیوں اُٹھیا ، جے اسیں احساس کردے آں پئی اسیں سارے دوزخ جان دے لائق ساں تاں ، اسیں اپنے سچے دلوں ایہہ محسوس کر سکدے آں پئی ایہہ مکتی کنی اثر کرن والی تے شکر گزار اے ۔ بھاویں اسیں خُدا اُتے ایمان رکھنا تے اوہدے لوک بننا چاؤہندے ساں ، ساڈے کول ایہنوں لین دا کوئی راہ نئیں سی ۔ پر تہاڈے تے میرے لئی ،جنہاں نیں سچ مُچ اپنیاں پاپاں دی معافی نوں لبھیا ، اوہنے ساڈے نال سچیائی دے کلام نال میل جول رکھیا اے پئی مسیح ایس زمین اُتے آیا بپتسمہ لیا ، سولی اُتے مرگیا تے فیر تِناں دناں بعدوں مویاں وچوں جیوں اُٹھیا ۔
جے ایہہ یِسُوعؔ دی قربانی نئیں سی ، اسیں کویں کدی اپنی مکتی پا سکدے ساں ؟ اسیں کدی نئیں کر سکدے ساں ! جے ایہہ یِسُوعؔ دے بپتسمے تے صلیبی لہو نال نا ہوندا ،تے جے ایہہ خیمۂ اجتماع وچ ظاہر کیتی گئی اسمانی ، ارغوانی تے لال دھاگے تے مہین وٹے ہوئے کتان دی مکتی لئی نہ ہوندا ، تاں مکتی ساڈے لئی صرف گرمیاں دی ادھی رات دا کوئی سُفنا بن گئی ہوندی ۔ جے اوہدی قربانی نا ہوندی تاں ، اسیں کدی اپنیاں پاپاں توں نہ بچ سکدے تے نہ اوہناں دی سزا توں بچدے ، سگوں دوزخ دی ہمیش والی اگ وچ سُٹے جاندے تے ہمیش لئی دکھ جردے ۔ پر مسیح ساڈے بدلے اپنے آپ نوں قربان کرن دے راہیں ، بالکل پُرانے عہد نامے دے قربانی دے لیلے وانگر سانوں بچا چُکیا اے ۔
اسمانی ، ارغوانی تے لال دھاگے دی مکتی نویں عہد نامے وچ پوری کیتی گئی سی
میرے سوہنے کتاباں نوں پڑھن والیو ، تہانوں کدی وی خیمۂ اجتماع لئی ورتے گئے اسمانی ، ارغوانی تے لال دھاگے تے مہین وٹے ہوئے کتان دی سچیائی نوں نئیں بھُلنا چاہی دا ۔ مہین وٹے ہوئے کتان پُرانے تے نویں عہد نامیاں دا کلام اے ، اوہ کلام جیہدا خُدا نے بوہت پہلوں وعدہ کیتا سی پئی اوہ اپنے آپ ساڈے اپنے مکتی داتا وانگر ساڈے کول آئے گا تے اوس وعدے مطابق یِسُوعؔ مسیح ایس زمین اُتے آیا ۔ اسمانی دھاگہ سانوں دسدا اے پئی مسیح نے ، ایس زمین اُتے آکے ، اپنے بپتسمے دے راہیں اپنے آپ اُتے ساڈیاں ساریاں پاپاں نوں چُک لیا ، دوجیاں اکھراں وچ ، اوہنے وعدے دے مطابق بپتسمہ لیا پئی اوہ سانوں ساڈیاں پاپاں توں بچائے گا تے ساڈی سزا توں سانوں چھڈائے گا ۔ ساڈیاں پاپاں نوں تے ایس دُنیا وچ ہر کسے دے پاپاں نوں اپنے آپ اُتے لین لئی ، اوہنے یوحنا کولوں بپتسمہ لیا تے بنِا شک دُنیا دے ساریاں پاپاں نوں جریا ۔ سانوں لازمی ایہنوں کدی نئیں بھُلنا چاہی دا ، ایس لئی پئی جے اسیں بھُل گئے پئی یِسُوعؔ ساڈے قربانی دے لیلے وانگر آیا تے اپنے بپتسمے دے راہیں اپنے آپ اُتے ساڈیاں ساریاں پاپا ں نوں چُک لیا تاں کوئی مکتی نئیں ہوئے گی ۔
بوہتی وار تے بوہت بوہت، اسیں ایس دُنیا وچ اپنے آپ نوں بوہت خاص سمجھدے ہویاں جیندے آں ۔ لوکاں دے دل ایہو جیہے نیں پئی بھاویں اوہ کسے دوجے دے شیخی سُننا نئیں جر سکدے ، پر فیر وی اوہ آپ شیخی مارنا چنگا سمجھدے نیں ۔ پر ایک خاص ویلا آیا جد مَیں اپنے آپ اُتے فخر کرنا نئیں ، سگوں کسے دوجے اُتےفخرکرنا شروع کیتا ، تے ایہہ ویلا سی جد مَیں یِسُوعؔ دا سانوں اسمانی ، ارغوانی تے لال دھاگے تے مہین وٹے ہوئے کتان دے راہیں بچاؤن لئی شکرگزار ہویا ۔ دوجیاں اکھراں وچ ، مَیں یِسُوعؔ اُتے فخر کرن لگیا ۔ ہُن مَیں جنی واری ہو سکے ، دسدا ہاں تے فخرکردا ہاں پئی یِسُوعؔ ایس زمین اُتے آیا سی ؛ پئی ساڈیاں پاپاں نوں مکاؤن لئی ،اوہنے بپتسمہ لین دے راہیں اپنے آپ اُتے ساڈیاں ساریاں پاپاں نوں چُک لیا؛ پئی یِسُوعؔ اپنے بپتسمے دے سببوں سولی اُتےچڑھ سکدا سی ؛ تے ایہہ پئی خُداوند نے سانوں ایس طرح بچایا اے ۔ مَیں ایس سچیائی اُتے فخر کرن ، ایہدی منادی کرن تے خُدا نوں سارا جلال دین وچ سُستی نئیں کردا ۔
اِنج ہوندیاں ہویاں وی بوہت سارے لوک ہیگے نیں جیہڑے پئی یِسُوعؔ اُتے ایمان رکھن دا اقرار کردیاں ہویاں ، اوہدے بپتسمے نوں چھڈدیاں ہویاں کلام دی منادی کردے نیں ، یا صرف اوہدا ناں لَے کے اپنے آپ اُتےفخرکردے نیں ۔ اک جھوٹا خادم سی جیہڑا ایہہ دعویٰ کردا ہوندا سی پئی اوہ اپنی زندگی بسر کرن لئی ہر مہینے صرف ۳۰۰ ڈالر خرچہ کردا سی ۔ بھاویں ایہہ اک وڈا کم سی ، اوہنے ایس گل اُتےفخرکیتا پئی اوہ ہر مہینے صرف ۳۰۰ ڈالر نال گزارہ کر سکدا اے ، تے ایہہ پئی اوہنوں ہو ر پیسے لین دی ضرورت نئیں ایس لئی پئی جد اوہ سفر کردیا پیا ہوئے تاں اوہدے پِچھے چلن والے اوہدے سارے خرچے دیندے نیں ۔ پر کیہ ایمانداراں دے پیسے کسے طرح پیسے نئیں ہیگے ؟ کیہ ایس پیسے دا کسے شے لئی حساب نئیں ، جد پئی اوہدے اپنے پیسے اہمیت رکھدے نیں ؟ ایس مسیحی آگُو نے دعویٰ کیتا پئی جد کدی اوہنوں کسے شے دی ضرورت ہوئے اوہنے صرف دعا ای کرنی سی ۔ ”اے خُدایا ،میرے سفری خرچے دے ! اے خُداوندا، مَیں تیرے اُتے ایمان رکھدا ہاں !“اوہنے گواہی دتی ، ایس دعا نال ، کُجھ پاک لوک اچانک نکلے تے اوہنوں بوہت چوکھے پیسے دے دتے ۔ ایہو جیہے لوکاں نوں ویکھ کے جیہڑے اِنج دیاں گلاں کر دے
نیں جویں ایہہ فخرکرن والیاں شیواں نیں ، تہاڈے ذہن وچ کِس طرح دے خیال آؤندے نیں؟
متی ۳ : ۱۳ ۔ ۱۷ دسدا اے ، ”تد یِسُوعؔ گلیل توں یردن دے کنڈھے یوحنا کول آیا پئی اوہدے ہتھوں بپتسمہ لَئے ۔پر یوحنا اوہنوں ایہہ آکھ کے روکیا پئی مینوں تیتھوں بپتسمہ لین دی لوڑ اے تے تُوں میرے کول آیا ایں ؟ تے یِسُوعؔ اوہنوں جواب دتا۔ حالی تے ہون دے کیوں جو سانوں چاہیدا اے پئی ایسے طرح ساری راستبازی نوں پورا کرئیے ۔ تد اوس ہون دتا ۔ تے یِسُوعؔ بپتسمہ لَے کے جھٹ پانیوں باہر نکل آیا ۔ تے ویکھو اسمان اوہدے لئی کھُل گیا تے اوس خُدا دے رُوح نوں کبوتر وانگوں اُتردیاں تے اپنے اُتے آؤندیاں ویکھیا ۔ تے ویکھو اسماناں توں اِک اواز آئی پئی ایہہ میرا پیارا پُتر اے جس توں مَیں بڑا خوش آں ۔ “ ایہہ حوالہ دسدا اے کیہ واقع ہویا جد یِسُوعؔ نےبپتسمہ لیا ۔ جد یِسُوعؔ نے یردن دے دریا اُتے یوحنا بپتسمہ دین والے کولوں بپتسمہ لیا تے پانیوں باہر آیا ، اسمانی بوہا کھُل گیا تے خُدا باپ د ی اواز سُنی گئی ، ”ایہہ میرا پیارا پُتر اے جس توں مَیں بڑا خوش آں ۔ “ یوحنا بپتسمہ دین والا اوس ویلے حیران ہوگیا سی ۔
