ကိုဗစ်-၁၉ကပ်ရောဂါနှင့်အပြည်ပြည်ဆိုင်ရာစာပို့လုပ်ငန်းဝန်ဆောင်မှုများပျက်ပြားခြင်းကြောင့်ကျွန်ုပ်တို့၏ 'အခမဲ့ပုံနှိပ်စာအုပ်ဝန်ဆောင်မှု' ကိုယာယီရပ်ဆိုင်းလိုက်သည်။
ဤအခြေအနေ၏အခြေအနေအရကျွန်ုပ်တို့သည်ယခုအချိန်တွင်သင့်အားစာအုပ်များမပို့နိုင်သေးပေ။
ဤကပ်ရောဂါသည်မကြာမီကုန်ဆုံးပြီးစာတိုက်လုပ်ငန်းပြန်လည်စတင်ရန်ဆုတောင်းပါ။
مضمون 10: مُکاشفہ(مُکاشفہ دی کتاب اُتے تفسیر)
[7-2باب] آؤاسیں ا وہ ایمان رکھیےجیہڑالَڑ سکے (مُکاشفہ ۷:۱-۱۷)
(مُکاشفہ ۷:۱-۱۷)
اج دے دے مسیحیا ں نوں بائبل دے سچیائی نوں چنگی طرح جاننا چاہی دا اے ۔ خاص کر کے ، مُکاشفہ دے کلام دے راہیں ، سانوں پاک لوکاں دے چُکے جان دے بارے وچ ٹھیک عقل دانائی ہونی چاہی دی اے تے جائز ایمان نال زندگی بسر کرنی چاہی دی اے ۔
سب توں پہلوں ، سانوں ایہہ سمجھنا چاہی دا اے پئی پاک لوکاں دا چُکیا جانا وڈے دکھ جرن دے وچکارلے ویلے اُتے واقع ہووے ، ست ورہیاں دے زمانے دے پہلے ساڈھے تِن ورہیاں دے تھوڑا جیہا گزارن دے بعدوں ۔کلیسیاواں تے پاک لوکاں نوں ایس لئی لازمی اخیری دناں وچ اک لڑن والا ایمان رکھناچاہی دا اے ، تاں پئی سارے لوکاں نوں پا پ توں مکتی دین تے ہمیش دی زندگی دین لئی خُدا دی مرضی نوں پورا کیتا جاوے جویں اوہنے یسوع مسیح وچ اردہ بنایا اے ۔
خُدا نے اپنی ایس مرضی نوں پورا کرن لئی مخالفِ مسیح نوں کم کرن دی اجازت دتی اے ۔مخالفِ مسیح جیہڑے دناں وچ اوہ کم کردا ہووے گا اوہ وڈے دکھ جرن دے ست ورہیاں دے پہلے ساڈھے تِن ورہے نیں ۔ خُدا نے مخالفِ مسیح نوں ایس ویلے وچ کھُل کھلا کے اپنے اخیر ول جان دی اجازت دتی ۔ کاہدے لئی ؟ ایس لئی پئی ساڈے لئی بنائے گئے اپنے وڈے ارادیاں نوں پورا کرن لئی ، خُدا شیطان نوں ڈوہنگے ٹوئے وچ بنھ دیوے گا ، تے اِنج کرن لئی خُدا وند آپ ایس دھرتی اُتے بندیاں وانگر پرت کے آوے گا ۔ ایس لئی خُدا نے مخالفِ مسیح نوں وڈے دکھ جرن دے ست ورہیاں دے زمانے دے پہلے ساڈھے تِن ورہیاں وچکار تگڑے طریقے نال اپنے کم کرن دی اجازت دتی ۔
خُدا نے ساریاں نوں پاپ توں مکتی دا اپنا کلام تے ہمیش دے زندگی دتی اے ، تے ایس کلام نوں پورا کرن لئی اوہنے وڈے دکھاں دا ارادہ بنایا ۔ خاص حوالے وچ ، ایہہ لکھیا اے ، ” مَیں زمین دی چَوہاں نُکرِیں چَوہ فرِشتے کھلوتے ویکھے اوہناں زمین دیاں چَوہاں وَاوَاں نُوں تھمیا ہویا سی پئی زمین یا سمُندر یا کِسے بُوٹے نُوں وَا نا لگّے۔“ خُدا نے بنی اسرائیل دے ۰۰۰,۱۴۴ بندیاں نوں وی اوہناں دی بربادی توں مکتی دین دا ارادہ بنایا اے ، ایس لئی پئی اوہنے ابرہام نال وعدہ کیتا سی پئی اوہ اوہدا تے اوہدی نسل دا خُدا ہووے گا ۔ ایس وعدے نوں پورا کرن لئی ، خُدا بنی اسرائیل اُتےاپنی مکتی دا فضل ڈوہلے گا تے اخیری ویلیاں وچ ابرہام دی نسل وچوں ۰۰۰,۱۴۴ نوں مکتی دیوے گا ۔
پاک لوکاں نوں اپنی ہزار ودہیاں دی بادشاہی تے ہمیش دا نواں اسمان تے دھرتی دین لئی ، خُدا لازمی طور اُتے وڈے دکھاں نوں ایس دھرتی اُتے آؤن دی اجازت دیوے گا ۔وڈے دکھاں وچکار مخالفِ مسیح دےزمانے دی اجازت دین دے بعدوں ، خُدا فیرشیطان نوں اپنے ہتھ ہیٹھ کرے گا تے ایہنوں ڈوہنگھے ٹوئے وچ بند کر دیوے گا ۔ خُدا مخالفِ مسیح تے وڈے دکھاں جرن دے آؤن دی کیوں اجازت دیندا اے ، ایہدا سبب ایہہ ہیگا اے پئی اوہ بنی اسرائیل نوں بچان دے اپنے وعدے نوں پورا کرے تے اوپریاں قوماں نوں ہمیش دی زندگی دے اپنا فضل دے ، جیہڑیاں وڈے دکھ جرن دے راہیں چٹے کپڑے پاؤن گئیاں ۔
ایسے طرح ، وڈے دکھ جرنا تے مخالفِ مسیح دا راج اوہ ویلے نیں جنہاں وچوں اسیں کسے نقصان توں ہٹ کے لنگھ جاواں گے ۔سانوں ایہہ سمجھنا چاہی دا اے پئی ایہہ ساریاں شیواں جنہاں دی خُدا نے اجازت دتی اے ایہہ سانوں ساریاں نوں بچان تے مسیح دی بادشاہی وچ سانوں اوہدی ہمیش دی زندگی دے فضل دے لیڑے پوان لئی اوہدے ارادے دا اک حصہ ہیگیاں نیں۔ ایس لئی سانوں واضح طریقے نال ایہہ پتہ کرنا چاہی دا اے پئی اسیں کیہڑےزمانے وچ رہندے پئے آں ، تے اپنے آپ کولوں ایہہ پچھنا چاہی دا اے پئی سانوں کس طرح دے عقیدے اُتے جیونا پوے گا ۔ ساڈا ایمان ، خاص، واضح تے لازمی ہونا چاہی دا اے ۔
اسیں خُدا دے کلام اُتے ایمان رکھدے آں ۔ تے اسیں ایہہ وی ایمان رکھدے آں پئی بدنی تے رُوحانی ، دونواں طریقیاں نال ایہہ کلام پورا ہووے گا ۔ اج دازمانہ اک ایہو جیہازمانہ اے جیہڑا اخیری ویلیاں ول نسیا جاندا اے ۔ جد مخالفِ مسیح تے ایہدے بوہت سارےچیلے اخیری ویلیاں وچ نکلن گے تاں سانوں اپنے ایمان دی راکھی کرن لئی ایہناں دے خلاف لڑنا چاہی دا اے ، ایتھوں تیکر پئی شہادت دےوانگرسانوں اپنی جاناں دانذرانہ ای کیوں نا دینا پوے ۔ ایہہ زمانہ بوہت چھیتی ساڈے نیڑے آؤندا پیا اے ۔جے اسیں کلام اُتے ایمان رکھدے آں تاں سانوں مخالفِ مسیح ، وڈے ویری ،تے اوہدیاں چیلیاں دے خلاف لڑنا چاہی دا اے ۔ ایہو ای ایمان اے جیہڑا لڑدا اے ۔
جنگ دا مطلب لڑنا اے ۔ پر لڑن توں میرا مطلب بدنی تنگیاں ، کُٹ مار تے توڑ پھن نئیں ہیگی ۔ سگوں ایتھے جنگ دا مطلب مخالفِ مسیح دے اگے ہتھیار نہ سُٹدیاں ہوئیاں ایمان دی راکھی کرنی اے ، جیہڑا ایمانداراں تے کُٹ مار کرے گا ، شیطان دا خادم جیہڑا مکتی دی خوشخبری دے خلاف کھلووے گا جیہڑی خُداوند نے سانوں دتی اے ۔ اخیری ویلیاں وچ شہید ہون والے اوہو ای لوک نیں جنہاں دے کول یسوع دی گواہی اے تے جیہڑے خُدا دے کلام اُتے چلدے نیں ۔ اوہ گواہی دیندے نیں پئی اوہ یسوع اے جیہڑا پانی تے رُوح دی خوشخبری دے راہیں آیا سی ۔
لڑائی کرنا پانی تے رُوح دی خوشخبری اُتے ایمان دی راکھی کرنا اے ۔ ایس خوشخبری دی راکھی لئی ، جیہڑے لوک خُدا ولوں دتی گئی پانی تے رُوح دی خوشخبری اُتے ایمان رکھ کے نویں سریوں جم پئے نیں ، اوہناں نوں خُدا دی نویں سریوں جمن والی کلیسیاواں وچ ، نویں سریوں جمن والے دوجے پاک لوکاں نال میل جول رکھنا چاہی دا اے ۔ تے سانوں وڈا حوصلہ رکھنا چاہی دا اے پئی اسیں دوجیاں تیکر اپنا ایمان ودھان تے اوہناں دیاں جاناں نوں بچان لئی کدی نا ڈولن والے ارادے نال دلیری نال لڑائی وچ حصہ لیئے ۔پورے طریقے نال لڑائی لئی تیار رہن دا مطلب اے اپنے ایمان دی راکھی کرنا تے دوجے لوکاں نوں وی بچانا ؛ کلیسیا دا ایہہ ایمان فتح دی راہ اے جیہڑا خُدا نوں خوش کردا اے ۔ خُدادے خادماں تے اوہدے پا ک لوکاں نوں ہمیشہ اپنے لڑن والے ایمان نوں قیم رکھنا چاہی دا اے ۔
اج دا زمانہ کیہو جیہا اے، جیہدے وچ سانوں لڑائی لئی تیار دلاں تے ایمان نال رہنا چاہی دا اے ؟ موجودہ زمانہ خاص کر کے بوہتیاں تبدیلیاں وچوں لنگھدا پیا اے ۔ چُکے جان دے تے مسیح دے پر ت کے آؤن بارے بوہتے ”نظریے“بنے تے غائب ہو گئے نیں ، تے ایہناں دے نال ای لوکاں دا ایمان وی اوہناں دے مطابق بدل دا رہیا اے ۔
ایس توں پہلوں پئی ۱۸۰۰ء دے شروع وچ چُکے جان دے اک نویں نظریے دی وکالت کیتی گئی ، ہر کسے نے دکھ جرن توں بعدوں چُکے جان دے خیال اُتے ایمان رکھیا تے ایہدی منادی کیتی ، جیہدے وچ ایہہ دلیل رکھی گئی پئی مسیح پاک لوکاں د ے سارے وڈے دکھ جرن وچوں لنگھن دے بعدوں واپس آوے گا ، تے ایہہ پئی اوہناں دا جیوں اُٹھنا تے چُکیاجانا مسیح دی واپسی دے اوس ویلے اُتے ای ہووے گا ۔پر دکھ جرن توں پہلوں چُکے جان دا نظریہ ،جنہے ۱۸۰۰ء دے شروع وچ ہولی ہولی اپنے پیرا جمائے ، دکھ جرن دے بعدوں چُکے جان دے نظریے نوں مکمل طور اُتے مکا دتا ۔
دکھ جرن توں پہلوں چُکے جان دا نظریہ ایہہ بحث کردا اے پئی یسوع دے منن والے وڈے دکھ جرن دا ست ورہیاں دا زمانہ شروع توں ای پہلوں ای اسمان اُتے چُکے لئے جان گے ۔ بھاویں پہلوں بوہت ساریاں لوکاں نیں ایس نظریے نوں ردّ کر دتا سی ، پر ہُن عملی طور اُتے ہر بندہ دکھ جرن توں پہلوں چُکے جان دےنظریے اُتے ، صرف کجھ گِلیاں نال ایمان رکھ چُکیا اے ۔ پر دکھ جرن توں پہلوں چُکے جان دا نظریہ ناصرف خُدا دے کلام وانگر ہیگا اے ، سگوں ایہہ خُدا دے کلام تے اوہدے ارادے نوں وی فضول سمجھدا اے ۔ فیر وی ایہناں لوکاں دے خیالاں تے دلاں وچ جیہڑے بائبل نوں نئیں جان دے ، دکھ جرن توں پہلوں چُکے جان داایہہ نظریہ پہلوں ای پکے طریقے نال لایا گیا اے ۔
پُرانے زمانے دے رسولاں نیں خُدا دے زمانیاں نوں دو زمانیاں وچ ونڈیا اے ۔ یسوع مسیح اُتے ایمان لیاؤندے ہوئیاں ایہہ مکتی دا پہلازمانہ سی ، تے وڈے دکھ جرن دا دوجا زمانہ سی جیہڑاپہلے زمانے دے لنگھن دے بعدوں آؤندا اے ۔ اج دے اُستاد آکھدے نیں پئی جدوں اوہ یسوع اُتے ایمان لیا کے مکتی دے پہلے زمانے نوں سمجھدے نیں تاں ، وڈے دکھ جرن دا دوجا زمانہ، مسیح دے پرت کے آؤن دا زمانہ تے پا ک لوکاں دے چُکے جان دے زمانے نوں سمجھنا بوہت ای اوکھا اے ۔
بوہت سارے مسیحی جیہڑے زمانیاں وچ اپنے کجھ نا جاننا دے سبب دکھ جرن توں پہلوں چُکے جان دےنظریے اُتے ایمان رکھدے نیں اوہناں دا ایمان غلط ہون توں بچ نئیں سکدا ۔ وکھالے طریقے نال اپنے بنائے ہوئے مسیح دے پرت کے آؤن دے دیہاڑے تے ویلے دی پیشین گوئی کرنا ، یاں اپنے ایمان نوں فضول ای ایس سوچ وچ رہن دینا پئی اوہناں نوں دکھ جرن توں پہلوں چُک لیا جاوے گا — ایہہ سارے دکھ جرن توں پہلوں چُکے جان دےایس نظریے اُتے ایمان رکھن دے نتیجے نیں ۔ بوہتے مسیحی اپنے آپ ولوں سوچدیاں ہوئیاں، رُوحانی سُستی وچ پھس گئے نیں ، ”جے جگ اُتے اوکھے ویلے آؤندے نیں تاں ایہناں دی کیہڑا پرواہ کردا اے ؟ میَں تاں وڈے دکھ جرن دے ویلے دے آؤن توں بوہت پہلوں ای چُک لیاجاواں گا، تے ایس طرح سارا کجھ ٹھیک اے ۔ “ایہہ ساری اڑاؤنی ،چُکے جان دے بارےوچ ، بائبل دے مطابق ٹھیک تعلیم دے گھاٹے دے سبب پیداہوئی اے ۔
