ကိုဗစ်-၁၉ကပ်ရောဂါနှင့်အပြည်ပြည်ဆိုင်ရာစာပို့လုပ်ငန်းဝန်ဆောင်မှုများပျက်ပြားခြင်းကြောင့်ကျွန်ုပ်တို့၏ 'အခမဲ့ပုံနှိပ်စာအုပ်ဝန်ဆောင်မှု' ကိုယာယီရပ်ဆိုင်းလိုက်သည်။
ဤအခြေအနေ၏အခြေအနေအရကျွန်ုပ်တို့သည်ယခုအချိန်တွင်သင့်အားစာအုပ်များမပို့နိုင်သေးပေ။
ဤကပ်ရောဂါသည်မကြာမီကုန်ဆုံးပြီးစာတိုက်လုပ်ငန်းပြန်လည်စတင်ရန်ဆုတောင်းပါ။
مضمون 10: مُکاشفہ(مُکاشفہ دی کتاب اُتے تفسیر)
[2-4باب] جان دین تِیکروفادار رہو (مُکاشفہ۲:۸ -۱۱)
)مُکاشفہ۲:۸ -۱۱(
کلیسیا دے مڈھلے دیہاڑیاں وچکار ، بوہت سارے مسیحی دھرتی اُتے ڈکو ڈولے کھاندے پئے سن ،مطلب اے اک ایہو جیہی محفوظ تھاں لبھدے پئے سن جتھے اوہ رومی راجیاں دی کُٹ مار توں بھج کے بچ سکن ۔ راجے نیرو دے مرن دے بعدوں وی ،رومی راج نے کُٹ مار دے اپنے کم نوں جاری رکھیا ، ایس لئی پئی مسیحی ایہدے بعدوں نویں راجیاں دے راج دا وی مقابلہ کردے رہے ۔ مُڈھلے پاک لوکاں نیں رومی راجیاں دے جگ دے راج نوں پچھانیا تے پسند کیتا ، پر اوہناں نیں ایہنوں منن توں انکار کر دتا جدوں اوہناں تو ں ایہہ چاہیا گیا پئی اوہ اپنا عقیدہ چھڈ دین ۔ ایس لئی پئی اوہ رومی راجیاں دی ایس گل دے خلاف اُٹھ کھلوتے سن ، مڈھلی کلیسیا دے لنگھے دیہاڑے کُٹ مار تے شہادتاں نال بھر گئے ۔
سانوں اپنےآپ توں ایہہ پچھنا چاہی دا اے پئی کیہ اج دے پاک لوکاں لئی مُکاشفہ دا کلام کوئی خاص تعلق رکھدا اے ؟ بھاویں ، ایہہ لگ بھگ دو ہزار ورہے پہلوں لکھیا گیا سی ، ہُن نئیں ،تے آسیہ دی ست کلیسیاواں نوں لکھیا گیا، سانوں نئیں ۔ ایہہ ساڈے نال کویں تعلق رکھ سکدا اے ؟
ایہہ تعلق رکھدا اے ایس لئی خُدا دا کلام اے جیہڑا سانوں آؤن والے دیہاڑیاں وچ آؤن والے کماں دے بھیتاں توں خبردار دا کردااے ۔ سانوں ایہہ سمجھنا چاہی دا اے پئی اسیں کالے گھوڑے دےزمانے وچ جیوندے پئے آں، مُکاشفہ۶ باب وچ دسے گئے ”چونہہ گھوڑیاں دےزمانیاں “ وچوں تیجا زمانہ ۔ چٹے تے لال گھوڑے دےزمانے دے لنگھن دے بعد، ہُن اسیں کالےگھوڑےوچ جیوندے پئے آں، لگ بھگ ایہدے مُکن اُتے ۔ بدنی تے رُوحانی ، کال سارے جگ نوں بوہت چھیتی سہنا پوے گا ۔ اصل وچ ، ایہہ آکھنا خورے ٹھیک اے پئی کال دا ایہہ زمانہ پہلوں ای آگیا اے ۔ جدوں کالے گھوڑے دا ہُن دازمانہ ، کال دازمانہ ، لنگھ جاوے گا ، پیلے گھوڑے دا زمانہ آجاوے گا ۔
ست مہراں دےبارے مُکاشفہ ۶ باب وچ لکھیا گیا اے دا مطلب ایہہ ہیگا اے پئی خُدا نے مسیح وچ کُل ستاں زمانیاں دی منصوبہ بندی کیتی اے ۔ جدوں اوہنے سارے جگ نوں بنایا سی ۔ پہلازمانہ ، چٹے گھوڑے دازمانہ ، خوشخبری دا زمانہ اے ؛ دوجازمانہ ، لال گھوڑے دا زمانہ ، شیطان دا زمانہ اے جدوں شیطان جگ وچ وڈی پریشانی لیایا ، جنگاں کروائیاں ، تے خُدا دی کلیسیا دی مخالفت کردارہیا ۔ ایہناں زمانیاں دے بعدوں کالے گھوڑے دا زمانہ، اک ایہو جیہا زمانہ اے جنہے جگ نوں بدنی تے رُوحانی کال نال برباد کیتا ۔ کالے گھوڑے دا ایہہ زمانہ کجھ چِر پہلوں ای شروع ہویا اے ۔
جدوں ایہہ زمانہ مُک جاوے گا، پیلے گھوڑےدا زمانہ شروع ہو جاوے گا ، جیہدے وچ مخالفِ مسیح نکلے گا ، ایسے طرحاں مُکاشفہ ۸ باب وچ دسیاں گئیاں ست نرسنگیاں دیاں آفتاں شروع ہون گئیاں ۔جدوں ستاں نرسنگیاں وچوں اخیری نرسنگا پھوکیا جاوے گا ، پاک لوکاں نوں چُک لیا جاوےگا ، تے ایہدے بعدوں ست پیالیاں دیاں آفتاں آؤن گئیاں۔ ایہدےبعدوں ہَوا وچ چُکےجان والے پاک لوکاں دامیمنے نال ویاہ ہووے گا ، تے جدوں ست پیالیاں دی ساریاں آفتاں مُک جان گئیاں ، فیر خُداوند ساڈے نال دھرتی اُتے واپس آوےگا تے اپنی ہزارورہیاں دی بادشاہی نوں شروع کرے گا ۔ایہدے بعدوں ہزارورہیاں دی بادشاہی دے بعدوں نواں اسمان تے دھرتی آؤن گے ایہہ اوہناں پاک لوکاں لئی آؤن گے جیہڑے اپنی پہلی قیامت توں ہزارورہیاں دی بادشاہی وچ جیوندے پئے سی۔
ایس لئی مُکاشفہ دی کتاب دے حوالے ، جویں ” جان دین تِیکر وی وفادار رہو تے مَیں تینُوں زِندگی دا تاج دیاں گا، “تے ” جیہڑا جتے اوہنوں دُوجی مَوت توں نُقصان نا پہنچے گا، “ ایہہ سارے سدھے ساڈے نال تعلق رکھدے نیں ۔ مُکاشفہ دا کلام ، دوجے اکھراں وچ ، اوہناںمسیحیاں لئی ٹوکن والےوانگر اے جیہڑے اج دے دیہاڑےوچ رہندے پئے نیں ۔ جے مُکاشفہ دا کلام ساڈے نال رَلدا ملدانئیں تاں ، خُدا دے ایس سارے کلام دا کوئی فائدہ نئیں ہوندا ۔