یوحنا بپتسمہ دین والا ایس یردن دے دریا اُتے دو واری حیران ہویا سی ۔ اوہ پہلی واری حیران ہویا جد اوہنے ویکھیا پئی یِسُوعؔ اوس ول آیا تے اوہدے توں بپتسمہ لینا چاہیا ، تے اوہ فیر یِسُوعؔ نوں بپتسمہ دین دے بعدوں حیران ہویا جد اسمانی بوہا کھُل گیا تے اِنج آکھدیاں ہویاں خُدا باپ دی اواز سُنی ، ”ایہہ میرا پیارا پُتر اے جس توں مَیں بڑا خوش آں ۔ “
یِسُوعؔ دا یوحنا بپتسمہ دین والے کولوں بپتسمہ لین دا سبب کیہ اے ؟ ایتھے متی ۳ : ۱۵ سانوں جواب دیندا اے ، آؤ اسیں فیر آیت ۱۵ تے ۱۶ نوں پڑھئیے ؛” یِسُوعؔ اوہنوں جواب دتا۔ حالی تے ہون دے کیوں جو سانوں چاہیدا اے پئی ایسے طرح ساری راستبازی نوں پورا کرئیے ۔ تد اوس ہون دتا ۔ تے یِسُوعؔ بپتسمہ لَے کے جھٹ پانیوں باہر نکل آیا ۔ تے ویکھو اسمان اوہدے لئی کھُل گیا تے اوس خُدا دے رُوح نوں کبوتر وانگوں اُتردیاں تے اپنے اُتے آؤندیاں ویکھیا ۔“
متی ۳ : ۱۵سانوں سبب دسدا اے پئی کیوں یِسُوعؔ نے یوحنا بپتسمہ دین والے کولوں بپتسمہ لیا ۔ بھاویں یِسُوعؔ اسمانی بادشاہی دا وڈا کاہن تے خُدا اِکواِک پُتر سی،فیر وی اوہ سانوں ،اپنیاں لوکاں نوں ، ساڈیاں پاپاں توں بچاؤن لئی ایس زمین اُتے آیا ۔ دوجیاں اکھراں وچ ، یِسُوعؔ ایس زمین اُتے قربانی دے لیلے وانگر آیا جیہڑا ایہناں پاپاں نوں اپنے اُتے لین تے ساڈے بدلے سولی اُتے چڑھن دے راہیں ساڈیاں پاپاں دا
مُل اُتاردا اے ۔ ایس لئی یِسُوعؔ نے یوحنا کولوں بپتسمہ لینا چاہیا ۔
پر کیوں یِسُوعؔ نے یوحنا بپتسمہ دین والے توں علاوہ کسے دوجے کولوں بپتسمہ نا لیا ایس لئی پئی یوحنا بپتسمہ دین والا انسانی پیِڑھی دا نمائندہ سی ۔ ایس لئی پئی اوہ زنانیاں وچوں جمن والیاں وچوں سب توں وڈا سی ۔ متی ۱۱:۱۱ کہندا اے ،”جیہڑے عورتاں توں جمے نیں یوحنا بپتسمہ دین والے نالوں وڈا کوئی وی نئیں اُٹھیا۔“ یوحنا بپتسمہ دین والا پُرانے عہد دے زمانے وچ ملاکی دی کتاب وچ پیشین گوئی کیتا گیا خُدا دا خادم سی : ”ویکھو خُداوند دے وڈیرے تے ڈاہڈے دن دے آؤن توں پہلوں مَیں ایلیاہ نبی نوں تہاڈے کول گھلاں گا “(ملاکی ۴ : ۵)۔ یوحنا بپتسمہ دین والا اوہو ای ایلیاہ نبی سی جنہوں خُدا گھلن دا وعدہ کر چُکیا سی ۔
کیوں خُدا نے یوحنا بپتسمہ دین والا نوں ایلیاہ وانگر سدیا ؟ ایلیاہ اک نبی سی جنہے بنی اسرائیل دیاں دلاں نوں خدا ول پھیر دتا ۔ اوس ویلے ، اسرائیلی بعل د ی اپنے خُدا وانگر عبادت کردے پئے سن ، پر ایلیاہ نے اوہناں نوں واضح طریقے نال وکھایا اصلی خُدا کون اے ، کیہ وہ بعل سی یا یہوواہ خُدا سی ۔ اوہ نبی سی جنہے اپنے ایمان نال تے قربانی دے پشُو دے راہیں ، اسرائیلیاں اُتے ثابت کیتا پئی کون اصلی زندہ خُدا سی تے اِنج اوہناں دی جیہڑے بُتاں دی پوجا کردے پئے سن ، واپس سچے خُدا ول اگوائی کیتی ۔ ایہو ای سبب اے پئی پُرانے عہد نامے دے اخیر وچ ، خُدا نے وعدہ کیتا ، ” مَیں ایلیاہ نبی نوں تہاڈے کول گھلاں گا “ایس لئی پئی ساری انسانی پیِڑھی جیہڑی خُدا دے روپ وانگر بنائی گئی سی ، بُتاں دی پوجا تے بدروحاں دی پوجا دے غلط راہ اُتے سن ، خُدا نے آکھیا پئی اوہ اوہناں کول اپنے خادم نوں گھلے گا جیہڑا اوہناں دی خُدا ول اگوائی کرے گا ۔ اک جیہڑا اِنج آئے گا یوحنا بپتسمہ دین والا اے ۔
متی ۱۱: ۱۳۔۱۴ کہندا اے، ”کیوں جو سارے نبی تے توریت وی یوحنا تیکر نبوت کردےآئےسن ۔ تےایلیاہ جیہڑا آؤن والا سی ایہو اے۔ چاہو تے منو ۔ “ ایہہ ایلیاہ جیہڑا آؤن والا اے کوئی ہور نئیں سگوں یوحنا بپتسمہ دین والا اے ۔ آیت ۱۱ ۔ ۱۲ وچ ، اِنج لکھیا ہویا اے ، ”مَیں تہانوں سچ آکھنا آں پئی اوہناں وچوں جیہڑے عورتاں توں جمے نیں یوحنا بپتسمہ دین والے نالوں وڈا کوئی وی نئیں اُٹھیا۔پر جیہڑا اسمان دی بادشاہی وچ نِکا اے اوہ اوہد ے نالوں وڈا اے ۔ تے یوحنا بپتسمہ دین والے دیاں دناں توں لے کے ہُن تیکر اسمان دی بادشاہی اُتے زوراوری ہوندی اے تے زوراور لوک اوہنوں زبردستی مَل لَیندے نیں ۔ “
ایس لئی جد ایتھے ایہہ کیہا گیا اے پئی ” جیہڑے عورتاں توں جمے نیں یوحنا بپتسمہ دین والے نالوں وڈا کوئی وی نئیں اُٹھیا،“ ایہدا مطلب ہیگا اے پئی خُدا نے یوحنا بپتسمہ دین والے نوں انسانی پیِڑھی دے نمائندے وانگر اُٹھایا ۔ خُدا نے یوحنا بپتسمہ دین والے نوں یِسُوعؔ دے جمن توں ۶ مہینے پہلوں ایس زمین اُتے پیدا ہون دے لائق بنایا ۔تے خُدا نے اوہنوں اخیریں نبی تے پُرانے عہد نامے دے کاہن وانگر تیار کیتا ۔ ایس لئی ، زمین دے وڈے کاہن وانگر ، یوحنا بپتسمہ دین والے نے یِسُوعؔ مسیح نوں بپتسمہ دتا تے اِنج ساری انسانی پیِڑھی دیاں پاپاں نوں اوس اُتے لد دتا ۔ دوجیاں اکھراں وچ ، یوحنا بپتسمہ دین والے دے یِسُوعؔ نوں بپتسمہ دین دا سبب دُنیا دیاں ساریاں پاپاں نوں اوس اُتے لدنا سی ۔سبب کیوں یِسُوعؔ مسیح نے یوحنا بپتسمہ دین والے کولوں بپتسمہ لیا اپنے بپتسمے دے راہیں اپنے آپ اُتے انسانی پیِڑھی دے ساریاں پاپاں نوں چُکنا سی ۔
ایس لئی یِسُوعؔ نے متی ۳ : ۱۵ وچ کہیا ، ”حالی تے ہون دے کیوں جو سانوں چاہی دا اے پئی ایسے طرح ساری راستبازی نوں پورا کرئیے۔“کیوں جو ساری راستبازی پوری کیتی جا سکدی سی صرف جد یِسُوعؔ نے یوحنا بپتسمہ دین والےکولوں دُنیا دے ساریاں پاپاں نوں قبول کرن لئی اپنا بپتسمہ لیا ، یِسُوعؔ نے آکھیا پئی انج ای مناسب سی ۔
ساڈے خُداوند نے ایس طریقے نال پاپیاں نوں مکتی دتی اے
ایہہ بپتسمہ جیہڑا یِسُوعؔ نے یوحنا کولوں لیا اوسے طرح اے جویں پُرانے عہد نامے وچ ہتھاں دا رکھیا جانا سی ۔ دوجیاں اکھراں وچ ، ایہہ ہتھاں دا رکھیا جانا سی جیہڑے پُرانے عہد نامے دے زمانے وچ سوختنی قربانی دی قربانگاہ توں پہلوں کسے دیاں پاپاں نوں قربانی دے پشُو اُتے لدن لئی کیتا جاندا سی ۔ ایس زمین اُتے آؤن تے بپتسمہ لین دےراہیں ، یِسُوعؔ مسیح نے ہتھاں دے رکھے جان دا وعدہ پورا کیتا—وعدہ کیتا گیا جد کدی ہر روز دیاں قربانیاں دتیاں جاندیاں سن جتھے پاپی اپنیاں پاپاں نوں اپنے قربانی دے پشُو اُتے اوہدے سِر اُتے اپنیاں ہتھاں نوں رکھن دے راہیں لددے سن ، تے جد کدی ورہے دی قربانی ،کفارہ دیہاڑے اُتے ،ستویں مہینے دی دسویں تاریخ نوں دتی جاندی سی ، جیہدے راہیں وڈاکاہن قربانی دے پشُو اُتے ایہدے سِر اُتے اپنیاں ہتھاں نوں رکھن دے راہیں اسرائیلیاں دے ساریاں بوہت چوکھیاں پورے ورہے دیاں پاپاں نوں لددا سی ۔