سکوفیلڈ نے دکھ جرن توں پہلوں چُکے جان دےنظریے دی حمایت کیتی ، تے ایہدانتیجہ ایہہ نکلیا
پئی ایس نظریے نوں منن والیاں دے دل اپنے ای سکون ول وگدیاں ہوئیاں مک گئے نیں ، ایہہ سوچدے ہوئیاں پئی ، ”ایس دھرتی اُتے اُتے دکھ جرن دے ویلے دے آؤن توں پہلوں ای سانوں چُک لیا جاوے گا ۔ تے ایس لئی ہُن لئی جناں سو کھا ہو سکے آرام نال زندگی بسر کرن دی کوشش کریے۔ “اِنج کر کے اوہناں دا ایمان فضول ہو گیا اے ۔
پر بائبل وڈےدکھ جرن تے چُکے جان دے بارے وچ کیہ دسدی اے ؟ بائبل دکھ جرن دے وچکار چُکے جان دی گل کردی اے ۔ ایہہ سانوں دسدی اے پئی اوپریاں قوماں تے بنی اسرائیل دونویں ای یسوع ولوں دتی گئی پانی تے رُوح دی خوشخبری اُتے ایمان رکھن دے سبب مخالفِ مسیح دے ولوں دکھ تے پیڑاں سہن گے جدوں اوہ پیلے گھوڑے دے دناں وچکار وڈے دکھ جرن دے پہلے ساڈھے تِن ورہیاں وچوں لنگھدے ہون گے ۔
ایہہ سانوں دسدی اے پئی وڈے دکھ جرن دے پہلے ساڈھے تِن ورہیاں دے بعدوں مخالفِ مسیح پاک لوکاں نوں مار سُٹے گا ۔ یعنی ، پاک لوکاں نوں شہید کر دتا جاوے گا ۔ اوہ سانوں ایہہ وی دسدی اے پئی سارے پاک لوک جنہاں نوں شہید کیتا گیا سی تے جیہڑے نئیں ہوئے سن دونواں نوں ای ، اوہناں دے جلالی بدناں وچ جیوند ا کیتا جاوے گا ، تے اکو ویلے اوہناں دے جیوں اُٹھن دے بعدوں اوہناں نوں ہَوا وچ چُک لیا جاوے گا ۔ جدوں پاک لوکاں نوں وڈے دکھ جرن وچکار چُک لیا جاوے گا ، تاں ایہہ جگ ستاں پیالیاں دیاں آفتاں دے ڈوہلے جان نال اپنی بربادی ول اپڑے گا ۔فیر خُداوند شیطان ، مخالفِ مسیح تے اوہدیاں چیلیاں نوں سزا دین لئی ایس دھرتی اُتے واپس آوے گا ۔
مُکاشفہ۱۳باب سانوں دسدا اے پئی اوہ لوک جنہاں دے ناں حیاتی دی کتاب وچ نئیں لکھے گئے اوہ سارے مخالفِ مسیح تے اوہدے بُتاں اگے ہتھیار سُٹ دین گے ۔ صرف اوہو ای جنہاں دے ناں حیاتی دی کتاب وچ لکھے گئے نیں ، ودجے اکھراں وچ ، اوہ جیہڑے مخالفِ مسیح تے اوہدے چیلیاں نوں قبول نئیں کرن گے ۔ اوہ لوک جنہاں دے ناں اوہناں دے دلاں وچ پانی تے رُوح دی خوشخبری اُتے ایمان رکھن توں مکر جان دے سبب حیاتی دی کتاب وچ نئیں لکھے گئے اوہ سارے شیطان تے اوہدیاں بُتاں دی پوجا کرن گے تے اوہدے اگے ہتھیار سُٹ دین گے ۔
ایس لئی بائبل سانوں دسدی اے پئی پاک لوک وڈے دکھ جرن وچکار دھرتی اُتے ہون گے ، تے وڈے دکھ جرن وچکار توں تھوڑا چر لنگھن دے بعدوں ، اوہناں ساریاں نوں اوہناں دے چُکے جان نال ہَوا وچ چُک لیا جاوے گا ۔ اوہ لوک جیہڑے شیطان دے اگے ہتھیار سُٹ دے نیں تے وڈے دکھ جرن دے ست ورہیاں دے زمانے وچ مخالفِ مسیح دے ناں دا نشان پاندے نیں ، اوہناں ساریاں نوں اگ تے گندھک دے دریاوچ سُٹ دتا جاوے گا ، پر اوہ لوک جنہاں دے ناں حیاتی دی کتاب وچ لکھے گئے نیں تے جنہاں نیں اوہدے بُت دے اگے ہتھیار نئیں سُٹے اوہناں نوں وڈے دکھ جرن وچکار چُک لیا جاوے گا ۔
اصلی چُکیا جانا وڈے دکھ جرن دے ست ورہیاں دے ویلے دےادھ وچکار توں تھوڑا چر بعدوں ہووے گا ۔ چُکے جان دے ویلے اُتے بائبل دے کھول کے دسے گئے اکٹھے حوالیاں اُتے چلن لئی ایس کتاب دی دوجی جِلد وچ دسیا جاوے گا ۔ فیر وی بوہتے لوک ہیگے نیں ، جیہڑے بوہت چھیتی چُکے جان نوں سواردے نیں ، دکھ جرن توں پہلوں ای چُکے جان دے بارے وچ گل کردے نیں ، یاں دوجی صورت وچ ،ایہنوں بوہت ای سُستی نال سواردے نیں تے دکھ جرن دے بعدوں چُکے جان دے نظریے دی گل کردے نیں ۔ اُستاد دکھ جرن توں پہلوں چُکے جان دے نظریےدی گل کردے نیں ایتھوں تیکر پئی جدوں اوہ آپ وی ایہدی چنگیائی نوں پسند نئیں کردے ، تے حالے تیکر بوہت گرجے جان والے ایس نظریےاُتے قیم نیں تے ایہدے اُتے ایمان رکھدے نیں ۔ ایتھوں تیکر پئی کجھ لوک تاں اپنا سارا پیسہ دھیلا اپنے گرجیاں نوں ہدیہ دے دیندے نیں ، یاں مسیح دی واپسی دی اپنی مرضی نال خیالی تاریخ مطابق کملیاں وانگر اُڈیکدے نیں ۔
تھوڑا چر پہلوں ، اک خاص فرقے دے بندیاں نیں اک واری اک تاریخ چُنی تے اوہناں دا بھروسہ سی پئی مسیح ایہناں دے چُنی ہوئی تاریخ اُتے واپس آجاوے گا ۔ ایس لئی اوہ سارے اک پہاڑ اُتے چڑھ گئے ، اپنے بدناں نوں رسیاں نال بنھ کے ادھی رات تیکر اپنے چُکے جان نوں اُڈیکدے رہے ۔ ویلا لنگھ گیا ، پر ایس توں ہٹ کے پئی اوہناں نیں بوہت بے چینی نال اڈیکیا سی ، یسوع واپس نئیں آیا ۔ ایس لئی اخیریں اوہ ہمت ہار گئے ، اپنے رسے کھولے ،تے شرمندیاں ہوکے پہاڑ اُتوں ہیٹھاں آگئے ۔ بے نصیبی نال ، ایس طرح دی شرمناک ناکامی مسیحی لوکاں وچ ہُن بوہت چوکھی ہوگئی اے ۔ ایس طرح دے مذاق بھرے واقعے صرف کوریا وچ ای نئیں ہوئے ، سگوں ایہہ سارے سنسار وچ ، یورپ ، امریکہ ، ایشیا،ہر تھاں بوہتے چوکھے نیں ۔
ایس لئی ، سانوں جو کجھ وی خاص کر کے جاننا چاہی دا اے ، اوہ ہیگا اے پئی خُدا اپنے ایماندار پاک
لوکاں نوں وی ایتھوں تیکرپئی دکھ جرن دی خاص کر کے اجازت دیوے گا ۔ ایہہ خُدا داارادہ ا ے ۔ خُدا دے پاک لوکاں نوں وڈے دکھ جرن دی اجازت دین دا سبب ایہہ ہیگا اے پئی اوہ اپنے سارے وعدیاں نوں پورا کردا اے — وڈے دکھ جرن دے راہیں شیطان نوں ہمیش دی اگ وچ سُٹنا ، ہزار ورہیاں لئی مسیح دی بادشاہی قیم کر کے ایس دھرتی نوں اک نواں جگ بنا نا،جتھے پاک لوک اوہدے نال راج کرن گے ، تے یسوع دے منن والیاں نوں نواں اسمان تے دھرتی دینا ۔ ایہہ خُدا دی مرضی اے جیہڑی وڈے دکھاں نوں اک ارادے دے مطابق ساڈے کول آؤن دی جازت دیندی اے ۔
وڈے دکھ جرن دا ست ورہیاں دا زمانہ اجے شروع نئیں ہویا ۔ جے اسیں فرض کرئیے پئی حالے تیکر جیہڑیاں قدرتی مصیبتاں ساڈے اُتے آؤندیاں نیں ایہدا حساب لاؤنا اوس ویلے دی اگ نال کیتا جا سکدا اے جنہوں اگ بھجاؤن والے سوکھے طریقے نال بجھا سکدے ہون تاں ، وڈے دکھ جرن وچ جیہڑی بربادی جگ اُتے آؤن والی اے ، ایہہ بوہت چوکھی اے ، مطلب اےاوس اگ دے مقابلے وچ جیہڑی جگ دے تریجے حصے جنگلاں نوں ساڑ دیوے گی ۔
جدوں جگ اُتے ایس طرحاں دیاں بربادیاں تے آفتاں آؤن تاں تہانوں پریشان نئیں ہونا چاہی دا تے ڈٹ کے رہنا چاہی دا اے ، خُدا دے خادماں تے پاک لوکاں نوں سارا اوہ ایمان چاہی دا اے جیہڑا لڑائی کر سکے ۔ ایس لئی پئی اسیں ایس دھرتی اُتے وڈے دکھ جرن دے ادھ تیکر رہواں گے ، ایس لئی سانوں اخیری زمانیاں وچ ایس ایمان نال جیونا پوے گا جیہڑا کدی وی مخالفِ مسیح تے اوہدیاں چیلیاں اگے سر نئیں نواندا ۔ اک سپاہی دلیری نال لڑائی وچ وڑدا اے ،تہانوں اپنے خنوادے سمیت بوہتے بوہتے لوکاں نوں بچان لئی پانی تے رُوح دی خوشخبری دی سارے جگ وچ منادی کرنی پوے گی ۔
جگ وچ سدا ایہہ امن نئیں ہووے گا ۔ پر ایتھوں تیکر پئی جدپریشانیاں جگ اُتے راج کر دیاں نیں تے ساڈی زندگیاں وچ مشکلا ں بوہت چوکھیاں نیں ، سانوں سدا ایس گل اُتے ایمان رکھنا چا ہی دااے پئی خُدا سانوں اخیری دیہاڑے تیک حفاظت وچ رکھے گا ۔ جگ دے دین تے شیطان لوکاں نوں ہر طریقے نال بھٹکان والے بولاں نال دھوکہ دیندے نیں ، اوہناں توں چراندے نیں تے اخیریں اوہناں نوں دوزخ وچ سُٹ دیندے نیں۔
ایتھوں تیکر پئی ہُن وی ، بے گنت لوک تے جیہڑے وڈیاں فرقیاں نال تعلق رکھدے نیں ، سکوفیلڈ دے دکھ جرن توں پہلوں چُکے جان دے نظریے اُتے ایمان رکھدے نیں ، تے بوہتیاں لوکاں نوں اپنے غلط عقیدے ول بھٹکاندے نیں ۔ اوہ لوک جیہڑے ایہہ من دے نیں پئی وڈے دکھ جرن توں پہلوں ای اوہناں نوں چُک لیا جاوے گا، اوہناں نوں وڈے رکھ جرن نال ڈٹ کے رہن لئی اپنے ایمان نوں پکا کرن دی لوڑ نئیں ہیگی۔اوہناں دا خیال ہیگا اے پئی اوہناں نیں جو کجھ کرنا ایں اوہ صرف اوہناں دی موجودہ زندگیاں وچ وفادار بننا اے تے جد خُداوند اوہناں نوں بلاوے گا تاں اوہ سادگی نال ہَوا وچ چُکے جان گے ۔پر پاک لوکا ں دا چُکیا جانا اصل وچ وڈے دکھ جرن دے پہلے ساڈھے تِن ورہے لنگھن دے بعدوں ہووے گا ، تے ایس لئی ایس توں ہٹ کےپئی مسیح دا آؤنا کدوں ہووے گا اوہناں نوں وڈے دکھ جرن لئی اپنے ایمان نوں پکا کرنا پوے گا ۔ سانوں ایمان رکھنا چاہی دا اے پئی خُدا نے بنی اسرائیل دے لوکاں تے بوہت ساریاں اوپریاں قوماں نوں وڈے دکھ جرن دے ستاں ورہیاں دےزمانےوچ بچایا اے ۔
آیت نمبر ۱۴سانوں دسدی اے ، ” اوس مَینُوں آکھیا ایہہ اوہ نیں جیہڑے اوس وڈّی مُصِیبت وِچوں نِکل کے آئے ہوئے نیں ایہناں اپنے کپڑیاں نُوں لیلے دے لہو وِچ دھوکھے چٹیاں کِیتا ہویا اے۔“ایہدا مطلب شہادت اے ۔شہادت دا مطلب کسےدا ایمان وچ رہندیاں ہوئیاں راستباز کم کرن لئی مرنا اے ۔ پاپاں توں مکتی پاؤن والے پاک لوکاں لئی سب توں بوہتا ٹھیک ایمان خوشخبری اُتے ایمان پئی ، خُداوند نے ساڈے سارے پاپاں نوں مکا دتا اے ، تے ایس ایمان نوں اُتے قیم رہنا اے ۔ پر شیطان سدا پاک لوکاں دے ایمان نوں مکاؤن دی کوشش کردا اے ۔ ایس لئی سانوں شیطان دے خلاف ایمان دی لڑائی کرنی چاہی دی اے ۔