ایناں ستاں زمانیاں دا ارادہ جیہڑا مُکاشفہ دی کتاب وچ دسیا گیااے مسیح ساڈے خُداوند وچ لاگُو تے کامل ہو یا اے ۔ جدوں پیلے گھوڑے دا زمانہ آجاوے گا ، تاں مخالفِ مسیح اپناآپ وکھاوے گا ۔ سانوں خُدا دےکلام توں ایہہ جانن دی لوڑ ہیگی اے پئی اوس ویلے لئی ساڈے خُداوند دا کیہ ارادہ اے ۔ ایہہ گل بالکل فکر والی اے پئی اسیں ساریاں نیں مُکاشفہ دےکلام وچوں ایہہ سمجھیا اے پئی خُدا نے ساڈے لئی کویں اپنا سارا ارادہ بنایا تے اوہ ایہنوں کویں پورا کرے گا — جگ اُتے کیہڑیاں آفتاں آؤن گئیاں ، ایمانداراں نال کیہ ہووے گا ، کیہ آفتاں بے ایماناں نوں برباد کرن گئیاں ، تے ایسے طرحاں ۔ تہانوں اپنے لئی مُکاشفہ دے ایس کلام د ی خاص لوڑ تے تعلق نوں مننا تے ایہدے اُتے ایمان رکھنا چاہی دااے ۔
تہانوں مُکاشفہ دی کتاب کیہ آکھدی اے ، ایہدے بارے وچ وی چنگی طرحاں سمجھ ہونی چاہی دی اے ، جویں ست ورہیاں دی وڈے دکھاں نوں جرنا تے مسیح دا دوبارہ آؤنا ۔ اج دے بوہتے مسیحی دکھ جرن توں پہلوں چُکے جان دے نظریے اُتے ایمان رکھدے نیں ، جیہڑا انگلینڈ وچ پہلی واری ۱۸۳۰ ء وچ وکھالی دتاسی تے ایہدے بعدوں موڈی بائبل انسٹی ٹیوٹ وچ اک پروفیسر ، سی ۔ آئی سکو فیلڈ نام دے استاد نے ایہنوں بوہت چوکھا مشہور کیتا سی ۔
ایہہ نظریہ دعویٰ کردا اے پئی پاک لوکاں دا چُکیا جانا وڈے دکھ جرن دے ست ورہیاں دا زمانہ شروع ہون توں پہلوں ہووےگا ۔ ایس خیال وچ ،پہلوں غیر یہودیاں نوں چُکیا جاوے گا ، تے فیر خُدا بنی اسرائیل دی مکتی لئی اپنا کم شروع کرے گا ۔ ایہہ وی پئی پاک لوکاں دا چُکیا جانا مخالفِ مسیح دے نکلن تے ست پیالیاں دیاں آفتاں دونواں توں پہلوں ہووےگا ۔
عام طور اُتے ، بوہتے مسیحی یاں تاں ہزار ورہیاں دی بادشای دی مخالفت کرن والے نظریے یاں دکھ جرن توں پہلوں چُکے جان دے ایس نظریےاُتے ایمان رکھدے نیں ۔ پر ایہہ صرف فرضی گلاں نیں جیہڑیاں بے تُکیاں تعلیماں تے بائبل دی ادھی سمجھ دے سبب بنیاں سن ۔ ایماندار مُکاشفہ دی کتاب دے بارے وچ جیہڑے بوہتے سوال رکھدے نیں اوہناں لئی ایناں دے جواب دین دی تھاں اُتے ، ایناں خیالاں نے مُکاشفہ دے کلام دے بارے وچ ہو ر وی سوال تے شک شُبے بنا کے فائدے توں بوہتا گھاٹا دتا اے ۔
جے دُکھ جرن توں پہلوں چُکے جان دا نظریہ ٹھیک سی تاں ، غیر یہودی ایمانداراں لئی مُکاشفہ دی کتاب کیہ تعلق رکھے گی ؟ وڈے دکھ جرنا تے دکھاں دا سلسلہ جنہاں دی مُکاشفہ وچ نبوت کیتی گئی اے ساڈے لئی کوئی تعلق نئیں رکھن گے ، ایس لئی پئی سانوں ساریاں نوں پہلوں ای چُک لیا جاوے گا ۔ایہوای وجہ اے بوہت سارے لوک مُکاشفہ دے کلام نوں ایمان رکھن دی تھاں حیرانگی دا معاملہ سمجھدے نیں ۔
پر سانوں ایہہ سمجھنا چاہی دا اے پئی مُکاشفہ دا کلام ساڈے لئی سمجھاؤن دا تعلق رکھدا اے جیہڑے اج دے دیہاڑیاں وچ رہندے پئے آں۔ مینوں تہاڈے کولوں ایہہ پچھن دیوو: کیہ تُسیں خُدا دے کلام اُتے ایمان رکھدے او ، یاں تُسیں استاداں دیاں گلا ں اُتے ایمان رکھدے او ؟ اخیری زمانیاں اُتے بوہت چوکھے نظریے ہیگے نیں ، ہزارورہیاں دی بادشاہی دی مخالفت دے نظریےتو ں لَے کے ہزارورہیاں دی بادشاہی دے بعدوں چُکے جان دا نظریہ ، وڈے دکھ جرن دے بعدوں چُکے جان دا نظریہ، وڈے دکھ جرن توں پہلوں چُکے جان دانظریہ، وڈے دکھ جرن دے وچکار چُکے جان دا نظریہ، وغیرہ ۔ استاداں دے مقرر کیتے گئے ایہہ نظریےبس اِنج ای نیں پئی—اوہ صرف ، خیالاں ، دعویاں تے شک شُبہیاں توں ودھ کے ہور کجھ نئیں ۔
تُسیں ایناں وچوں کیہڑے نظریے اُتے ایمان رکھدے او ؟ بوہت سارے لوک آکھدے نیں پئی اوہ وڈے دکھ جرن توں پہلوں چُکے جان دےنظریے اُتے ایمان رکھدے نیں ایس لئی پئی ایہو ای اوہ شے اے جیہڑی اوہناں نیں اپنے پادریاں کولوں سکھی اے۔ پر میَں تہانوں کھول کے تے سچ سچ دسدا چلاں : تُسیں تےمیَں ستاں نرسنگیاں دیاں آفتاں وچوں لنگھاں گے تے وڈے دکھ جرن دے وچکار تیک رہواں گے ۔ ایس لئی پئی وڈے دکھ جرن وچوں لنگھنا ساڈا نصیب اے ، ساڈا ایمان ایناں سچا تے پکا ہونا چاہی دا اے پئی اسیں اوہناں ازمائشاں تے دُکھاں اُتے فتح پا سکیے جیہڑیاں سانوں اُڈیکدیاں نیں ۔