پُرانے عہد نامے دے ہتھاں دے رکھے جان وانگر ، ایس لئی پئی یِسُوعؔ نے بپتسمہ لین دے راہیں اپنے آپ اُتے دُنیا دیاں ساریاں پاپاں نوں قبول کیتا ، اوہنے ایہناں ساریاں پاپاں نوں دھو دتا ، تے ایس لئی پئی اوہنے انسانی پِیڑھی دیاں ایہناں ساریاں پاپاں نوں اپنے اُتے چُک لیا ، اوہنے ساڈے بدلے ایہناں پاپاں دی سزا جری تے قربان ہو گیا ۔ ایس طرح یِسُوعؔ مسیح ساڈی مکتی دا سچا خُدا بن گیا ۔
ایس طرح ، سانوں سچ مُچ ای مننا چاہی دا اے پئی ساڈیاں پاپاں دے سببوں ، اسیں اپنی پکی موت تے سزا جرن توں بچ نئیں سکدے ساں ۔ سانوں لازمی ایہنوں جاننا تے محسوس کرنا چاہی دا اے ۔تے سانوں ایہہ سمجھنا چاہی دا اے پئی یِسُوعؔ مسیح ساڈا مکتی داتا سانوں ، ایس زمین اُتے آؤن تے ساڈے بدلے قربان ہون دے راہیں بچا چُکیا اے—یعنی ، اپنی مکتی دیاں کماں دے راہیں اپنے بپتسمے ، سولی اُتے مرن تے جیوں اُٹھن نال ، یِسُوعؔ مسیح ساڈیاں ساریاں پاپاں نوں دھو چُکیا اے تے ساڈیاں پاپاں توں سانوں کامل طریقے نال بچا چُکیا اے ۔ سانوں لازمی ایہہ وی ایمان رکھنا چاہی دا اے پئی یِسُوعؔ سانوں مکتی دا انعام دے چُکیا اے ۔ یِسُوعؔ مسیح ساری راستبازی پوری کر چُکیا اے ، تاں پئی جے کوئی صرف ایمان لیائے تے جے کوئی صرف قبول کرے تاں، اوہ لازمی مکتی یافتہ ہوئے گا ۔
سانوں ایس گل دا احساس کراؤن لئی ، خیمۂ اجتماع دے برانڈے دا پھاٹک اسمانی ، ارغوانی ، تے لال دھاگے تے مہین وٹے ہوئے کتان نال اُنیا گیا سی ۔ ایہو ای سبب اے پئی جے اسیں خیمۂ اجتماع دے برانڈے دے ایس پھاٹک نوں کھولدے تے اندر جاندے آں تاں اسیں پہلوں سوختنی قربانی دی قربانگاہ ویکھاں گے ۔ سوختنی قربانیاں دی قربانگاہ اُتے چڑھائیاں جان والیاں قربانیاں وی مکتی دے ایس طریقے دا اگیترا کم سی جیہدے راہیں یِسُوعؔ مسیح سانوں بچا چُکیا اے ۔ سوختنی قربانی دی قربانگاہ اُتے چڑھائیاں جان والیاں قربانیاں نوں پاپیاں دیاں بدکاریاں نوں اپنے اُتے ہتھاں دے رکھے جان تے پاپیاں بدلے مرن تیک لہو وگا کے قبول کرنا پیندا سی ۔ فیر قربانیاں دے پشُو آں دا لہو قربانگاہ دیاں سِنگاں اُتے لایا جاندا ، تے باقی زمین اُتے تراؤنکیا جاندا سی ۔ فیر ، اوہ قربانگاہ اُتے پشُوآں دا گوشت تے چربی سوختنی قربانیاں وانگر چڑھاؤندے سن ۔ ایہہ اوہ طریقہ سی جیہدے راہیں قربانی دے پشُو خُدا نوں دتے جاندے سن ۔ قربانی دیاں پشُوآں دیاں ایہہ ساریاں صفتاں اوسے طریقے نال بالکل رَلدیاں مِلدیاں نیں جیہدے راہیں یِسُوعؔ مسیح ساڈا مکتی داتا بن گیا اے ۔ دوجیاں اکھراں وچ ، قربانی دے پشُوآں دے راہیں خُدا سانوں وکھا چُکیا اے پئی یِسُوعؔ مسیح ایس زمین اُتے آئے گا تے سانوں ایس طریقے نال بچائے گا ۔
بغیر کسے ناکامی دے ، پاپیاں دے ہتھ سوختنی قربانی دی قربانگاہ اُتے دتے جان والیاں قربانی دیاں پشُوآں اُتے رکھے جانےپیندے سن ۔ ایہو ای سبب اے پئی خیمۂ اجتماع سانوں پانی تے رُوح دی خوشخبری دسدا پیا اے ۔ ایس زمین اُتے آکے، یِسُوعؔ مسیح نے اپنے آپ اُتے انسانی پیِڑھی دیاں پاپاں نوں لین لئی بپتسمہ لیا ۔ بپتسمہ مکتی وانگر اے جیہڑا یِسُوعؔ مسیح نے خُدا باپ دے اگے دُنیا دیاں ساریاں پاپیاں لئی قربانی دا لیلا بنن واسطے لیا۔
ایس خیمۂ اجتماع دے راہیں ، ہُن اسیں واضح ایمان رکھ سکدے آں ۔ بالکل جویں قربانی دے پشُو نے کفارہ دیہاڑے اُتے وڈے کاہن دیاں ہتھاں دے رکھے جان دے راہیں اسرائیل دیاں لوکاں دے پاپاں نوں قبول کیتا تے بالکل جویں ایہنوں اوہناں بدلے اوہناں دیاں پاپاں دے سببوں جیہڑے اودوں سارے اوس اُتے لدے گئے سن قربان ہونا پینداسی (احبار ۱۶) یِسُوعؔ مسیح ایس زمین اُتے اپنے آپ اُتے ساڈیاں پاپاں نوں چُکن لئی تے اوہناں پاپاں لئی ساڈا اپنا قربانی دا لیلا بنن واسطے ، بِنا شک قربانی دا لیلا بن گیا ، تے اِنج سانوں ساڈیاں ساریاں پاپاں تے سزا توں بچا چُکیا اے ۔ ہُن اسیں محبت دی ایس مکتی اُتے کامل طریقے نال ایمان رکھ سکدے آں ۔ ایہہ ایس سچیائی اُتے ایمان رکھن دے راہیں ہیگا اے پئی اسیں شکر ادا کر سکدے آں تے محبت دی مکتی لئی جیہڑی اوہ سانوں دے چُکیا اے خُدا نوں اپنا قرضہ ادا کر سکدے آں ۔
کوئی معنی نئیں رکھدا کوئی خیمۂ اجتماع دے بارے کناں چوکھا علم رکھدا اے ، جے اوہ ایمان نئیں رکھدا ، فیر ایہہ سارا علم بیکار اے ۔ ایس طرح سانوں لازمی سمجھنا چاہی دا اے ، ایسے طرح ایمان وی رکھنا چاہی دا اے پئی یِسُوعؔ مسیح دا بپتسمہ سچ مُچ کناں خاص اے ۔ خیمۂ اجتماع دے تِن پھاٹک سن ، ایہہ سارے اسمانی ، ارغوانی تے لال دھاگے تے مہین وٹے ہوئے کتان نال اُنے گئے سن ۔ لوک اپنے علم دے گھاٹے دے سببوں خیمۂ اجتماع دے ہر پھاٹک بارے وکھ وکھ طریقے نال دس سکدے نیں ۔
دھاگیاں دی ترتیب وچ ، سب توں پہلوں جیہڑا اُنیا گیا سی اوہ اسمانی دھاگہ سی ، ایہدے بعدوں ارغوانی دھاگے، لال دھاگے تے مہین وٹے ہوئے کتان دی ترتیب سی ۔ صرف ایس طریقے نال پھاٹک بناؤن دے راہیں ای ایہنوں خیمۂ اجتماع دا اصلی پھاٹک قرار دتا جا سکدا اے ، ایس لئی پئی بالکل ایسے طرح خُدا نے پُرانے عہد نامے دے زمانےوچ اسرائیلیاں نوں ایہنوں بناؤن دا حکم دتا سی ۔
ایس طریقے نال پھاٹک بناؤن دا اک سبب سی ۔ ایس گل توں ہٹ کے پئی کویں یِسُوعؔ مسیح ایس زمین اُتے بندے دے بدن وچ کواری مریم دے بدن دے راہیں انسانی پیِڑھی دے مکتی داتا وانگر پیدا ہویا سی ، جے اوہ پہلی واری وچ اپنےآپ اُتے ساڈیاں پاپاں نوں چُکن لئی بپتسمہ نہ لَے چُکیا ہوندا تاں ، اوہ ساڈا سچا مکتی داتا نئیں بن سکدا سی ۔ جے اوہ بپتسمہ نہ لَے چُکیا ہوندا تاں ، اوہ سولی اُتے نئیں چڑھ سکدا سی تے نہ ای سولی اُتے مر سکدا سی ۔ ایس طرح ، اسمانی دھاگہ پہلوں اُنیا جانا سی ،تے ایس بارے ضرورت وی اہم سی ۔
سانوں کیہدے اُتے لازمی ایمان رکھنا چاہی دا اے