جے اسیں ایس لڑائی وچ شیطان دے اگے ہتھیار سُٹ دیندے آں تاں اسیں شیطان نال ایہدے قیدی بن کے دوزخ وچ سُٹ دتے جاواں گے ، پر جے اسیں ایتھوں تیکر پئی سِر دھڑ دی بازی لا کے وی لڑدے تے اپنے ایمان دی راکھی کردے آں تاں، اسیں شہید ہوجاواں گے تے شہادت دے ایس ایمان دے سبب خُدا دی بادشاہی وچ وڑ جاواں گے ۔ ایس لئی پئی اسیں اپنےعقیدے دی راکھی کرن لئی ایہہ ایمان دی لڑائی کردے پئے آں ، ایس لئی ساڈی موت راستباز تے وڈی شان والی ہووے گی ۔
ایس لئی سانوں اوہ ایمان رکھنا چاہی دا اے جیہڑا راستباز کماں لئی لڑدا اے۔سانوں لازمی ایہہ ایمان رکھنا چاہی دا اے پئی اسیں دوجے لوکاں نوں بچان لئی کسے لڑائی وچ مصروف ہیگے آں ،تے سانوں ایہناں لوکاں نوں اسمان اُتے گھلن لئی ایس لڑائی دے مکن تے جِتن تیکر اپنے ایمان دی راکھی کرنی چاہی دی اے۔جد تیکر پئی سانوں فتح دا تاج نئیں مل جاندا، سانوں اپنے خُدا وند دے کلام دی تلوار نال شیطان دے خلاف لڑائی وچ اوہدے اُتے فتح پاؤنی چاہی دی اے ۔
لوک اک واری جم دے نیں تے اوہ اکو ای واری مر جاندے نیں ۔ ایس توں ہٹ کے پئی طبی سائنس نے کنی بوہتی ترقی کیتی ہووے ، ہر بندہ اخیریں مر جاندااے ۔ بھاویں لوک ۱۰ یاں ۸۰ورہیاں دی عمر وچ مر جان ، اوہناں ساریاں نوں خُدا ولوں پاپاں دی سزا جرنی پوے گی ۔ اوہ لوک جیہڑے ایس دھرتی اُتے رہندے ہوئیاں خُدا ولوں دتی گئی پانی تے رُوح دی خوشخبری اُتے ایمان رکھیوں اڈ ای مر جاندے نیں ، اوہناں نوں سزا ملے گی تے اوہناں نوں ہمیش دی اگ وچ سُٹن دی سزا دتی جاوے گی ۔بھاویں اوہناں دے سارے پاپ یسوع دے پانی تے لہو نال دُھل گئے سن ، اوہناں نوں برف وانگر چٹا بنایا گیا سی ، فیر وی اوہناں دا ایس سچیائی اُُتے یقین نہ کرن دا پاپ معاف نئیں کیتا گیا سی ، اوہناں غیر ایمانداراں دے اوہناں سارے پاپاں دی سزا دتی جاوے گی جیہڑے اوہناں نیں خُدا تے بندے اگے کیتے ، تے اوہناں نوں اوہناں پاپاں دا مُل اُتارنا پوے گا ۔
خُدا دے اگے دوزخ دی اگ دی سزا توں بچن لئی ، سانوں یسوع ولوں دتی گئی پانی تے رُوح دی خوشخبری اُتے ایمان رکھنا چاہی دا اے جیہڑی سانوں ساڈے سارے پاپاں توں مکتی دیندی اے ۔ پانی تے رُوح دی خوشخبری جیہڑی ساڈے سارے پاپاں لئی فدیہ دیندی اے اوس خوشخبری توں وکھری اے جیہڑی صرف صلیبی لہو اُتے ایمان رکھدی اے ۔ میَں سدا پانی تے رُوح دی خوشخبری دی منادی کیتی اے بھاویں عام ویلا ہووے یاں کوئی ہور ویلا ہووے ۔ صرف پانی تے رُوح دی خوشخبری اُتے ایمان رکھ کے ای اسیں پاک رُوح پا سکدے آں تے خُدا دے پُتر بنن دی برکت پاؤندے آں ۔ جد اسیں یسوع اُتے ایمان رکھدے آں تاں، سانوں لازمی طور اُتے دُور رہنا چاہی دا اے تے صرف صلیبی لہو نال بنی ہوئی جھوٹی خوشخبری اُتے ایمان نئیں رکھنا چاہی دا ۔
پُرانا عہد نامہ ہتھا ں دے رکھے جان تے حوض دی اصل خوشخبری دی گل کردا اے ۔ نویں عہد نامے وچ ، خُدا دا کلام سانوں دسدااے پئی ساڈے پاپ اکو ای ویلے بپتسمے دے راہیں مسیح اُتے لدے گئے سن ۔ پُرانے عہد نامے دا حوض تے نویں عہد نامےدا بپتسمہ دونویں پانی تے رُوح دی خوشخبری اُتے اکو ایمان دا حوالہ دیندے نیں جنہے سانوں ساڈے سارے پاپاں توں بچایا اے — یسوع دے بپتسمے راہیں جنہے ساڈے سارے پاپاں نوں اوہدے حوالے کیتا ، سولی اُتے اوہدی موت ،تے اوہد ا جیوں اُٹھنا۔پانی تے
رُوح دی خوشخبری دی ایس خوشخبری توں سوا کوئی نئیں بچ سکدا ۔
سانوں پانی تے رُوح دی خوشخبری اُتے اپنے ایمان دے مطابق زندگی بسر کردے رہنا چاہی دا اے جد تیکر پئی اسیں دکھ جرن دے دناں وچکار نا اپڑ جائیے ۔ سانوں چاہی دا اے پئی اسیں ایس جگ نوں پچھانیے ،تے باقی تھوڑے جیہےبچے ہوئے دیہاڑے اوس طرح بسر کرئیے جویں خُدا ساڈے توں چاہندا اے ۔ خُدا دی بادشاہی دی منادی کرئیے تے ساریاں نوں خوشخبری سُنائیے ۔ خُداوند نے سانوں دسیا اے پئی بوہتے سارے لوک ایتھوں تیکر پئی ایہناں اخیری دیہاڑیاں وچ وی بچائے جان گے ۔
کُجھ بوٹےصحرا وچ جیوندے رہ سکدے نیں ، جتھے پانی نئیں ہوندا ، سگوں صرف ریت تے سڑدی دُھپ دی لو ہوندی اے ۔ پر ایتھوں تیکر پئی ایہہ ویران صحرا صرف گرم تے سُکی دھوڑ تے ریت نال بھریا ہوندا اے ، جد مینہ نال پانی آندااے ، بوٹے صرف اکو ہفتے وچ پھُٹ ، پھُل تے پھل سکدے نیں ۔ صحرا دے گھاٹے داساراسبب پانی اے ؛ ریت دے ہیٹھاں دبے ہوئے بیج ، بھاویں اجے پھُٹن وچ ناکام نیں ، اوہ مرے نئیں سگوں حالے تیکر جیوندے نیں، تے مینہ نوں اُڈیکدے نیں ۔ تے جد ایہناں سُکے بیجاں تیکر سیلاب اپڑدی اے تاں ،اوہ چھیتی نال پھُٹ جاندےنیں ۔ بیج اک دن وچ پھُٹ دے نیں ، اگلے دیہاڑے ودھدے نیں ، تے تیجے دیہاڑے پھُل دے تے پھل لیاؤندے نیں ۔ تے اپنے اخیری دیہاڑے ایہہ بوٹے دھرتی اُتےاپنے بیج ڈیگ دیندے نیں ، تے سخت بیج اک واری فیر ریت ہیٹھاں لُک جاندے نیں ۔
جویں صحرا وچ ایہو جیہاں بوٹیاں دا قیم رہنا اوکھا لگدا اے ایتھوں تیکر پئی اک اکلا مُڈھ یاں گُلی وی حالے پانی لگن دے ویلے وی سنبھل کے ودھنی اوکھی لگدی اے ، ساڈا ایمان ہیگا اے اخیری دناں وچ وی صحرا وانگرجگ دے آلے دوالے لوک پھُٹن گے ، پھلن گے تے پھل لیان گے جے اوہ ایتھوں تیکر پئی پانی تے رُوح دی خوشخبری دے وچ نال تھوڑے جیہے وی رَل جان ۔ اسیں ایمان رکھدے آں پئی جد نرسنگیاں دیاں مصیبتاں اصل وچ سامنے آن گئیاں ، بوہت سارے لوک جنہاں نیں کلام دے راہیں ایہدے توں پہلاں وڈے دکھ جرن دے بارے وچ سنیا سی ،اپنے وچ آئی ہوئی خوشخبری دا احساس کرن گے ،ایہدے اُتے قائم رہن گے ، تے تھوڑے ای چر وچ شہادت دے ایمان نوں ودھاؤن گے ۔
ایسے طرح ، جدوں تُسیں تے میَں اپنے ایمان دی راکھی کرن لئی شہیدہو جاواں گے تاں ، بوہت سارےایماندار لوک ، جنگل دے بوٹیاں وانگر ودھن گے جیہڑے ایتھوں تیکر پئی سُکی دھرتی اُتے وی چھیتی نال اُگ دے نیں ، جیہڑے مخالفِ مسیح دا نشان لین تے اوہدے بُت داانکار کرن اُتے ساڈی شہادت وچ ساڈے نال رَلن گے ۔ پانی تے رُوح دی ایہہ خوشخبری جنہوں اسیں ہُن ودھاؤندے پئے آں بوہتیاں لوکاں نوں تھوڑے چر وچ اپنے ایمان نوں ودھاؤندے ہوئیاں شہادت قبول کرن دے لائق بناوے گی ، تے اوہنا ں نوں خُدا دےکم کرن والےبناوے گی جیہڑے لڑن گے ۔
بچیاں تو لے کے بُڈھیاں تیکر، اسیں سارے خُداوند دی فوج وچ سپاہی ہیگے آں ۔سدا اپنے دلاں نوں لڑائی لئی تیار کردے رہنا چاہی دا اے ، سانوں مسیح دے لوکاں وانگر کسے وی جھوٹ وچ پین توں اڈ ،ٹھیک ایمان نال زندگی بسرکرنی چاہی دی اے ۔ ساڈےوچوں اوہ جیہڑے جنگ جت جان گے ، خُدا سانوں فتح دا تاج تےنا دسے جان والے انعام دیوے گا ۔ایس لئی سانوں اپنیا ں زندگیاں خُدا دے راستباز کماں دی سیوا وچ بسر کرنیاں چاہی دیاں نیں ، ایس ایمان نال جیہڑا شیطان ، اوہدے سارے جھوٹیاں ، تے جگ دیاں ساریاں بدیاں دے خلاف لڑدا اے ۔
خُدا دکھ جرن دے ویلے سانوں دلیری والا ایمان دیوے گا
جد پیلے گھوڑے دا زمانہ آجاوے گا ،خُدا سانوں ایہدیاں نشانیاں دیوے گا ۔ آیت نمبر ۱ وچ آکھیا گیا اے ، ” ایہدے پِچّھوں مَیں زمین دی چَوہاں نُکرِیں چَوہ فرِشتے کھلوتے ویکھے اوہناں زمین دیاں چَوہاں وَاوَاں نُوں تھمیا ہویا سی پئی زمین یا سمُندر یا کِسے بُوٹے نُوں وَا نا لگّے۔“ایتھے وَا دا مطلب وڈے دکھ جرن دی وَا اے جنہوں خُدا چلاوے گا ۔ مُکاشفہ ۷ :۱-۸ سانوں دسدا اے پئی بنی اسرائیل دے لوکاں نوں بچان لئی ، خُدا اوہناں اُتے مہرلاوے گاتے ایس طرح وَانوں تھوڑے چر لئی تھمی رکھے گا ۔ پر جد ویلا آوے گا — یعنی ، جد کالے گھوڑے دا زمانہ، خُدا دے ستاں زمانیاں وچوں کال دا زمانہ لنگھے گا تاں ، خُدا پیلے گھوڑے دا زمانہ کھول دیوے گا ۔ فیر زمین دیاں چوہاں وَاواں نوں چلایا جاوے گا ، جیہڑیاں جگ وچ دکھ جرن دی وَا لیان گئیاں ۔
جد پیلے گھوڑے دا زمانہ گھلن دا ویلا آجاوے گا ، دکھ جرن دیاں ڈراؤنیاں وَاواں چلن لگ پین گئیاں ، تے بوہت سارے اسرائیلی مر جان گے ، تے ساڈےسمیت ، بوہتیاں اوپریاں قوماں وی ماریاں
جان گئیاں ۔ جد پیلے گھوڑے داایہہ زمانہ آجاوے گا ،دکھ جرن دا زمانہ اصل وچ شروع ہوجاوے گا۔
ایس لئی پئی ہُن کالےگھوڑے دا زمانہ اے ، سارے جگ وچ کال دی وَاچلدی پئی اے ۔ جد ایہہ زمانہ مُک جاوے گا ، پیلے گھوڑے دا زمانہ شروع ہو جاوے گا ، تے دکھ جرن دی وَا ودھے گی ۔ دکھ جرن دی وَا وڈے دکھ جرن دے ستاں ورہیاں دے زمانے دےسارے دےساری شروع ہون دی نشانی دیندی اے ۔ جد خُدا سنسار دے اپنے بنان تے انسانی تاریخ دے شروع دے بعدوں پہلی واری ایس دنیا اُتے وڈے دکھ جرنا لے کے آوے گا — یعنی ، جد پیلے گھوڑے دے دناں دے شروع ہون نال وڈے دکھ جرن دی وَا چلے گی تاں—سارا کجھ مُک جاوے گا۔تے ہر شے فیر توں نویں ہوجاوے گی تے دوبارہ شروع ہو جاوے گی ۔
سانوں ایہہ سمجھنا چاہی دا اے پئی جد پیلے گھوڑے دازمانہ آوے گا تاں دکھ جرن دازمانہ وی کُھل جاوے گا ۔ ایس لئی پئی سارے جگ دے راجے اکٹھے ہوجان گے ، کجھ خاص سیاست دان پورے راج اُتے قبضہ کر لین گے ، تے جیہڑے لوک اوہناں دے قانون تے حکماں نوں نئیں منن گے اوہ ڈاہڈے دکھاں تے موت وچ سُٹ دتے جان گے ۔ لوکاں نوں پیلے گھوڑے دےزمانے وچ زندگی بسر کرنا بوہت اوکھا ہووے گا ایس لئی پئی اوہ ست نرسنگیاں دی مصیبتاں دے نتیجےوچ آؤن والیاں قدرتی مصیبتاں توں بوہت چوکھے اوکھے ہون گے ، پر ایہناں تنگیاں نوں ہور ودھانا اوس ویلے دےسیاسی حال ہون گےجیہڑے بوہت دھمکیاں والے ہون گے ۔ پر ایس حال وچ وی ، خُدا لوکاں وچکار کم کردا رہوے گا ،تے بے گنت اوپریاں قوماں نوں اوہناں دی مکتی ول لے جاوے گا ۔