کیہ ہووے گا جے تُسیں دکھ جرن توں پہلوں چُکے جان دےنظریے اُتے ایمان رکھدے او ، اپنے آپ توں سوچو ، ”میَں وڈے دکھ جرن توں پہلوں چُک لیا جاواں گا ؛ میَں ایس توں بے پرواہ نئیں ہو سکدا ، “تے اخیری ویلے لئی اپنے ایمان نوں پکا نئیں کردے ؟ جدوں وڈے دکھ جرن دا ست ورہیاں دا زمانہ آوے گا جویں خُدا دا کلام فرماؤندا اے اِنج ہووے گا ، اوہ لوک جنہاں نیں اپنے ایمان نوں وڈے دکھ جرن لئی پکا نئیں کیتا اوہ بوہت اڑاؤنی ، دکھ ،تے ایتھوں تیک پئی موت وچ ڈُب جان گے — ایہہ پئی یسوع اُتے اوہناں دا ایمان ساریاں نوں ہلا کے رکھ دین والا ہو سکدا اے ۔ اوہناں وچوں بوہت سارے لوک دُکھ جرن اُتے فتح پاؤن دے لائق نئیں ہون گے تے اپنے ایمان دی جنگ ہاردے ہوئیاں مُک جان گے ۔
وڈے دکھ جرن توں پہلوں چُکے جان دے نظریے دے ظاہر ہون توں پہلوں، بوہت ساریاں مسیحیاں نیں اصل وچ ایہہ سمجھیا سی پئی اوہ وڈے دکھ جرن دے پورے ست ورہیاں دےزمانے وچوں لنگھن گے ، تے ایہہ پئی اوہناں دے مکن دے بعدوں ای اوہناں نوں چُکیا جاوے گا جدوں مسیح اپنی دوجی آمد اُتے آوے گا ۔ ایہہ سوچ کے پئی اوہناں نوں ست ورہیاں دے چِر دے ہر ورہے نوں سہنا پوے گا، اوہناں نیں بے چینی وچ، سگوں وڈے ڈر نال وی اپنا ایمان پکا کیتا۔ ساریاں آفتاں وچوں لنگھنا لازمی اوہناں لئی ڈراؤنا ویلا ہووے گا ، جویں پئی سچ مُچ کسے لئی ہونا چاہی دا اے ۔ پر ایہو جیہا ایمان صرف
اک تعلیمی نظریہ سی ۔ خُدا دے کلام نوں نہ جانن دی اک پیداوار ۔
فیر ایہو جیہے پُرانیاں رسماں پسند کرن والے وی نیں جیہڑے ہزار ورہیاں دی بادشاہی دی مخالفت دے نظریے اُتے ایمان رکھدے نیں ۔ ایہہ لوک ہزار ورہیاں دی بادشاہی نوں نشان طور اُتے ویکھدے نیں ۔ اوہ ایہنوں امن دی نشانی دی نمائندگی وانگر ویکھدے نیں جیہڑے مسیح اُتے ایمان رکھن والے اپنی مکتی راہیں پاؤندے نیں ۔ جے ایہو جیہے تعلیمی خیال سچے سن ، تاں اسیں ایس گل دی پرواہ نئیں کرسکدے ساں پئی جگ نال کیہ ہوندااے ، ایس لئی پئی سانوں ساریاں نوں دکھ جرن دے شروع ہون توں پہلوں ای خُدا دے ولوں ہَوا وچ چُک لیا جانا سی ۔
پر جے اوہ سچ نئیں سن تاں ، فیر کیہ ہووے گا؟ اپنے ایمان نوں پکیاں کیتیوں اڈ دکھاں نوں جردے ، اسیں سُنّ ہو کے ڈر دے جال وچ پھس جاواں گے ۔ اسیں اپنے ایمان دی راکھی کرن دے لائق نئیں ہوواں گے ، ازمائشاں تے دکھ جرن دیاں لہراں اگے نیویں ہونا ،تے باقی جگ وانگر ایسے طرحاں وگدے ہوئیاں مُک جاواں گے ۔ پر خُدا نے سانوں دسیا اے پئی جنہاں دے نام حیاتی دی کتاب وچ لکھے گئے نیں — مطلب اے ، اوہ لوک جیہڑے پانی تے رُوح دے راہیں نویں سریوں جمے پیندے نیں—اوہ کدی ہتھیار نئیں سُٹن گے ۔
خُدا اپنے مُکاشفہ دے کلام وچ سانوں دسدا اے پئی جیہڑے لوک نویں سریوں جم پئے نیں اوہ ایمان دے راہیں وڈے دکھ جرن دیاں ازمائشاں اُتے فتح پاؤن گے ، تے ایہہ پئی دکھ جرن وچکار ای اوہ اوہناں نوں ہَوا وچ اُتاں چُک لوے گا۔ دکھ جرن توں پہلے چُکے جان دا نظریہ بائبل دے ایس سچ توں وکھ ہو جاندا اے ، ایہدا مطلب ایہہ ہیگا اے پئی ایہہ دعویٰ صرف بندیاں دا آپ بنایا دلی خیال اے ۔ ایہہ دوجے اکھراں وچ ، اک جھوٹ اے ، سچیائی نئیں ۔
فیر وی سار ے جگ وچ بوہتیاں لوکاں نیں دکھ جرن توں پہلوں چُکے جان دے ایس نظریے نوں پسند کیتا اے ۔ اوہ لوک جیہڑے سکو فیلڈ دے دُکھ جرن توں پہلوں چُکے جان دےنظریےدی تعلیم اُتے ایمان رکھدے نیں ، اوہ ہیٹھاں لکھیاں ہویاں گلاں اُتے ایمان رکھدے نیں ۔
۱۔ وڈےدُکھ جرن دےست ورہیاں دا زمانہ اخیری ویلیاں وچ مخالفِ مسیح دے نکلن دے بعدوں شروع ہووے گا ۔
۲۔مخالفِ مسیح وڈےدُکھ جرن دےست ورہیاں دے زمانے وچکار سارے جگ اُتے راج کرے گا ؛ ست ورہیاں دےزمانے دے پہلےادھے حصے وچ ، اوہ اک ترس کھان والے راجے وانگر راج کرے گا ، تے ایس توں بعد دے ادھے حصے وچ اوہ اک شرارتی بے رحم وانگر راج کرے گا ۔
۳۔یروشلیم وچ ہیکل دوبارہ بنائی جاوے گی تے قربانی دے پسوُآں دی قربانی اک واری فیر شروع ہووے گی ۔
۴۔ مخالفِ مسیح بنی اسرائیل نال ست ورہیاں دا وعدہ کرے گا۔