ایس لئی ، سانوں لازمی یِسُوعؔ مسیح اُتے ایمان رکھنا چاہی دا اے جیہڑا سانوں ساڈیاں پاپاں توں بچا چُکیا اے ۔اسیں اصل وچ اوسے ویلے نویں سریوں جم سکدے آں جد اسیں ایس مکتی اُتے ایمان رکھدے آں جیہڑا خُدا دا ایہہ پُتر ، یِسُوعؔ مسیح ساڈا مکتی داتا سانوں مکتی دے چُکیا اے ۔ جد اسیں خُدا دے پُتر اُتے اپنی مکتی دے خُدا وانگر ایمان رکھدے آں ، تے جد اسیں سچیائی اُتے ایمان رکھدے آں پئی اوہ ایس زمین اُتے آیا ،تے ساڈے لئی بپتسمہ لین دے راہیں اِکو ای واری اپنے آپ اُتے ساڈیاں پاپاں نوں چُک لیا ،تے سولی اُتے ساڈی سزا جری ، فیر اسیں سارےاپنی اصل مکتی پا سکدے آں ۔
ایس لئی پئی یِسُوعؔ مسیح ساڈیاں پاپاں نوں کسے دوجے طریقے نال اپنے اُتے نئیں لَے سکدا سی سگوں اپنے بپتسمے دے راہیں ، صرف ساڈیاں پاپاں نوں ایس ٹھیک طریقے نال جرن دے راہیں اوہ سولی اُتے جا سکدا سی ، اپنا لہو وگا سکدا تے ایس اُتے مر سکدا سی ۔ ایس نال کوئی فرق نئیں پیندا پئی اوہ کویں خُدا دا پُتر اے تے اوہ کویں ساڈے مکتی داتا وانگر ایس زمین اُتے آیا ، جے اوہ اپنے بپتسمے دے راہیں اپنے آ پ اُتے ساڈیاں پاپاں نوں نا اُٹھا چُکیا ہوندا تاں ، ساڈی مکتی ایس دُنیا وچ کدی نئیں مِل سکدی سی ۔
ایس لئی ، تہاڈے واسطے بھرواں پکا یقین رکھن لئی تفصیل نال پاک کتاب دیاں گواہیاں دی تصدیق کرنا بوہت ضروری اے پئی تہاڈے پاپ پہلوں ای مکائے گئے نیں ۔
آؤ اک منٹ لئی فرض کروپئی تہاڈے اُتے وڈا قرضہ اے ۔ فیر کوئی تہانوں آکھدا اے ، ”فکر نہ کرو؛مَیں ایہنوں تہاڈے لئی اُتار دیاں گا ۔پریشان ہون دی ضرورت نئیں ہیگی؛ مَیں ایس مسئلے نوں حل کراں گا ۔“جد کدی تُسیں او س نال مِل دے او ، ایہہ بندہ سانوں دسدا رہندا اے ، ” کیہ مَیں تہانوں نئیں دسیا پئی پریشان نہ ہووو؟ مَیں تہانوں کہیا سی پئی مَیں ایہدی فکر کراں گا !“آؤ اسیں ہور فرض کرئیے پئی اوہ بندہ ایتھوں تیک پئی ایہہ آکھدیاں ہویاں ناراض ہو جاندا اے پئی تُسیں کیوں ایس اُتے یقین نئیں کردے ۔ ایتھوں تیک پئی جے ایہہ بندہ ہر روز تہانوں دسدا اے ، ” مَیں سارا کُجھ ادا کر دتا اے؛ صرف میرے اُتے یقین رکھو،“جد اوہنے اصل وچ تہاڈا قرضہ ادا نئیں کیتا تاں ، کیہ تُسیں سچ مُچ اوس اُتے یقین کرکے ایس قرض توں چھُٹ جاؤ گے ؟ بالکل نئیں !
ایہہ کوئی معنی نئیں رکھدا پئی اوہ تہانوں کنے ای بھروسے نال کہندا اے ، ”جے تُسیں میرے اُتے بھروسہ رکھدے او تاں ، تہاڈا سارا قرضہ ادا ہو جائے گا ، “جے اوہنے اصل وچ اوہنوں ادا نئیں کیتا ، فیر تہاڈا قرضہ قیم رہندا اے تے ایہہ بندہ صرف تہاڈے نال فریب کردا پیا اے ۔ سو تُسیں اوہنوں گھڑی مُڑی پُچھدے او ، ”تاں کیہ تُسیں میرا قرضہ لاہ دتا ؟“ فیر اوہ تہانوں گھڑی مُڑی کہندا اے ، ”تسیں کیوں اینے شکی جے ؟ صرف میرے اُتے شرطوں اڈ بھروسہ رکھو ! مَیں تہانوں دسیا سی پئی مَیں تہاڈا سارا قرضہ لاہ دتا اے ۔ سارا جیہڑا تُسیں کرنا اے صرف میرے اُتے یقین رکھنا اے ، تے فیر وی تُسیں اینے شکی جے ! اِنج دے نا بنو !“ تاں آؤ دوجی واری فرض کرئیے ،تُسیں اپنے سچے دلوں اوس اُتے بھروسہ کیتا ۔ پر کوئی معنی نئیں رکھدا پئی تُسیں اوس اُتے کناں یقین کیتا ہوئے ، جے اوہنے اصل وچ تہاڈا قرضہ نئیں لاہیا ، تاں اوہناں گلاں ساریاں جھوٹھیاں نیں ۔
اَج دے مسیحیاں دا ایمان اِنج ایسے طرح اے
اَج دے مسیحی کہندے نیں ، ” یِسُوعؔ تہانوں سولی اُتے اپنا مہنگا لہو وگاؤن دے راہیں بچا چُکیا اے ۔ اوہنے اوتھے پاپ دی ساری سزا جری ۔ ایس طرح اوہ تہانوں بچا چُکیا اے۔“ بوہت سارے پادری ایسے طرح اپنیاں کلیسیاواں وچ منادی کردے نیں ۔ جد لوکاں وچوں کوئی نکلدا اے تے اوہناں نوں کہندا اے ،”پر مَیں فیر وی پاپی آں،“ اوہ کہندے نیں ، ”ایہدا سبب ایہہ ہیگا اے پئی تہاڈا ایمان گھٹ اے ۔صرف ایمان رکھو! بےاعتقادی توں علاوہ تہاڈا کوئی پاپ نئیں ہیگا!“ ” مَیں وی سچ مُچ ایمان رکھنا چاؤہندا ہاں ، جناب۔ پر مینوں نئیں پتہ مَیں کیوں ایمان نئیں رکھ سکدا۔“ ”مینوں نئیں پتہ پئی مَیں ایمان رکھدیاں ہویاں وی کیوں پاپی آں ۔ مَیں سچ مُچ ایمان رکھدا ہاں ۔ “ ” تُسیں بوہتا ایمان نئیں رکھدے او ۔ تہانوں بوہتا ایمان رکھن دی ضرورت اے ۔ اک پہاڑ اُتے چڑھ جاؤ تے روزہ رکھن دی کوشش کرو ۔ اپنیاں کھانیاں نوں چھڈدیاں ہویاں ایمان رکھو ۔“ ”کیہ مَیں کھانیاں نوں چھڈیوں بغیر صرف ایمان نئیں رکھ سکدا ہاں ؟“ ”نئیں ، تینوں روزہ رکھدیاں ہویاں ایمان رکھن دی کوشش کرنی پوے گی ۔ “
اج دے بوہت سارے پادری تہانوں ایمان رکھن لئی کہندے نیں ، پر اوہ تہاڈیاں پاپاں دا مسئلہ حل نئیں کردے ، تے اوہ صرف نا ایمان رکھن توں تہانوں جھڑکدے نیں ۔ تہاڈے ولوں ، تُسیں ایمان رکھن دی کوشش کردے او تے فیر وی ایہہ ایمان رکھنا بوہت اوکھا اے ، یاتُسیں سچ مُچ انھے وا ایمان رکھدے او ، پر تہاڈیاں پاپاں دا مسئلہ فیر وی قیم رہندا اے ۔ ایتھے کیہ غلطی اے ؟ ایہدی کیہ وضاحت کرسکدے او ؟ لوک سچا تے پکا ایمان نئیں رکھ سکدے ایس لئی پئی اوہناں نوں نئیں پتہ پئی یِسُوعؔ مسیح نےبپتسمہ لَے کے اوہناں دیاں ساریاں پاپاں نوں اپنے اُتے چُک لیا اے ۔ ایہدا سبب ایہہ ہیگا اے پئی اوہ فریباں اُتے ایمان رکھدے نیں جیہدے نال اوہ اپنیاں پاپاں دا مسئلہ حل نئیں کرسکدے بھاویں اوہ کناں ای ایمان رکھدے نیں ۔
کیہ ایمان صرف بغیر کسے پکے ثبوت دے شرطاں بغیر یقین کرکے مِلدا اے ؟ بالکل نئیں ! پورا ایمان اِکو ای واری مِلدا اے صرف جد تہانوں پتہ ہوندا اے پئی تہاڈے پاپ دا مسئلہ سچ مُچ کویں حل کیتا گیا تے ایس اُتے ایمان رکھدے او ۔” بھاویں مَیں تیرے اُتے شک کیتا سی ،پر ایہہ بوہت واضح ہیگا اے پئی تُوں پہلوں ای میریاں پاپاں دے مسئلے نوں حل کر چُکیا ایں ۔ کوئی معنی نئیں رکھدا مَیں ایمان نا رکھن دی کنی کوشش کردا ہاں ، مَیں تیری مکتی اُتے ایمان رکھن توں علاوہ کُجھ نئیں کر سکدا ہاں ، ایس لئی پئی ایہہ مکتی بوہت بھروسے والی اے ۔ میرے مسئلے نوں حل کرن لئی تہاڈا شکر ہوئے ۔ “دوجیاں اکھراں وچ ، بھاویں اسیں پہلوں شک کر سکدے آں ، ایس لئی پئی ساڈی مکتی دا ثبوت ایناں پکا اے پئی اسیں ہور کوئی شک نئیں کر سکدے ۔ ساڈی مکتی دے نشان تے اوہدے ثبوت دے طور اُتے ، یِسُوعؔ سانوں اپنی پانی تے رُوح دی خوشخبری اکھواؤن والی رسید وکھا چُکیا اے ۔ ”مَیں تہاڈا قرضہ تہاڈے لئی ایس طریقے نال لاہ چُکیا ہاں ۔“ صرف جد اسیں ایس رسید نوں ویکھدے آں جیہڑی سانوں وکھاؤندی اے پئی ساڈے سارے قرضے لاہ دتے گئے نیں تاں ساڈے کول سچا ایمان آسکدا اے ۔