جد پیلے گھوڑے دے زمانے وچ دکھ جرن دی وَا چلدی پئی اے تاں ، تسلی صرف اک تھاں اُتے لبھ سکدی اے ۔ جویں پئی کلام سانوں دسدا اے ، پئی ” نجات ساڈے خُدا ولّوں اے۔ جیہڑا تخت اُتّے بَیٹھا اے تے لیلے ولّوں،“ ایہہ اکو آس ساڈے خُدا باپ تے یسوع مسیح وچ ہیگی اے ۔ جد دکھ جرن دی ڈاہڈی وَا چلے گی تاں ، مخالفِ مسیح ایس دھرتی اُتے نکلے گا تاں، اوہ نا صرف جگ دے سیاسی شعبے سگوں معاشرےتوں لے کے دین تیکر ، جگ دے اکٹھیاں ہون وچ ،سارے معاشرتی شعبیاں نوں وی اکٹھا کرے گا ۔ دکھ جرن دا مطلب ڈاہڈے دکھاں پیڑاں وچوں لنگھنا اے ۔ ایہہ وَا اے جیہڑی چلے گی ۔ تے ایہہ ساریاں شیواں اچانک ای ہو جان گئیاں ۔
معاشی اکٹھیاں ہون دی وَا اج دے سارے جگ وچ چلدی پئی اے ۔ آزادانہ کاروبار ول اک
پکی تحریک چلدی پئی اے جیہڑی ، وکھ وکھ تجارتی تنظیماں دے ممبر ملکاں وچ محصولاں دیاں کندھاں مکاؤندی پئی اے ۔ اک تحفظ پسند تجارتی نظام دے ہیٹھاں ، کسے اک ملک دیاں بنائیاں ہوئیاں شیواں لئی کسے دوجے ملک وچ اپنیاں قیمتاں دی مسابقت نوں قیم رکھنا اوکھا ہندا سی ، ایس لئی پئی باہروں شیواں منگان تے شیواں باہر گھلن دے کم وچکار لائے ہوئے محصول ایناں دیاں قیمتاں وچ وادا کرن گے ، ایس گل توں ہٹ کے ایہدیاں باہر گھلن والیاں شیواں دی شروع والیاں قیمتاں کنیاں ای گھٹ کیوں نا ہون ۔
پر ایہو جیہے محصولاں دیاں کندھیاں ڈِگ دیاں پئیاں نیں ۔ ایہدی ای اک ودھیا مثال یورپ وچ مل سکدی اے ، جتھے محصولا نوں واری واری مکا دتا گیا اے ۔ مثال دے طور اُتے ، یورپی یونین (EU) دے ممبر ملکاں وچ ، ہُن کوئی محصول نئیں ہیگا ۔ ایہہ آؤن والے وڈے اکٹھ دا شروع اے ، جیہڑی سیاسی تے ثقافتی اتحاد دے ودھن دا اشارہ دیندی اے ۔ایہہ حیران کرن والی ترقی اے ۔ محصولاں توں اڈ ، اک ملک اپنی بنائی ہوئیاں شیواں نوں کسے دوجےملک وچ ویچ سکدا اے ، ایہہ عالمی معاشی ماحول دی اک خاص تبدیلی اے ۔ جے یورپی یونین (EU) کامیابی نال اپنی معاشی اکٹھ نوں مکمل کردی اے تاں ، عالمی معاشی اکٹھ ایتھوں تیکر پئی ہو روی تیز ہو جاوے گا۔
تھوڑا چر ای ہویا اے ایشیا وچ ، کوریا، چین ، تے جاپا ن نے آؤن والے معاشی گھاٹےدے سبب اک دوجے نوں ہنگامی قرضے دین لئی اک وعدہ پکا کیتا ، جویں ایس نے ۱۹۹۷ء وچ علاقے نوں اپنے گھیرے وچ لے لیا سی ۔ ۱۹۹۷ءدے ایشیائی گھاٹے وچ ، امریکہ نے پیسے دھیلے دی مدد کیتی ۔ پر ایس وعدے نال ، ایہدے نال رلے ہوئے تِناں مُلکاں وعدہ کیتا پئی جے کسے دستخط کرن والے ملک نوں نوٹاں یاں پیسے دھیلیاں دے گھاٹا ہوندا اے تاں اک دوجے نوں پیسیاں دی مدد دتی جاوے گی ۔ ایہدا مطلب معاشی اکٹھ بناؤنا اے ۔ جویں یورپی ملکاں نیں اپنے ممبر ملکاں دی بوہتی بوہتی خوشحالی لئی یورپی یونین راہیں محصول مکادتے تے معاشی اکٹھ نوں جاری رکھیا ، ایس طرح مشرق بعید دے تِن ملک وی اپنے وسیلیاں نوں آپس وچ ونڈدے پئے نیں۔ وکھ وکھ ملکاں دا ایس طرح دا اکٹھ تے ایہناں دی تنظیمی ترقی اخیریں سیاسی اکٹھ دا سبب بنے گی ۔
محصولا ں نوں مکاؤن دے راہیں معاشی اکٹھ دا مطلب اصل وچ وکھ وکھ ملکاں دا اک ملے جُلے وجود وچ اکٹھ سی ۔جد ست آفتاں دی قدرتی بربادیاں سارے جگ اُتے بوہت وڈا حملہ کرن گئیاں تے بے ترتیبی جمن گئیاں تاں ، ایس طرح بین الاقوامی تنظیماں تے اداریاں دے نمائندے اکٹھے ہوکے اک مطلق رہنما نوں چُنن گے ۔ دوجے اکھراں وچ، اوہ کوشش کرن گے پئی جگ نوں اکو ای سیاسی طریقے نال سوار کے تے اک مطلق راج نا ل کسے نوں راجا بنا کے افراتفری والے جگ وچ نظم و ضبط لیان ۔
ایس کم وچکار وڈے دکھ جرن دا زمانہ آوےگا ۔ ہر کسے دے حقوق دا احترام کرن دی بجائے، بوہتے لوکاں لئی تھوڑے لوکاں دے حق لتاڑنا نا صرف پسند ،سگوں اوہدی آس رکھی جاوے گی ۔ جد پیلے گھوڑے دا زمانہ آوے گا تاں ایہہ وَا چلے گی ۔ ایس طرح دے کماں دی نیہ کالے گھوڑے دے زمانے وچ رکھی گئی اے ، تے ایہناں نوں اصل وچ پیلے گھوڑے دے زمانے وچ محسوس کیتا جاوے گا ۔
جدکوریانوں ۱۹۹۷ءوچ پیسے دھیلے دا گھاٹا پیا تے بین الاقوامی مالیاتی فنڈ (آئی ایم ایف)دے اثر ہیٹھاں رہیا ، ایہہ بربادی بھریاں معاشی آفتاں وچ پھس گیا سی ۔ زمیناں دے مُل ڈِگ پئے ، لوکاں دیاں نوکریاں راتوں رات گواچ گئیاں ، تے وچکارلے لوکی سڑکاں اُتے آگئے۔ایس طرح دی معاشی بربادی سارے جگ وچ اینی چوکھی ہوئی پئی خورے ای کوئی دیہاڑا لنگھیا ہووے پئی کسے دوجے دیس وچ کسے ہور معاشی گھاٹے دے بارے وچ نئیں سُنیا گیا ہونا ۔ ایہہ وَاکال دی وَا اے ۔ اسیں کال دے ایہناں دناں وچ آں ، ایہہ اک ایہو جیہا زمانہ اےجد تہاڈے کول پیسہ نئیں ہیگا تاں تہاڈی زندگی فضول ہو جاندی اے ۔ بوہت چھیتی آؤن والے دناں وچ ، کال دی ایس وَا دے فوراً بعدوں وڈے دکھ جرن دی تیز وَا چلے گی ۔
خُدا نے زمین دیاں چارا ں نکراں دیاں وَاواں نوں تھوڑے چر لئی تھم لیا تے بنی اسرائیل وچوں ۰۰۰,۱۴۴ اُتے مہر کیتی ۔ اوہناں نوں کسے طرح گھاٹا ہون توں بچاؤن دے بعدوں ، اوہ دکھ جرن دی وَا نوں چھڈ دیوے گا ۔ جد دکھ جرن دی ایہہ وَا فرشتیاں دے ہتھوں چھڈی جاوے گی ، تاں وڈے دکھ جرن دی وَاچلے گی ۔ دکھ جرن دی وَاجگ نوں اکٹھیاں کر دیوے گی ، جیہڑا ، مخالفِ مسیح دے نکلن نال ،سارےدا ساراشیطان دا راج بن جاوے گا، تے ست نرسنگیاں دیاں آفتاں نال وڈیاں قدرتی بربادیاں دےست ورہیاں دے دناں توں لنگھے گا۔ ست نرسنگیاں دی ایہناں آفتاں دے بعد وں فیر ست پیالیاں دیاں آفتاں آؤن گئیاں ۔
مخالفِ مسیح دے ظالم راج دے ایہناں دناں وچکار تے ایمان دی آزادی دے غائب ہون دے ایہناں دناں وچ ، کال تے بھکیاں رہنا بوہت چوکھے ہوجان گے ، جیہڑا لوکاں نوں صرف حکومت دی ونڈی ہوئی خوراک اُتے ای جیوندے رہن لئی مجبور کرے گا۔جگ وچ ہر کسے نوں ایس ویلے وچوں لنگھنا پوے گا ۔ مُکاشفہ دے کلام دا ۷ باب سانوں آؤن والیاں ایہو جیہاں شیواں دی اکٹھی فوٹو وکھاندا اے ۔
ایس زمانے وچ سانوں ہور کون اُڈیکد اے ؟ پیلے گھوڑے دا زمانہ بنی اسرائیل تے اوپریاں قوماں دونواں دی بے گنت شہادتاں دی نشانی وی ہووے گا ۔ جد وڈے دکھ جرنے آؤن گے، تاں صرف آس باقی رہ جاوے گی ۔ آیت نمبر ۱۰سانوں دسدی اے ، ” تے اُچّی اُچّی چِیک چِیک کے آکھدی اے۔ پئی نجات ساڈے خُدا ولّوں اے۔ جیہڑا تخت اُتّے بَیٹھا اے تے لیلے ولّوں۔“دوجے اکھراں وچ ، سادی مکتی ، صرف ساڈے خُدا وچ مل سکدی اے جیہڑا تخت اُتے بیٹھا اے ،تے برّے وچ ۔ جویں پئی اسیں باب ۴ وچوں ویکھ سکدے آں ، جیہڑا سانوں دسدا ا ے پئی یسوع مسیح لئی اک تخت بنایا گیا سی ، جیہڑا تخت اُتے بیٹھا اے اوہ یسوع مسیح اے ، اوہ کوئی ماڑا بندہ نئیں ہیگا ،سگوں خُدا دے پُتر ، اپنی مرضی دے مالک خُدا ، تے ساریاں دے انصاف کرن والے وانگر بیٹھااے ۔ خُدا باپ ہُن وی اپنے تخت اُتے بیٹھا اے ۔ ایس لئی جد اسیں تثلیث دے خُدا دی گل کردے آں تاں ، خُدا باپ ،بیٹا تے پاک رُوح سارے اکو ای خُدا نیں ۔ ایس طرح ساڈی اصل مکتی خاص کر کے ساڈے خُدا تے برّے —یسوع مسیح نال تعلق رکھدی اے ۔
جد ڈاہڈے دکھ جرنے شروع ہون گے تاں ، اسیں کتھوں تسلی پا سکدے آں ؟ جدمخالفِ مسیح وڈے دکھ جرن وچکار نکلے گا ، تاں اوہ اپنے اگے اک مورتی بناوے گا ، تے اوہناں سارے لوکاں نوں جانوں مارن دا دابا مارے گا جیہڑے مورتی دی پوجا کرن توں مکرن گے ،تے نال ای اوہناں لوکاں نوں وی جیہڑے اپنے ہتھاں یاں متھیاں اُتے اوہدے ناں دا نشان نئیں لین گے ، برباد کرے گا (مُکاشفہ ۱۳باب)۔
ماحول دے مطابق ، قدرتی حالات وی بوہت بھیڑے ہوجان گے ،ایس لئی پئی اسمان ولوں اگ تے گڑے وسن گے ، بھنچال حملہ کرن گے ، تے ایہدے بعدوں ہور آفتاں آؤن گئیاں ۔ ایس دھرتی اُتے کوئی وی تھاں آفتاں ولوں بچ نئیں سکے گی ۔ ایس بوہت گندیاں حالاں وچ ،جتھے دھرتی بھنچالاں نال ٹوٹے ٹوٹے ہو جاوے گی ، سورج ، چن تے تارے اپنی لو گوا لین گے ، تے سمندر تے دریاآفتاں نال مر جان گے ، ایس ویلے دا سیاسی حال وی ایس طرح بوہت بھیڑے حال ہو ن گے ۔ مخالفِ مسیح جناں وی ہو سکے بوہت ظلم راجے وانگر راج کرے گا ،ایس لئی پئی اوہ اپنی من مرضی دی طاقت والا راج کرے گا تے جگ دے دوجے آگُوآں نوں اپنے راج ہیٹھاں اپنے قیدی بناوے گا ۔
مخالفِ مسیح دا نکلنا کیوں ہووےگا ؟
ایس لئی پئی شیطان اپنی اخیری آس پوری کرن دی کوشش وچ مخالفِ مسیح نوں تھوڑے چر لئی اپنی طاقت دیوے گا —یعنی ، اوہ اپنی آس نوں پورا کرے گا پئی لوک اوہنوں خُدا آکھ کے بلاؤن تاں پئی اوہ اصل خُدا توں اُچا ہو سکے ۔ پر شیطان نوں آپ پتہ ہیگا اے پئی اوہدی ایہہ تمنا پوری نئیں ہووے گی ۔ فیر وی اخیری وار، اوہ سارے لوکاں کولوں وڈیائی کراؤن دی کوشش کرے گا ، تے اوہناں ساریاں لوکاں نوں مار دیوے گاجیہڑے اوہد ا آکھا نئیں منن گے ۔ ایہہ سارے دکھاں توں بوہت بھیڑا حال اے جیہڑا پاک لوکاں اُتے آؤے گا ، ایس ویلے ، پاک لوکاں کول مرن توں علاوہ کوئی دوجا راہ نئیں ہیگا ، ایس لئی پئی اوہ اکو جیہدے اُتے اوہ بھروسہ کر سکدے نیں تے اپنی آس رکھ سکدے نیں اوہ ساڈی مکتی دا خُدا ، یسوع مسیح ساڈا خُدا اے ، جنہے پانی تے رُوح دی خوشخبری دے راہیں سانوں بچایا اے ۔ اسیں صرف اوس خُدا اُتے بھروسہ رکھ سکدے آں ، تے صرف اوسے اُتے بھروسہ رکھدےہوئیاں ای سانوں ایناں ڈراؤنیاں آفتاں تے دکھ جرن وچکار موت توں مکتی مل سکدی اے ۔
