کورونا وائرس اور بین الاقوامی ڈاک سروس میں رکاوٹ کی وجہ سے ، ہم نے اپنی ’مُفت چھپی ہوئی کتاب کی سروس‘ کو عارضی طور پر معطّل کردیا ہے۔
اِس صورتحال کی روشنی میں ہم اِس وقت آپ کو کتابیں بھیجنے کے قابل نہیں ہیں۔
دُعا ہے کہ یہ وبائی بیماری جلد ہی ختم ہوجائے اور ڈاک سروس بحال ہو جائے۔
دُعا ہے کہ یہ وبائی بیماری جلد ہی ختم ہوجائے اور ڈاک سروس بحال ہو جائے۔
مضمون 10: مُکاشفہ(مُکاشفہ دی کتاب اُتے تفسیر)
[2-8باب] تھواتِیرہ دی کلِیسیا دے ناں خط (مُکاشفہ ۲:۱۸- ۲۹)
)مُکاشفہ ۲:۱۸- ۲۹(
”تے تھواتِیرہ دی کلِیسیا دے فرِشتے نُوں ایہہ لِکھ پئی۔ خُدا دا پُتر جِہدِیاں اَکھّیاں اَگ دی لاٹ وانگر تے پَیر خالص پِتّل وانگر نیں ایہہ آکھدا اے پئی۔مَیں تیرے کمّاں تے مُحبّت تے اِیمان تے خِدمت تے صبر نُوں تے جاننا آں۔ تے ایہہ وی پئی تیرے پِچّھلے کمّ پہلے کمّاں نالوں وَدّھ نیں۔پر مَینُوں تیرے اُتّے ایہہ شکایت اے۔ پئی تُوں اوس عورت اِیزبِل نُوں رہن دِتّا اے۔ جیہڑی اپنے آپ نُوں نَبِیہ آکھدی اے۔ تے میرے بندیاں نُوں حرامکاری کرن تے بُتاں دِیاں قُربانِیاں کھان دی تعلِیم دے کے بد راہ کر دی اے۔تے مَیں اوہنوں تَوبہ کرن دی مُہلت دِتّی پر اوہ اپنی حرامکاری توں تَوبہ نئیں کرنا چاہندی۔ویکھ مَیں اوہنوں مَنجی اُتّے سُٹّناں آں۔ تے جیہڑے اوہدے نال زنا کر دے نیں جے اوہدے جِہے کمّاں توں تَوبہ نا کرن۔ تے اوہناں نُوں بڑی مُصِیبت وِچ سُٹّناں آں۔تے اوہدے پُتراں نُوں جانوں ماراں گا۔ تے سارِیاں کلِیسیاواں نُوں پتا لگّے گا۔ پئی گُردیاں تے دِلاں دا جانن والا مَیں آں۔ تے مَیں تُہاڈے وِچوں ہر اِک نُوں اوہدیاں کمّاں دے سببّوں بدلہ دیاں گا۔پر تُہانوں تھواتِیرہ دے لوکاں نُوں جیہڑے اوس تعلِیم نُوں نئیں مَن دے تے اوہناں گلّاں توں جِنہاں نُوں لوک شیطان دِیاں ڈونگھیاں گلّاں آکھدے نیں ناواقِف ہو۔ ایہہ آکھنا آں۔ پئی تُہاڈے اُتّے ہور بھار نا پاواں گا۔بے شک جو کُجھ تُہاڈے کول اے۔ میرے آؤن تِیکر گُھٹ کے پَھڑی رکھو۔جیہڑا جتے تے جیہڑا میرے کمّاں دے سببّوں اخِیر تِیکر عمل کرے مَیں اوہنوں قوماں اُتّے اختیار دیاں گا۔تے اوہ لوہے دے ڈنڈے نال اوہناں اُتّے حکُومت کرے گا۔ جیویں گھمیار دے بھانڈے ٹُٹ پُھٹ جاندے نیں۔ ایسے طرح مَیں وی اجیہا اختیار اپنے باپ کولوں لیا اے۔تے مَیں اوہنوں سویر دا تارا دیاں گا۔جِہدے کنّ ہَین اوہ سُنے پئی رُوح کلِیسیاواں نُوں کِیہ آکھدا اے۔“
تشریح
آیت۱۸:”تے تھواتِیرہ دی کلِیسیا دے فرِشتے نُوں ایہہ لِکھ پئی۔ خُدا دا پُتر جِہدِیاں اَکھّیاں اَگ دی لاٹ وانگر تے پَیر خالص پِتّل وانگر نیں ایہہ آکھدا اے پئی۔“