۵۔دُکھ جرن دے پہلے ساڈھے تِن ورہیاں دے بعدوں ، مخالفِ مسیح بنی اسرائیل نال ایس وعدے نوں توڑ دیوے گا ۔
۶۔ ایہہ ساڈھے تِن ورہے بنی اسرائیل لئی وڈے دُکھ جرن تے کُٹ مار داویلا ہووے گا ۔ ایس چِر وچکار فضل دی خوشخبری دی تھاں اُتے ہزار ورہیاں دی بادشاہی دی خوشخبری دی منادی کیتی جاوے گی ۔
۷۔ بنی اسرائیل وچوں ،۰۰۰,۱۴۴ دُکھ جرن توں بچ جان گے ۔
۸۔ دُکھ جرن دا مکنا ہرمجدون دی جنگ نال ہووے گا ۔
اُتے لکھیاں ہویاں شرطاں وچوں وڈے دُکھ جرن دی گل کرن دے بعد وں،سکو فیلڈ نے دُکھ جرن دے وچکار اوپریاں قوماں نال کیہ ہووے گا ایہدے بارے کوئی گل نئیں کیتی ۔ دوجے اکھراں وچ ، سکوفیلڈ نے ایہہ بحث کیتی پئی ساریاں اوپریاں قوماں جیہڑیاں مسیح اُتے ایمان رکھدیاں نیں دُکھ جرن دے شروع ہون توں پہلوں ای چُک لئیاں جان گئیاں ، تے ایہہ پئی اوہناں دے چُکے جان دے بعدوں ای خُدا بنی اسرائیل وچکار کم کرنا شروع کرے گا ۔ اوہدا کم ۰۰۰,۱۴۴ اسرائیلیاں دی مکتی نال پورا ہووے گا ، تے ایہدے نال ای اوہ اپنی مکتی دا کم مکا دیوے گا ۔ ایہدے بعدوں ہزار ورہیاں دی بادشاہی شروع ہووے گی ۔
سکو فیلڈ اُتے بوہت اثر تے دُکھ جرن توں پہلوں چُکے جان دے ایہدے دعوے جون نیلسن ڈاربی ولوں آئے سن ،جیہڑا اوس جھنڈدا آگُو سی ، جیہڑا پلئموت بھراواں دے نام توں مشہور سی ، جنہے اک پینتی کاسٹل استاد نال ملن دےبعدوں ایس نظریے دی حمایت کیتی ۔ ایہہ استاد اصل وچ اسکاٹ لینڈ دی مارگریٹ میک ڈونلڈنام دی اک پندرہ ورہیاں دے کُڑی سی ، جنہے ۱۸۳۰ء وچ دعویٰ کیتا سی پئی اوہنے خُدا ولوں اک رویا ویکھی جیہدے وچ اوہنے ویکھیا پئی مسیحیاں نوں دُکھ جرن توں پہلوں ای چُک لیا گیا سی ۔ اوس کُڑی نال ملن دے بعدوں ڈاربی نے دُکھ جرن توں پہلوں ای چُکے جان دے نظریے دیاں تعلیماں
دینیاں شروع کر دتیاں ۔
ایہدے بعدوں ڈاربی دیاں تعلیماں اک امریکی دینی استاد سکوفیلڈ کول اپڑ گئیاں ۔ سکوفیلڈ جنہے اپنی ساری حیاتی بوہت چوکھی ورتی جان والی اپنی سکوفیلڈ ریفرنس بائبل اُتے کم کردے ہوئیاں بسر کیتی ، اوس ویلے ایس سوال بارے سوچدا پیا سی پئی کیہ چُکیا جانا دُکھ جرن توں پہلوں یاں ایہدے بعدوں ہووے گا ۔ جدوں سکوفیلڈ نے ڈاربی دے دُکھ جرن توں پہلوں چُکے جان دے نظریے بارے سنیا تاں ، اوہ اوہدے وچ سارے دا سارا ڈُب گیا ، تے اوہدے دعویاں اُتے پوری طرحاں توجہ دین دے بعدوں ، اوہنے ایس نویں خیال نوں اپنی سکوفیلڈ ریفرنس بائبل وچ رَلا ن نال من لیا۔ ایس طرحاں سکوفیلڈ نے دُکھ جرن توں پہلوں چُکے جان دے خیال اُتے یقین کیتا تے ایہدے بارے بحث کیتی ، تے ایسے طرحاں اج دے بوہتے مسیحی وی ایہدے پچھے چلدے نیں ۔
ایس توں پہلوں پئی دُکھ جرن توں پہلوں چُکے جان دے نظریے نوں ڈاربی تے سکوفیلڈ نے دسیا سی ، بوہتے مسیحی دُکھ جرن توں بعدوں چُکے جان دے نظریے اُتے ایمان رکھدے سن ۔ پر سکوفیلڈ ،جیہڑا امریکہ وچ موڈی بائبل انسٹی ٹیوٹ وچ اک پروفیسرسی ، نے خیالی کماں اُتے خاص کر کے سکوفیلڈ ریفرنس بائبل دے اثراں نال بوہتا اثر پایا ۔ ایہہ سکوفیلڈ تے اوہدی جان پچھان دے سبب سی پئی دُکھ جرن توں پہلوں چُکے جان دا نظریہ سارے جگ وچ مسیحی برادریاں وچ بوہت ودھ گیا سی ۔
بے نصیبی نال ، ایہدے نتیجے وچ ، اج دے بوہت سارے مسیحی اپنے ایمان وچ مٹھی نیندر سُتے ہوئے نیں ۔ اوہ سُتے ہوئے نیں ایس لئی پئی اوہ غلطی نال سوچدے نیں پئی مخالفِ مسیح دے نکلن دا اوہناں نال کوئی تعلق نئیں ہووے گا ۔ اوہ آکھدے نیں اوہناں نوں وڈے دکھ جرن دے زمانے لئی اپنے ایمان نوں پکیاں کرن دی کوئی لوڑ نئیں ، ایس لئی پئی اوہناں دا بھروسہ اے پئی ایہدے شروع ہون توں پہلوں ا ی اوہناں نوں چُک لیا جاوے گا ۔ پر ساڈے خُداوند نے سانوں ہمیش جاگدے رہن لئی آکھیا اے ، ایس لئی پئی کسے نوں نئیں پتہ پئی لاڑا کدوں آوے گا ۔ فیر وی دُکھ والی گل ایہہ ہیگی اے پئی ،جیہڑےلوک خُدا دے کلام نوں ردّ کردے نیں تے ایہدی تھاں اُتے دُکھ جرن توں پہلوں چُکے جان دیاں تعلیماں اُتے یقین رکھدے نیں ، مٹھی نیندر وچ سُتے ہوئے نیں ۔