اسیں ایمان نئیں رکھ سکدے ایتھوں تیک پئی جویں اسیں خُدا اُتے ایمان رکھن دا اقرار کردے آں ، آکھدے آں پئی یِسُوعؔ مسیح ، آپ ای خُدا ، ساڈا مکتی داتا اے ، تے مکتی داتا اُتے ایمان رکھن دا دعویٰ کردے آں ، جد ساڈے کول ثبوت نئیں ہیگا کویں اوہ سانوں بچا چُکیا اے تے کویں ساڈے پاپ مکائے گئے سن ۔ دوجیاں اکھراں وچ ، اسیں پکا کامل بھروسہ نئیں رکھ سکدے جد تیک اسیں اپنیاں پاپاں دے مُل دے سارے لہہ جان نوں وکھان والی رسید نہ ویکھ لئیے ۔ جیہڑے لوک ایس رسید نوں ویکھیوں بغیر ایمان رکھدے نیں ، اوہ خورے پہلوں ایمان دا اک پکا احساس رکھن لئی ظاہر ہو سکدے نیں پر اوہناں دا ایمان ، اصل وچ انھا اے ۔ ایہہ اک پاگلاں والے ایمان توں بوہتا نئیں ہیگااے ۔
کیہ تُسیں اک جنونی ایمان نوں اک چنگے ایمان وانگر سمجھدے او ؟
تُسیں کویں پسند کروگے پئی جے اک پادری جنونی ایمان رکھ کے اِنج ای جنونی ہون بارے دوجیاں نوں وی آکھدا اے ، ”ایمان رکھو ! اگ نوں پاؤ ! اگ ، اگ ، اگ !پاک رُوح جیہڑا اگ وانگر اے سانوں اگ نال بھر !مَیں ایمان رکھدا ہاں پئی خُدا تہانوں ساریاں نوں برکت دیوے گا ! مَیں ایمان رکھدا ہاں پئی اوہ سانوں ساریاں نوں دولت دیوے گا ! مَیں ایمان رکھدا ہاں پئی اوہ تہانوں برکت دیوے گا ! مَیں ایمان رکھدا ہاں پئی اوہ تہانوں شفا دیوے گا !“جد ایہو جیہا پادری ایس طرح دے شو کردا اے تاں ، سُنن والیاں دےکن وجن لگدے نیں تے اوہنا ں دے دل بھُڑکن لگدے نیں ،بوہت ودھیاں قِسماں دے سپیکراں وچوں جد اوہ رولا پاؤنا شروع کردا اے ،” اگ ، اگ ، اگ ،“ سُنن والیاں دے دل اوہدی ودھیاں اواز سُن کے بھُڑکن لگدے نیں ۔فیر اوہ جذبیاں وچ پھس جاندے نیں پئی جویں سچ مُچ اک پکا ایمان اوہناں کول آگیا اے ، تے روندے نیں ، ”اے خُداوند یِسُوعؔ ، آ ، آہو ، اے پاک رُوح آ!“
اوس ویلے دے بارےوچ ، پادری فیر سُنن والیاں دیاں جذبیاں نوں ایہہ آکھ کے ہور بھڑکاؤندا اے ، ”آؤ اسیں دعا منگیے ۔ مَیں ایمان رکھدا ہاں پئی پاک رُوح ہُن اُتردا پیا اے تے سانوں ساریاں نوں بھردا پیا اے ۔“ کوائر دے جوش بھرے گیت چھیتی نال اوہدے پِچھے چلدے نیں ، تے لوک اپنیاں ہتھاں نوں اُچیاں کردے نیں ،جوش تے خروش نال کملے ہوندے نیں تے اوہناں دی جذباتی اگ بوہت اُچی ہو جاندی اے ۔ ٹھیک تھاں اُتے ، ایہہ اوہ ویلا اے جد پادری آکھدا اے ، ”آؤ اسیں اپنے ہدئیے دیئیے۔ خاص کر کے ، ایس شام ، خُدا تہاڈے کولوں اک وڈا ہدیہ لینا چاؤہندا اے ۔ آؤ اسیں سارے خُدا اگے اک وڈا ہدیہ دیئیے۔ “
اپنےجذبیاں نال بھرکے ، لوک فیر اپنیاں جیباں خالی کر لیندے نیں ۔ ایہہ جھوٹھا پادری پہلوں ای اک بوہت وڈا پلپٹ تیار کر چُکیا اے جیہڑا پئی ساریاں اکٹھے ہویاں پیسیاں نوں ودھاؤن لئی بوہت وڈا اے ، تے تتلیاں پھڑن والیاں بوہت چوکھیاں جالیاں نوں (چندے والیاں ٹوکریاں نوں )ایہدے اگے رکھدا اے ۔ جد کوائر گیت گاؤنا شروع کردی اے تے لوکاں دے دل اپنے جوش نال بھر جاندے نیں تاں ، اوہ تتلیاں اکٹھیاں کرن والیاں نوں (چندے والیاں ٹوکریاں نوں اگے پوہنچاؤن والیاں رضاکاراں نوں )کلیسیا دے وچکار گھلدا اے ۔
ایہہ جھوٹھ بول کے پئی بوہتیاں نذراں دین دا مطلب بوہتیاں برکتاں نیں ، تے لوکاں دیاں جذبیاں نوں ودھا کے ، ایہو جیہے جھوٹھے پادری لوکاں نوں اوہناں نوں رواؤن تے بٹوے کھولن لئی مجبور کردے نیں ۔ ایہہ اوہناں نوں سوچیوں بغیر اوہناں نوں اوہناں دی عقل تے سمجھ نوں مکاؤن تے ایہدی تھاں اُتے اوہناں نوں اوہناں دیاں جذبیاں وچ پھساؤن دے راہیں اپنے پیسے اوہناں دے حوالے کرنا اے ۔ اِنج نا تاں خُدا دے کلام وچ لکھیا اے تے نا ای کسے طرح دے پیغام وچ اے ،سگوں اک کملیاں والا تے انھا کم اے جیہڑا فریب بھریا اے ۔ ایس طرح ، اوہ پادری جنہاں دا ایمان کملیاں والا اے لوکاں دیاں جذبیاں نوں اپنیاں بھیڑیاں مقصداں تیکر اَپڑن لئی بھڑکاؤندے نیں ۔
جے سانوں پتہ اے پئی ساڈے خُداوند نے اپنے بپتسمے دے راہیں اپنے آپ اُتے ساڈیاں پاپاں نوں چُک لیا، تے جے اسیں ایس یِسُوعؔ مسیح اُتے اپنے مکتی داتا وانگر ایمان رکھدے آں ، فیر اسیں نئیں ڈولدے ، سگوں سکون نال رہندے آں ۔ اک شے جیہڑی سانوں چُپ کیتے اپنے وَل لاؤندی اے اوہ ایہہ ہیگی اے پئی یِسُوعؔ نے اپنے بپتسمے نال ساڈیاں پاپاں نوں موھڈا دتا تے مرن تیک سولی اُتے مویا سی ۔ جد اسیں ایس بارے وچ سوچدے آں پئی یِسُوعؔ ، آپ ای خُدا نے ، اپنے بپتسمے نال اپنے آپ اُتے ساڈیاں پاپاں نوں چُک لیا تے ایہناں پاپاں دا مُل اُتارن لئی مر گیا تاں ، اسیں بوہت شکر گزار ہو جاندے آں ، تے ساڈے دل اک وڈی خوشی نال بھر جاندے نیں ۔ پر ، ساڈیاں دلاں وچ ایہہ سکون بھریا خُدا دا کلام ایس دُنیا وچ کسے وی دوجی شے توں بوہت وڈا اے ؛ نا محبت دا کوئی پیار بھریا اقرار تے نا ای ایس دُنیا دے سب توں مہنگے ہیرے دا کوئی انعام سانوں ایس توں بوہتا اپنے وَل لا سکدا اے ۔
ایس توں اُلٹ ، کملیاں دا جذباتی ٹولا بوہتے چر تیک قیم نئیں رہندا اے ۔ بھاویں اوہ ایس خُدائی کلام وچ تھوڑے چر لئی زندہ رہ سکدے نیں ، جد اوہ ہر روز پاپ کردے نیں تے اِنج پاپاں توں ذلیل ہوندے نیں ، اوہ بچ نئیں سکدے سگوں اپنیاں مُنھاں نوں شرم نال لکاؤندے نیں ۔ ”جد یِسُوعؔ نے ساڈی سزا جری تے ساڈے لئی سولی اُتے مر گیا ، فیر وی مَیں ہر روز کیوں پاپ کردا ہاں ؟ “سو اوہ اپنیاں مُنھاں نوں وگاڑ لیندے نیں تے جویں ای ویلا لنگھدا اے ہور جوش بھرے نئیں ہو سکدے ؛ تے کیہ اے ، شرم نال ، اوہ خُدا دے اگے وی نئیں جا سکدے نیں۔
ایہہ ہے کیوں خُدا سانوں سوختنی قربانی دی قربانگاہ وکھا چُکیا اے ۔ قربانی دا پشُو جیہڑا قربانی دے طریقے مطابق سوختنی قربانی دی ایس قربانگاہ اُتے دتا جاندا سی یِسُوعؔ مسیح ساڈے مکتی داتا توں علاوہ کوئی دوجا نئیں سی ۔ ایس طرح ، سوختنی قربانی دی قربانگاہ ظاہر کردی اے پئی یِسُوعؔ ایس زمین اُتے آیا تے اصل وچ اسمانی ، ارغوانی ، تے لال دھاگے تے مہین وٹے ہوئے کتان دے راہیں اِکو ای واری ہمیش لئی سانوں بچا چُکیا اے۔ خُدا سانوں سوختنی قربانی دی ایہہ قربانگاہ ویکھن دے لائق کر چُکیا اے، تے اوہ چاؤہندا اے پئی اسیں ایس اُتے ایمان رکھن دے راہیں مکتی یافتہ ہو جائیے ۔