تھواتِیر ہ دی کلِیسیا دی بھیڑی کرتوت ایِزبل دیاں تعلیماں نوں کلیسیاوچ آؤن دی اجازت دیندی پئی سی ۔ اخی اب دی زنانی، اِیزبل ، بنی اسرائیل وچ بُت پرستی لیا ئی تے ایہدے لوکاں نوں بھیڑے کم کرن تے بُتاں دیاں قربانیاں کھان لئی پُٹھے پاسے لایا۔ یسوع دیاں ” اَکھّیاں اَگ دی لاٹ وانگر “ہون دی وضاحت توں ، خُدا خبردار کردا پیا اے پئی اوہ اوہدی کلیسیا وچ غلط ایمان رکھن والیاں نوں جھڑکے گا تے اوہناں نوں سزا دیوے گا ۔
آیت۱۹:”مَیں تیرے کمّاں تے مُحبّت تے اِیمان تے خِدمت تے صبر نُوں تے جاننا آں۔ تے ایہہ وی پئی تیرے پِچّھلے کمّ پہلے کمّاں نالوں وَدّھ نیں۔“
پر ایہدے نال ای ، خُدا نے اپنی تھواتِیر ہ دی کلِیسیادے خادماں تے اوہدے پاک لوکاں نوں آکھیا پئی اوہناں دے کم ہُن پہلوں توں چنگے سن ۔
آیت۲۰:”پر مَینُوں تیرے اُتّے ایہہ شکایت اے۔ پئی تُوں اوس عورت اِیزبِل نُوں رہن دِتّا اے۔ جیہڑی اپنے آپ نُوں نَبِیہ آکھدی اے۔ تے میرے بندیاں نُوں حرامکاری کرن تے بُتاں دِیاں قُربانِیاں کھان دی تعلِیم دے کے بد راہ کر دی اے۔“
تھواتِیر ہ دی کلِیسیادا مسئلہ ایہہ سی پئی ایہنے جھوٹی نبِّیہ دیاں تعلیماں نوں قبول کیتا ۔ اک گندی زنانی ، اِیزبل وانگرجھوٹی نبِّیہ نوں کلیسیا وچ آؤن دی اجازت دے کے تےاوہدیاں تعلیماں پچھے چل کے ، ایہدے پاک لوکاں دے دل اخیریں اپنیاں بدنی آساں نوں لبھن وچ پے گئے ۔ جیہدے نتیجے وچ ، خُدا دا غصے بھریا قہر اوہناں اُتے ڈوہلیاجانا سی ۔
خُدا دی اصل کلیسیا اوہناں لوکاں نوں جیہڑے پانی تے رُوح دی خوشخبری اُتے ایمان نئیں رکھدے پاک لوک آکھ کے نئیں بلاؤندی ۔ تے ناای ایہہ اوہناں لوکاں نوں جیہڑے اپنے دلاں وچ پاک رُوح نئیں رکھدے کلیسیائی قیادت دے عہدے دیندی اے ۔ ایس لئی پئی جیہڑے پاک رُوح دے اڈ خُدا دی بجائے اپنے بدن تے جگ نوں لبھدے نیں ، خُدا دی اصل کلیسیا وچ ایہناں نوں کدی وی اجازت نئیں دتی جاسکدی تے جریا نئیں جا سکدا اے۔
آیت ۲۱:”تے مَیں اوہنوں تَوبہ کرن دی مُہلت دِتّی پر اوہ اپنی حرامکاری توں تَوبہ نئیں کرنا چاہندی۔“
ایہہ آیت سانوں دسدی اے پئی اوہ جیہڑے بدنی نیں جنہاں نوں پاک رُوح نئیں ملیا اے اوہ پاک رُوح دی اواز نوں پچھان تے سُن نئیں سکدے ۔ ایس لئی جھوٹی نبِّیہ اپنی بدکاری توں توبہ نئیں کرسکی ۔ جیہدے نتیجے وچ ، اوہ پاک رُوح دی تلوار نال ماری گئی تے بدن تے رُوح دونواں وچ برباد ہوگئی ۔