پر ہُن جاگن دا ویلا آگیا اے ۔ہُن ویلا آگیا اے پئی تُسیں دُکھ جرن توں پہلوں چُکے جان دے بارے وچ اپنے غلط ایمان نوں چھڈ دیوو تے سچیائی دےکلام اُتے بھروسہ کرو۔ نہ تاں دُکھ جرن توں پہلوں چُکے جان دا نظریہ تے نہ ای دکھ جرن توں بعدوں چُکے جان دا نظریہ بائبل دے مطابق کوئی بنیاد رکھدا اے ۔ تہانوں خُدا دے سچے کلام ول مُڑنا چاہی دا اے۔ مُکاشفہ دا کلام (۶:۸) سانوں دسدا اے ، ” تے مَیں دھیان کِیتا تے کِیہ ویکھنا آں پئی اِک پِیلا جیہا گھوڑا اے تے اوہدے سوار دا ناں مَوت اے تے پاتال اوہدے پِچّھے پِچّھے اے تے اوہناں نُوں زمین دی چوتھائی اُتّے ایہہ اختیار دِتّا گیا۔ پئی تلوار تے کال تے ڈاکی تے زمین دے پشُوآں نال لوکاں نُوں مارن۔ “
ایتھے آکھیا گیا اے پئی پیلے گھوڑے اُتے بیٹھے ہوئے بندے دا نام ، مخالفِ مسیح ، موت سی ، تے پاتال اوہدے پچھے پچھے اے ۔ ایہدا مطلب ایہہ ہیگا اے پئی مخالفِ مسیح اک قاتل اے جیہڑا اپنے شکاراں نوں دوزخ ول لَے جاندااے ۔ ایتھے ایہہ وی آکھیا جاندا اے پئی اوہنوں دھرتی دے اک چوتھائی حصے اُتے تلوا ر نال ، بُھک نال ، موت نال تے زمین دے پشُوآں کولوں قتل کراؤن دی طاقت دتی جاوے گی ۔ مخالفِ مسیح دوجے اکھراں وچ ، رومی راجیاں وانگر ای بے ترسی دے طریقےورتےگا —صرف ایس وار وی بھیڑا —مسیحیاں نوں مار دینا ، بے سلوکی کرنا ، تے کُٹ مار کرنی تے اوہناں دے ایمان نوں مکاؤنا ۔
تہانوں ایہہ سوچنا چاہی دا اے پئی پیلے گھوڑے دازمانہ مخالفِ مسیح دازمانہ اے ۔ خُداوند سانوں دسدااے ، ” تے سرگھی ویلے آکھدے ہو۔ ”پئی اَج ہنیری وگے گی کیوں جو اسمان لال تے گہرا اے۔“ اسمان دی ڈول دی جاچ کرنی تُہانوں آؤندی اے پر سمیاں دے نِشان تُسی معلُوم نئیں کر سکدے؟ “ (متی ۱۶: ۳)۔جدوں اسیں جگ دے رنگ بدلن بارے نئیں جان سکدے ، اسیں نئیں جان سکدے پئی سانوں کِنج دا ایمان رکھنا چاہی دا اے ، تے ایس طرحاں اسیں نہ تاں بیج بو سکدے آں تے نہ ای پھل وڈھ سکدے آں — دوجے اکھراں وچ، اسیں خُداوند لئی کم نئیں کرسکدے ۔ اج ، لال گھوڑے دا زمانہ لنگھ گیا اے ، تے اسیں کالے گھوڑے دے زمانے وچ ہیگے آں ۔ جگ بوہت چھیتی وڈیاں پیسے دھیلے دیاں مصیبتاں وچ پھس جاوے گاتے وڈے کال دا ایہدے اُتے ویلا آوے گا ۔سارے جگ وچ بُھک تے فاقہ ہر دیہاڑے ودھدا جاوے گا ۔ جدوں ایہہ سارے کم ہون گے ، تاں بوہت سارے لوک چوکھی پیڑ نال دُکھی ہون گے ۔ اوہناں وچوں اک نہ بنو؛ایہدی تھاں اُتے ، اوہناں وچوں اک بنو جیہدا ایمان جگ دے رنگاں نوں پچھان سکدا اے ۔
اج دا زمانہ کالے گھوڑے دا زمانہ اے ۔ جدوں کالے گھوڑے دا ایہہ زمانہ لنگھ جاوے گا ، پیلے گھوڑے دا زمانہ آجاوے گا ۔ ایس زمانے وچ نکلن والا مخالفِ مسیح ،پاک لوکا ں نوں انھے وا قتل کرے گا
تے کُٹ مار کرے گا ، ایس زمانےنوں شہاد ت دا زمانہ آکھیا جاندا اے ۔
مُکاشفہ ۱۳: ۶۔۸ آکھدا اے ، ” تے اوس خُدا دے بارے کُفر بکن لئی مُنھ کھولیا پئی اوہدے ناں تے اوہدے خیمے دے بارے یعنی اسمان دے رہن والیاں دے بارے کُفر بکے۔ تے اوہنوں ایہہ اختیار دِتّا گیا پئی پاک لوکاں نال لڑے تے اوہناں نُوں جِت لَئے تے اوہنوں ہر اِک گھرانے تے اُمّت تے قوم اُتّے اختیار دِتّا گیا۔تے زمین دے اوہ سارے رہن والے اوہدی پُوجا کرن گے جِنہاں دے ناں اوس لیلے دی حیاتی دی کتاب وِچ لِکھے نئیں سن گئے جیہڑا دُنیا دے مُڈھ توں پہلاں ہلال ہویا ہویا اے۔ “ ”تےاوس“ ایتھے مخالفِ مسیح نوں بیان کردا اے ۔ایہہ عبارت سانوں دسدی اے پئی جگ دے اک راجے نوں خُدا دے بارے کفر بکن تے پاک لوکاں نوں دُکھ دین لئی شیطان دی طاقت دتی جاوے گی ۔ ایہہ شیطان دا پُتر اے ، وڈے سپ دی طاقت نال ۔ اوہ اپنی طاقت نال پاک لوکاں نال لڑے گا تے اوہناں اُتے ”فتح“پاوے گا ۔ پر فتح پاؤن توں ، ایہدا صرف ایہہ مطلب اے پئی اوہ پاک لوکاں نوں شہید کرے گا ۔ ایہدا مطلب پاک لوکاں دی صرف بدنی موت اے۔ مخالفِ مسیح کدی وی پاک لوکاں دے ایمان نوں نئیں مکا سکدا ۔
سکوفیلڈ نے جیہڑی بحث کیتی اوہ ایہہ سی پئی پاک لوکاں نوں وڈے دُکھ بالکل نئیں سہنے پین گے ۔ پر ست ورہیاں دے وڈیاں دُکھاں نوں جرنوں اڈ ، پاک لوکاں لئی کوئی ہزارودہیاں دی بادشاہی نئیں ہو سکدی ۔ پاک لوک وڈے دُکھاں وچوں شہید بن کے نکل آؤن گے ۔ بائبل دی ایہہ نبوت بالکل جگ دے شروع توں ای مسیح یسوع وچ بنائی گئی سی ۔ سارے جگ دا مُکا اوہناں کماں نال مُک ہووے گا جیہڑے یسوع کرے گا ۔