ایہہ کیہ اے جیہڑا سانوں لازمی ایس زمانے وچ کرنا چاہی دا اے
بوہت سارے کم نیں جیہڑے سانوں نویں سریوں جمیاں نوں لازمی ایس زمانے وچ کرنے چاہی دے نیں ۔ سب توں پہلوں ، سانوں ساری دُنیا وچ پانی تے رُوح دی خوشخبری دی منادی کرنی اے ۔ سانوں لازمی اوہناں تیک سچیائی نوں ودھاؤنا چاہی دا اے جیہڑے اسمانی ، ارغوانی ، تے لال دھاگے تے مہین وٹے ہوئے کتان دی ایس سچیائی نوں نئیں جان دے ، تے اِنج سانوں لازمی اوہناں نوں دوزخ دی اگ دی سزا توں بچاؤن وچ اوہناں دی مدد کرنی چاہی دی اے ۔ کیوں ؟ ایس لئی پئی بوہت سارے لوک ایہو جیہے نیں جیہڑے ایتھوں تیک پئی خیمۂ اجتماع وچ ظاہر ہون والی پانی تے رُوح دی خوشخبری نوں سمجھیوں تے ایمان رکھیوں بغیر یِسُوعؔ پِچھے چلدے پئے نیں ۔
ایس سچیائی نوں اوہناں تیک ودھاؤن لئی ، ساڈے کول ہُن تیک کر ن لئی بوہت سارے کم ہیگے نیں ۔ اسیں اپنیاں کتاباں چھاپنیاں نیں جیہڑیاں پوری دُنیا وچ گھلیاں جاندیاں نیں ؛ ایہناں کتاباں دے ترجمے ، پڑھ کے سوارناتے کٹ وڈ توں لَے کے ایہناں نوں چھاپن لئی ، تے ساری دُنیا دے ملکا ں وچ گھلن لئی ضروری پیسیاں نوں رکھن لئی ،اصل وچ بوہت سارے کم نیں جنہاں نوں کرن دی ضرورت اے ۔
سو جدوں اسیں اپنے نال رَل کے کم کرن والیاں نوں تے خادماں نوں ویکھدے آں تاں، اسیں ویکھدے آں پئی اوہ سارے کنے کمیں لگے نیں ۔ ایس لئی پئی خُدا دی کلیسیا دے سارے پاک لوک تے کم کرن والے ایس طریقے نال بوہت کمیں لگے نیں ، اوہ بدنی طور نال کُجھ اوکھے ویلے وچوں لنگھدے پئے نیں ۔ ایہہ آکھیا جاندا اے پئی میرا تھن وچ نسن والے اپنی ۱۹۵.۴۲ کلو میٹر دوڑ وچ اک خاص مقام تیک اپڑ جاندے نیں جد اوہ اینے تھک جاندے نیں پئی اوہناں نوں ایہہ وی احساس نئیں ہوندا پئی اوہ نس دے پئے نیں یابالکل وکھراکوئی دوجا کم کردے پئے نیں ۔ مختصر ، ایہہ پئی چوکھا تھکیواں اوہناں دے ذہن نوں سکھناں کر دیوے گا ۔ خورے ہُن اسیں وی خوشخبری لئی اپنی دوڑ وچ ایس مقام تیک اَپڑ گئے آں ۔ خوشخبری لئی اپنیاں زندگیاں بسر کرنا اپنےمقصدول بغیر رُکیوں ، بوہت لمے پندھ دی دوڑ نسن وانگر اے جویں پئی میرا تھن وچ نسن والے کردے نیں ۔ ایس لئی پئی خوشخبری لئی ساڈی دوڑ لازمی ساڈے خُداوند دے آؤن دے دن تیک جاری رہوے گی ۔ اسیں سارے مشکل نوں جردے آں ۔
پر کیوں جو ساڈا خُداوندساڈے وچ اے ، ایس لئی پئی اسیں پانی تے رُوح دی خوشخبری رکھدے آں ، ایس لئی پئی ساڈا ایمان یقین رکھدا اے پئی خُداوند سانوں اسمانی ، ارغوانی ، تے لال دھاگے تے مہین وٹے ہوئے کتان نال بچا چُکیا اے ، تے ایس لئی پئی اسیں ساریاں نال پکے سچ اُتے ایمان رکھدے آں ، تے اسیں ساری نویں طاقت پا سکدے آں ۔ ایہہ ایس لئی اے پئی یِسُوعؔ سانوں مکتی دا انعام دے چُکیا اے پئی تُسیں تے مَیں ایہہ انعام پاچُکے آں ۔ ایس لئی ساڈیاں بدنی مشکلاں سانوں پریشان نئیں کرسکدیاں ۔ ایس دے اُلٹ ، ایہہ جنی بوہتی مشکل ہوندی جائے گی ، راستباز اونی ای طاقت پاؤندا اے ، مَیں سچ مُچ خُداوند دا شکر ادا کردا ہاں ۔
روحانی طریقے نال ، ساڈیاں دلاں وچ ، ساڈیاں سوچا ں وچ ، تے اپنے سارے اصل آلے دوالے وچ ، اسیں نویں طاقت محسوس کر سکدے آں جیہڑی ساڈا خُداوندسانوں دے چُکیا اے ، تے پئی اوہ ساڈے نال اے ۔ایس لئی پئی اسیں محسوس کر سکدے آں پئی اوہ ساڈی مدد کردا پیا اے تے سانوں سنبھالدا پیا اے ، تے ایہہ پئی اوہ ساڈے نال اے ، اسیں اوہدا ہور وی بوہتا شکر ادا کردے آں ۔ سو، پولوس رسول نے وی کیہا، ”جیہڑا مینوں طاقت دیندا اے اوہدے سببوں مَیں سبھ کُجھ کر سکنا آں “(فلپیوں ۴ : ۱۳)۔ ایس لئی اسیں ہر روز اقرار کرد ے آں پئی جے خُداوند سانوں طاقت نئیں دیندا تاں اسیں کُجھ وی نئیں کرسکدے ۔ نا صرف یِسُوعؔ مسیح نے ساڈے لئی بپتسمہ لیا ، سگوں اوہ ساڈے لئی سولی اُتے چڑھ کے قربان وی ہویا ، اپنی موت نوں جریا ، فیر مویاں وچوں جیوں اُٹھیا ، تے اِنج ساڈا اصلی مکتی داتا بن گیا اے ۔ جد کدی اسیں سوختنی قربانی دی قربانگاہ نوں ویکھدے آں ، اسیں اپنے آپ نوں ایس سچیائی دا چیتا کراؤن لئی آؤندے آں ۔
سوختنی قربانی دی قربانگاہ کِکر دی لکڑ نال بنائی گئی سی ، تے ایہنوں اندروں تے باہروں موٹے پِتل نال مڑھیا گیا سی ۔ ایہدی اُچیائی تقریبا ً۳۵.۱میٹر سی ، تے ایہدی انگیٹھی ، پِتل دی جالی نوں ایہدے وچکار دےنیڑے ،تقریبا ً ۶۸ سینٹی میٹر اُچیائی اُتے رکھیا گیا سی ۔ قربانیاں دا گوشت ایس انگیٹھی اُتے رکھیا جاندا تے ساڑیا جاندا سی ۔
جد کدی اسیں سوختنی قربانی دی قربانگاہ نوں ویکھدے آں ، تاں سانوں لازمی اپنے آپ نوں ویکھن دے لائق ہونا چاہی دا اے جویں اسیں آں ۔ سانوں لازمی ایہہ وی ویکھن دے لائق ہونا چاہی دا اے پئی یِسُوعؔ مسیح نے اپنے بدن وچ بپتسمہ لے کے اپنے آپ اُتے ساڈیاں پاپاں نوں چُک لیا ، تے ایہہ پئی اوہنے سولی اُتے اپنا لہو وگاؤن دے راہیں ساڈیاں پاپاں دی ساری لعنت جری ۔ تُسیں تے مَیں سچ مُچ اپنیاں پاپاں تے لعنت دے سببوں خُدا دے اگے مرن توں بچ نئیں سکدے ساں ۔ ساڈیاں پاپاں تے لعنت دے سببوں ، تُسیں تے مَیں مرن تے ہمیش لئی لعنتی ہون توں بچ نئیں سکدے ساں ۔ پر یِسُوعؔ مسیح دے سببوں ، جیہڑا ایس زمین اُتے فدیے دی ہمیش دی قربانی وانگر آیا ، ساریاں لئی ، بپتسمہ لیا ، تے مر گیا ، پُرانے عہد نامے دے قربانی دے پشُو وانگر ، اسیں بچائے گئے آں ۔