اخیری دناں وچ ، ساڈی اکو آس ، ” ساڈے خُدا ولّوں اے۔ جیہڑا تخت اُتّے بَیٹھا اے تے لیلے ولّوں“اے۔ساڈے خُدا اُتے ایمان رکھن نال ، پاک لوکاں نوں شہید کردتا جاوے گا ، تے خُدا اُتے اپنے ایمان دے سبب،اوہ ڈراؤنیاں آفتاں تے موت توں مکتی پاؤن گے ۔ مُکاشفہ ۷ باب ایس طرح سانوں اوہناں ساریاں شیواں دی صورت وکھاؤندا اے جیہڑیاں وڈے دکھ جرن دے ست ورہیاں دے دناں وچکار ہون گئیاں ۔
آؤ اوہناں واقعیاں نوں جاری رکھیے جیہڑے وڈے دکھ جرن دی وَا لیاؤن گے ۔ آیتاں ۹ ۔ ۱۰ ،سانوں دسدیاں نیں ،”اوہناں گلّاں دے پِچّھوں مَیں دھیان کِیتا۔ تے کِیہ ویکھنا آں پئی ہر اِک قوم تے گھرانے تے اُمّت تے اہلِ زبان دی اِک ایڈی وڈّی بِھیڑ جِہنُوں کوئی گِن نئیں سکدا چِٹّے کپڑے پا کے تے کھجور دِیاں ٹہنِیاں اپنیاں ہتّھاں وِچ لے کے تخت تے لیلے دے اگّے کھلوتی اے۔ تے اُچّی اُچّی چِیک چِیک کے آکھدی اے۔ پئی نجات ساڈے خُدا ولّوں اے۔ جیہڑا تخت اُتّے بَیٹھا اے تے لیلے ولّوں۔“ جد پچھیا گیا پئی چٹے کپڑے پائے ہوئے ساریا ں قبیلیاں تے زباناں دی ایہہ بھیڑ ،کون نیں ؟ تاں چوی بزرگاں وچوں اک نے جواب دتا ، ” ایہہ اوہ نیں جیہڑے اوس وڈّی مُصِیبت وِچوں نِکل کے آئے ہوئے نیں ایہناں اپنے کپڑیاں نُوں لیلے دے لہو وِچ دھوکھے چٹیاں کِیتا ہویا اے۔“
ایس لئی پئی خُدا نے سانوں پانی تے رُوح دی خوشخبری دتی جنہے سانوں ساڈے پاپاں توں بچایااے ، تے ایس لئی پئی اسیں ایس خوشخبری اُتے ایمان رکھدے آں ، جد مخالفِ مسیح ظاہر ہوندااے تے سانوں اوہدے اگے ہتھیار سُٹن تے اوہنوں خُدا دے ناں نال پکارن بارے دابے مار کے آکھدا اے تاں اسیں اِنج نئیں کراں گے ۔ ایس توں علاوہ ، ایتھوں تیکر پئی جے ساڈے وچوں کجھ مخالفِ مسیح دے اگے ہتھیار سُٹ دے نیں تاں وی ، اوہناں دے بچ جان دی کوئی ضمانت نئیں ہووے گی ، ایس لئی پئی اوہناں نوں برباد کرن والیاں آفتاں تے شیطان دی اخیری شیدائی والی حرکت وچوں لنگھنا پوے گا ۔اوس ویلے کسے وی شے دی ضمانت نئیں ہووے گی ۔
ایس طرح ساڈے کول ہور کوئی راہ نئیں بچیا اوس خُدا اُتے ایمان رکھن توں سوا جنہے سانوں بچایا اے ۔ اسیں دلیری نال خُدا اُتے بھروسہ رکھدے ہوئیاں اپنی شہادت نوں پسند کراں گے ،جیہڑا سانوں اپنی ہزار ورہیاں دی بادشاہی تے نواں اسمان تے نویں دھرتی دیوے گا ، ایس لئی پئی اوہ سانوں مویاں وچوں جواوے گا ، سانوں چُک لوے گا ، تے سانوں ساریاں نوں نویں اسمان تے دھرتی دا جلال تے برکت دیوے گا ۔ ایس لئی پئی بوہت سارے لوک نیں جیہڑے لیلے دے لہو وچ دھوتے ہوئے چٹے کپڑے پائے ہوئے نیں ۔
سچ مُچ ایہو جیہے بوہت سارے شہید ہون جیہڑے خُدا اُتے اپنےایمان سبب مرجان گے ۔پاک لوک تے سارے جیہڑے اوہناں دناں وچکار شہید ہو گئے نیں ، جگ دی ہر قوم توں ، خُدا اُتے ایما ن لئی ، اپنیاں جاناں وار دین دے ۔ اوہ لوک جیہڑے پانی تے رُوح دی خوشخبری اُتے ایمان رکھدے نیں جیہدی اسیں منادی کردے پئے آں اوہ خُد ا اُتے ایمان رکھ کے اپنی شہادت نوں سینے لاؤن گے ، یعنی اوہ اوہناں نوں اوس ویلے دے سارے ڈراؤنے دکھاں نوں جرن تے آفتاں توں مکتی دیوے گا ۔ صرف خُدا ای سانوں ڈراؤنی آفتاں توں مکتی دے سکدا اے ۔
میَں تہانوں اوہ سارے خاص واقعے دسدا پیاں آں جیہڑے وڈے دکھاں نوں جرن دے ست ورہیاں دے دناں وچکار پیش آؤن گے ۔جد ایس جگ وچ دکھ جرن دی وَا چلے گی تاں ، ایس دھرتی اُتے کوئی آس باقی نئیں رہوے گی ۔جویں پئی ہُن اسیں جان دے آں ایس جگ دا ہُن کوئی وجود نئیں رہوے
گا ، جد اسمان تے دھرتی غائب ہو جان گےاک جویں رُقعے نوں لویٹیا گیا ہووے ۔
خُدا فیر ایس دھرتی اُتے اک نویں دھرتی بناوے گا ۔ایمان دار شہیداں نوں ایہدے اُتے اک ہزار ورہے تیکر راج کرن دیوے گا ، تے جد ایہہ ہزار ورہے مک جان گے تاں ، اوہناں نوں اپنی ہمیش دی بادشاہی وچ گھل دیوے گا ۔ صرف ساڈا خُدا ای اے جنہے سانوں ساڈےپاپاں توں مکتی دتی اے ، جیہڑاسانوں دکھ جرن دی موت تے بربادی توں بچاوے گا،تے جیہڑا سانوں تسلی دے سکدا اے ۔ جد شہادت دا ویلا آوے گا ،تُسیں تے میَں ، تے نال ای سارے جگ دے خوشخبری سُنن تے اوہدے اُتے ایمان رکھن والے ، خُدا اُتے لیاؤن دے سبب دلیری نال شہیدہو جان گے جنہے سانوں ساڈے پاپاں توں بچایا اے ۔اسیں اپنی شہادت نوں اپنے دلیری والے ایمان تے آس رکھ کے سینے لاواں گے ۔ اوہ جیہڑا سانوں ڈراؤنے دکھ جرن تے آفتاں توں مکتی دیوے گا ، ساڈا خُدا اے جیہڑا تخت اُتے بیٹھا اے ۔
ایسے طرح ، اسیں ایہہ منن توں اڈ شہید نئیں ہو سکدے پئی جیہڑے خُدا نے سانوں ساڈے پاپاں توں بچایا اے اوہو ای خُدا اے جیہڑا سانوں ایہناں ڈراؤنیاں آفتاں توں مکتی دیوے گا ۔ اوس ویلے دے شہید اوہ لوک نیں جنہاں دے ناں لیلے دی زندگی دی کتاب وچ لکھے گئے نیں ۔ پر کوئی وی بندہ جیہداناں زندگی دی کتاب وچ نئیں لبھدا اوہ شہید نئیں ہوسکے گا ۔
ایس خوشخبری دی سارے جگ وچ خاص کر کے منادی کیتی جاوے گا ، تے سارا جگ وچ ہر بندہ ایہنوں لازمی سُنے تے ایہنوں جانے گا ۔ ایس لئی پئی اسیں ہُن ایس خوشخبری نوں لگاتا ر ودھاؤندے پئے آں ، پانی تے رُوح دی خوشخبری دی سارے جگ وچ گواہی دتی جاندی پئی اے ۔ ایس جگ وچ بوہت سارے لوک ہیگے نیں ،جیہڑے ، جد وڈے دکھ جرن داویلا آوے گا ، اوہ صرف لیلے اُتے ای اپنی آس رکھن گے ، ایتھوں تیکرپئی اپنی جان دے خطرے ویلے وی خُدا اُتے ایمان رکھن گے ، تے اپنی شہادت نوں پسند کرن دے لائق ہون گے ۔تے پانی تے رُوح دی خوشخبری ، جیہڑی اپنے ایمانداراں دے ناں حیاتی دی کتاب وچ لکھن دے لائق بناؤندی اے ، دی منادی ہوندی رہوے گی ۔
جیہڑے لوک پانی تے رُوح دی خوشخبری اُتے ایمان رکھدے نیں او ہ اخیری دناں وچ شہید ہوجان گے ۔ مُکاشفہ ۱۳:۸ سانوں دسدا اے ، ”تے زمین دے اوہ سارے رہن والے اوہدی پوجا کرن گے جنہاں دے ناں اوس لیلے دی حیاتی دی کتاب وچ لکھے نئیں سن گئے جیہڑا دنیا دے مُڈھ توں پہلاں ہلال ہویا ہویا اے “ ایہہ سچ مُچ سچیائی ہیگی اے پئی ہر اوہ بندہ جیہدا ناں
حیاتی دی کتاب وچ نئیں لکھیا گیا اوہ کسے گلے توں اڈ ، حیوان دے اگے ہتھیار سُٹ دیوے گا ۔
صرف یسوع مسیح تے اوہدا باپ ای سانوں اخیری دناں دے وڈے دکھ جرن توں مکتی دے سکدے نیں۔ پاک رُوح ہُن ساڈے دلاں وچ وسدا اے ۔ میرا ایمان ہیگا اے پئی اسیں خُدا دے سبب مکتی پا چُکے آں ، تے ایتھوں تیکر پئی جے سانوں اوہدے بدلے مار وی دتا گیا تاں ، خُدا سانوں دوبارہ مویاں وچوں جواوے گا ،سانوں چُکے جان نال وَا وچ چُک لوے گا ، دھرتی دی ہر شے نوں نواں کرے گا ، تے سانوں اوہدی ہزار ورہیاں دی بادشاہی وچ رہن دی اجازت دیوے گا ۔
دکھ جرن دی وَا نال فناہ ہویا پیلے گھوڑے دا ایہہ زمانہ تیزی نال ساڈے نیڑے آؤندا پیا اے ۔ کالے گھوڑے دا زمانہ تیزی نال چلدا پیا اے ۔ جد ایہہ اپنا ویلا مکا لوے گا تاں ، پیلا گھوڑا آوے گا ۔ فیر توں ، سارا زمانہ وڈے دکھ جرن دے ست ورہیاں دے ویلے وچ داخل ہو جاوے گا ۔ ایہہ ست ورہے تھوڑے یاں بوہتے نئیں رہن گے ،وڈے دکھ جرن دا ایہہ ویلا لازمی پورا ہووے گا ، ایس لئی پئی ایہہ خُدا دا ارادہ اے ۔
آؤ تھوڑے چر لئی فرض کرئیے پئی وڈے دکھ جرنا سچ مُچ شروع ہو گیا اے ۔ ساڈے آلے دوالے تے سارے جگ وچ رُکھ دے گھاہ سڑدے پئے نیں ، اسمان دھوں نال بھریا ہویا اے ، ایتھوں تیکرپئی دن دے ویلے وی جگ اُتے ہنیرا کردے ہوئیاں سورج ڈاہڈے سنگھنے بدلاں پچھے لُکیا ہویا اے ، لوک ہر تھاں اُتے مردے پئے نیں ، تے ایتھوں تیکر پئی اسیں لوکاں دی اواز و ی سُن دے آں جیہڑے ساڈا پچھا کردے پئے نیں ۔ اسیں کیہدے اُتے ایمان رکھاں گے ؟ کیہ تُسیں خُدااُتے بھروسہ کرو گے ، جنہے سانوں ساڈے سارے گناہواں توں بچایا اے ، تے جنہے شہیداں نوں جنہاں نیں مخالفِ مسیح دے اگے ہتھیا ر نئیں سُٹے سن ،اوہناں نوں دوبارہ جیوندے کرن ، جیوں اُٹھن ، تے سانوں چُکے جان لئی ایس دھرتی اُتے دوبارہ واپس لیاؤن ، تے سانوں اپنے نویں اسمان تے زمین وچ لے جان دا وعدہ کیتا اے ، یاں فیر تُسیں اوہدے اُتے بھروسہ نئیں کرو گے؟ لازمی اسیں خُدا اُتے بھروسہ کراں گے ! صرف خُدا ای ساڈی اکو آس اے ! نا ای مخالفِ مسیح دی خوشامد تے نا ای اپنے آپ اُتے بھروسہ کرنا سانوں مکتی دے سکدا اے ؛ نا غاراں وچ لُکنا، نا ای دھرتی نوں چھڈ کے کسے خلائی اسٹیشن ول فرار ہونا —کجھ وی نئیں ، سگوں خُدا دے سوا کجھ وی سانوں کدی نئیں بچا سکے گا !
جد ایس سیارے نال پوچھل والے تارے ٹکران گے تاں بربادکیتیاں ہوئیاں شیواں دے باقی
حصے دھرتی اُتے ڈِگ پین گے ، تے سارے سیارے نوں فناہ کر دین گئیاں ۔ سار ا کجھ جیہڑا خُدا نے پہلوں بنایا سی اوہ فنا ہو جاوے گا ۔ فیر سچی آس ساڈے دلاں وچ پیدا ہو جاوے گی ۔ ایہو جیہے پریشانی والے حال وچ اسیں کیہدے اُتے اپنی آس رکھ سکدے آں؟ خُدا اکو اے جیہدے ول اسیں ویکھ سکدے آں تے مدد منگ سکدے آں ، خُدا توں سوا کسے نے نئیں سانوں بچایا!