تہانوں اوہناں ستاں زمانیاں نوں سمجھن دے لائق ہونا چاہی دا اے جیہڑے خُدا نے ساڈے لئی بنائے نیں ۔ پہلازمانہ چٹے گھوڑے دا زمانہ اے ، اوہ زمانہ جیہدے وچ خُدا دا کلام اپنا کم شروع کردا اے ۔ دوجازمانہ، لال گھوڑے دا زمانہ ، شیطان دا زمانہ اے ۔ کالے گھوڑے دا تیجا زمانہ بدنی تے رُوحانی کال دا زمانہ اے ۔ پیلے گھوڑے دا چوتھا زمانہ مخالفِ مسیح دے نکلن دازمانہ اے ۔ ایہہ ست نرسنگیاں دا زمانہ، شہادت دا زمانہ اے ۔ پیلے گھوڑے دے ایس زمانے نوں ناسمجھنا اے جیہڑا لوکاں نوں بوہت پریشان کر دیندا اے ۔
ایس زمانےنوں جانیوں اڈ ،اسیں نویں سریوں جمن والے مسیحیاں وانگر ٹھیک طریقے نال اپنی حیاتی نئیں بسر کرسکدے ۔ جے اسیں اوس شے توں سُتے رہیے جیہڑی سانوں اڈیکدی اے تاں، اسیں
آؤن والے دناں لئی کِیویں تیار رہ سکدے آں؟ ایتھوں تیک پئی اوہ لوک جیہڑے کاروبار چلاؤندے نیں اوہناں نوں کامیاب ہون لئی ویلے دے رنگ بدلن نوں پہلوں ای جان لینا چاہی دا اے ۔ اسیں کویں کر سکدے آں ، مسیح وچ ایماندار ، اوہدے واپس آؤن لئی کویں تیار ہوسکدے نیں جدوں سانوں نئیں پتہ پئی سانوں کیہ اُڈیکدااے ؟
سانوں ایہدے لئی تیار ہون لئی وڈے دُکھ جرن دی بوہتی تعلیم ہونی چاہی دی اے ۔ پاک لوک دُکھ جرن دے پہلے ساڈھے تِن ورہیاں تیک جیوندے رہن گے ، تے ایسے ویلے وچکار اوہ شہید ہون گے ۔ اوہ دُکھ جرن دے پورے ستاں ورہیاں نوں نئیں لنگھاؤن گے ، سگوں صرف پہلے ادھے حصے وچوں ، تے فیر ، اوہناں دی شہادت دے نال ای اوہناں دا جیوں اُٹھنا تے چُکیاجانا ہووے گا ۔ جدوں پاک لوکاں دا چُکیا جانا ہووے گا، ایہدا مطلب ایہہ نئیں ہیگا پئی مسیح دھرتی اُتے اُترے گا ، سگوں ایہہ پئی خُداوند اوہناں نوں میمنے دے ویاہ دے جشن اُتے ہَوا وچ چُک لوے گا ۔
ایس وچکار ، ایہہ دھرتی ستاں پیالیاں دے دُکھاں وچ پھس جاوے گی ۔ او ہ لوک جیہڑے دکھاں دے بعد مسیحا نال دھرتی اُتے واپس آؤن گے اوہو لوک نیں جنہاں دے پاپاں نوں معاف کر دتا گیا اے ، برف وانگر چٹے ، پانی تے روح دی خوشخبری اُتے ایمان رکھن دے راہیں جیہڑی خُداوند نے سانوں دتی اے ۔ ایس لئی سانوں ایس زمانےتے ایہدے خاص تعلق تے لوڑ نوں سمجھ کے اپنے ایمان نوں پکیاں کرنا چاہی دا اے ۔
ساڈے خُداوند نے سمُرنا دی کلیسیادے فرشتے نوں آکھیا ، ” پئی مَیں تیری مُصِیبت تے غرِیبی نُوں جاننا آں (پر تُوں دَولتمند ایں) تے جیہڑے اپنے آپ نُوں یہُودی آکھدے نیں تے اوہ ہَین نئیں سگوں شیطان دی جماعت نیں اوہناں دِیاں طعنیاں مہِنیاں نُوں وی جاننا آں۔ جیہڑے دُکھ تینُوں جَھلّنے پَین گے۔ اوہناں توں نا ڈر۔ ویکھو ابلیس تُہاڈے وِچوں کُجھ نُوں قید وِچ پان نُوں تیار اے۔ پئی تُسی ازمائے جاؤ تے دَس دِناں تِیکر مُصِیبت پاؤ گے۔ جان دین تِیکر وی وفادار رہو تے مَیں تینُوں زِندگی دا تاج دیاں گا ۔“ اسیں حوالے وچ ، اسیں ویکھ سکدے آں پئی سمُرنا دی کلیسیا نوں یہودیاں نیں بوہت چوکھا ستایا سی ۔ پر خُداوند نے آکھیا پئی ایہہ یہودی سچے یہودی نئیں سن ، سگوں شیطان دی جماعت سن ۔ اوہنے ایہہ صرف سمُرنا دی کلیسیا نوں ای نئیں آکھیا، سگوں آسیہ دیاں ساریاں ستاں کلیسیاواں نوں وی آکھیا ۔
سمُرنا وچ یہودیاں دی اک وڈی جماعت ہیگی سی ، جیہڑی ، ایس سچیائی دے ہوندیاں ہویاں پئی یہودی جیہڑے خُدا دی بھگتی کردے سن مسیح دے منن والے وی اوسے خُدا دی بھگتی کردے سن ، ایہدے ہوندیاں ہویاں وی ، سمُرنا دی کلیسیا دے پاک لوکاں نوں کُٹیا ماریا گیا سی ، جویں رومیاں کیتا سی ۔ ایہناں دُکھاں نوں جرن والے پا ک لوکاں نوں خُدا نےآکھیا ، ” جان دین تِیکر وی وفادار رہو تے مَیں تینُوں زِندگی دا تاج دیاں گا ۔“ تے ، ” جیہڑا جتے اوہنوں دُوجی مَوت توں نُقصان نا پہنچے گا۔“ خُدا نے پاک لوکاں نوں آکھیا پئی اوہناں نوں لازمی فتح پاؤنی چاہی دی اے ۔ ایس طرحاں ، سانوں، وی ، اخیر تیک مخالف ِ مسیح نال لڑنا چاہی دا اے تے اپنے ایمان دے جنگ وچ اوہدے اُتے فتح پاؤنی چاہی دی اے ۔ ایہدے بعدوں ساڈا خُداوند سانوں زِندگی دا تاج دیوے گا — دوجے اکھراں وچ ، اوہ سانوں ، ہزار ورہیاں دی بادشاہی تے نویں اسمان تے دھرتی دین تے ایہدے اُتے حیاتی بسر کرن دی اجازت دین د ی برکت دیوے گا ۔