اک قربانی دا پشُو زندہ حالت وچ خورے سوہنا تے پُرکشش نظر آسکدا اے ، پر ہتھاں دے رکھے جان دے راہیں پاپاں نوں قبول کرن دے بعدوں ، جد ایہدا گل وہڈیا جائے گا تاں ، ایہہ کناں ڈراؤنا ہوئے گا جد ایہہ مرن تیک لہو وگاؤندا اے ۔ ایہہ پئی اسیں ،جیہڑے ایس ڈراؤنے طریقے نال مرن دے حقدار ساں ،اپنی سزا توں بچ گئے آں ، سچ مُچ اک وڈی برکت اے ۔ ایہہ برکت سوکھی ہوگئی ایس لئی پئی خُداوند سانوں مکتی دا انعام دے چُکیا اے ۔ بالکل جویں اسمانی ، ارغوانی ، تے لال دھاگے تے مہین وٹے ہوئے کتان وچ ظاہر ہوندا اے ، ایسے طرح ، یِسُوعؔ مسیح اک بندے دے بد ن وچ ایس زمین اُتے آیا ، تہانوں تے مینوں اپنےبپتسمے تے صلیبی لہو دے راہیں بچا چُکیا اے ، تے اِنج سانوں مکتی د ا اصلی انعام دے چُکیا اے ۔ ایس طرح خُد ا تہانوں تے مینوں مکتی د ا انعام دے چُکیا اے — کیہ تُسیں اپنیاں دلاں وچ ایس اُتے ایمان رکھدے او ؟ کیہ تُسیں مکتی د ے ایس انعام، یِسُوعؔ دی محبت اُتے ایمان رکھدے او ؟ سانوں ساریاں نوں لازمی ایہہ ایمان رکھنا چاہی دا اے ۔
جد اسیں سوختنی قربانی دی قربانگاہ نوں ویکھدے آں ، تاں سانوں لازمی ایہہ سمجھنا چاہی دا اے پئی یِسُوعؔ مسیح سانوں ایس طریقے نال بچا چُکیا اے ۔ اوہ سانوں مکتی د ا انعام دین لئی ایس طرح قربان ہویا سی ۔ جویں قربانی دے پشُو اُتے ہتھ رکھے جاندے سن ،تے جویں ایہہ قربانی دا پشُو مرن تیک لہو وگاؤندا سی ، یِسُوعؔ مسیح سانوں ساڈی مکتی ایسے طریقے نال دکھ جرن دے راہیں دے چُکیا اے ۔ ایس طرح اوہ سانوں ساڈیاں پاپاں توں بچا چُکیا اے ۔ سانوں لازمی ایہدا احساس کرنا، خُدا دے اگے اپنیاں دلاں وچ ایمان رکھنا ، تے اپنے سچیاں دلاں نال اوہدا شکر ادا کرنا چاہی دا اے۔
خُدا چاہندا اے اسیں ایمان دے راہیں مکتی د ا انعام تے محبت پائیے جیہڑی اوہ سانوں دے چُکیا اے ۔ اوہ چاہندا اے پئی اسیں اپنیاں دلاں وچ بپتسمہ تے صلیبی لہو دی مکتی اُتے ایمان رکھیے جیہڑی اوہنے پانی تے رُوح دے راہیں آن کے پوری کیتی ۔ ایہہ میری تمنا اے پئی تُسیں سارے اپنیاں دلاں وچ اپنے خُداوند دی محبت اُتے ایمان رکھو گے تے ایہناں وچ سچ مُچ اوہدے مکتی د ےانعام نوں قبول کرو گے ۔ کیہ تُسیں سچ مُچ ایہنوں اپنیاں دلاں وچ قبول کردے او ؟
کون ایس طریقے نال تہاڈے لئی قربان ہویا سی ؟
مَیں اک واری گواہی دین والی نکی کتاب ویکھی جیہدے وچ لکھیا سی ، ”تہاڈے لئی کون مرے گا ؟اج تُسیں کنہوں ملے جنہے تہانوں تسلی دتی ؟ یِسُوعؔ مسیح تہاڈے لئی سولی اُتے مویا ۔ کیہ تہاڈا دل ایس توں تسلی نئیں پاؤندا “کون سچ مُچ تہاڈیاں پاپاں نوں بپتسمہ لے کے جرے گا تے تہاڈے پاپاں نوں مکاؤن لئی تہاڈے بدلے سولی اُتے مرے گا؟ کیہڑا اپناسارا لہو وگائے گا تے تہاڈے اُتے اپنی محبت ورساؤن لئی مرے گا ؟کیہڑا کدی تہاڈے لئی ایس قربانی نوں جرن لئی دلوں خوش ہوئے گا ؟ کیہ ایہہ تہاڈے رشتے دار نیں؟ تہاڈے بچے ؟ تہاڈے ماپے ؟
ایہنوں وچوں کوئی وی نئیں !ایہہ خُدا آپ ای اے جنہے تہانوں بنایا ۔ تہانوں تہاڈیاں پاپاں توں بچاؤن لئی ، ایہہ خُدا اک بندے دے بدن وچ ایس زمین اُتے آیا، تہاڈیاں پاپاں نوں اپنے اُتے لین لئی بپتسمہ لیا ، سولی اُتے چڑھیا ،تے تہاڈیاں پاپاں دی سزا جرن لئی اپنا لہو وگایا ،تہاڈا اصلی مکتی داتا بن گیا اے ،فیر مویاں وچوں جیوں اُٹھیا ،جویں ہُن زندہ اے ، تے تہانوں اپنی مکتی تے محبت اک انعام وانگر دے چُکیا اے ۔کیہ تُسیں سچ مُچ محبت دی ایس مکتی نوں اپنیاں دلاں وچ قبول کرنا چاہندے او ؟ کیہ تُسیں سچ مُچ اپنیاں دلاں وچ ایمان رکھدے او ؟
جیہڑا وی ایمان رکھدا اے خُداوند نوں پائے گا ، تے جیہڑا وی ایہنوں پاؤندا اے مکتی یافتہ ہوئے گا ۔ اوہنوں پاؤن دا مطلب مکتی تے محبت نوں قبول کرنا اے جیہڑی مسیح تہانو ں دے چُکیا اے ۔ ایس محبت ، پاپاں توں معافی ، پاپاں نوں جرن،تے پاپاں دی ایس سزا بارے اپنیاں دلاں وچ ایمان رکھ کے ای اسیں مکتی یافتہ ہوندے آں ۔ ایہہ اوہ ایمان اے جیہڑا مکتی دے انعام نوں پاؤندا اے ۔
خیمۂ اجتماع دی ہر شے یِسُوعؔ مسیح نوں ظاہر کردی اے ۔ خُدا سانوں کوئی قربانی دین لئی نئیں آکھدا ۔ سارا کُجھ جیہڑا اوہ ساڈے توں چاؤہندا اے ایہہ ہیگا اے پئی اسیں مکتی دے انعام اُتے ایمان رکھیے جیہڑا اوہ ساڈیاں دلاں وچ سانوں دے چُکیا اے ۔”تہانوں مکتی داانعام دین لئی ، مَیں ایس زمین اُتے آیا ۔ پُرانے عہد نامے دے قربانی دے لیلے وانگرمَیں ہتھاں دے رکھے جان دے راہیں میرے اُتے لدے گئے تہاڈیاں پاپاں نوں قبول کیتا ، تے قربانی دے ایس پشُو وانگر ، مَیں تہاڈیاں پاپاں دی ڈاہڈی سزا جری ۔ ایس طرح مَیں تہانوں بچا چُکیا ہاں۔“ ایہہ ہے خُدا سانوں خیمۂ اجتماع دےراہیں کیہ دسدا پیا اے ۔
کوئی معنی نئیں رکھدا اِنج خُدا کویں سانوں بچا چُکیا اے ، ساڈے نال اِنج اینی محبت کر چُکیا اے ، تے ایس طریقے نال سانوں کامل مکتی داانعام دے چُکیا اے ، جے اسیں ایمان نئیں رکھدے ،تاں سارا کُجھ بیکار اے ۔تہاڈی الماری وچ رکھے ہوئے لُون نوں ایہدا سواد لُونا بنان لئی پہلوں ایہنوں لازمی سُوپ وچ پاؤنا چاہی دا اے ؛ایسے طرح ، جے تُسیں تے مَیں اپنیاں دلاں وچ ایمان نئیں رکھدے ، ایتھوں تیک پئی اوہدی کامل مکتی وی بالکل بیکار ہو جاندی اے ۔ جے اسیں اپنیاں دلاں وچ پانی تے رُوح دی خوشخبری لئی شکر ادا نئیں کردے تے ایہنوں اپنیاں دلاں وچ قبول نئیں کردے ، یِسُوعؔ دی قربانی بے فائدہ ہو جاندی اے ۔
مکتی تہاڈی ہو سکدی اے صرف جد تُسیں جان دے او پئی یِسُوعؔ ، خُدا مکتی داتا تہانوں کیہ قربانی تے محبت دے چُکیا اے ، اوہناں نوں اپنیاں دلاں وچ قبول کرو تے اوہناں لئی اوہندا شکر ادا کرو ۔ جے تُسیں اپنیاں دلاں وچ مسیح دی کامل مکتی داانعام قبول نئیں کردے سگوں صرف ایہنوں اپنیاں دماغاں وچ سمجھدے او ، تاں ایہہ سارے دا سارا بیکار اے ۔
سارا کُجھ جیہڑا تُسیں کرنا اے صرف سچیائی نوں پھڑنا اے
ایس توں کوئی فرق نئیں پیندا پئی تہاڈا سُوپ چُلہے اُتے کنے چر توں اُبلدا پیا اے ؛جے تُسیں صرف اپنے آپ وچ سوچدے او پئی تُسیں لُون پاؤن جاندے پئے او تے فیر وی اصل وچ اِنج نئیں کردے ، تاں تہاڈا سُوپ کدی لُونا نئیں ہو سکدا ۔ تُسیں اودوں ای مکتی یافتہ ہو سکدے او جد تُسیں اپنیاں دلاں وچ قبول کردے تے ایمان رکھدے او پئی ساڈا خُداوند تہانوں تہاڈیاں پاپاں توں بپتسمہ لین تے ساڈے لئی قربان ہون دے راہیں بچا چُکیا اے ، بالکل جویں قربانی دا پشُو جیہڑا سوختنی قربانی دی قربانگاہ اُتے قربان کیتا جاندا سی ۔ جد خُدا تہانوں مکتی داانعام دیندا پیا اے ، تاں ایہنوں صرف شکرگزاری نال قبول کرو ۔ جد ساڈا خُداوند سانوں دسدا پیا اے پئی اوہ سانوں کامل طریقے نال بچا چُکیا اے، ساڈے کرن لئی ٹھیک کم ایہہ ہیگا اے پئی اسیں صرف ایس اُتے ایمان رکھیے ۔