ایس لئی پئی اسیں پانی تے رُوح دی خوشخبری دے کلام اُتے ایمان رکھ کے مکتی پا چُکے آں ، ایس لئی اسیں مکتی لئی خُدا دا شکر تے وڈیائی کرد ے آں ۔ پر جد وڈے دکھ جرن دے ویلے آن گے ، اسیں ڈراؤنیاں آفتاں تے موت توں مکتی دین لئی وی ساریاں شیواں نال ، خُدا دے شکرگزار تے اوہدی وڈیائی کراں گے ۔ صرف خُدا ای سانوں مخالفِ مسیح دے ہتھوں مکتی دے سکدا اے ۔ خدا توں سوا کوئی نئیں ہیگا ۔ ایس لئی پئی اسیں اوس خُدا اُتے اپنا ایمان تے آس رکھدے آں ، تے ایس لئی پئی سانوں یقین اے تے آس اے پئی سانوں دوبارہ جیوندا کرے گا تے سانوں ہزار ورہیاں دی بادشاہی تے نویں اسمان تے دھرتی وچ ہمیش دی خوشی و چ زندگی بسر کرن دی اجازت دیوے گا ، ایس لئی اسیں آؤن والے سارے دکھ نوں جرن دا مقابلہ کر سکدے آں تے ایہناں اُتے فتح پا سکدے آں ۔
اوہ ویلا آوے گا جد مخالفِ مسیح سانوں اپنی مورتی اگے کھچ کے ایہہ آکھے گا پئی ، ”ایس مورت نوں سجدہ کرو ، تے مینوں خُدا آکھو ۔ یسوع خُدا نئیں ہیگا ۔ میَں خُدا ہیگا واں ، تے میَں اوہوای آں جیہڑا تہانوں بچاواں گا ۔ “ایس طرح جد مخالفِ مسیح ساڈے کولوں اپنی بھگتی کراندااے تاں، اسیں گھبرا سکدے آں ، پر ساڈے وچوں جیہڑے نویں سریوں جمے نیں کدی وی اوہدی مورتی اگے نئیں جھکن گے ۔ کیوں ؟ ایس لئی پئی سانوں اوہدے ناں دا نشان لین لئی مجبورکرن دے بعدوں ، مخالفِ مسیح سانوں اپنے قیدی بنالوے گا ۔لوکاں نوں مارن لئی سانوں ورتے گا ، تے اخیری سانوں وی مار دیوے گا ۔
اوہ ویلا آوے گا جد ایہہ مخالفِ مسیح اپنے آپ نوں خُدا اکھوان لئی کھلووے گا۔ ایہہ آؤن والے دن دُور نئیں جد مخالفِ مسیح اپنے اگے اپنی بوہت وڈی مورت بناوے گا ، سارے جگ وچ ہر کسے نوں آکھے گا پئی اوہ اوہنوں خُدا آکھن ، تے اوہدی وڈیائی تے بھگتی کرن والے لوکاں دیاں جماعتاں بنان ، جے ایس ویلے امن ہیگا اے تے قدرتی ماحول تگڑا تے سوہنا اے تاں خورے ، کوئی سوچ سکدا اے پئی اک نواں جگ شروع ہوگیا اے ۔ پرجنگل سڑن نال ، سورج غائب ہوگیا تے دھرتی اُتے ہنیرا ہو گیا ، لوک چیکاں مارن لگے پئے جویں پئی اوہ مرن لگے نیں ،تے کچرا تے ادھیاں سڑیاں ہوئیاں لاشاں سڑکاں اُتے پُٹھیاں سدھیاں پئیاں ہوئیاں نیں ، ساڈے وچوں کوئی وی کدی وی مخالفِ مسیح دی مورت اگے جھکن تے اوہنوں خُدا وانگر بلاؤن دا حکم نہیں من سکدا ۔ ہر نویں سریوں جمن والا ایمان دار اوس ویلے جان دا ہووے گا ، پئی ایہہ خُدا دے کلام دے راہیں پیشین گوئی کیتے جان والا مخالفِ مسیح اے۔
پاک رُوح وی سانوں سکھاندااے ، اوہ سانوں ایہو جیہے دل دیندا اے جیہڑے کدی نئیں ہتھیار سُٹ دے ۔ اوہ سانوں دلیری والا دل دیندا اے ، جیہڑا آکھدا اے پئی ، ”جے تُسیں چاہو تاں مینوں مار سُٹو ، پر جے میَں مر جاواں گا تاں خُداوند میری موت دا بدلہ تہاڈے کولوں لوے گا ، تے اوہ خاص کر کے مینوں جواوے گا !“سانوں یقین اے پئی جویں ساڈا خُداوند تیجے دیہاڑے مویاں وچوں جیوں اُٹھیا ، ایسے طرح ، سانوں ، وی ، فیر جیوندا کیتا جاوے گا ۔ تے خُداوند سانوں کسے وی ناکامی توں اڈ چُک لوے گا ۔
راستباز کدی وی مخالفِ مسیح دے اگے ہتھیار نئیں سُٹن گے
اوہ لوک جنہاں نے ایہہ وعدے دا کلام سُنیا ، پئی خُدا پہلے لوکاں نوں فناہ کر دیوے گا تے ہزار ورہیاں دی بادشاہی نوں ایہدی تھاں اُتے بناوے گا تاں پئی راستباز ایہدے اُتے اک ہزار ورہے تیکرایہدے اُتے راج کرن ، تے ایہدے اُتے ایمان رکھ کے نویں سریوں جمن والے ، مخالفِ مسیح د ے اگے کدی ہتھیار نئیں سُٹن گے ۔ ایس لئی پئی جویں ای پاک رُوح اوہناں دے دلاں وچ وسے گا تاں اوہ سارا کجھ جان لین گے ۔ پر جنہاں کول پاک رُوح نئیں ہیگا اوہ اپنیاں جاناں لئی بھیک منگن گے تے شیطان دے اگے ہتھیار سُٹ دین گے ، ایس ڈر نال پئی جے اوہ پہلوں توں موجود اک مکمل نویں جگ وانگر فتح مند غالب دھارے دے پچھے چلن توں انکار کر دین گے تاں اوہناں دیاں جاناں فناہ ہو جان گئیاں ۔ جد ہر بندہ ایس طرح موت کولوں ڈردا اے تے اوہدا قیدی بن جاندا اے ۔ تاں صرف نویں سریوں جمن والے ای موت دے ایس ڈر توں آزاد ہون گے تے دلیری نال اپنی شہادت نوں پسند کرن گے ، ایہو جیہے کم وچ جیہڑا چڑھدے سورج وانگر روشن ہووے گا ۔
نویں سریوں جمن والے اِنج کر سکدے نیں ایس لئی پئی اوہ آس رکھدے نیں پئی نویں بدناں نال جیوں اُٹھن گے ۔ ایس لئی پئی پاک رُوح رکھن والیاں نوں نا صرف موت دا ڈر ہووے گا ، سگوں اوہ اصل وچ مخالفِ مسیح دے خلاف کھلون گے تے پاک رُوح نال چلن والے دلیری والے اکھراں نا ل اوہدی حیثیت مکا دین گے ۔ اوہ ہُن ڈرپوک ہوسکدے نیں ، پر اوہ لوک جیہڑے پاک رُوح دے راہیں پانی تے رُوح دی خوشخبری اُتے ایمان رکھن نال مُہرکیتے گئے نیں ، رُوح پاک دے راہیں ، اوہ اکھر بولن گے جیہدا اوہناں دے ویری بالکل ای جواب نئیں دے سکدے ۔ اسیں خُدا دےایس کلام اُتےایمان رکھدے آں۔
مخالفِ مسیح پریشان ہو جاوے گا جویں ای پاک لوک اوہنوں ایہہ آکھدیاں ہویاں اعلان کرن گے ، ”تُوں اپنے آپ نوں خُدا آکھن دی کِیویں ہمت کر سکدے ایں! تینوں اسمان توں باہر کڈھ دتا گیا سی ،تے بوہت چھیتی تینوں دھرتی توں وی باہر کڈھ دتا جاوے گا ! ہُن تیرے دیہاڑے گنے گئے نیں !“صرف تھوڑے ای نئیں ، سگوں جگ دیاں ساریاں قوماں وچوں اک بے گنت جماعت وی مخالفِ مسیح دے خلاف اُٹھ کھلووے گی۔ مخالفِ مسیح فیر اوہناں ساریاں نوں مار دیوے گا ۔ اوس ویلے پا ک لوک کدی وی قیدی نئیں بنن گے بھاویں اوہناں نوں موت دی سزا دتی جاوے ۔ جویں پئی خُدا دا کلام سانوں دسدا اے ، پئی ”مکتی ساڈے خُدا ولوں اے جیہڑا تخت اُتے بیٹھا اے ، تے لیلے ولوں !“اسیں پاک رُوح وچوں وگدے ہوئےاپنے ایمان دی آس تے وڈے یقین نال مرجاواں گے ۔
جویں پئی اعمال دی کتاب گواہی دیندی اے ،جد ستفنس نوں سنگسار کیتا گیا تاں ، اوہنے اسمان ول ویکھیا تے اک رویا وچ خُدا دا تخت ویکھیا ، تے یسوع نوں خُدا دے سجے ہتھ کھلوتیاں اوہدا استقبال کردیاں ویکھیا ۔ ایتھوں تیکر پئی جد اوہ مردا پیا سی ، ستفنس نے اوہناں دی معافی لئی دعا کیتی جیہڑے اوہنوں سنگسار کردے پئے سن ، ایسے طرح ای جویں یسوع نے اوہناں لوکاں دی معافی لئی دعا کیتی جنہاں نیں اوہنوں سولی اُتے چاڑھیا سی ۔
ستفنس وانگر ، اخیری ویلیاں دے شہید پاک لوک ، پاک رُوح نال بھرے ہوئے ہون دے سبب ، ڈکو ڈولے نئیں کھاندے سگوں دلیربن جاندے نیں ۔بھاویں اوہ ڈرن والے ہو سکدے نیں تے ایہناں دے ایمان ماڑے پے سکدے نیں ، ہُن جیہڑے ایہہ کلام سُن دے نیں جدایہہ ویلا آوے گا ، دلیراں والا ایمان رکھن گے ۔
ڈرو نا ، ڈرن والی کوئی گل نئیں ، مخالفِ مسیح دے نکلن توں لے کے دکھ جرن دی وَا تیکر ایہہ ساریاں شیواں صرف خُدا دی اجازت نال تے اوہدے ارادے ہیٹھ ای ہون گئیاں جویں پئی مُکاشفہ ۶ باب
وچ وکھالی دیندا اے ۔
شہادت ساڈی اپنی بدنی طاقت نال نئیں آوے گی ۔ شہادت صرف پاک رُوح دی طاقت تے سچیائی اُتے ساڈے ایمان نال ای ہوسکدی اے ۔ دوجے اکھراں وچ ، خُدا اُتے ،اوہدے وعدے دے کلام اُتے ایمان رکھ کے ، تے ایس سچیائی اُتے پئی قادرِ مطلق خُدا ساڈا خُدا اے ، اسیں شہید ہو سکدے آں ۔
ہُن تہانوں ایہہ سوچنا چاہی دا اے پئی خُدا نے اپنے ارادے دے ست زمانیاں وچ سانوں جیہڑی شہادت دی اجازت دتی اے اوہ خُدا دی سیانف اے ۔ آؤ اسیں اپنی شہادت دے بارے وچ ، ساڈے لئی خُدا دے ارادے دے اک حصے وانگر سوچیے ، اپنی سوچاں مطابق نا سوچئے ،سگوں ایہدی بجائے خُدا دی مرضی مطابق ایہدے اُتے سچے دلوں ایمان رکھیے ۔ آؤ اسیں خُدا دے کلام اُتے ایمان رکھیے ، پئی جد ساڈی شہادت دا ویلا آوے گا ، خُدا سانوں ایہنوں جرن لئی بوہت چوکھی طاقت دیوے گا ۔
ہر زمانےوچ اک اپنی مرضی دا راجہ ہوندا اے ۔ نویں سریوں جمن والیاں اُتے خُدا دا راج ہوندا اے ، جدپئی اوہ جیہڑے نویں سریوں نئیں جمے اوہناں اُتے شیطان دی رُوح راج کردی اے ۔ جد اخیری ویلا آوے گا ، نویں سریوں جمن والے ، خُدا دے راج ہیٹھاں ، ساریاں ازمائشاں تے دکھاں نوں جرن لئی اوسے کولوں طاقت پاؤن گے ۔ ایہدے توں اُلٹ ، جیہڑیاں لوکاں اُتے شیطان دا راج اے اوہناں کول اوہدی مرضی پچھے چلن توں سوا کوئی چارہ نئیں ہووے گا ، بھاویں اوہ چاہن یاں نا چاہن ، ایس لئی پئی اوہ شیطان دے راج ہیٹھاں نیں ۔
پر سچ مُچ کیہدی طاقت وڈی اے ؟ کیہ اسیں برکت والے آں یاں لعنت کیتے ہوئے ایہدا فیصلہ خُدا تے شیطان وچکار کیہدی طاقت بوہتی اے ، نال کیتا جاندا اے ۔ اخیری ویلیاں وچ کیہڑا بچایا جاندااے ایہدا فیصلہ ایس گل نال ہوندا اے پئی کیہدے اُتے اسیں ایمان رکھدے تےکیہدے پچھے چلدے آں ، کیہدے اکھراں اُتے اسیں بھروسہ کردے آں ۔ اوہ لوک جیہڑے خُدا تے اوہدے کلام اُتے ایمان رکھدے نیں اوہناں نوں حفاظت ، برکت تے اوہدی قادرِ مطلق قدرت تے اختیار دے راہیں ہمیش دی زندگی دتی جاوے گی ۔ پر جیہڑیاں لوکاں نیں شیطان دیاں اکھراں نوں سُنیا تے اوہدے اگے ہتھیار سُٹ دتے اوہناں نوں اوہدے نال ای دوزخ وچ سُٹ دتا جاوے گا ، جیہڑا اوہنوں نوں دوزخ توں مکتی دین لئی بے وس اے ۔ ایس لئی خُدا نے مُکاشفہ ۱-۷ باباں دے راہیں اپنا کلام دتا ۔
اٹھواں باب تے ایہدے بعدوں والے باباں وچ ، مُکاشفہ تفصیل نال لکھدا اے پئی پیلے گھوڑے دے زمانےوچ کیہ ہووے گا ۔ سب توں پہلوں تاں ، ست نرسنگیاں دیاں آفتاں دھرتی اُتے آؤن گئیاں ۔ ایہناں ستاں آفتاں وچوں آؤ آیت ۷ وچ لکھی ہوئی پہلی آفت ول دھیان کرئیے: ”تے جد پہلی تُرہی وجی تے گڑے تے اگ جنہاں وچ لہو رلیا ہویا سی جمے تےزمین اُتے سُٹے گئے ۔ تے زمین دا تریجا حصہ سڑگیا تے تریجا حصہ بُوٹے تے سارا ہراگھاہ سڑ گیا ۔ “پہلی تُرہی دی آفت نال ، لہو رلے ہوئے گڑے تے اگ زمین اُتے وسے گی ۔ ایہہ پہلا ویلا نئیں ہووے گا جد زمین اُتے اگ وسے گی ، ایس لئی پئی سیارہ زمین اُتےشہابِ ثاقب یاں پوچھل والے تاریاں دا کئی وار حملہ ہویا اے ۔
حالے تیکر ، ایہناں وچوں کوئی وی اینا فناہ کرن والا نئیں ہو سکیا پئی سارے جگ نوں فناہ کر سکے ، پر جد پیلے گھوڑے دا زمانہ آجاوے گا ، تاں دکھ جرن دی تیز وَا دھرتی اُتے چلے گی ۔ جد ایہہ وَا طوفان وانگر ودھدی اےتے قدرتی شیواں نوں روڑھ کے لے جاندی اے ، تاں ایس دھرتی اُتے اگ وسے گی تے بوٹیاں تے ساری گھاہ دا تریجا حصہ ساڑ کے رکھ دیوے گی ، تے ہر کوئی ایس تیز اگ نوں بجھاؤن لئی نکلے گا ۔