کیہ تُسیں شہید ہون دا حوصلہ رکھدے او ؟ ہُن تہاڈے لئی ویلا ہیگا اے پئی تُسیں اپنے شہادت والے ایمان نوں پکیا ں کرو ۔ تے اِنج کرن لئی ، تہانوں مکتی دا ایمان رکھنا چاہی دا اے جیہڑا ٹھیک طریقے نال تہانوں خُداوند دے اگے کھلون دے لائق بناؤندااے—اوہ ایمان جیہڑا شرمائیوں اڈ شہادت نوں پسند کر سکدا اے ۔
سانوں ہُن ایہہ ایمان تیارکرناچاہی دا اے ۔ ساڈے خُداوند نے ساریاں نوں دسیا اے پئی کوئی وی پانی تے رُوح دی خوشخبری اُتے ایمان رکھیوں اڈ خُدا دی بادشاہی وچ جا نئیں سکدا تے نہ ای ایہنوں ویکھ سکدا اے ۔ اوہنے سانوں دسیا اے پئی ایس خوشخبری اُتے ایمان اخیری ویلیاں وچ شہادت والا ایمان اے ۔
جے لوکاں دے دلاں وچ پاپ اے تاں ، اوہ کویں شہید ہو سکدے نیں ؟ شہید ہون توں ہٹ کے ، ایہہ اوہ لوک نیں جیہڑے دوجیاں نوں حیوان دا نشان پاؤن وچ اگوائی کرن گے ! پانی تے رُوح دی خوشخبری توں ہٹ کے کوئی شے ساڈے پاپاں نوں نئیں مکا سکدی ۔ ایتھوں تیک پئی تہاڈیاں توبہ دیاں دعاواں جیہڑیاں تُسیں ہر دیہاڑے تے رسم وانگر کردے او ،اوہ تہاڈے پاپاں نوں نئیں مکا سکدیاں ۔ توبہ دیاں دعاواں نال اپنے پاپاں نوں مکاؤن دی کوشش کرنا صرف ویلے تے کوشش نوں برباد کرنا اے ۔
جیہڑے ایس طرحاں کرن دی کوشش کردے نیں اوہ خُدا دا کلام اوہناں نوں کیہ دسدااے ، اوہدے نالوں دینی استاداں نیں جو کجھ آکھیا ، اوہدے اُتے بوہتا یقین کردے نیں ۔ کیہ سچ ایہہ نئیں ہیگا پئی وڈے استاد ، اوہ لوک نیں جنہاں اُتے بوہت سارے مسیحی ایمان رکھدے نیں ،مطلب اے بحث کردے نیں تے ہزار ورہیاں دی بادشاہی دی مخالفت دے نظریے اُتےایمان رکھدے نیں ایہہ صرف ایس گل نوں ظاہر کردا ے پئی ایہہ بائبل دے ماہر سمجھے جان والے بائبل توں کنہے ناسمجھ نیں؟ ایہناں ہزار ورہیاں دی بادشاہی دی مخالفت کرن والیاں دے مطابق ، وڈے دُکھ جرن وچ نہ تاں ہزار ورہیاں دی بادشاہی ہووے گی تے نہ ای پاک لوکاں دی شہادت ۔ اوہناں لوکاں لئی جیہڑے دُکھ جرن توں پہلوں چُکے جان دے نظریےیاں ہزار ورہیاں دی بادشاہی دی مخالفت دےنظریے اُتے ایمان رکھدے نیں ، مُکاشفہ دی کتاب اوہناں لئی بالکل کسے مطلب دی نئیں ہووے گی !
مُکاشفہ دا کلام خُدا دا کلام اے ۔ ایہہ خُدا داکلام اے جیہڑا یوحنا رسول نے لکھیا ، مسیح دا سب توں سوھنا چیلا ۔ ایہدے توں کوئی مکر نئیں سکدا ۔
میَں دینی تعلیماں دے بنائے گئے خیالاں تے تعلیماں بارے بے سبب نوک ٹوک نئیں کردا پیا ، سگوں میَں تہاڈے ایمان نوں پکیا ں کرن لئی کردا ہاں تاں پئی تُسیں جان دین تیکر خُداوند دے وفادار رہن دے لائق بنو ۔ ایہہ تہانوں پاک کلام دی تعلیم دین لئی سکھاؤنا اے تاں پئی تُسیں اپنی شہادت نوں قبول کرن لئی پکے ایمان نال وڈے دُکھاں والیاں کُٹاں ماراں دا مقابلہ کرن لئی تیار ہوجاوو۔
اِنج کرن لئی ، تہانوں پانی تے رُوح دی خوشخبری نال ہُن اپنے ایمان نوں پکیاں کرنا چاہی دا اے ۔ دوجے پاسے ، اوہ لوک جیہڑے پانی تے رُوح دی خوشخبری اُتے ایمان نئیں رکھدے اوہ شیطان دے اگے ہتھیار سُٹ دیاں ہویاں تے خُدا دی ویری بن دے ہویاں مُک جان گے ، ایس لئی پئی جنہاں دے نام حیاتی دی کتاب وچ نئیں لکھے گئے اوہ شیطان دی بھگتی کرن گے ۔ ایہہ خُدا دا کلام سانوں دسدا اے ۔
خُدا پاک لوکاں نوں وڈیاں دُکھاں دیاں ویلیاں وچکار شہید کرے گا ۔ جدوں وڈیاں دُکھاں دے ست ورہیاں دے پہلے ساڈھے تِن ورہے لنگھ جان گے تاں، اوہ جیہڑے پانی تے رُوح دی خوشخبری اُتے ایمان رکھدے نیں اوہ شہید ہو جان گے ۔اوہناں دی شہادت دے بعدوں بوہت چھیتی اوہناں دی جیوں اُٹھنا تے چُکیا جانا ہووے گا ۔ایہہ مُکاشفہ دی کتاب دا خاص خلاصہ اے ، تے ایسے سبب توں میَں ایہدیاں خاص گلاں نوں گھڑی مُڑی دُہراندا پیاں ہاں ۔
تہانوں چیتا رکھنا چاہی دا اے پئی جدوں مخالفِ مسیح دا زمانہ آوے گا،بوہت سارے لوک ہون گے ، جیہڑے پانی تے رُوح دی خوشخبری اُتے ایمان دے سبب شہید ہون دے بوہت چھیتی بعدوں ای جیوں اُٹھن گے تے اِکو واری چُکے جان گے ۔ جدوں پیلے گھوڑے دا زمانہ آوے گا ، اوہناں دی شہادت نال ایمان دے پُھل کھڑن گے ۔ کھرا ایمان ، جدوں ٹھیک ویلاآؤندا اے ، پکا پھل دیندا اے تے سوہنیاں پھُلاں نال کھڑدا اے ۔