کیہ خُدا دی محبت جیہڑی اوہ تہانوں دے چُکیا اے صرف وچکارلے دل دی اے ؟ بالکل نئیں !ساڈے خُداوند دی محبت کامل اے ۔ دوجیاں اکھراں وچ ، ساڈا خُداوند تہانوں تے مینوں سارے دے سارےتے کامل طریقے نال بچا چُکیا اے ۔ ایس لئی پئی اوہنے ساڈیاں پاپاں نوں اپنےآپ اُتے اپنے بپتسمے نال کامل طریقے نال چُک لیا تے لازمی سولی اُتے مر گیا ، اسیں ایس محبت دے بارے کوئی شک نئیں کر سکدے ۔ اوہ سانوں اِنج کامل طریقے نال بچا چُکیا اے تے سانوں مکتی داانعام دے چُکیا اے ۔ سانوں ساریاں نو ں لازمی مکتی دے ایس انعام نوں قبول کرنا چاہی دا اے جیہڑا خُدا سانوں دے چُکیا اے ۔
آؤ اسیں تھوڑے چر لئی فرض کرئیے پئی میرے ہتھ وچ بوہت مہنگیاں پتھراں نال بنے ہوئے بوہت مہنگے گہنے نیں۔ جے مَیں ایہنوں تہانوں انعام وانگر دیندا ہاں تاں ، تہانوں صرف ایناں کرنا اے پئی ایہنوں فطری طور اُتے قبول کرنا اے ۔ کیہ اِنج ای نئیں ہیگا ؟ تہاڈے لئی ایہنوں اپنا بنانا کناں سدھا تے سوکھا اے ؟ ایس گہنے نوں اپنا بنان لئی ، تہانوں ایناں کرنا اے پئی ایس تیک اَپڑو تے ایہنوں پھڑ لووو۔ اِنج ای اے ۔
جے تُسیں صرف اپنیاں دلاں نوں کھولو گے تے اوہدے بپتسمے دے راہیں یِسُوعؔ اُتے اپنیاں ساریاں پاپاں نوں لدو گے ، تاں تُسیں سارے سوکھے طریقے نال اپنیاں پاپاں دی معافی پا سکدے او تے اپنیاں سکھنیاں دلاں نوں سچیائی نال بھر سکدے او ۔ ایس طرح خُداوند نے آکھیا پئی اوہ سانوں اک مفت انعام وانگر مکتی دیوے گا ۔ مکتی صرف ایس تیک اَپڑن تے ایس اُتے ایمان رکھن دے راہیں تہاڈی ہو سکدی اے ۔
اسیں مکتی نوں اک انعام وانگر ، ایس لئی اک دھیلا وی دتیوں بغیر پا سکدے آں ۔ تے ایس لئی پئی خُدا اوہ اے جیہڑا ایہہ انعام اوہنوں دے کے خوش ہوندا اے جیہڑا ایہنوں لینا چاہندا اے ، بھاگاں والے نیں اوہ لوک جیہڑے ایہنوں شکرگزاری نال لَے چُکے نیں ۔ اوہ جیہڑے خوشی نال خُدا دی محبت نوں قبول کردے نیں اوہناں اوہدی محبت دے کپڑے پائے ہوئے نیں ، تے اوہ اوہناں وچوں نیں جیہڑے ایس دین والے نال محبت کردے نیں ، ایس لئی پئی ایہنوں قبول کرن دے راہیں ، اوہ اوہدے دل نوں خوش کر چُکے نیں ۔ ایس انعام نوں قبول کرنا کرن لئی ٹھیک کم اے ۔ ایس لئی صرف جد تُسیں کامل مکتی دے انعام نوں قبول کردے او جیہڑا خُدا تہانوں دے چُکیا اے یعنی مکتی دا ایہہ اصلی انعام تہاڈا ہو سکدا اے ۔ جے تُسیں اپنے دلوں ایہنوں قبول نئیں کردے فیرمکتی دا انعام کدی تہاڈا نئیں ہو سکدا ، بھاویں تُسیں کنی ای بوہتی کوشش کیوں نہ کرو ۔
مَیں وی مکتی دا ایہہ انعام قبول کر چُکیا ہاں ۔ ”آہ! خُداوند نے میرے لئی ایس طریقے نال بپتسمہ لیا ۔ ایس طرح بپتسمہ لین دے راہیں ، اوہنے میریاں ساریاں پاپاں دی سزا جری ۔ اوہنے اخیریں میرے بدلے بپتسمہ لیا سی ۔ اے خُداوند ، تیرا شکر ہوئے!“ مَیں ایہہ ایمان رکھن لئی آیا ۔ ایس لئی ،ہُن مَیں بے پاپ آں ۔ مَیں پاپ دی کامل معافی پا چُکیا ہاں ۔ جے تُسیں وی پاپ دی ایہہ معافی پاؤنا چاہندےاو تے مکتی
یافتہ ہونا چاہندے او تاں ، ایہنوں ہُنے قبول کر و ۔
مَیں اودوں توں ہر ویلے مکتی دے ایس انعام دے بارے سوچیا اے ۔ ایتھوں تیک پئی ہُن جد مَیں ایہدے بارے وچ فیر سوچدا ہاں ، مَیں احساس کردا ہاں پئی اپنی مکتی لئی خُداوند دا شکر ادا کرن توں علاوہ ہور کُجھ نئیں کر سکدا ۔ ایس لئی پئی مکتی دی ایہہ محبت میرے دل وچ اے ، مَیں ایہنوں کدی نئیں بھُل سکدا ۔ جد مَیں پہلی واری اسمانی ، ارغوانی ، تے لال دھاگے تے مہین وٹے ہوئے کتان وچ ظاہر ہون والے سچ توں پانی تے رُوح دی خوشخبری نوں قبول کرن تے ایمان رکھن دے راہیں اپنی پاپ توں معافی پائی ، مَیں خُدا دا بے حد شکرگزار ساں۔ تے ہُن وی ، کئی ورہے لنگھ جان دے بعدوں وی ، مَیں حالے تیک اوہو ای شکرگزار دل رکھدا ہاں تے روز نواں ہوندا ہاں ۔
یِسُوعؔ لازمی مینوں بچان لئی ایس زمین اُتے آیا ، ،میریاں ساریاں پاپاں نوں اپنے اُتے لین لئی بپتسمہ لیا ، تے میریاں پاپاں دی سزا نوں جرن لئی سولی اُتے مر گیا ۔ جد مَیں احساس کیتا پئی ایہہ سارا کُجھ میرے لئی کیتا گیا سی ، مَیں چھیتی نال اوہناں نوں قبول کیتا تے اوہناں نوں اپنا بنا لیا ۔ مَیں ہر ویلے احساس کردا ہاں پئی ایہہ بوہت چنگا سی جیہڑا مَیں کدی اپنی ساری زندگی وچ کر چُکیا ہاں ، ایہہ سب توں سیانا تے سوہنا کم اے ۔ ایس لئی مَیں ایمان رکھدا ہاں پئی خُداوند سچ مُچ میرے نال محبت کردا اے تے میری ویکھ بھال کردا اے ، تے مَیں ایہہ وی ایمان رکھدا تے اقرار کردا ہاں پئی اوہنے ایہہ سارا کُجھ ایس لئی کیتا تاں جو اوہنے میرے نال محبت کیتی ۔ ”اے خُداوندا، مَیں اپنی ساری شکرگزار تینوں دیندا ہاں۔ جویں تُو ں میرے نال محبت کر چُکیا ایں ، مَیں وی تیرے نال محبت کردا ہاں ۔“اِنج اقرار کرنا نویں سریوں جمن والیاں لئی اک وڈی خوشی اے ۔
ساڈے خُداوند دی محبت ہمیش تیک نا بدلن والی اے ۔بالکل جویں ساڈے لئی اوہدی محبت ہمیش تیک نئیں بدلدی ، ایسے طرح اوہدے لئی ساڈی محبت وی ہمیش تیک نئیں بدل سکدی ۔ کئی واری ، جد اسیں دکھ جرے تے مشکلاں جردے آں تاں ،ساڈے دل بھٹک سکدے تے اسیں ایتھوں تیک پئی ایس محبت نوں بھُلن تے چھڈن دی تمنا کر سکدے آں ۔ پر ایتھوں تیک پئی جد اسیں اپنی پیِڑ وچ پھس جاندے آں تے ساڈی عقل سانوں ناکام کر دیندی اے ، تے ایتھوں تیک پئی جد اسیں سارا کُجھ جیہڑا سوچ سکدے آں اوہ ساڈی اپنی پیِڑ اے ، فیر وی خُدا سانوں وفاداری نال سنبھالدا اے تاں پئی ساڈے دل اوہدی محبت نوں کدی نا بھُلن ۔
خُدا ساڈے نال سدا محبت کردا اے ۔ پئی ساڈا خُداوند ایس زمین اُتے ساڈے بدلے اک بندے وانگر آیا ایس لئی پئی اوہنے اپنے مرن تیک ساڈے نال محبت رکھی۔ ہُن ، مَیں تہاڈی مِنت کردا ہاں پئی تُسیں اپنے آپ لئی خُدا دی ایس محبت اُتے ایمان رکھو ۔ تے ایہنوں اپنیاں دلاں وچ قبول کرو ۔ کیہ تُسیں ہُن ایمان رکھدے او ؟
مَیں خُداوند دا سانوں ایس محبت نال ساڈیاں پاپاں توں سارے دا سارا بچان لئی شکر ادا کردا ہاں ۔
Copyright © 2021 by The New Life Mission