خُدا دا کلام سانوں دسدا اے پئی جگ دے جنگل پہلی آفت نال سڑن دے بعدوں ، اگ نال بلدا ہویا اک بوہت وڈا پہاڑ سمندر وچ ڈگ پوے گا—غالباً ایہہ اک پوچھل والے تارے وانگر ای ہووے گا ۔ تیجی آفت نال ایہدی ہور وضاحت کیتی گئی اے : ”تے جد تریجے فرشتے تُرہی نوں پھوک ماری تے اک وڈا سارا تارہ مشال وانگر بلدا ہویا اسمانوں ٹُٹ پیا تے تریجے حصے دریاواں تے پانی دے چشمیاں اُتے آپیا ۔ “اک پوچھل والا تارہ ، دوجے اکھراں وچ ،دھرتی نال ٹکرائے گا ۔ جویں پئی فلم ڈیپ امپیکٹ، جتھے اک پوچھل والا تارہ سمندر وچ ڈگدا اے تے بوہت وڈیاں سمندری لہراں اُٹھدیاں نیں ، تیجی آفت ایسے طرح دی بربادی لیاوے گا ۔ آفت ایس فلم وانگر خورے اینی فناہ کرن والی نئیں ہوسکدی ، پر دھرتی دیاں وکھ وکھ تھاواں اُتے حملہ کرن والے شہاب ِ ثاقب ساری دھرتی نوں بوہت چوکھا نقصان پہنچان گے ۔ سمندری لہراں سمندر وچ رہن والے تریجے حصے جانداراں نوں جانوں مار دین گئیاں تے تریجے حصے سمندری جہازاں نوں فناہ کر دین گئیاں ۔
جد دکھ جرن دی ایہو جیہی وَا چلن لگ پے گی ، تاں اسیں پیلے گھوڑے دے زمانےدی آمد نوں من لواں گے ۔ آؤن والے دناں وچ ، جد تُسیں اپنے ٹی وی اُتے چلدیاں ہوئیاں خاص خبراں ویکھدیاں ہوئیاں ایہہ سُنو گے پئی اسمان توں اگ وسدی پئی اے تے ایہہ پئی جگ دے تریجے حصے دے جنگل دھوئیں وچ سڑدے پئے نیں ،تاں تہانوں پتہ ہونا چاہی دا اے پئی جو کجھ ہونا سی اوہ اخیریں ہو گیا اے ۔ جد حکومتاں بچیاں توں لے کے بُڈھیاں تیکر ہر کسے نوں اگ توں بچاؤن لئی اکٹھیاں ہوندیاں نیں ،تاں تہانوں لازمی طور اُتے ایہہ من لینا چاہی دا اے پئی مکن دا ویلا اخیریں شروع ہو گیا اے ۔
ساڈے وچوں جیہڑ ے ہُن پانی تے رُوح دی خوشخبری اُتے ایمان رکھدے نیں ، مکتی دی آس جیہڑی سانوں ایہناں ڈراؤنیاں آفتاں توں مکتی دیوے گی اوہ صرف قادرِ مطلق خُدا وچ ہیگی اے ۔ جد مخالفِ مسیح سانوں مار دیوے گاتاں ، اسیں شہیدہو جاواں گے ایس لئی پئی اسیں اوہدے نال مقابلہ کرن لئی کوئی دنیاوی طاقت نئیں رکھدے ، پر ایہدے باوجود اسیں بوہت خوشی نال شہید ہو جاواں گے ۔ قادرِ مطلق ساڈے وچوں اوہناں لوکاں نوں جواوے گا جیہڑے ایہناں ڈراؤنے دکھاں وچکار ایمان نال شہادت قبول کردے نیں ،تے خُداوند ساڈاایّالی بن جاوے گا تے سانوں زندگی دے پانی دے چشمیاں ول لے جاوے گا ۔
خُدا دی بادشاہی بناؤن دے بعدوں، جتھے اسیں فیر کدی اگ ، تریہہ تے سورج دے نقصاناں وچ نئیں پواں گے ، خُدا سانوں اوتھے لے جاوے گا ۔ کلام سانوں دسدا اے پئی خُدا ساڈے نال ایس بادشاہی وچ رہوے گا ، سانوں تسلی دیوے گا ،ساڈے اتھرُو پوہنجے گا ، تے سانوں ہمیش لئی جلال وچ جیون دی اجازت دیوے گا ، تاں پئی اسیں دوبارہ کدی دکھاں وچ نہ پیے ۔
وعدے دے کلام اُتے پکیا ں ہوکے قیم رہوو
جد میَں بائبل وچ ٹھہردا آں ،تاں میرا دل پاک رُوح دی تسلی نال بھرجاندا اے ، تے مینوں پتہ لگدا اے صرف خُدا ای سانوں ایہناں ڈراؤنیاں آفتاں توں مکتی دے سکدا اے ۔ ”خُداوند یسوع آ !“مینوں اپنے خُداوند اُتے بھروسہ اے ۔ میَں آس رکھداہاں پئی اوہ مینوں ڈراؤنے دکھاں نوں جرن توں بچاوے گا ، جویں اوہنے مینوں میرے سارے پاپاں توں مکتی دتی اے ۔ میرا ایمان اے پئی اوہ میرے نال دے پاک لوکاں نوں وی ایسے طرح مکتی دیوے گا ۔ میرا ایمان اے پئی میری مکتی ، ایتھوں تیکر پئی اخیری دناں وچ مسیح دے پرت کے آؤن توں پہلوں ای ، ساڈے خُدا ولوں اے جیہڑا تخت اُتے بیٹھا اے تے لیلے ولوں اے ، تے میرا ایمان اے پئی تہاڈی مکتی وی ، خُدا وچ ہیگی اے ۔
جگ بوہت چھیتی وڈے دکھ جرن دے ویلے دے آؤن دے نال ای آفتاں تے بربادیاں نال بھر جاوے گا ۔پر ایس توں ہٹ کے پئی ایس جگ اُتے بھاویں کنے ای اوکھے ویلے آؤن ، میَں ایمان رکھداہاں پئی ساڈا خُدا سانوں اوس ویلے دیاں آفتاں تے دکھ جرن تے ساڈے ویریاں دی کُٹ مار توں بچاوے گا ، ایس لئی پئی خُدا نے سانوں ساڈے سارے پاپاں توں مکتی دتی اے ، سانوں اپنے پُتر بنن دا حق دتا اے ، تے سانوں ایہو جیہا بنا دتا اے ۔
جیہڑے نویں سریوں نئیں جمےاوہ ساڈے تو ں بوہت چوکھے لیکھاں مارے نیں ۔جد ہر شے سڑدی ہووے گی تے افراتفری روزدیہاڑی وھد دی ہووے گی تاں ، خُدا اُتے دلوں ایمان نہ رکھنا بوہت دکھ دین والا ہووے گا ؟ کئی لوک ایہدے وچ بِنا شک پئی اوہ بُدھ مت ہون یاں کوئی ہور دین ، اوہ اپنے دین اُتے مجبوری نال قیم رہن گے ، پر اوہناں نوں اپنے آپ وچ کوئی تسلی نئیں لبھے گی ۔ صرف اوہ پریشان تے ناکام ای رہن گے ۔ بوہت سارے لوک ہون گے جیہڑےایس طرح دی پریشانی دی حالت وچ اپنی موت مرن گے ۔سانوں ، وی ، اوہناں لوکاں وانگر افراتفری تے اوہو ای مشکلاں جرنیاں پین گئیاں ۔ پر ساڈے دل اوہناں توں فرق نیں ۔ اسیں جیہڑے ہُن اپنے ایمان نوں پکا کردے پئے آں دوجیاں توں فرق آں ، ایس لئی پئی خُدا نےپانی تے رُوح دی خوشخبری دے راہیں سانوں بے پاپ بنا دتا اے ۔
یوحنا ۱: ۱۲سانوں دسدا اے ،”پرجنیاں اوہنوں قبول کیتا اوس اوہناں نوں حق دتا پئی خُدا دے پُتر بن جان یعنی اوہناں نوں جیہڑے اوہدے ناں اُتے ایمان لیاؤندے نیں ۔ “ خُدا نے دوجے اکھراں وچ ، اوہدے پُتر بنن دے حق نال ، ایہہ آکھدے ہوئیاں ، ساڈے اُتے مہر کردتی ،” تُسیں میرے پُتر او ۔ “ اوہنے سانوں ایہہ خاص تے اُچی شان والا حق دتا اے ۔ اسیں خُدا دے پُتر آں ۔جد اسیں پانی تے رُوح دی خوشخبری اُتے ایمان رکھدے آں تاں ، کیہ ساڈے دلاں وچ ہُن وی کوئی پاپ باقی ہیگا اے ؟ بالکل نئیں ! ہرطریقے نال ، کیہ اسیں خُدا دے پُتر نئیں بنے آں ؟ بالکل اسیں بنے آں ! جے خُدا دے پُتراں نوں خُدا دے کلام دی تعلیم دا گھاٹا اے تے اوہناں وچ بوہت ساریاں کمیاں نیں تاں کیہ ایہدا مطلب ایہہ ہیگا اے پئی خُدا اوہناں دے باپ وانگر اوہناں دی راکھی نئیں کرے گا ؟ بالکل نئیں ! جویں ماپے اپنے بچیاں اُتے بوہتا دھیان دیندے تے ویکھ بھال کردے نیں جیہڑے تعلیم دا گھاٹا رکھدے
نیں ، خُدا ساڈے وچوں ماڑیاں لوکاں نوں وی بوہتی بوہتی طاقت دینداتے اوہناں دی راکھی کردا اے ۔
جد مخالفِ مسیح دے ویلے دے آؤن نال افراتفری ہر دیہاڑے ودھدی اے تاں ، خُداپاک رُوح دے راہیں اپنے پُتراں نوں تگڑے بناوے گا ، تے اوہناں نوں ایمان ، آس تے دلیری دیوے گا ۔ ایس لئی پئی اوہ سانوں دلیری دیوے گا ، سانوں کوئی ڈر نئیں ہووے گا ۔ڈرن والی کوئی گل نئیں سوا اوس ڈر دے جیہڑا ساڈے دلاں وچ ودھدا اے ۔ لوک ایہدے توں دور رہ کے اپنے آلے دوالے ہون والے واقعیاں توں بچ سکدے نیں ، پر اپنے دلاں والے ڈر توں کدی مکتی نئیں پاسکدے بھاویں او ہ کدھرے و ی چلے جان ۔ نا ای سون والیاں کمریاں وچ ُلک کے ، نا تہہ خانیاں وچ ، نا ای بم توں بچاؤن والیاں پناہ گاہواں وچ ، اوہ ایس ڈر توں بھج سکدے نیں جنہے اوہناں دے دلاں نوں قیدی کیتا ہویا اے ۔
پاک لوکاں دے دلاں وچ ، ایس توں اُلٹ ، کوئی ڈر نئیں ، صرف دلیری اے ، تے اوہ ایس طرح دلیری نال اپنی شہادت دا مقابلہ کر سکدے نیں ، اپنے آپ نوں آکھدے ہوئیاں ، ”جیہڑا ویلا آؤن والا سی اوہ اخیریں آگیا ۔ ایہہ خُداوند دی واپسی دا ویلا اے !اوہ چھیتی نال سانوں لے جاوے گا !“ایہہ چُکے جان دے ویلے ہووے گا — اج دے دن وانگر ایہہ روز وانگر نئیں ہووے گا ، سگوں جگ دا تریجا حصہ دھوئیں نال سڑدا ہووے گا ۔پر ایس توں پہلوں پئی دکھ جرنے ہور وی بھیڑے ہوجان ،خُدا پاک لوکاں نوں وَا وچ چُک لوے گا ۔
کیہ تہانوں ہُن یقین ہیگا اے پئی خُدا نے سچ مُچ تہاڈے لئی ست زمانے مقرر کیتے نیں ؟ مُکاشفہ ۶ باب سانوں دسدااے پئی اوہنے اِنج کیتا ۔ جویں پئی اوہنے مقرر کیتا اے ، خُدا سارا کُجھ پاک لوکاں دے جرن لئی بالکل اوسے طرح لیائےگا جویں لکھیا ہویا اے ۔ اِنج ای ، جنہاں دے پاپاں دا فدیہ دتا گیا اے اوہ بوہت برکت والے نیں ،پر اوہ لوک جیہڑے شرماندے نیں تے خوشخبری اُتے ایمان نئیں رکھدے اوہ بے نصیبے نیں ، اوہ دوزخ وچ مک جان گے ۔ خُدا سانوں دسدا اے پئی آؤن والے دناں وچ ڈراؤنیاں آفتاں آؤن گئیاں ، تے جد ایہہ آفتاں مک جان گئیاں ، جیہڑے نویں سریوں نئیں جمن گے اوہناں نوں ہمیش والی اگ تے گندھک دے دریاوچ سُٹ دتا جاوے گا ۔ ایس لئی خُدا نے سانوں ہن اک سکون بھریا جگ دتا اے ، تے ایس لئی اوہنے سانوں اینے امن بھرے ویلے وچ اپنی خوشخبری دتی اے ۔
خُدا اک بندے دے بدن وچ لگ بھگ ۲۰۰۰ء ورہے پہلاں ایس دھرتی اُتے آیا ۔ ساڈے بدلے ، اوہنے ساڈے سارے پاپاں نوں اپنے اُتے لین لئی بپتسمہ لیا تے سولی اُتے مر گیا ، سانوں جگ دے سارے پاپاں توں مکتی دتی ۔ ساڈے مکتی داتا وانگر ، اوہنے سانوں بچایا ۔ اوہنے سانوں اپنی برکت دتی جنہے سانوں خُدا تے اوہدی مکتی اُتے ایمان رکھ کے بچائے جان دی اجازت دتی ۔ ایہہ خُدا دا فضل اے ۔ ایہہ خوشخبری اے جنہے سانوں ساڈے سارے پاپاں تے خُدا دی سزا توں بچایا ، خُدا دے پلیٹھی دے پُتر نوں ساڈے کول گھل کے ، ساڈے سارے پاپاں نوں اوہدے اُتے لد دتا ، تے ساڈے بدلے اپنے ای پُتر نوں سزا دتی ۔ ہُن ایہدے اُتے ایمان لیا کے ، اسیں خُدا دے فضل دے کپڑے پاؤندے آں ،تے اوہدے ولوں ہمیش دی زندگی پاؤندے آں ، ایس لئی پئی اسیں ایہدے اُتے ایمان رکھدے آں ، اسیں خُدا دے پُتر بن گئے آں ، تے ایس لئی پئی ہُن اسیں خُدا دے پُتر بن گئے آں ، جد اخیری دناں دے دکھ بوہت چوکھے ہوجان گے تاں اوہ سانوں اُتے سد ے گا تے ساڈی راکھی کرے گا ۔
اوس ویلے خُدا دے پُتر تے شیطان دے پُتر اک دوجے توں خاص کر کے وکھ ہون گے ۔ ایہناں دے خاص اختلاف بالکل صاف نظر آؤن گے ۔ ایہدے بارے ہور تفصیل نال بحث بعدوں کیتی جاوے گی ۔ تہانوں حالے تیکر جیہڑی شے یاد رکھنی چاہی دی اے اوہ ایہہ ہیگی اے پئی جد ساڈے اُتے وڈے دکھ آؤن گے تے اسیں شہید ہوجاواں گے ، فیر اسیں خُدا دے اگے جیوں اُٹھاں گے تےچُکے جاواں گے ۔ایہدے توں کوئی فرق نئیں پیندا پئی کوئی ایہدے اُتے ایمان رکھدا اے یاں نئیں ؛ ایس توں ہٹ کے ایہہ ہووے گا ، ایس لئی خُدا نے آکھیا اے پئی اوہ وَاواں وگائے گا تے ایسے طرحاں ایہہ سارے کم کرےگا ۔