خُدا دی سچی کلیسیا وچ ، صرف اوہو ای لوک جیہڑے پانی تے رُوح دی خوشخبری اُتے ایمان رکھدے نیں خُدا دے خادماں وانگر قائم رہ سکدے نیں ۔ اوہ جیہڑے پانی تے رُوح دی خوشخبری اُتے ایمان نئیں رکھدے ، ایس توں ہٹ کے پئی اوہ ایس جگ وچ کنے ای ودھیا پادری وانگر ہون ، اوہ وفادار آگُو نئیں بن سکدے جیہڑے خُدا دے پُتراں دی اوس تیک اگوائی کر سکن ۔ ایس لئی سانوں جھوٹے نبیاں دی پچھان کرنی چاہی دی اے تے اوہناں نوں اپنیاں کلیسیاواں توں باہر کڈھنا چاہی دا اے ۔ صرف اِنج کر کے ای خُدا دی کلیسیا شیطان دیاں ساریاں چالاں توں بچ سکدی اے تے رُوحانی طریقے نال اوہدے پچھے چل سکدی اے ۔
آیت۲۲:”ویکھ مَیں اوہنوں مَنجی اُتّے سُٹّناں آں۔ تے جیہڑے اوہدے نال زنا کر دے نیں جے اوہدے جِہے کمّاں توں تَوبہ نا کرن۔ تے اوہناں نُوں بڑی مُصِیبت وِچ سُٹّناں آں۔“
ایہہ عبارت سانوں دسدی اے پئی جے خُدا دا کوئی خادم جھوٹیاں دی پچھان تے اوہناں نوں بے پردہ نئیں کردا تاں ، خُدا اپنے آپ اوہناں لوکاں نوں لبھے گا جیہڑے رُوحانی بدکاری کردے نیں تے اوہناں نوں وڈے دُکھاں وچ سُٹے گا ۔ خُدا دے پاک لوکاں تے خادماں نوں ایہہ سمجھنا چاہی دا اے پئی خُدا آپ اپنیاں کلیسیاواں نوں پاک رکھدا اے تے ٹھیک راہ تیک اوہناں دی اگوائی کردا اے ۔
خُدا دی اصل کلیسیا وچ جھوٹے نبیاں دی کوئی تھاں نئیں ہوندی ۔ جے جھوٹے نبی ہوندے نیں
تاں خُدا آپ اوہناں نوں لبھدا تے اوہناں نوں سزادیندا اے ۔ جد ایہناں جھوٹے نبیاں دے را ہیں خُدا دی کلیسیا وچ وگاڑ پیندا اے تاں ، خُدا لازمی طور اُتے اوہناں نوں وڈے دُکھاں دی سزا دیوے گا ۔
آیت ۲۳:”تے اوہدے پُتراں نُوں جانوں ماراں گا۔ تے سارِیاں کلِیسیاواں نُوں پتا لگّے گا۔ پئی گُردیاں تے دِلاں دا جانن والا مَیں آں۔ تے مَیں تُہاڈے وِچوں ہر اِک نُوں اوہدیاں کمّاں دے سببّوں بدلہ دیاں گا۔“
خُدا اپنی کلیسیا وچوں جھوٹے نبیاں نوں باہر کڈھ دیندا اے ، تاں پئی ساریاں نوں پتہ لگے پئی اوہ اپنی کلیسیا دی راکھی کردا اے ۔ پاک لوکاں نوں پتہ لگ جاوے گا پئی خُد ا اوہناں دی کلیسیا دی ویکھ بھال کردااے ، تے اوہ اوہناں دے چنگیاں کماں دا پھل دیندا اے ۔
آیت۲۴:”پر تُہانوں تھواتِیرہ دے لوکاں نُوں جیہڑے اوس تعلِیم نُوں نئیں مَن دے تے اوہناں گلّاں توں جِنہاں نُوں لوک شیطان دِیاں ڈونگھیاں گلّاں آکھدے نیں ناواقِف ہو۔ ایہہ آکھنا آں۔ پئی تُہاڈے اُتّے ہور بھار نا پاواں گا۔“
ایہدا مطلب ایہہ ہیگا اے پئی جیہڑے لوک اوہدی پانی تے رُوح دی خوشخبری اُتے ایمان رکھ کے خُدا دے پاک لوک بن گئے نیں اوہناں نوں جگ دے اخیر تیک اپنے ایمان اُتے قائم رہنا چاہی دا اے ۔ جیہڑے لوک ایس خوشخبری اُتے ایمان رکھدے نیں اوہناں کول خُدا دی کلیسیا تے پاک لوکاں نال اپنے دلاں نوں اکٹھیاں رکھن تے اخیر تیک اپنے ایمان دی راکھی کر کے اپنی زندگی بسر کرن توں سوا ہور کوئی راہ نئیں ہیگا ۔ خُدا دی اصل کلیسیا نوں ناصرف پانی تے رُوح دی خوشخبری دی ہمیشہ منادی کرنی چاہی دی اے ، سگوں ایہنوں جھوٹیاں نوں وی ایس خوشخبری اُتے ایمان نال بے پردہ کرنا چاہی دا اے ۔