صحرا وچ کجھ بُوٹے ایہو جیہےہوندے نیں جیہڑے صرف اک ہفتے دے ویلے وچ پھُٹ دے ، کھڑدے تے پھل لیاؤندے نیں ۔ ایہدا سبب ایہہ ہیگا اے پئی اوہناں نیں اپنے آپ نوں صحرائی حالاں مطابق بنا لیا اے ، جتھے مینہ بوہت چِربعدوں پیندااے تے پانی دا گھاٹا ہوندااے ۔ اوہ چھیتی نال پھُٹ دے ، کھڑدے تے پھل لیاؤندے نیں ایس لئی پئی پانی دے گھاٹے دے سبب اوہنا ں نوں ایہناں ای پانی مل سکدااے ۔
اوہناں لوکاں دا ایمان جیہڑے وڈے دُکھ جرن دے ستاں ورہیاں دے ویلے وچکار پانی تے رُوح دی خوشخبری اُتے ایمان رکھدے نیں اوہناں بُوٹیاں وانگر نیں۔ اوہناں لئی ساڈے نال ایس خوشخبری اُتے ایمان ، ایہدے پچھے چلنا ، تے شہید ہون لئی ، صرف اک نِکا جیہا ویلا ای بوہت ہوے گا ۔ مخالفِ مسیح دیاں کملیاں حرکتاں وڈے دُکھ جرن دے وچکار ، اوہدے شروع توں ساڈھے تِن ورہے ، بوہت ودھ جان گئیاں ۔
جدوں پاک لوک شہید ہون گے ۔ ایتھوں تیک پئی اوہ لوک ، جیہڑے پانی تے رُوح دی خوشخبری دے بارے وچ پہلوں ای سُن چُکے نیں، حالے وی اپنے دلاں وچ من سکدے نیں ، اوہ حالے وی کھرا ایمان رکھن تے شہادت وچ ساڈے نال رلن دے لائق ہوسکن گے ، جے اوہ وڈے دُکھ جر ن دے ویلےوچکار ، ایہنوں سمجھدیاں ہویاں ، ایس خوشخبری اُتے ایمان رکھدے نیں ۔ ایہو ای سبب ہیگا اے پئی اسیں سارے جگ وچ مسیحیاں نوں اوہناں دی روحانی نیندر توں جگاؤن لئی خوشخبری ودھاؤندے پئے آں ۔ اسیں اپنی شہادت تیک جگ دے اخیر تیک پانی تے رُوح دی خوشخبری دی منادی کراں گے ۔ جےکوئی شہادت نہ ہوندی ، تاں ایہہ خوشخبری کیہ چنگی ہووے گی جیہڑی اسیں ہُن ودھاؤندے پئے آں ، ایہدی سیوا کردے ؟ جیہڑےلوک پانی تے رُوح دی خوشخبری اُتے ایمان رکھدے نیں اوہ اخیری ویلے وچ شہید ہو سکدے نیں ۔ سانوں ہُن ایس لئی اپنا ایمان پکا کرنا چاہی دا اے ۔
جے اسیں ہُن پانی تے رُوح دی خوشخبری نوں بچاؤن لئی اپنے ایمان نوں شہادت قبول کرن لئی پکا نئیں کردے ، جدوں اسیں خُدا اگے سکون وچ ہیگے آں تاں ، سانوں بعدوچ صرف ایہدے اُتے دُکھ ہووے گا ۔ جدوں اخیری ویلا آوے گا ، تاں اسیں اپنے آپ ای کم وچ لگ پواں گے ، ایہہ آکھدے ہویاں ، ”خُداوندا ، میَں حالے بوہت کم کرنے نیں ۔ مینوں تھوڑا جیہا اُڈیکو ؛ میَں حالے توبہ کرنی اے۔“جے ایہہ ایسے طرحاں دا ایمان اے جیہڑا اسیں اخیر تیک رکھیا ہویا اے ، تاں خُداوند سانوں دسے گا ، ”تُسیں اپنے آپ اگ دے دریاوچ چھال کیوں نئیں ماردے؟ تُسیں ایہد ے توں وی بوہتا پاووگے !“ جیہڑے لوک حالے پاپ رکھدے نیں اوہناں نوں ایہہ سمجھنا چاہی دا اے پئی اخیری اوہ ایسے طرحاں مُک جان گے ۔ ایس لئی خُدا نے آکھیا ، ” جِہدے کنّ ہَین اوہ سُن لَئے پئی رُوح کلِیسیاواں نُوں کِیہ آکھدا اے۔“
پاک لوکاں دے شہید ہون دے ویلے تیک ، جگ دا قدرتی ماحول سارے دا سارا برباد ہو چُکیا ہووے گا ۔ جنگل سڑ گئے ہون گے ؛ سمندر ، دریا تے سوتے سڑدے ہویاں لہو ہوجان گے ؛ تے سورج ، چن تے ستارے ایہناں دیاں لوواں نئیں رہن گئیاں۔ سارا جگ ہنیرا ہو جاوے گا ۔ ایہدے لوک ، جیہڑے شیطانی رُوحاں دے راج ہیٹھاں نیں ، عقلوں انھے ہوجان گے ، اوہناں دا سبھاہ ڈنگراں وانگر ڈاہڈا ہوجاوے گا، تے اوہناں دا اکلا ارادہ خُدا دے سارے پُتراں نوں برباد تے قتل کرنا بن جاوے گا جیہڑا اوہناں نوں لبھ پیا اے ۔ایس لئی تہانوں مُکاشفہ دے کلام نوں سمجھنا تے ایہدے اُتے ایمان رکھنا چاہی دا اے ۔
اج دیاں کلیسیاواں نوں صرف لمے چوڑے ، وڈے تے اُچے گرجے بناؤن دا شدا اے ۔ اوہ اپنے گرجے بناؤن لئی لکھاں ڈالر لاؤندے نیں ، تے فیر وی اوہناں دے دلاں وچ صرف پاپ ہوندا اے ، نہ پئی اوہ ایمان یسوع لئی شہاد ت قبول کر سکدا اے ۔ اوہناں لوکاں نوں پہلوں اپنے دلاں نوں اپنے پاپاں توں صاف کرنا ہووے گا ۔
جگ بوہت چھیتی دُکھ جرن دے زمانے ، پیلے گھوڑے دے زمانے وچ چلاجائے گا۔ میَں آس رکھدا ہاں تے دُعا کرداہاں پئی تُسیں ایس طرحاں دا ایمان رکھو گے جیہڑا شہادت نوں قبول کر سکدا اے تے جان دین تیکر مسیح دا وفادار رہ سکدا اے ۔ سانوں سچے دلوں سچیائی دی پچھان کرن والی رُوح نال بوہت خاص پچھ گچھ کرن دے بعدوں مُکاشفہ دے کلام اُتے ایمان رکھنا چاہیدااے ۔
Copyright © 2021 by The New Life Mission