آیت ۱ سانوں دسدی اے ، ” ایہدے پِچّھوں مَیں زمین دی چَوہاں نُکرِیں چَوہ فرِشتے کھلوتے ویکھے اوہناں زمین دیاں چَوہاں وَاوَاں نُوں تھمیا ہویا سی پئی زمین یا سمُندر یا کِسے بُوٹے نُوں وَا نا لگّے۔“ خُدا ایہناں وَاواں نوں تھم لیندااے تاں پئی اوہ اجے نہ چلن ۔ دوجے اکھراں وچ دسدے ہوئیاں ، ایہدا مطلب ایہہ ہیگا اے پئی جد خُدا اجازت دیندا اے ، تاں ایہہ وَاواں زمین دیاں چاراں نکراں توں چلن گئیاں ۔ جد خُدا ولوں اجازت دتی جاوے گی ، تاں خُدا دے فرشتے ایہناں وَاواں نوں چھڈ دین گے تے پیلے گھوڑے دے زمانے دی اگوائی کرن والے ہون گے ۔ جد ایس طرح دے وڈے دکھاں دی وَا چلے گی تاں ، جگ وچ ہرتھاں اُتے قدرتی آفتاں تے جنگاں لیاؤن گئیاں ، ہر بندہ ساری بربادی دے ٹھیک وچکار ہووے گا ۔ پر حالے تیکر ، خُدا نے ایہناں وَاواں نوں پکے ہتھیں پھڑ رکھیا اے ۔
جگ دے سارے دیس اسلحہ بناؤن وچ بوہتے پیسے لاؤندے پئے نیں ۔اوہ ویلا آسکدا اے جد وڈیاں طاقتاں اپنی جی این پی دا ۳۰ فیصدتیکر وی فوجی خرچیاں اُتے لا دین گئیاں ۔ ایتھوں تیکر اجے وی ، بوہت چوکھی بربادی کرن والے نویں ، بوہت خطرناک ہتھیاراں نوں تیار کرن دی کوشش وچ ، فوجی خرچیاں لئی بوہتے پیسے لاؤن دا ارادہ بنایا جاندااے ۔ جد وی معیشت بحال ہو جاندی اے تاں ، ایہدی بوہتی رقم فوجی خرچیاں نوں ودھاؤن وچ لا دتی جاندی اے ۔
مثال طور اُتے ، امریکہ ، ہن میزائل حفاظتی نظام تیار کرن اُتے دھیان لاؤندا پیا اے جنہوں ”سٹاوار پلان“آکھیا جاندا اے ۔جد ایہہ نظام مکمل طور اُتے تیار ہو جائے گا تاں ، نا صرف دھرتی اُتے ، سگوں خلا وچ وی،جنگ ہووے گی ، اسلحیاں والے مصنوعی سیار ے فضا وچ اُڈن والے بیلسٹک میزائلاں نوں اپنے میزائلاں توں فضا توں باہر سُٹن گے ۔ ایہدے بعدوں فضائی جنگ دا اک بالکل نواں مطلب ہووے گا ۔ ایس طرح ہن ایہہ گل کیتی جاندی اے پئی اُتلے فضائی ہتھیاراں نوں بناؤن تے فوجی دے ورتن لئی فضا اُتے جان بارے پہل کیہڑا کرے گا ؟
ایس طرح دیاں پیش رفتاں نوں ویکھ کے ، اسیں ایہہ محسو س کر سکدے آں پئی جد خُدا اجازت دیوے گا ، تے جد خطرناک آفتاں دھرتی اُتے آؤن گئیاں تاں ، پیشن گوئی کیتے جان والا راجا اپنی مرضی دی طاقت نال بوہت چھیتی ظاہر ہووے گا ۔
پر ، ایہہ ساریاں شیواں اوس ویلے ای ہو سکدیاں نیں جد خُدا نے ایہناں دی اجازت دتی ۔ ایس توں ہٹ کے پئی جگ اُتے بھاویں کنے ای اوکھے ویلے آن ، ساڈا ایمان اے خُدا ساڈا ایّالی بن جادے گا ، زندگی دے پانی دے چشمیاں ول ساڈی اگوائی کرے گا ، تے ساڈیاں اکھاں دےسارے اتھرُو پونجھ دیوے گا ۔ ایس لئی مکتی پاؤن والے بوہتے برکتا ں والے نیں ۔
جد تُسیں یسوع اُتے ایمان رکھدے او تاں ، تُسیں اوہدے اُتے ایس طریقے نال ایمان نئیں رکھ سکدے ، پئی تُسیں کِیویں محسوس کردے او ، اصل ایمان اوہناں لوکاں دا ایمان اے جیہڑے خُدا دے کلام اُتے ایمان رکھدے نیں ۔
مُکاشفہ ۷ : ۱۴ سانوں دسدا اے ، ” مَیں اوہنوں آکھیا اَے میرے خُداوند تُوں ای جاندا ایں۔اوس مَینُوں آکھیا ایہہ اوہ نیں جیہڑے اوس وڈّی مُصِیبت وِچوں نِکل کے آئے ہوئے نیں ایہناں اپنے کپڑیاں نُوں لیلے دے لہو وِچ دھوکھے چٹیاں کِیتا ہویا اے۔ “ ” ایہناں اپنے کپڑیاں نُوں لیلے دے لہو وچ دھو کے چٹیاں کیتاہویا اے ۔ “ دامطلب ایہہ ہیگا اے پئی اوہ خُداوند اُتے اپنے ایمان وچ شہید ہوئے سن ۔ ایس آیت دی تشریح کرن ویلے احتیاط کرو ؛ایہہ صرف سولی دےلہو اُتے ایمان رکھ کے مکتی پاؤن ول اشارہ نئیں کردا اے ۔
سگوں جیہڑی شے تہانوں محسوس کرنی چاہی دی اے اوہ ایہہ ہیگی اے جنہاں دے دلاں وچ پاک رُوح نئیں وسدا اوہ خُدا دے پُتر نئیں ہیگے ، تےجیہڑے پانی تے رُوح دی خوشخبری اُتے ایمان نئیں رکھدے اوہو ای لوک نیں جیہڑے بالکل ای خوشخبری اُتے ایمان نئیں رکھدے ۔ صرف اوہو ای لوک جیہڑے پانی تے رُوح دی خوشخبری اُتے ایمان رکھدے نیں اوہ اپنی شہادت نوں قبول سکدے نیں ۔ دکھ جرن اُتے فتح پا سکدے نیں ، تے ایس طرح خُدا وند نوں بوہتا جلال دے سکدے نیں ۔
ایس لئی پئی اسیں خُدا اُتے بھروسہ رکھدے آں ، جد وڈیاں مشکلاں تے دکھاں داویلا آوے گا تاں ، اسیں اپنا ایمان نئیں گواواں گے ، تے نہ ای شیطان دے اگے ہتھیار سُٹاں گے ، سگوں خُدا ولوں ملن والی طاقت نال دلیری نال اپنی شہادت نوں من لواں گے ۔ ایہدے بعدوں اسیں خُدا دے راہیں جیوندے کیتےجاواں گے تے اوہدی راکھی وچ ہوواں گے ۔ لیلا ساڈا ایّالی بن جاوے گا تے ساڈیاں اکھاں دے سارے ہنجوپوہنجھ دیوے گا ، تے سانوں نا تاں بُھک لگے گی ، نا تریہہ لگے گی ،ناگرمی توں نقصان پوہنچے گا تے نا ای کسے ہور شے توں دکھی ہوواں گے ۔ کیوں ؟ ایس لئی پئی خُدا مصیبتاں نوں ہمیش لئی مکا دیوے گا ، جویں پئی اسیں پہلوں ای وڈے دکھاں وچوں لنگھ گئے ہوواں گے ۔ خُدا دا جگ جنہوں اسمان آکھیا جاندااے ایہہ بوہت حیران کرن والا اے ۔ ایس لئی پئی ایہہ بوہت ای ودھیا تھاں اے ، لوک ایہنوں فردوس یاں اسمان آکھدے نیں ، جویں ایہناں ساریاں دا لُبِ لباب چنگا اے ۔
فردوس بوہت چوکھی خوشی والی تھاں اے ۔ بُدھ مت وچ، فردوس صرف اوہناں لوکاں لئی خاص اے جیہڑے دیوتا ، بُدھا بن گئے ہون ۔ پر کیہ سچ مُچ کوئی ہیگااے جیہڑا بُدھا بن سکدا اے ، جیہڑا کوئی دیوتا بن سکدا اے ؟ بالکل نئیں ! سدھارتھا نے اپنے آپ اپنے مرن دے منجے اُتے آکھیا ، ”دیوتا بن جاوو؛صرف دیوتا بن کے ای تُسیں جگ دیاں ساریاں بربادیاں توں بچ سکدے او ۔“پر کسے لئی وی پاپ توں بچنا تے آپ اپنی ہمت نال ایس مارن والے ڈر اُتے فتح پاؤنا بوہت اوکھا اے ۔ سدھارتھا آپ وی ایہدے توں بچن وچ ناکام رہیا تے باقی سارے وی ایہدے توں نئیں بچ سکدے ۔ جویں پئی کلام سانوں دسدا اے ،”تے کسے ودجے توں نجات نئیں اےایس لئی پئی اسمانوں ہیٹھاں بندیاں نوں کوئی ہورناں دتا نئیں گیا جیہدی راہیں اسی نجات پا سکیے ۔“(اعمال ۴: ۱۲)۔سانوں مکتی صرف خُدا ، یسوع مسیح نے دتی اے جنہے سنسار تے سانوں پیدا کیتا ، ایہہ سچیائی پئی یسوع مسیح مکتی داتا اے جیہڑا سانوں ڈاہڈیاں ڈراؤنیاں آفتاں توں بچاوے گا ، ایہہ ہیگا اے جیہڑا خُدا پاک رُوح دے راہیں سانوں سکھاندا پیا اے ۔
اسمان سب توں حیران کرن والی تھاں ایں ۔ کیہ تُسیں عزت تے جلال وچ ہمیش خوش رہنا چاہندے او ؟ کیہ تُسیں بوہت چوکھی عزت پاؤنا چاہندے او تے ہمیش دی خوشی وچ رہنا چاہندے او ؟ کیہ تُسیں کامل طریقے نال تے ودھیریاں شیواں نال جیونا چاہندے او ، جتھے تہانوں کسے شے دا گھاٹا نہ ہووے ؟اوہ تھاں جتھے خُدا سانوں رہن لئی سدے گا ، ایہو جیہی ای ہووے گی ۔ ایہہ اسمان اے ۔ ایہدے وچ کوئی وی گھاٹا نئیں ہیگا ، تے نا ای کدی وی کوئی غریبی ہیگی اے ۔ تُسیں فیر کدی بیمار نئیں ہووو گے ، ناای گرمی توں ستائے جاوو گے ، تے نہ ای ہور ہنجو وگانے پین گے ۔
جد یسوع نوں سولی اُتے چاھڑیا گیا سی ، اوہنے اوس ڈاکو نوں آکھیا جیہڑا اوہدے نال سولی چڑھیا سی ، ”اج ای تُوں میرے نال فردوس وچ ہوویں گا ۔ “ ” فردوس “دا اکھر مطابق مطلب خوشی دا باغ اے ۔ ایہہ اک ایہو جیہی تھاں ایں جتھے ہر کوئی خوشی تے شادمانی نال راضی رہ سکدا اے ۔ جیہڑی شے سانوں ایس دھرتی اُتے خوشی تے شادمانی دیندی اے ایہہ تھاں اوس ہرشے نال بھری ہوئی ہووے گی ، جتھے خُدا سانوں رہن لئی سدے گا ۔ ایہدے اُتے ایمان رکھو تے آسمان نوں ، ایس فردوس نوں تے خُدا دی بادشاہی نوں اپنا بناوو۔خُدا دی بادشاہی کامل تے چنگی اے ، ایس لئی پئی ایس دھرتی دیا ں بادشاہیاں وانگر کوئی وی ادھوری شے اوہدے وچ نئیں ۔
ایس لئی پئی خُدا قادرِ مطلق اے ، ایس لئی اوہ سانوں ایہہ بادشاہی دیوے گا ۔ایس لئی پئی ساڈا خُداوند قادر ِمطلق خُدا اے ، اوہ اپنے لوکاں نوں مکتی دیوے گا تے اوہناں دیاں اکھاں دے سارے ہنجوآں نوں پوہنجھ دیوے گا ، تے نا ای اوہ فیر کدی کسے دکھ وچ پھسن گے ۔ اوہ سانوں زندگی دے پانی دے چشمیاں ول لے جاوےگا ۔ اوہ ساڈی ہمیش دی زندگی ، ہمیش دی خوشی تے ہمیش دی شادمانی وچ رہن دی اگوائی کرے گا ۔ میرا ایمان اے ، ایہہ ساریاں شیواں سوکھیاں نیں ، ایس لئی پئی اوہدی قدرت قادر ِمطلق اے ۔
جے خُدا جنہے سانوں بچایا اے بے وس سی تاں ، اسیں وی بے وس ہوندے ۔ پر خُدا جنہے سانوں
مکتی دتی اے اوہ بالکل قادر ِمطلق طاقت رکھدا اے ۔ اوہنے سانوں اپنی مرضی دی طاقت نال بے پاپ بنا دتا اے، تے ایس طرح اسیں اوہدے پاک لوک اکھواندے آں ۔
ایہدے توں کوئی فرق نئیں پیندا پئی اسیں ایس دھرتی اُتے کس طرح دی زندگی بسرکردے پئے آں ۔ ایس لئی پئی اسیں خُدا دے پُتر آں تے بادشاہواں دے بادشاہ دی طاقت رکھدے آں ، ایتھوں تیکر پئی بھاویں ساڈیاں زندگیاں اوہناں لوکاں توں بھیڑیاں نیں جیہڑے حالے تیکر نویں سریوں نئیں جمے ، پر جد پیلے گھوڑے دازمانہ آوے گا تے خُداوند واپس آجاوے گا ، اوہ لازمی سانوں اُتے بلاوے گا تے اپنے فردوس وچ رہن دے اجازت دیوے گا ۔سانوں کسے شے دا گھاٹا نئیں ہووے گا تے ساری طاقت نال راج کراں گے ، ایتھوں تیکر پئی فرشتے وی ساڈے نوکر ہون گے ۔ پاک لوک سدا اُچے رُتبے تے شان نال رہن گے۔
پاک لوک کدی وی ہمیش لئی نئیں مرن گے ۔ ایہہ اوہ اے جیہدی سارے دین تمنا رکھدے نیں —ہمیش لئی جیون ، راج کرن تے اسمان وچ جان دی تمنا ۔ ایہہ برکت صرف میرے لئی ای نئیں ہیگی ،سگوں خُدا نے تہانوں وی اوہو ای برکت دتی اے۔
جد ویلاآوے گا تاں ،میرا ایمان اے ، خُدا دکھ جرن دی وَا وگائے گا تے جد دکھ جرن دی ایہہ وَا وگے گی تاں ، اوہ سانوں شیطان دے خلاف کھلون لئی تگڑا بناوے گا تے اخیریں سانوں دُور لے جاوے گا ۔ تے میرا ایہہ وی ایمان ہیگا اے پئی اوہ سانوں ہمیش لئی خوشی وچ رہن دیوے گا ۔
کیہ خُدا نے ایہناں ساریاں شیواں دا وعدہ نئیں کیتا ؟ لازمی اوہنے کیتا اے ! اوہنے سانوں دسیا اے ، ”تہاڈا دل نا گھبرائے ۔تُسی خُدا اُتے یقین کردے ہو میرے اُتے وی یقین کرو ۔میرے باپ دے گھر وچ بتھیرےمکان نیں جے ناں ہوندے تے میَں تُہانوں آکھ دیندا کیوں جو میَں تُہاڈے لئی تھاں تیار کرن جاناں آں ۔تے جے میَں جا کے تُہاڈے لئی تھاں تیار کراں میَں مُڑ آ کے تُہانوں اپنے نال لے لاں گا پئی جتھے میَں آں تُسی وی ہوؤ۔ “(یوحنا ۱۴:۱-۳)۔ایہہ ہیگا اے جیہدا ساڈے خُداوند نے ساڈے نال وعدہ کیتا اے ۔ مُکاشفہ ۲۰توں۲۲ باباں وچ خُدا دا سارا کلام ساڈے لئی اوہدے وعدیاں دا کلام اے ۔
ہیلیلویاہ! مَیں سچےدل نال خُدا دا شکر ادا کردا ہاں۔
Copyright © 2021 by The New Life Mission