آیت ۲۵:”بے شک جو کُجھ تُہاڈے کول اے۔ میرے آؤن تِیکر گُھٹ کے پَھڑی رکھو۔“
پاک لوکاں نوں پانی تے رُوح دی خوشخبری اُتے کدی وی اپنا ایمان نئیں گوانا چاہی دا تے ساڈے خُداوند دی واپسی دے دیہاڑے تیک ایہدے اُتے قائم رہنا چاہی دا اے ۔ایہناں دی پانی تے رُوح دی خوشخبری وچ بوہت طاقت تے راج ہیگا اے جیہڑا شیطان اُتے فتح پاؤن لئی بوہت چوکھا اے ۔ پاک لوک ایس ایمان نال خُدا نوں خوش کر سکدے نیں ۔ جے پاک لوک پانی تے رُوح دی خوشخبری اُتے اپنے ایمان نال زندہ رہندے نیں تے خُدا دی سچی کلیسیا وچ رہندے نیں تاں ، اوہ اخیری دناں وچ وی جِت سکدے نیں تے فتح پا سکدے نیں ۔
آیت ۲۶:”جیہڑا جتے تے جیہڑا میرے کمّاں دے سببّوں اخِیر تِیکر عمل کرے مَیں اوہنوں قوماں اُتّے اختیار دیاں گا۔“
پاک لوک پانی تے رُوح دی خوشخبری جیہڑی خُدا نے اوہناں نوں دتی اے ،اُتے ایمان رکھن دے راہیں اپنے سارے ویریاں اُتے فتح پا سکدے نیں ۔ ایمان دی ایہہ لڑائی اک ایہو جیہی لڑائی اے جیہڑی ہمیشہ سانوں فتح دیندی اے ۔ سارے پاک لوک ایس طرح مخالفِ مسیح دے خلاف لڑن گے تے اخیری دناں وچ شہید ہو جان گے ، تے ایہدے نتیجے وچ ، اوہناں نوں خُداوند نال راج کرن دا اختیار دتا جاوے گا ۔
آیت ۲۷:”تے اوہ لوہے دے ڈنڈے نال اوہناں اُتّے حکُومت کرے گا۔ جیویں گھمیار دے بھانڈے ٹُٹ پُھٹ جاندے نیں۔ ایسے طرح مَیں وی اجیہا اختیار اپنے باپ کولوں لیا اے۔“
خُداوند شہید ہون والے پاک لوکاں نوں اپنی بادشاہی دا اختیار دیوے گا ۔جیہڑے لوک ایس طرح فتح پاؤندے نیں اوہ اک طاقت نال راج کرن گے جیہڑا ، جویں پئی حوالہ دسدا اے ، لوہے دے ڈنڈے وانگر پکا اے جیہڑا گھمیار دے بھانڈیاں نوں ٹوٹے ٹوٹے کر سکدا اے ۔
آیت ۲۸:”تے مَیں اوہنوں سویر دا تارا دیاں گا۔“
پانی تے رُوح دی خوشخبری اُتے ایمان رکھ کے ویریاں دے خلاف لڑن والیاں نوں خُدا دے کلام دی سچیائی دی سمجھ پاؤن دی برکت ملے گی ۔
آیت ۲۹:”جِہدے کنّ ہَین اوہ سُنے پئی رُوح کلِیسیاواں نُوں کِیہ آکھدا اے۔“
خُدا دی کلیسیا دے راہیں سارے پاک لوک پاک رُوح دی اواز سُن سکدے نیں ، ایس لئی پئی رُوح خُدا دے خادماں دے راہیں سارے پاک لوکاں نال گل کردا اے ۔ پاک لوکاں نوں خُدا دی کلیسیا دےراہیں سُنن والیاں گلاں نوں خُدا دی اواز وانگر پچھاننا چاہی دااے۔
Copyright © 2021 by The New Life Mission